Matie 10
10
Ɔkɔ̀hɔ̀n-wá-bɔ̀ ɛvà anhyrɛ̀
(Nyɛ́n nyan Markɛ̀n 3:13-19; mán Lükɛ̀n 6:12-16 wrú lɔ mɛ̀n)
1Zhezü bi n'ɛsɛ̀nkɛn-bɔ̀ ɛvà-anhyrɛ̀ lɔ kɩ nɛ̀n tán yɔ ɛkɔrɛ̀srɔn ô yɔ kɛ́n anhɛ́n gbàngbàn hɔ̀n ɛsɛ̀n, yɔ kɔrɛ ɛnlɔẅiɛ hɔ̀n lɔ fɛn mán ɔkpɔ̀cɔ lɔẅiɛ lɔ fɛn. 2Nyàn ɔkɔ̀hɔ̀n-wá-bɔ̀ ɛvà-anhyrɛ̀ hɔ̀n lɔ, y'ebɩ́: bukru Simɔn (léyi ye bi Piɛrɛ̀n nɔn) mán nɛ́n muan-ẅì andre; Zhakɛ̀n mán nɛ́n muan-ẅì Zhan, yɔ anwrɔn anhyrɛ̀ lɔ yɔ dú Zebede ẅì hɔ̀n; 3Filipɛ̀n mán Bartelemi; Toma mán Matie léyi dú anmàn-wɔɛ̀n-yrɛ-wrɔn nɔn, Zhakɛ̀n léyi dú Alfe ẅì nɔn mán Tade; 4Simɔn léyi dú anmàn-ẅì nɔn mán Zhüda Iskariɔtɛ̀n léyi hɛ́ Zhezü nɔn.
Zhezü kɛ wá n'ɛsɛ̀nkɛn-bɔ̀ ɛvà-anhyrɛ̀ lɔ ɔkɔ̀hɔ̀n
(Nyɛ́n nyan Markɛ̀n 6:7-13; mán Lükɛ̀n 9:1-6 wrú lɔ mɛ̀n)
5Zhezü wá anwrɔn ɛvà-anhyrɛ̀ ndɔ hɔ̀n lɔ ɔkɔ̀hɔ̀n kɩ nɛ̀n wá tán yɔ le: “Nyɛ́n bɩ́ hɔ́n ɔkpɔsɔ wú hɔ̀n léyi Zhüifɛ̀n-bɔ̀ bàdà nɔn, kɩ nyɛ́n bɩ́ bru Samari anmàn hɔ̀n lɔ mán mɛ̀n. 6Nyɛ́n hɔ̀n nyɛ́n cɔ́ Izraɛlɛ̀n fɛcüè ẅì hɔ̀n léyi zrɛ́n nɔn. 7Ny'ɛhɔ́n mɛ̀n lɔ, nyɛ́n dɔ́ Ɔwɔ ankà, nyɛ́n dɔ̀ le: ‘Anhobɩ́-Nɛ̀ncüì-dúyri lɔ bá ɛtɛ̀sɛ̀n!’ 8Nyɛ́n kɔrɛ ɛnlɔẅiɛ-bɔ̀, nyɛ́n hán owú-bɔ̀ kɛ vá ɔkɔrɛ-bɔ̀ mɛ̀n, nyɛ́n hán kokove-bɔ̀ kè fì, nyɛ́n wrɔ́ anhɛ́n gbàngbàn hɔ̀n. Yɛ tán nyɛ̀n ankɔra, nyɛ̀n mán nyɛ́n tán ankɔra. 9Nyɛ́n bɩ́ bɩ́ ansɩ̀kɛ kùa, dɔlà kùa mán ɛngbɛ́n-ẅì wɔnsɛ́n kùa nyɛ́n wá kotokuemɛ̀n; 10nyɛ́n bɩ́ bɩ́ bàgɛ̀n nyɛ́n nɛ̀nnyànmàn hɔ̀n lɔ mɛ̀n, anhyrɛmɛ̀n ceci mán nyɛ́n bɩ́ bɩ́ɛ, nyɛ́n bɩ́ bɩ́ annanwrú mán ɛtɛ̀ kpò mán. Annànwɔrɛ mɛ̀n lɔ ɔkɔ̀hɔ̀n-hán-wrɔn ẅɛn ɛci-zî kɔrɛ̀levri.
11Ɛnvra léyi nye bru anmàn cüìcüì mán anmàn cɛ nɔn, nyɛ́n ji ɔwrɔn léyi ke le shrì kɛ̀ ẅɛn nyɛ̀n nɛ̀nnyàn-bɔ̀ nɔn, ô nyɛ́n dú nanvrɛn hàn kɩ kɛ̀ krɔn ny'ɛhɔ́n vra. 12Ɛnvra léyi nye bru ebɩ́ tɔ̀n mɛ̀n nɔn, nyɛ́n dɔ̀ le: ‘Anwɔwɔ kè dú nyɛ tɛn.’ 13Ke dú kɛ ebɩ́-nɛ́n-zi hɔ̀n kɛ ẅɛn nyɛ̀n nɛ̀nnyàn-bɔ̀ hô, ny'anwɔwɔ bi-nyan lɔ kè dú yɔ edomɛ̀n, tɛ́n ke dú kɛ yɔ sɩ̀ bɩ́ nyɛ̀n, nyɛ́n bɩ́ ny'anwɔwɔ bi-nyan lɔ, nyɛ́n sɔhɔ́. 14Ke dú kɛ ebɩ́ tɔ̀n mɛ̀n, anmàn tɔ̀n, ye sɩ́ ji ye bɩ́ nyɛ̀n nɛ̀nnyàn-bɔ̀, ye sɩ́ ji ye die nyɛ̀n nukùɛ, nyɛ́n cɔhɔ́ nanvrɛn lɔ, ô nyɛ́n korɛ ny'annan-hi lɔ nyɛ́n cüe. 15Mɛ dɔ́ nyɛ̀n annànwɔrɛ mɛ̀n le: ɛmrɛ̀nci bì lɔ, kɛ lɛ sɔ́ tán anmàn ndɔ lɔ bɔ̀ kɛ lɛ vrán Sodɔmɛ̀n mán Gomɔrɛ̀n anmàn-bɔ̀.”
Ejüezì gbànkàn hɔ̀n léyi kɛ lɛ và nɔn
(Nyɛ́n nyan Markɛ̀n 13:9-13; mán Lükɛ̀n 21:12-17)
16“Nyɛ́n die nukùɛ! Mɛ wá nyɛ̀n ɔkɔ̀hɔ̀n, kɩ nyɛ́n dù nyɛ́n hán kɔ̀kɔ̀sɛ̀ hɔ̀n léyi dú ovú lɛ̀tù hɔ̀n wanzi nɔn hɔ́. Nyɛ́n wá ny'edomɛ̀n esùva kɛ̀ hán ɛnlɛ̀brì hɔ̀n hɔ́, nyɛ́n dù nyɛ́n hán brɛndre hɔ̀n hɔ́, ô nyɛ́n bɩ́ di ankà mɛ̀n ebɩ́. 17Nyɛ́n wá esùva, ɔmuhi anwrɔn kɛ lɛ sɩ́ nyɛ̀n ɛmrɛ̀nci-bɔ̀ zìwú kɩ yɛ lɛ cüran nyɛ̀n ɛngbele y'Ɔwɔ-ankà-yé-wɔn lɔ mɛ̀n. 18Yɛ lɛ sɩ́ nyɛ̀n ɛyri-ẅɛn-bɔ̀ mán ɛnnɛ̀ncüì hɔ̀n zìwú m'ɛkruhú ô nyɛ́n srɔ mɛ́n dalɛfuɛ-di-bɔ̀ yɔ mán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn zìwú. 19Ɛnvra léyi ye le sɩ́ nyɛ̀n ɛmrɛ̀nciemɛ̀n nɔn, ɛnkrɛ̀ta ke bɩ́ ku nyɛ̀n, ankà hɔ̀n léyi nyɛ lɛ dɔ̀ nɔn mán ɔmu le nyɛ lɛ hán nyɛ́n dɔ́ nɛ̀n nɔn; ankà hɔ̀n léyi nyɛ lɛ dɔ̀ nɔn, kɛ lɛ và cɔ́ nyɛ̀n ɛnvra ndɔ lɔ mɛ̀n; 20ankà hɔ̀n lɔ ke sɩ̀ dú ny'ɛmɛ̀n kɛ̀ srɔ, tɛ́n nyɛ́n Zi Hɛ́n de kɛ lɛ dɔ́ ankà ny'ɛmɛ̀n nɔn. 21Anwrɔn ndɔ hɔ̀n kɛ lɛ hɛ́ yɔ muan-ẅì hɔ̀n ô ye di yɔ owúemɛ̀n, kɩ ɛẅì-nɛ́n-zi hɔ̀n kɛ lɛ hán eci zri lɔ y'ɛẅì hɔ̀n tɛ̀sɛ̀n; ɛẅì hɔ̀n kɛ lɛ kɛ́n yɔ zi hɔ̀n ezì kɩ kɛ lɛ di yɔ owúemɛ̀n. 22Anwrɔn lɔ fɛn kɛ lɛ gbri nyɛ̀n m'ɛkruhú. Tɛ́n ɔwrɔn léyi kɛ lɛ ẅɛn m'ankà lɔ ɛshishiemɛ̀n hàn kɩ kɛ̀ cɔ́ ɛmɛẅi trɔ vra lɔ nɔn, nɛ lɛ cɔ́ ebɩdie. 23Ɛnvra léyi yɛ lɛ hán nyɛ̀n ɛgbàn anmàn tɔ̀n mɛ̀n nɔn, nyɛ́n srɛ́, nyɛ́n hɔ́n anmàn nyàntɛn. Mɛ dɔ́ nyɛ̀n annànwɔrɛ mɛ̀n le: nyɛ́n sɩ̀ ci Izraɛlɛ̀n anmàn hɔ̀n lɔ fɛn wú kɛ̀ trɔ kɩ ɔwrɔnẅì Ẅì vá vra lɔ kɛ lɛ cɔ̀.
24Owrú-wɔn-mɛ̀n-ẅì zriɛmɛ́n ke sɩ̀ sevri kɛ̀ vrán n'ankà-yé-wrɔn; eci-bɩtan-wrɔn zriɛmɛ́n ke sɩ̀ sevri kɛ̀ vrán n'ɛẅɛnwrɔn. 25Zrɔ tán le owrú-wɔn-mɛ̀n-ẅì kè dù kɛ̀ hán n'ankà-yé-wrɔn hɔ́, ô ɛci-bɩtan-wrɔn kè dù kɛ̀ hán n'ɛẅɛnwrɔn hɔ́. Ke dú kɛ ye bi ebɩ́-nɛ́n-zi Bɛlzebülɛ̀n (anhɛ́n gbàngbàn-bɔ̀ wrɔn cüìcüì) hô, yɛ lɛ tán n'ɛmɛ̀n-bɔ̀ ebi kɛ lɛ sàn krɛ́ ɛfɔ́n!”
Ɔwrɔn léyi ke ji le ye sù nɔn
(Nyɛ́n nyan Lükɛ̀n 12:2-7 wrú lɔ mɛ̀n)
26“Nyɛ́n bɩ́ sú anwrɔnẅì. Eci lɔ fɛn léyi dú ɛbán mɛ̀n nɔn, kɛ lɛ srɔ ɛwú, kɩ ye le nyri ɛci hɔ̀n lɔ fɛn léyi dú ɛshre mɛ̀n nɔn. 27Ankà léyi mɛ dɔ́ nyɛ̀n ɛnẅìemɛ̀n nɔn nyɛ́n dɔ́ nɛ̀n ɛcɛ̀n pupu mɛ̀n; kɩ ankà léyi yɛ yá ɛshremɛ̀n nɔn, nyɛ́n di bobo nyɛ́n dɔ́ nɛ̀n ɔwɔn wú. 28Nyɛ́n bɩ́ sú anwrɔn hɔ̀n léyi ke wri edùwrú, tɛ́n ke sɩ́ wri ɛnhɛ́n rɔ́a nɔn; tɛ́n nyɛ́n sú Ɔwɔ léyi ke le wri edùwrú mán ɛnhɛ́n tɛ̀, ɛnhyà léyi ke sɩ̀ zɛ́n hán nɔn mɛ̀n. 29Ye sɩ́ hɛ́ annrɛ̀n ẅì hɔ̀n anhyrɛ̀ ɛngbɛn zri hɛ́? Ɔmu tɛ̀kɩ ɛnzriɛmɛ́n ke sɩ̀ bore ɛnhibɩ́ɛ ke dú kɛ nyɛ́n Zi Ɔwɔ ke sɩ̀ tán ɛkɔrɛ̀levri. 30Nyɛ tɛn, ny'ɛnkruẅie hɔ̀n lɔ mán yɛ krɛ́ fɛn. 31Ɛnjansù ke bɩ́ ẅɛn nyɛ̀n: nyɛ́n ẅɛn vɔ̀nshɛ́ vrán annrɛn ẅì hɔ̀n bobrebe!”
Zhezü Krisì ankà-bɩ mán n'ɔmùan crɔn
(Nyɛ́n nyan Lükɛ̀n 12:8-9 wrú lɔ mɛ̀n)
32“Ke dú kɛ ɔwrɔn totɔtɔ̀n kɛ mrɛ́n ɔmùan anwrɔn lɔ fɛn zìwú le nɛ̀n dú mɛ tɛn, mɛ̀n mán mɛ lɛ mrɛ́n ɔmùan Dade léyi dú anhobɩ́ nɔn zìwú le, nɛ̀n dú mɛ tɛn; 33tɛ́n, ke dú kɛ ɔwrɔn totɔtɔ̀n kɛ dɔ́ anwrɔn lɔ fɛn zìwú le, nɛ̀n sɩ̀ nyri mɛ̀n, mɛ̀n mán mɛ lɛ dɔ́ Dade léyi dú anhobɩ́ nɔn zìwú le, mɛ̀n sɩ̀ nyri nɛ̀n.”
Kè sɩ̀ dù anwɔwɔ, tɛ́n anhà-kɔ̀n
(Nyɛ́n nyan Lükɛ̀n 12:51-53; 14:26-27 wrú lɔ mɛ̀n)
34“Nyɛ́n bɩ́ tro le mɛ́n và, ô mɛ̀n sɩ́ anwɔwɔ ɛnhibù wú, mɛ̀n sɩ̀ sɩ̀ anwɔwɔ, tɛ́n anhà-kɔ̀n. 35Mɛ́n và hô, mɛ̀n hán ɔwrɔn kɛ kɛ́n nɛ́n zi ezì, ɛnnyɔnwrɔn-ẅì kɛ kɛ́n nɛ́n muan ezì, eyri-hi kɛ kɛ́n nɛ́n cüì nɛ́n muan ezì. 36Bɔ́ egbri-bɔ̀ ke le dú bɔ́ ɛmɛ̀n mɛ̀n-bɔ̀. 37Ɔwrɔn léyi kɛ cüɛn nɛ́n zi mán nɛ́n muan kɛ vrán mɛ̀n nɔn, nɛ̀n sɩ̀ dù m'esɛ́-wrɔn. 38Ɔwrɔn léyi ke sɩ̀ bɩ́ n'ɛgbàn-hán-tɛ̀ lɔ kɛ̀ kɛ́n mɛ̀n ɛsɛ̀n nɔn, nɛ̀n sɩ̀ dù m'esɛ́-wrɔn. 39Ɔwrɔn léyi ke ji kɛ̀ ẅɛn n'ɛwúvà kɛ̀ hɛ́n nɔn, kɛ lɛ zrɛ́n nɛ̀n; tɛ́n ɔwrɔn léyi kɛ lɛ zrɛ́n n'ɛwúvà m'ɛkruhú nɔn, kɛ lɛ cɔ́ n'ɛwúvà lɔ.”
Anjakpà hɔ̀n
(Nyɛ́n nyan Markɛ̀n 9:41 wrú lɔ mɛ̀n)
40“Ɔwrɔn léyi ke bɩ́ nyɛ̀n nɔn, ke bɩ́ mɛ̀n; kɩ ɔwrɔn léyi ke bɩ́ mɛ̀n nɔn, ne bɩ́ ɔwrɔn léyi wá mɛ̀n ɔkɔ̀hɔ̀n nɔn. 41Ɔwrɔn léyi ke bɩ́ Ɔwɔ-mùanwú-ankà-dɔ́-wrɔn, ɔmuhi nɛ̀n dú Ɔwɔ-mùanwú-ankà-dɔ́-wrɔn nɔn, kɛ lɛ cɔ́ anjakpà léyi dú Ɔwɔ-mùanwú-ankà-dɔ́-wrɔn tɛn nɔn; kɩ ɔwrɔn léyi ke bɩ́ ɔwrɔn léyi dú ɔmùan-zri-di-wrɔn Ɔwɔ zìwú, ɔmuhi nɛ̀n dú ɔmùan-zri-di-wrɔn nɔn, kɛ lɛ cɔ́ anjakpà léyi dú ɔmùan-zri-di-wrɔn tɛn nɔn. 42Mɛ dɔ́ nyɛ̀n annànwɔrɛ mɛ̀n le: ɔwrɔn léyi kɛ tán ɛnshi grashɛ̀n kɔra sà, ɛẅì hɔ̀n ndɔ hɔ̀n lɔ ɔtɔ̀n, hɩ dú m'ɛtɛ̀sɛ̀n-bɔ̀ lɔ mɛ̀n, ɔmuhi ɛnẅì lɔ dú m'ɛsɛ̀nkɛn-wrɔn nɔn, nɛ lɛ cɔ́ n'anjakpà.”
Արդեն Ընտրված.
Matie 10: ƐAA03
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.