Matìù 7
7
À ka me zəâ èfaãnəè wòt
(Lk 6:37-38, 41-42)
1“À ka me zəâ èfaãnəè bòt mbɨ̀Ꞌɨ̀ Mbɔ̧ɔ̧mà li ndzəèəè èbê mɨ̧̂. 2Ko nê ndɨ àa ndzəèà èfaãnəè bòt ko la wu ndɨ Mbɔ̧ɔ̧mà nàa li zəèəè è bê la. Ndɨ àa ngɨ ane bòt ko la wu wuê ndɨ tàa li ghɨ̌ ane yê la.
3“À ghɨ̀ na ka me ko ndzea wuê alààte kèsaabe àyɨt a èghɨ wanyɨ wè, nè ndɨ à bɔ taꞋà mpɨ̀ŋ èwȩ a lê nè èghɨ la à? 4À ghɨ̀ na me shu abua wanyɨ wè nê tà tsiꞋ yè tsì àlààte kèsaabe àyɨt fu a èghɨ tò la nè ndɨ mpɨ̀ŋ èwȩ nàa a èghɨ lê la à? 5Yàa nè nè; Àwɔ̀ wu àa shua nê ye wu àghɨa kà wu yùà la, bɨa ntsì mpɨ̀ŋ yu a èghɨ lê la ka mbɨ̀Ꞌɨ̀ eko eye alààte kèsab fu a èghɨ wanyɨ wè la etsǐ.
6“A batè ngu ale ka à ka ŋa àghɨa betsiꞋa à ŋa abua Mbɔ̧ɔ̧mà la abua babə mbɨ̀Ꞌɨ̀ bɔ jɨ, ngèble awɔb ntsìꞋi me kɨa wê. À ka ndzì àtuꞋ àmî a èkunyà̧ mbɨ̀Ꞌɨ̀ ka tà nɨŋ fele a èbem àtɔ̀blè.
Bɨ̀ lo̧, nkɨ̂, ndùꞋtê ètsələèꞋ
(Lk 11:9-13)
7“Lo̧, ko Mbɔ̧ɔ̧mà naa ŋa, nkɨ̂ ko taa ghɨ̌ aa ye, mè ndùꞋte ètsələèꞋ ko taa tsɔꞋɔ abua yê. 8Nkàà nê wòt ègème tà lo̧ la nàà mbɔa, wòt tà kɨ la yea, èwe tà luꞋte ètsələèꞋ la bɔ tsɔꞋa abua tò.
9“Wòt wu ane yɨ̧ waã tò lo̧ èghɨjɨ abua tò ko taa ŋa tò èti la wu wàà? 10Kò wòt naa ane yɨ̧ waã tò lò̧a asəâ ko taa ŋa nyà̧kàbɔ̀ŋ yû̧ abua tò la leè? 11Tè bɨ̀a wàa bɨ̀ wu bòt kàbɔ̀ŋ la e wu ko eŋa èghɨ ntsɔ̧̀ abua bɔ̧ bɨ̧, è me wu tǎt wɨ̧ wu a ègwet la tà kà ŋa èghɨ mbɔŋ abua bòt bɔ lo̧ abua tò la tè ntsě? 12Ale, àghɨa àa nkɨà nê bòt è ghɨ̌ abua yê la, ghɨ̌ abua yɔb mɨ̧̂, nkàà nê eyaa wu àghɨa mbɨ̧te Musì nè bèndàꞋàtɔŋ Mbɔ̧ɔ̧mà e shuà la.
ÈtsələèꞋ techɨɨle
(Lk 13:24)
13“Tsě ane ètsələèꞋ techɨɨle, nkàà nê ètsəê wu àa fǎ la e gha a èbem èwet Satàn. Èlu̧ mbɔŋ aà mbɔ̀; bòt bɔ̀ɔ ntsea adù̧ la e me yaãaã. 14Ka ètsələèꞋ wu àa nga àdziꞋa mèmpème la e taꞋa wua nkòa, èlu̧ e mè me bɨɨ, bòt bɔ̀ɔ ntsea adù̧ la è ka wua ndzà̧a.
Àyɨt nè tètaã ti
(Lk 6:43-44)
15“Bɨ̀ me ko awɨ̧ mbɨ̀Ꞌɨ̀ bèndàꞋàtɔŋ Mbɔ̧ɔ̧mà fɨte e nyi ayɔɔ yɨ̧. Bɔ̀ɔ ngɨ̀ bɔ me nyɨꞋte nê bɔ̀ɔ njùa ane mènəè mɔb mbɨ̀Ꞌɨ̀ njɨ̀tsə, ka mbɔ̂ ngu a èbem mbɨ̀Ꞌɨ̀ ngwitenyà̧. 16Èghɨ bɔ̀ɔ ngɨ̀à la aà ghɨ̌ bɨa ko awɔb. Tè bɔɔ nkààba bèteshɨndɨk a èbem àdzɔ̧? Kò nkààba àgu̧u̧me a ègwet àlô̧ à? 17Àyɨt a ntsɔ̧̀ àgème aà nkɔ̀ɔ̀la tètaãaãte ntsɔ̧̀, àyɨt a kàbɔ̀ŋ a me kɔɔle tètaãaãte kàbɔ̀ŋ. 18Àyɨt a ntsɔ̧̀ aà kà kɔɔle tètaãaãte kàbɔ̀ŋ; àyɨt a kàbɔ̀ŋ à ka wua nkɔ̀ɔ̀la tètaãaãte ntsɔ̧̀. 19Àyɨt àgème kà wua nkɔ̀ɔ̀la tètaãaãte ntsɔ̧̀, bɔɔ kòꞋo àyùà emàꞋa a èbem èwet. 20Ale, bɨa ko èwuu bèndàꞋàtɔŋ Mbɔ̧ɔ̧mà fɨte bàa ane èghɨ bɔ̀ɔ ngɨ̀à la.
E mbakà li mè ko awɨ̧
(Lk 13:25-27)
21“È ntsě wòt ègème tàa ntɔ am nê Tè, Tè la tàa li nyi a kèfɔ̧̀ Mbɔ̧ɔ̧mà la. Ka bòt bɔ̀ɔ li nyi a Kèfɔ̧̀ Mbɔ̧ɔ̧mà la wu ndàꞋ èbu bɔ̀ɔ ngɨ̀à àghɨa tǎt am wu a ègwet la nàa nkɨà la. 22Naa li ngu ane àlia mbɔŋ bòt nyaŋ e shu abua am nê ‘Tê, tè bà le kaꞋ a wua nɨ̀a èlen lê ndàꞋà èngǎ̧ Mbɔ̧ɔ̧mà, nɨ̀a èlen lê fəèà fote kàbɔ̀ŋ, mè nɨ̀a èlen lê ngɨ̀à tèwuute ènəê kà ye fɨ̀Ꞌ?’ 23Mbə maa shu abua yɔb nê, ‘E mbakà ko awɨ̧, bɨ̀ lɔ̀Ꞌɔ a ngèt yaã, bɨ̀a bòt kàbɔ̀ŋ’.
Bèmbɔ̧a lob babe
(Lk 6:47-49)
24“È wu ale, wòt tà zə mèngǎ̧ mɔ̧ maà me ghɨ̀ mbɨꞋɨ̀ nàa shua la, wu mbɨ̀Ꞌɨ̀ wòt èyì tà vəèəè lob zi a ègwet èwu la. 25Mbɨ̀ŋ lu, èdzî e lu̧, àfeme a mè ntsè ndèbè lob mbɔŋ, ka è kà kwen, nkàà nê bɔ bɔ̧ a ègwet èwu. 26Ka wòt ègème tà zə mèngǎ̧ mɔ̧ màa tà kà ghɨ mbɨ̀Ꞌɨ̀ è shua la wu mbɨ̀Ꞌɨ̀ àkèghɨ̧̀ a vəèəè lob zi a ègwet tèso̧ la. 27Mbɨ̀ŋ lu, èdzî e lu̧, àfeme a mè ntsè ndèbè lob mbɔŋ, è bê nkwèà nchu a si kà tàktè.”
28Yesò làꞋà mènəè maa mpàa ale, mèngǎ̧ mbɔŋ taꞋa tsè ènɔ̧̂ bòt bu abot la, 29nkàà nê tà li ngua nyɨ̀Ꞌta wɔb mbɨ̀Ꞌɨ̀ wòt tà bɔ àtɔŋ ane ànəa mbɔŋ la, tà kà wua nyɨ̀Ꞌta mbɨ̀Ꞌɨ̀ bènyɨꞋtà mbɨ̧te Musì.
Արդեն Ընտրված.
Matìù 7: mnf
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2006, Cameroon Association for Bible Translation and Literacy