Mateu 18
18
Nyani nang'olo muutawala wakuwa
Malukushi 9:33-37, 42-48; Lukashi 9:46-48; 17:1-2
1Muwakati wowo vakwoda vake vandímuukila ndamudya kushidoni, “Nyani álota kuva nang'olo muutawala wakuwa?” 2Yesu kunshema ndyoko ndikidiki, kunkamula kumwimidya shing'ati shave 3kutwala kushidoni, “Ninkumwaulila mwiu doni, mwenu mukanaujiyanga mitima vyenu kulitenda kenga mmadyoko mmadikidiki, mwiko hamwinjila muutawala wakuwa. 4Napavedoni woewoe álota kulishapeya kutwala kuva mwandyoko ndikidiki, aju andava nang'olo muutawala wakuwa. 5Woewoe álota kumpwashalela ndyoko ndikidiki kenga aju palina lyangu munu ajo angupwashalela nangu. 6Napane woewoe álota kuntadya kukuvala ndyoko jumo pakati pavadikidiki ava vangukulupíla nangu, kudyanga munu ajo kumuungangila lijanga lyakwidopa pang'ulo kuntitimidya mwimanga kumedi makumene. 7Shipambale shilambo kwamwaa wavitendo vivatádya vanu vatege. Ngwengwe vyakunyata vivatádya vanu vatege vindaumilila napane apambale aijá álota kwidanavo vyakunyata avyo!
8“Napanelo ikava kenga nkono wako kwali lidodo lyako vinu avyo vinkukutadya ukuvale, lumula ujae kushu ko. Kudyanga kwinjila mushingumi ùlamele kuliko kuvanavo makono uti mavili kwali madodo uti mavili kutwala kuka kushena kwauvele moto úkamalilika. 9Namomo ikava kenga liu lyako linkukutadya ukuvale usha ujae kushu ko, kudyanga winjile mushingumi ùlamele kuliko kuvanavo mevo uti mavili kutwala kuka kumoto wakushena.
Nkong'o wangandolo wakujaika
Lukashi 15:3-7
10“Lilaledye kwambangidya hamunamwiludyange ata ndyoko jumo pakati pavadyoko ava! Nangu ninkumwaulila doni, vanjelo vave kuwa ko, ngwengwe vankwonana namu Atata ávele kuwa. 11#18:11 Maandiko anji ákavele akala uti, vandyánjedya malove ala: Mwana Wamunu aidilé ndaambola ashilá she shijaíke. Mumaandiko oe ashigalegu malove ala hapali. 12Da mwenu mwona dashi? Ikava kenga munu ankuvanavo dingandolo miya anjaika jumo, haleka adilá tisini na tisa ko kumashinga kuka annambela jumo ánjaike? 13Akankodya, ninkumwaulila mwiu doni, anampuwangila namene kuliko adilá tisini na tisa dikanjaíke. 14Nimumo momo Tatagwenu ávele kuwa hanalota shinu ata padyoko kunjaika ndyoko jumo pakati pavadyoko ava.
Nung'unumunu akakukwawedya, igwanianavo
15“Napanelo nung'unumunu akakutagela muukile ukandume mùvele mmavili yenu. Ikava kenga andakwigwilila, unimposha. 16Kanji akanakwigwilila, ntwale munu jumo kwali vavili pakulota ‘likosha lyoelyoe vaakikishe vashuda vavili kwali vatatu.’#18:16 Lola Kumbukumbu 19:15. 17Ikava kenga havaigwilila vanu avo, mmalangange kuliganisha. Ikava kenga navanavo havaigwilila momo, bai mmalangile kuva mmidi kwali nkúkatisha-ukodi.#18:17 Kummalangila munu kuva mmidi kwali nkúkatisha-ukodi mana ake, mene kungana na munu ajo. 18Ninkumwaulila mwiu doni, uti vyamulota kunga pai apa, kuwa momo vindaungigwa na avilá vyamulota kuungula pai apa, kuwa momo vindaunguligwa. 19Namomo ninkumwaulila doni,#18:19 Maandiko anji akala: Ninkumwaulila mwiu doni… vanu vavili pakati penu vakaigwania mushilambo amu kwashinu shoeshoe shakujugwa, Atata ávele kuwa andavapa. 20Mwaa poepoe pavakadyanianga vanu vavili kwali vatatu palina lyangu nangu, nangu ngupali popo.”
Nkong'o wammádengo ákannivaliva muje
21Bai Patulu akamuukila ndamudya, “Umu, da nung'unumunu akangutagela ninnivalive myanda mingapi? Myanda saba?” 22Yesu kushidoni, “Mene, nakwaulila shinu kuva myanda saba ila myanda sabini kuujila myanda saba. 23Nadoni utawala wakuwa wo uvelé mwaumu jumo áshilota atende shikonda na vatumika vake. 24Patunduvenge kutenda shikonda sho, vandímwidanavo munu jumo e avénavo udeni wanjuluku woe. 25Kwodamwaa havenavo shakunnipa nang'olo wake, nang'olo wake jo kulamulila vanshulushe nae, ndyagwe, vanavake na vinu uti vyavénavo pakulota udeni wo, amalidye. 26Ntumika aijá kunguguvalila kulipudya aashidoni, ‘Nang'olo wangu ngwanangila shididi nangu ndakulipa uti udeni awo.’ 27Bai nang'olo wake andímwanangila shididi kutwala kunneka auke na udeni wo, kunnivaliva.
28“Kanji napane ntumika aijá paumile apo anínkodya ntumikamwagwe washindai dinali miya. Nae apalá kunkamula, kunkaba kabali kutwa kushidoni, ‘Njuluku wangu wo, ngulipa popo apa!’ 29Muje jo kunguguvalila kunjugwangila aashidoni, ‘Ngwanangila shididi, nangu ndakulipa.’ 30Nae kwita kuntwala kuka nanjela nkalaboshi mpaka udeni wo, alipe. 31Napanelo vatumikamwagwe vanji vakone shitendo asho, vandívanavo shipalodi shoe kutwala kuka nammanyiya nang'olo wave vinu uti vitandéke.
32“Nang'olo wave akanshema kumwaulila doni, ‘Wako ni untumika wakubanga namene. Nangu udeni wako uti ndikulivaliva mwaa wako uningujugwangila. 33Da napane hainaululike nawako kumwanangila mujo jo shididi kenga mo mwandikwanangilidile wako?’ 34Bai nang'olo wake jo àshimwidye namene anínkamudya kwavakushunga-kalaboshi mpaka udeni wo uti, alipe. 35Napavedoni Atata wakuwa anantandela momo ikava kenga namwenu mmitima myenu mo, kula munu hannivaliva nung'unumunu.”
Արդեն Ընտրված.
Mateu 18: kde
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2013, Wycliffe Bible Translators, Inc. All rights reserved.