Mataayi 4
4
ɄYesu ighelua nʉ Setano
(Malɨka 1:12-13; Lʉʉka 4:1-13)
1Pepano ʉYesu akalongosivua nʉ Mhepo ʉMwɨmɨke kulʉta kʉ lɨhaka, kuuti aghelue nʉ Setano. 2Ʉkuo ʉYesu akavʉhɨɨla kulia mʉlwa kufuunya#4:2 Akavʉhɨɨla kulia mʉlwa kufuunya: Ɨmba ɨlɨsio Kuvʉhɨɨla kulia mʉlwa kufuunya kʉ Vʉghanʉle vwa Masio aMahesia. ifighono fijigho fine pakɨlo na pamwisi. Pambele jɨkamʼbava ɨnjala. 3Pe ʉSetano akamwisila kʉkʉmʉghela akati, “Nave ʉve ʉlɨ Mwana ghwa Ngʉlʉve, ghavʉʉle amavue agha ghahambʉke ghaave makate.” 4ɄYesu akamʉla akati, “Lɨlembilue mʉ Malembe aMɨmɨke kuuti, ‘Ɨkyakʉlia kyene nakɨkʉmʼbɨɨka ʉmuunhu kuuva mwʉmi, looli iiva mwʉmi vwɨmɨla amasio ghooni ghano ijova ʉNgʉlʉve.’ ”#Similisio sa Ndaghɨlo 8:3
5Pe ʉSetano akantwala ʉYesu mʉ lɨkaaja ɨlyɨmɨke ɨlya Yelusalemu. Akamʼbɨɨka pakyanya fiijo apa nyumba ɨnyɨmɨke ɨja kufunyila,#4:5 Nyumba ɨnyɨmɨke ɨja kufunyila, jɨlyajengilue kʉ Yelusalemu. Ɨjɨ jɨlyale je nyumba ɨmbaha ɨja kufunyila aVayahudi vooni. Ɨmba kʉ Vʉghanʉle vwa Masio aMahesia. 6akamʼbʉʉla akati, “Nave ʉve ʉlɨ Mwana ghwa Ngʉlʉve, ghujughuje paasi, ʉlwakʉva mʉ Malembe aMɨmɨke lɨlembilue ndɨɨkɨ,
‘ɄNgʉlʉve isuungʼha avanyamhola vaake,
vikʉkwangʼa mʉ mavoko ghaave
kuuti ʉleke pighua pa lɨvue na kulemala.’ ”#Sabuli 91:11-12
7ɄYesu akamwamʉla kange akati, “Mʉ Malembe aMɨmɨke lɨlembilue kuuti, ‘Nʉngamʉghelaghe ʉMʉtwa, ʉNgʉlʉve ghwako.’ ”#Similisio sa Ndaghɨlo 6:16
8Kange, ʉSetano akantwala ʉYesu pakyanya pa kɨdunda ɨkɨtali, pe akansoona ɨɨsi sooni palɨkɨmo nʉ vʉvaha vwake, 9akamʼbʉʉla akati, “Nave ghufughama na kʉkʉnyɨmɨka ʉne, nɨkʉkʉpeela ifi fyoni.” 10Pepano ʉYesu akati, “Vʉʉka apa Setano! Ʉlwakʉva mʉ Malembe aMɨmɨke lɨlembilue ndɨɨkɨ, ‘Ʉmwɨmɨkaghe ʉMʉtwa ʉNgʉlʉve ghwako, kange ʉmʼbombelaghe jʉjuo mwene.’#Similisio sa Ndaghɨlo 6:13 ”
11Pepano ʉSetano akamʉleka ʉYesu. Nakalɨngi, avanyamhola va Ngʉlʉve vakiisa, vakantengelela.
ɄYesu itengʉla ɨmbombo kʉ Galilaya
(Malɨka 1:14-15; Lʉʉka 4:14-15)
12Ʉnsiki ghʉla ʉYohani ʉMwofughi alyadindilue mʉ ndinde. ɄYesu ye apʉliike ɨmhola ɨjio, akalʉta kʉ Galilaya. 13Ʉkuo, akavʉʉka mʉ kɨkaaja ɨkya Nasaleti akalʉta kukukala mʉ lɨkaaja ɨlya Kapelenaumu. Ɨlɨkaaja ɨlio lɨlyale mʉlʉbale mʉ lɨsʉmbe ɨlya Galilaya, imbale isa ɨɨsi ɨja Sabuloni nɨ ja Nafutali. 14Ʉluo lʉlyavombiike kukwɨlanɨsia ɨlɨsio lɨno ʉMʉtwa alyajovile kukilila ʉmʼbɨli ghwake ʉYesaya kuuti,
15“Ɨɨsi ɨja Sabuloni nɨ ja Nafutali,
mʉ sɨla jɨno jilʉta kʉ lɨsʉmbe,
ɨmwambo ja kɨkogha ɨkya Yolidani,
ɨɨsi ɨja Galilaya, kwe kʉno vikukala
avaanhu vano naVayahudi.
16Avaanhu vala vano vikukala mʉ ngʼhiisi,#4:16 Vikukala mʉ ngʼhiisi, kwekʉti avaanhu vano navankagwile ʉNgʉlʉve.
valwaghile ʉlʉmuli ʉlʉvaha;
voope vano vikukala mʉ ngʼhiisi ɨja vʉfue,
ʉlʉmuli lʉvamuliike.”#Yesaya 9:1-2
17Kuhʉma ʉnsiki ghʉla, ʉYesu akatengʉla kupʉlɨsia iiti, “Mʉlataghe inyɨvi siinu, ʉlwakʉva ʉVʉtwa vwa kʉkyanya vʉlɨ piipi.”
ɄYesu ɨkʉvakemeela avavʉlanɨsɨvua avatasi
(Malɨka 1:16-20; Lʉʉka 5:1-11)
18ɄYesu ye ighenda mʉlʉbale mʉ lɨsʉmbe ɨlya Galilaya, akavaagha avaanhu vavɨlɨ vanamuunhu, jʉmonga ghwe Simoni jʉno ɨlɨtavua ɨlɨngɨ akatambʉlwagha Peteli, ʉjʉnge ghwe Ndeleeya. Avaanhu ava valyale valovi, vakava ni nyaafu vilova isamaki mʉ lɨsʉmbe. 19ɄYesu akavavʉʉla akati, “Mʉmbɨngɨlɨlaghe! Ʉne nɨkʉvavɨɨka kuuva valovi va vaanhu.”#4:19 Valovi va vaanhu, kwekʉti kʉkʉvaleeta avaanhu kwa Ngʉlʉve kuhʉma mʉ nyɨvi saave. 20Ʉnsiki ghʉghuo vakasileka inyaafu saave, vakamʼbɨngɨlɨla.
21ɄYesu akalʉta pavʉlongolo padebe, akavaagha avanamuunhu vavɨlɨ, ʉYakovo nʉ Yohani avakina Sebedaayi. Avuo, valyale mʉ ngalava palɨkɨmo nʉ viise ʉSebedaayi, vakava vilɨngʼhania inyaafu saave, voope akavakemeela. 22Pala pala avanamuunhu vala vakamʉleka ʉviise nɨ ngalava, vakamʼbɨngɨlɨla ʉYesu.
ɄYesu ivʉlanɨsia avaanhu na kusosia avatamu
(Lʉʉka 6:17-19)
23ɄYesu akava ighenda mʉ kɨghavo kyoni ɨkya Galilaya. Akava ikwingila mʉ masinagogi ghaave,#4:23 Masinagogi ghaave: Ɨmba ɨlɨsio Sinagogi kʉ Vʉghanʉle vwa Masio aMahesia. ivʉlanɨsia na kupʉlɨsia ɨMhola ɨNofu ɨja Vʉtwa vwa Ngʉlʉve, kange akavasosyagha avatamu inhamu saave sooni. 24Imhola saake sikakwɨla fiijo kuhanga kufika mʉ kɨghavo kyoni ɨkya Silia. Avaanhu pe vakavatwalagha avatamu vooni vano valyale ni nhamu sino silyale papinga. Mʉ avuo, mwevalyale vano valyale na mapepo amalamafu, na vanya kɨvafi na vanya lɨteela. ɄYesu akavasosyagha avuo vooni. 25Amapʉgha gha vaanhu kuhʉma kʉ Galilaya, kʉ Dekapoli,#4:25 Dekapoli, kwekʉti ɨɨsi jɨno jɨlɨ na makaaja kɨjigho. Aghuo ghaale makaaja ghano vakikalagha avaanhu vano naVayahudi. kʉ Yelusalemu, kʉ Yudea nɨ mwambo ɨja kɨkogha ɨkya Yolidani ghakava ghikʉmʼbɨngɨlɨla.
Արդեն Ընտրված.
Mataayi 4: wbi
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© (Active), Wycliffe Bible Translators, Inc. All rights reserved.