Génesis 9
9
Tachi Akꞌõrepa Noé ome pacto ooda
1Mãpai Tachi Akꞌõrepa pedee pia jaraji Noemaa, chi warrarãmaa paara:
—Warra chokꞌara oodapáde aji. Wãdapáde aji, chi wãrutamaa na pꞌekꞌau eujãde, eperãarã chokꞌara paraamerã. 2Ne–animalaarã jõmaarãpa parã waaweedaitꞌee. Ne–animalaarã wãabaipata, eujãde nĩuteepata mãikꞌaapa pꞌusade pꞌanapata parã jua ekꞌari pꞌanadaitꞌee. 3Mɨa naaweda jaradakꞌa ne–inaa kꞌarra kꞌĩra tꞌãdoo kꞌodai, ɨ̃rá aukꞌa jara bɨ ne–animalaarã jõmaata kꞌodai. 4Mamĩda nechiara waa ome kꞌodaikꞌaraa bɨ, waa kꞌaurepa eperã chokꞌai bapari perã. 5Eperãpa awaraa peeru pɨrã, mɨa mãgɨ́ eperã ichiaba piupiitꞌee. Ne–animalpa eperã peeru pɨrã, ichiaba piupiitꞌee. 6Mɨ, Tachi Akꞌõrepa eperã mɨkꞌa ooda perã, eperãpa chĩara peeru pɨrã, mɨa mãgɨ́ awaraarãmaa peepiitꞌee. 7Mamĩda parã, warrarã oodapáde aji, na pꞌekꞌau eujã jõmaade pꞌanapataadamerã.
8Ichiaba Tachi Akꞌõrepa mãgaji Noemaa, chi warrarãmaa paara:
9—Mɨa nãgɨ́ pacto ooitꞌee parã ome mãikꞌaapa parãdeepa uchiadaitꞌeerã ome; 10ichiaba jõmaweda ne–animalaarã barcode wãdapꞌedaarã ome; ipanaarã, ne–animalaarã taunomaa, tausaaree; mãɨrã ome mãikꞌaapa jõmaweda awaraa ne–animalaarã ome. 11Mɨa waa na pꞌekꞌau eujã ũupi–e paitꞌeeda aji, eperãarã mãikꞌaapa ne–animalaarã jõpiitꞌee. Mɨa jaradakꞌa ichita mãga beeitꞌee.
12’Nãgá parãpa mãikꞌaapa ne–animalaarã jõmaarãpa kꞌawadai mɨa wãarata jara bɨ. 13Euma bɨitꞌee pajãde mɨa jarada kꞌirãpa pꞌanadamerã. 14Mɨa eujã ɨ̃rɨ jɨ̃arara pëikꞌãri, aɨde eperãarãpa euma unudaitꞌee. 15Mɨa mãgɨ́ unukꞌãri, kꞌirãpaitꞌee mɨa pacto ooda parã ome mãikꞌaapa ne–animalaarã ome; eujã paniapa ũutꞌaadakꞌa waa oo–e paitꞌee. 16Ma euma jɨ̃ararade unukꞌãri, kꞌirãpaitꞌee mɨa pacto ooda na pꞌekꞌau eujãdepema eperãarã ome mãikꞌaapa ne–animalaarã ome. 17Ma euma kꞌaurepa jõmaweda eperãarãpa mãikꞌaapa ne–animalaarãpa kꞌawadaitꞌeeda aji, mɨa pacto ooda wãara.
Tachi Akꞌõrepa Noemaa mãga jaraji.
Noé ichi warrarã ome
18Noé warrarã barcodeepa uchiadapꞌedaa paji Sem, Cam, Jafet. Cam Canaán akꞌõre paji. 19Noé warrarã õpeerãdeepa na pꞌekꞌau eujãdepemaarã jõmaweda uchiajida.
20Noé ne–uumaa beeji. Taarã pakꞌãri, uva uuda oroji mãikꞌaapa ma uvadee vino ooji. 21Ewari aba Noé vinopa piu beepꞌeda, kꞌãi beeji ichi te ne–animal edee oodade. Ãkꞌadaa kꞌãi baji. 22Cam, Canaán akꞌõrepa chi akꞌõre ãkꞌadaa unukꞌãri, uchiaji chi ɨ̃pemaarã omeemaa nepɨrɨde. 23Mãpai Sem, Jafet ome ãchi ikꞌiade poroba jita atadapꞌeda mãikꞌaapa teedaa kꞌĩra ãyaa wãdapꞌeda, poro bɨjida ãkꞌadaa unudaamaapa.
24Noé piu bapꞌeda, ɨ̃rɨmakꞌãri, kꞌawaaji chi warra tꞌẽepemapa ichi ome ooda. 25Mapa mãgaji:
—Kꞌachiade bapariitꞌeeda aji, Camdeepa uchiada Canaán. ¡Cam ɨ̃pemaarãdeepa uchiadaitꞌeerã esclavoorã ekꞌariara paitꞌeeda! aji.
26Ma awara mãgaji:
—¡Tachi Akꞌõre tꞌãri pia bapari! Sémpata irumaa ɨtꞌaa tꞌɨ̃pariitꞌeeda aji. Mamĩda Tachi Akꞌõrepa Canaán iru esclavo papiitꞌee. 27Tachi Akꞌõrepa kꞌaripapꞌeda, Jafetpa eujã waibɨa ataitꞌeeda aji, mãikꞌaapa irudeepa uchiadaitꞌeerã kꞌãiwee pꞌanapataadaitꞌee Semdeepa uchiadaitꞌeerã ome. Mamĩda Canaán iru esclavo paitꞌeeda aji.
28Na pꞌekꞌau eujã ũuda tꞌẽepai Noé trescientos cincuenta años baji. 29Noé jai–idaakꞌãri, novecientos cincuenta años iru baji.
Արդեն Ընտրված.
Génesis 9: sjaB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
©2005, 2010, 2015 Wycliffe Bible Translators, Inc. All rights reserved.