Matìù 11

Bɔntu̧ Jɔ̌n ndzìà èdzî

(Lk 7:18-35)

1È li ngu àfɨꞋa Yesò paa a màŋa nkɨ̀atsə abua bɔkatè bi bu ntsɔ̀b babe la, tà lɔꞋɔ abot me ghȩ̀ȩ̀ne nyɨ̀Ꞌta mè ndàꞋà èngǎ̧ Mbɔ̧ɔ̧mà a èbem èpfəè ènɨ̧ bu a ngèt abot la.

2Jɔ̌n ndzìà èdzî li ngu a tèfȩ àfɨꞋa mbɔŋ, mbɨ̀Ꞌɨ̀ tà zə èghɨ Yesò nàa ngɨ̀à la, tà tsàà bɔkatè bi ko nê, 3bɔ̀ gha mbììte tò nê, “À wu wòt wu bɔ li nê tàa kɨꞋɨ la, kò bàà me chɨꞋɨ wòt kǒ tsa à?”

4Yesò tsɔꞋɔ èngǎ̧ wɔb nê, “Bɨ̀ kua akwèn ngà shu a Jɔ̌n àghɨa bɨ zə la nè àyea bɨ ye la. 5Bòt àghɨ àleme e ye èdziꞋ, bòt èka bɔb e ŋɔꞋte la, e lɔ̀Ꞌ tè ntsìꞋa ngȩ̀ȩ̀nà ndɨŋndɨ̀ŋ, bòt àghɔ̧atsɔꞋɔ e pem, mbûꞋtsə te zə èdziꞋ, bèmpfəà be yu̧u̧mè, bɔ mè tsɔ̀tè Ntu̧ Ntsɔ̧̀ Mbɔ̧ɔ̧mà abua bòt ngoꞋ. 6Ntsɔ̧̀ wu wòt wu tàa ka màkè àghɨa è ngu yùà la.”

7Mbɨ̀Ꞌɨ̀ bɔntu̧ Jɔ̌n bu be lɔꞋ me ghà la, Yesò bùꞋ me laꞋa ànəa Jɔ̌n abua ènɔ̧̂ bòt bu shua nê, “Bɨ li me nkùŋe a Jɔ̌n e gha àbâ àlaꞋ àyuube ale, mɨ̀ɨ̀tè nê bɨ gha eye ghǎ? Bɨ li ngua nga eye àtsəa èfəèꞋ àfeme àa mpàà maꞋa àbâ abà la à? 8Tè a bakà wu ale, ko bɨ li ngua nga àbȩ eye ghǎ? Bɨ li ngua nga eye wòt bɔ wèe atò ane ndìte ntsɔ̧̀ la à? Bɨ ko nê, bòt bɔ wèè àwɔb ane ndìte ntsɔ̧̀ la bɔɔ ntsèka nè èbem ntɔꞋtsə. 9Bɨ li nchɨɨmê ngua nga àbȩ abàꞋa ghǎ? E ghǎ eye a ndàꞋàtɔŋ Mbɔ̧ɔ̧mà? Oò kwat! Bɨ li ndze wòt mènəè tò è tsě me ndàꞋàtɔŋ la. 10Jɔ̌n wàa wu wòt wu àkata Mbɔ̧ɔ̧mà à shu nê,

‘Ye wantu̧ am mâ tsǎ atò a mbì lɨ̧

taa kɨꞋɨ enèète alu̧ abua yɨ̧ la.’

11Ane nkûŋ, tsiꞋ è shu awɨ̧ nê bɔ bakà li tè me bi wòt kǒ tà tsèa Jɔ̌n ndzìà èdzî la, ka wòt tà wu tandiakwèn a kèfɔ̧̀ Mbɔ̧ɔ̧mà la, è tsě a Jɔ̌n. 12E buꞋu afɨꞋa Jɔ̌n ndzìà èdzî li mbùꞋ me làꞋa èngǎ̧ Mbɔ̧ɔ̧mà la, ekɨꞋɨ dzə àfɨ̀Ꞌ yaa, kèfɔ̧̀ Mbɔ̧ɔ̧mà nàà nkɨ̀Ꞌa nè ètɨ̧̂, bòt mètàŋ bɔ̂ ngu bòt bɔ̀ɔ fàa ane ètɨ̧̂ la. 13BèndàꞋàtɔŋ Mbɔ̧ɔ̧mà bàgème nè mbɨ̧te Musì e li ngua ndàꞋà ànəa kèfɔ̧̀ Mbɔ̧ɔ̧mà tè ngà dzəè àfɨꞋa Jɔ̌n li kɨꞋɨ la. 14Bɨ kɔ̀ŋkè ebɨ̧ɨ̧ne bɨ bɨ̧ɨ̧nè, Jɔ̌n wu Èlȩjà wu bɔ li ngua shua nê taa li ekɨꞋɨ la. 15Wòt bɔ ètû̧, tà yute èngà̧ waa.

16“Tê màa chɨɨme e fɨ̀Ꞌne bòt laane wàa ane ghǎ? Bɔɔ anè ngu mbɨ̀Ꞌɨ̀ bɔtechɨɨle bɔ tseke àdziꞋa èwen me ŋȩa ntɔ bèshu̧ bɔb shua nê,

17‘Ba li ntɔ bafɨ̀, bɨ tu̧ ebene,

ba kɔ̧ èvə, bɨ̀ ka dɨ̂Ꞌ.’

18Jɔ̌n li nkɨ̀Ꞌɨ̂ me tseke ndzìtsə, tà kà meè ngua nua mèlùꞋ, bɔ nê, ‘Tà bɔ fo kàbɔ̀ŋ.’ 19Waã Wòt kɨ̀Ꞌɨ̂ me jɨ èghɨjɨ mè nua mèlùꞋ, bɔ nê, ‘Bɨ yea mbê waa! Tà wu mpfəà èghɨjɨ, mè ngu àbaala mèlùꞋ, mè ngu shu̧ bòt bɔ̀ɔ nɨa mèkab taksì la, nè bòt kàbɔ̀ŋ ko’. A batè ngu ale, ka bòt e bɔ̂ ndâ me ye èyǐ Mbɔ̧ɔ̧mà ane èghɨ èyǐ mbɔŋ àa ngɨ̀à la.”

Èpfəè kà bɨ̧ɨ̧ne a Yesò

(Lk 10:13-15)

20Yesò ghɨ̀ ale, mbùꞋ me tsò̧o̧ èpfəè bu tà ghɨ̀ tèwuute ènəê kà ye efəa nyaŋ abàꞋ və la, nkàà nê bɔ li bɔ̀ ka waꞋa mènəè Kàbɔ̀ŋ mɔb. 21“Aa li bɨa wɨ̧ bɨ̀a bòt Kolazìn, aa li bɨa wɨ̧ bɨ̀a bòt Bèsedà! Bɔ li ngɨ̀ ale ngɨ̀ tèwuute ènəê taà bɔ ghɨ a kètsìà wɨ̧ la àlaꞋ a bòt Tȩê nè Sidɔ̀n, ko bɔ li dzaŋe kwaã epfəə, mè fəèꞋəè muttsə ane yɔb, enɨ nyɨꞋte nê bɔ waꞋa mènəè kàbɔ̀ŋ mɔb. 22Ka tsiꞋ è shu awɨ̧ nê Mbɔ̧ɔ̧mà naa li eku tèsȩte bòt Tȩê nè Sidɔ̀n àlia tàa li saꞋa ngɔ̀ŋ la, te tsě ndɨ tàa eku tɨ̧ la. 23È me wu awɨ̧ bɨ̀a bòt Kàpenàwuêm! Bɨ li mbàte ngua nkɨ ŋeꞋe awɨ̧ bɨ̀ambɔŋ e tsàà a ègwet, ka tsiꞋ è shu awɨ̧ nê bɔɔ li shuke wɨ̧ a si etsǎ àlaꞋ a bèmpfəà. Bɔ li ngɨ̀ ale ngɨ̀ tèwuute ènəê taà bɔ ghɨ a kètsìà wɨ̧ la àlaꞋ a bòt Sodòm ko bɔ te ebele kɨꞋɨ dzə àfɨ̀Ꞌ yaa. 24Ka tsiꞋ e shu awɨ̧ nê naa li ngu ane àli yu Mbɔ̧ɔ̧mà nàa saꞋa bòt ngɔ̀ŋ la, ta kù tèsȩte bòt Sodòm tè ntsè è tɨ̧.”

Bɨ̀ kɨ̀Ꞌɨ̀ abua Yesò ndzètè

(Lk 10:21-22)

25ÀfɨꞋa mbɔŋ Yesò nê, “Tê, Fɔ̧̀ ègwet nè sitsǎꞋ, mâ kɔ̀ŋkè àwê na à lô̧ èghɨ bàa abua bòt èyì nè bòt àkatè, mbɔ̂ nyɨ̀Ꞌte abua bòt kà ko èdziꞋ la. 26Oò Tè, à li ngɨ̀ àyaa ane mènkɔ̀ŋke mê, mè nè ndɨ àa bɔ̀ àwê la.

27“Tǎt am è ŋa èghɨ ègème abua am. Wòt kǒ tà lâ ko waã, kà wu tǎt tò la tsě; wòt kǒ tà meè ndâ ko a tǎt waã kà wu waã mbɔŋ la ka wu, nè bòt waã wu kɔ̀ŋkè nê bɔ̀ ko atò la.

28“Bɨ̀a wu bɨ̀a fàꞋà nkaãaã mè ŋeꞋa àbòꞋa lelet la, bɨ̀ kɨꞋɨ abua am, ko maa ghɨ̌ bɨa yètè. 29Bɨ bɨ̧ɨ̧nè mèngǎ̧ mɔ̧, ka è màà ndèt ntsèa wɨ̧, mè me kùŋè tèka taã, ko mèntɨ̧ɨ̧ mɨ̧ naa yète, nkàà nê mènəè mɔ̧ naa njùa, e mè mbɔ àbɔɔla èntɨ̧ɨ̧. 30Mèngà̧ mu e nyɨꞋtà àwɨ̧ la nàà njùa a mànkoa, àbòꞋà yu e ndzia a tèkwȩ tɨ̧ la a mè me yàŋe.”

Արդեն Ընտրված.

Matìù 11: mnf

Ընդգծել

Կիսվել

Պատճենել

Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք

Իմացեք ավելին Mundani-ի մասին

Matìù 11

Աստվածաշնչի հայտնի հատվածներ
Matìù 11
-ից

Աստվածաշունչ:

Mundani

Տարբերակ: Mundani - mnf

Matìù 11

Matìù 11

Աստվածաշնչի հայտնի հատվածներ Matìù 11-ից

Աստվածաշունչ:

Mundani

Տարբերակ: Mundani - mnf

Matìù 11

Աստվածաշնչի հայտնի հատվածներ
Matìù 11
-ից