Yohana 4
4
1Aho Guku wamanikaja ati Vafarisayo vigagwa kitisi Yesu alivagada vahemba vingi na alivoja vingi kukila 2Yohana (nulu Yesu akogizye mwenekili, sumbwa 3vahemba vakwe), haho wakufumaga ku Uyahudi na wajaga hangi ku Galilaya. 4Alisi yamudimaga kuvita mu Samaria. 5Haho wafikaga ku kaya yimo ya Samaria, lina lyayo Sikari, bihi na kiwanja chenicho Yakobo wamupaga mwana wakwe Yosefu. 6Na henaho lwinzi lwamwa Yakobo lwavagiho. 7Na Yesu, aho wazovaga na lugendo, wikalaga ha lwinzi, na yavagi kitisi saa sita. Na mukima Musamaria wizaga kudaha minzi. 8Na Yesu wamuwilaga, Umpe minzi nanwe; kwisi vahemba vakwe vajaga mu kaya vakagule chakulya. 9Mukima Musamaria wamuwilaga, Kungunoki veve Muyahudi ulilomba minzi ga kunwa hawane, nene mukima Musamaria? kwisi Vayahudi vakavile na lusangi na Vasamaria. 10Yesu witavukaga, umuwila, Ulu mbe wakimanikaja kipanwa cha Mulungu na uyu ali nani alikuwila, Umpe minzi nanwe, mbe veve wamulombaga, nawe mbe wakupaga minzi ga vuzuvuku. 11Mukima wamuwilaga, Guku, ukavile na kiseme cha kudahila na lwinzi lusihu, kuhe uli nago minzi ga vuzuvuku? 12Veve uli muhanya kukila nsiswe Yakobo homwene watupaga lwinzi lwenulu na mwenekili wanwaga kulo na vana vakwe na mitugo zyakwe? 13Yesu witavukaga, umuwila, Homwene alinwa ku minzi 14genaya akukolwa nota hangi; alisi homwene akunwa ku minzi genayo nene nkumupa, mwenuyu kukolwa ngʼo nota hangi kusika hanahana, sumbwa minzi hogene nkumupa gakuvi muwakwe kasela ka minzi hogene galisela kusika ha vuzuvuku wa hanahana. 15Mukima wamuwilaga, Guku, umpe minzi genaya ndeke kukolwa nota ninga kwiza hangi henaha kudaha. 16Yesu wamuwilaga, Jaga, ukamwitane mugosi wako na usyoke. Mukima witavukaga, uhaya, Nkavile na mugosi. 17Yesu wamuwilaga, Veve wayombaga sisoga, 18Nkavile na mugosi; kwisi wavagi na vagosi vatano, na uyu uli nawe kitale mugosi wako; henaha wayombaga yalole. 19Mukima wamuwilaga, Guku, ndivona ati uli mufumbuzi. 20Vahenga viswe vamwisengage Mulungu ku lugulu lwenulu, na inwe muliyomba ati mu Yerusalema henaho yatudima kwisenga. 21Yesu wamuwilaga, Mukima, usanizye ati itungo liliza aho mukumwisenga Vava, ngʼo ku lugulu lwenulu ninga ngʼo mu Yerusalema. 22Inwe muligisenga genayo mukagamanikizye; iswe tuligisenga genayo tuligamanicha, kwisi vupizya vulifuma ku Vayahudi. 23Alisi itungo liliza, ahene liliho lelo, aho avo valiwisenga loleyene vakumwisenga Vava mugati na Roho na hanayene, kwisi Vava alivakova visengi va mutindo ugo. 24Mulungu ali Roho, na venavo valimwisenga vamwisenge mu Roho na hanayene. 25Mukima wamuwilaga, Ndimanicha ati Mesiya aliza, homwene alitanwa Kristo; ulu mwenuyu wamalaga kwiza akutupozezya gose genaya. 26Yesu wamuwilaga, Nene ndi mwenuyu homwene aliyomba naʼho.
Na itungo lyenili vahemba vakwe vizaga na. 27vakumaja kunguno wavagi aliyomba na mukima; alisi kuduhu umo wayombaga, Ulikovaki? ninga, Kuki 28uliyomba nawe? Haho mukima wagulekaga muzoga gwakwe na wingilaga mu kaya na alivawila vanhu, 29Nzugi, mumulole munhu homwene wambwilaga gose 30genayo nene nitaga, imba ali Kristo. Na avo vafumaga mu kaya na vizaga kuwakwe. 31Alisi henaho hambele vahemba vamulombaga, vuhaya, Rabi, ulye! 32Nawe wavawilaga, Ndi nacho chakulya hochene mukakimanikizye. 33Na vahemba vakwe vayombaga hamohene, 34Imba nani wamuletelaga chakulya? Yesu wavawilaga, Cheniki kili chakulya chane nakimazye kikowa na mwenuyu wantumizaja na nayimalizye milimo yakwe. 35Mukavile kuyomba, Yasigalaga myezi inne, haho kuliza kwimbula? Lolagi, ndimuwila inwe, musanukage minso ginwe na muyilolele migunda ati yavile tayari ya pe mu kwimbulwa. 36Mwimbuzi aligwanukula musyahala na alikuminga fisumo ku vuzuvuku wa hanahana, kigele vose vadehe hamohene, muvivi na mwimbuzi. 37Kwisi mwenumo muhayo guli 38gwa lole ati, Umo aliviva na ungi aliwimbula. Nene namutumizaja inwe kwimbula henaho mukatumamile milimo; vangi vatumamaga, ninwe mwingilaga mu milimo yavo.
39Alisi Vasamaria vingi va mukaya yeniyo vamusanizaja kunguno ya muhayo gwa mukima homwene wasangilagwa, Mwenuyu wambwilaga gose genayo nitaga. 40Na aho Vasamaria vizaga kuwakwe vamulombaga ikale hawavo, nawe wadilagako nsiku ivili. 41Na vangi vingi vasanizaja lelo muno kunguno ya mihayo yakwe, 42na vamuwilaga mukima, Tukavile kusanizya hangi kunguno ya mihayo yako, kwisi iswe venekili twigagwa na tulimanicha ati mwenuyu loleyene ali Mupizya wa liwelelo.
43Hanuma na nsiku zyenizi ivili wakufumagako na wajaga ku Galilaya. 44Kwisi Yesu mwenekili wasangilagwa ati, mufumbuzi akavile nʼisima mu kaya yakwe mwenekili. 45Na aho wafikaga ku Galilaya, Vagalilaya vamwanukulaga kunguno vagavonaga gose genayo witaga mu Yerusalema ha sikukulu, kwisi navo vene vasikaga ku sikukulu. 46Haho wizaga hangi mu Kana mu Galilaya uko wagapilulile minzi kuvi mvinyo.
Alisi wavagimo munikulu muhanya mu Kapernaumu, mwana wakwe wavagi musatu. 47Aho mwenuyu wigagwa ati Yesu wafumaga ku Uyahudi na wizaga mu Galilaya, wajaga kuwakwe na wamulombaga ike na amupizye mwana wakwe, kwisi wavagi bihi na kufwa. 48Haho Yesu wamuwilaga, Ulu inwe mukagawine malumeho na migaka mukavile kusanizya. 49Munikulu alimuwila, Guku, ikaga aho mwana wane atali kufwa. 50Yesu wamuwilaga, Jaga, mwana wako alizuvuka. Na munhu uyu wagusanizaja muhayo gwenugo Yesu wamuwilaga na wajaga. 51Aho atali aliwika, vakumba vakwe vasangaja nawe na vamupozezaja ati mwana wakwe alizuvuka. 52Nawe wavavuzaja itungo ki wavukizaja kupila. 53Navo vamuwilaga, Igolo saa saba homa yamulekulaga. Haho ise wamanikaja ati lyavagi hitungo lyenilo Yesu wamuwilaga, Mwana wako alizuvuka. 54Na gwenugo gwavagi mugaka gwa vuvili hogwene Yesu wavezaja, aho wafumaga ku Uyahudi kuja ku Galilaya.
Արդեն Ընտրված.
Yohana 4: Nym51
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nyamwezi New Testament © Bible Society of Tanzania, 1951.