Malukushi 8
8
Yesu ankulisha imbumba yavanu dyalupu nsheshe
Mateu 15:32-39
1Napanelo mumaduva lolo lo, imbumba yavanu yùmbalanidile kavili na paikavanavo shakulya, Yesu kuvashema vakwoda vake kuvaulila doni, 2“Vanu ava ninkuvaanangila shididi mwaa vankutwala maduva matatu vavelé namu nangu na havave shakulya. 3Napavedoni ndikavaulila vaukanange kuding'ande kwave vàdobile indala, inkuululika kudilikanga shing'ati indila mwaa vanji vo vaaleke kushu.” 4Vakwoda vake kushidoni, “Vanu ava pakulota kuvalisha munu apata pashi magung'u panalugwangwa apa?” 5Yesu kuvaudya, “Muvénavo magung'u mangapi?” Vanavo do, “Saba.” 6Yesu ankuvalamulila venentete vaikalange pai. Nae patwete magung'u saba alalá kunnambwalela Nnungu kumajanianga, andívapa vakwoda vake pakulota vavajavile venentete, vanavo kutandela momo. 7Namomo dindípagwa dindemba padyoko do, nae paalalidye andívaulila doni, “Nadyanavo, java.” 8Vanu uti kulya mpaka kwikuta. Makombo lo avele oe, makalala saba. 9Palyutu alyo vanu vavele dyalupu nsheshe, bai nae andívalaila.
Mapalishayo vajugwa shimanyikilo
Mateu 16:1-4
10Napanelo nae andíkwelenneu mwingalava pamo na vakwoda vake kuka kwisemu ya ku Dalamanuta. 11Mapalishayo vandímwidila Yesu kutunduvanga kujunganavo vanninga ntima vanjugwa alodye shimanyikilo shakwalakela kuwa. 12Nae akaisha ntima namene kutwala kushidoni, “Mwaa shani vanu vaimbula ai vangujugwa shimanyikilo? Ninkumwaulila mwiu doni, vanu vaimbula ai havalodya munu shimanyikilo shoeshoe.”
Nkukumuku wamapalishayo na umwe Elode
Mateu 16:5-12
13Napanelo nae pavalakile, andíkwela mwingalava kuka litanda nkono unji. 14Vakwoda vake vandílivaliva kunyukata magung'u, mwingalava mo vavénavo ali, limo bai. 15Napanelo ashindavaduma aashidoni, “Lilaledye! Lishunge kwaing'ano yankukumuku wamapalishayo na umwe Elode!” 16Vanavo kutaukananga shivenevene vaashidoni, “Shamumwona kutangola davo po, mwaa wetu hatunyukete magung'u.” 17Yesu amanya shivéle mmitima myave kushidoni, “Mwaa shani munkutaukananga ing'ano yakumwova magung'u? Da hamunava kwigwa na kwanalela? Mitima vyenu vindinanopa? 18Mevo mwenu munkuvanavo kanji hamunalola shinu; matu munkuvanavo kanji hamunaigwa shinu. Da hamunakumbukila shinu? 19Pandivajavidile vanu dyelupu tano magung'u mwanu apalá, makombo muumbadidye makalala mangapi?” Vanavo do, “Kumi na mbili.” 20“Kushi pandivajavidile vanu dyalupu nsheshe magung'u saba apalá, makombo lo muumbadidye makalala mangapi?” Vanavo do, “Saba.” 21Kutwala Yesu kushidoni, “Napanelo hamunava kwanalela?”
Yesu ankumponia wakuputala mevo pa Beteshaida
22Vanavo vakauka ndawika pa Beteshaida. Pavawikile, vankumwidanavo kumwe Yesu munu jumo wakuputala mevo kunjugwangila ammikile makono. 23Nae pankamwile nkono munu jo andímuukanavo kunyenje likaja, kunshunila mata mmevo, kummika makono kumudya, “Dashi unkwona shinu shoeshoe?” 24Munu aijá pang'amwile mevo kushidoni, “Ninkuvona vanu vilinga-vilinga kenga milandi vinkuwena doni.” 25Yesu kummika kavili makono kumevo nae akuno alola ndoo! Munu jo kupona vinu uti kwona shana. 26Bai Yesu anínnamulila auke akapumule pang'ande pake amwaulila doni, “Nkaja mo, haunamwaulile munu.”
Patulu ankummalanganga Yesu kuva Klistu
Mateu 16:13-20; Lukashi 9:18-21
27Napanelo Yesu pamo na vakwoda vake vandyúma kuka kumakaja a ku Shashaleya imwe Pilipo. Vàvele ndila nae andívaudya vakwoda vake kushidoni, “Da vanu vanguvalanganga nangu kuva nyani?” 28Vanavo do, “Nshuwau Wakubatisha, vanji Liyashi, vanji kavili do nkúlava jumo pakati pavakulava.” 29Nae kuvaudya vanavo, “Kushi na mwenu po, mulota kunguvalanganga nangu kuva nyani?” Patulu patwete kujang'ula kushidoni, “Wako Klistu.”#8:29 Klistu ni lina limwe aijá walivikile Nnungu kuntumidya kwida. 30Nae kutwala kuvaduma pakulota havanammalangange kwavanu.
Yesu ankumanyiya kaladavo yakupela na kudyuka kwake
Mateu 16:21-23; Lukashi 9:22
31Napanelo Yesu andítunduvanga kuvapundisha vakwoda vake aashidoni, “Mwana Wamunu inimmaikila apate mauvilo oe; inimmaikila vamwite vanang'olo, vakulangalalela-shadaka vanang'olo pamo na vamwalimu vadishaliya, apele na muliduva lyantatu lyake adyuke.” 32Malove alo nae ashitangola ngala kutwala Patulu kunshamela Yesu kwagweka kuntangalela. 33Yesu pashiliwike kuvalola vakwoda vake, aníntangalela Patulu doni, “Tumuka mushu mwangu Shatwani! Wako haunakumbukila shinu mwakumbukilila Nnungu, ukumbukila mwavakumbukilila vanu.”
Nkwóda umwe Yesu anyukate nshalaba
Mateu 16:24-28; Lukashi 9:23-27
34Bai nae kushema imbumba yavanu pamo na vakwoda vake kuvaulila kushidoni, “Munu akalota kungwoda nangu, alishukulu jo mwene anyukate nshalaba wake angwode. 35Mwaa woewoe álota aposhe shingumi shake, andakatoka kanji woewoe álota akatoke shingumi shake mwaa wangu nangu na kwamwaa wantenga wambone, andaposha. 36Da munu alota kupata wambone shani akapata shilambo uti kutwala kukatoka shingumi shake? 37Da shinu shani shalota kuulula kumya munu abadilishe na shingumi shake? 38Munu woewoe waimbula ai yakulavalava#8:38 Yesu patangwele imbula ai ni yakulavalava, inkuvanavo mana doni, vanu vashindatenda vamwambukanga Nnungu wave. na yakutega akangwanangila nangu dyoni na kwanangila malove angu, Mwana Wamunu momo andamwanangila dyoni paida mulishangelo lyatatake àvele pamo na vanjelo vakwilimyanga.”
Արդեն Ընտրված.
Malukushi 8: kde
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2013, Wycliffe Bible Translators, Inc. All rights reserved.