Juan 3
3
Si Jesus Daw Si Nicodemo
1Amin sakup hu mga Parisiyu ha tagngaranan ki Nicodemo ha sabuwa duun taena ha mga labaw ha agalen hu mga Judio. 2Su masukilem en duminiyà haena ki Jesus daw ikagiyi, “Manunudlù, natun-an day ha iyan ka manunudlù ha sinugù hu Dios ta sa mga belenganen ha tagbuhaten nu iyan dà pakahimu duun sa etaw ha tagdumahan hu Dios.”
3Tuminubag si Jesus, “Laus gayed sa ag-ikagiyen ku ikaw ha sa etaw ku harì iisab ibatà harì gayed maharian hu Dios.”
4Dayun nanginginsà si Nicodemo, “In-inuwen pa hu magulang en ha iisab dà ibatà sa harì en man makalikù diyà ta getek hi Inay din?”
5Tuminubag si Jesus, “Laus gayed sa tag-ikagiyen ku ikaw ha iyan dà maharian hu Dios sa etaw ha ibatà pinaagi hu wahig daw pinaagi hu Balaan ha Ispiritu. 6Sa igbatà pinaagi hu etaw na etaw dà daan, ba sa igbatà pinaagi hu Balaan ha Ispiritu amin din en kinaiya ha iling hu Dios. 7Harì ka mabeleng taena ha inikagi ku ikaw, ‘Kinahanglan ha iisab kaw dà ibatà.’ 8Sa kalamag duun agpayanaen bisan hindu daw agkapaliman ta sa lageng din ba harì taw agkatun-an ku hindu napuun daw ku hindu duun agpayanaen, iling daan tayan sa alan ha etaw ha imbatà duun hu Balaan ha Ispiritu.”
9Nanginginsà si Nicodemo, “In-inuwen man hayana?”
10Tuminubag si Jesus, “Matatau ka ha manunudlù duun hu mga kaliwatan hi Israel, imbà nu man harì agkasabut sa tag-ikagiyen ku? 11Laus gayed sa ag-ikagiyen ku ha sa intudlù day iyan sa natun-an day daw sa tagsubayen day iyan sa naahà day ba harì nuy agdawaten. 12Ku harì kaw agtuu ku ikagiyen ku inyu sa mga hitabù dini ta kalibutan in-inuwen nuy pagtuu ku ikagiyen ku inyu sa diyà ta langit? 13Amin ba nakadiyà ta langit daw luminugnà dini hu pagpanunultul hu naahà din diyà? Hurà gayed, ba siak sa Batà hu Etaw diyà a napuun. 14Su duun pa si Moises hu pinakabulung-bulung ha lugar intaud din sa bunsalagan ha binuhat hu galang duun hu kayu daw ipatangkaw ta daw sa etaw ha umahà taena harì gayed matay. Iling daan taena ha sa Batà hu Etaw kinahanglan ha itaud duun hu kayu daw ipatangkaw 15ta daw sa alan ha tumuu kandin mailahan hu kinabuhì ha hurà din katapusan.
16“Palanggà gayed hu Dios sa alan ha kaet-etawan aman in-ila din sa bugtung ha Batà din ta daw sa alan ha tumuu taena harì en masilutan ba mailahan hu kinabuhì ha hurà din katapusan. 17Ta hurà sugua hu Dios sa Batà din dini ta kalibutan hu paghukum hu silut duun hu kaet-etawan, ba impadini din haena ta daw maluwas sa mga etaw pinaagi kandin. 18Bisan sin-u sa tumuu taena harì en mahukuman hu silut, ba saena ha harì tumuu daan en nahukuman ta hurà tuu hu bugtung ha Batà hu Dios. 19Iyan haini hinengdan ha aghukuman sa mga etaw. Su makauma dini ta kalibutan sa sulù iyan dan impalabi sa masukilem ta madaet gayed sa mga buhat dan. 20Bisan sin-u sa tagbuhat hu madaet agtambag hu mapawà daw tagpadiyù duun ta agkahaldek ha matun-an sa mga buhat din ha madaet. 21Ba saena ha tagsunud hu kamatuuran duun gayed hu mapawà aman agkatun-an sa buhat din ha ginaheman gayed hu Dios.”
Sa Pag-ikagi Hi Juan Mahitenged Ki Jesus
22Su maiwas en haena si Jesus daw sa mga tinun-an din duminiyà ta prubinsya ta Judea. Migtimà sidan diyà hu pila ha aldaw daw namautismu sidan hu mga etaw.
23Ba diyà ta Enon ha ubay ta Salim ha amin duun madalem ha wahig namautismu daan si Juan hu mga etaw ha agpangakauma. 24Duun taena ha panahun si Juan hurà pa kaprisu. 25Aman amin mga sumusunud hi Juan ha nakigsawalà hu sabuwa ha Judio mahitenged hu tulumanen hu paglimpyu. 26Duminiyà sidan ki Juan daw ikagiyi, “Manunudlù, natiman-an nu ba haena sa tagsubayen nu ha duma nu su diyà ka pa ta layun ta Jordan? Iman tagpamautismu en daan daw madakel sa mga etaw ha agdiyà ta kandin.”
27Ba tuminubag si Juan, “Hurà gayed mahimu hu etaw ku harì gaheman hu Dios. 28Natun-an nuy en sa inikagi ku ha kenà a iyan su Misiyas ba sinugù a hu Dios ha umuna dì kandin. 29Sa agpangasawa iyan gayed pakaangken hu ag-asawahen din. Sa amigu din tag-angat kandin daw agkabayà-bayà ku mapaliman din sa lageng taena ha agpangasawa. Iling daan taena sa kalipay ku iman. 30Kinahanglan ha iyan iman haena mabantug ba siak ipaus-us a.”
31Sa diyà napuun ta langit iyan labaw hu alan, ta sa etaw ha dini dà ta kalibutan kalibutanen dà sa tagsubayen din. Ba saena ha diyà napuun ta langit iyan labaw hu alan. 32Tigtultul din sa naahà daw sa napaliman din diyà ta langit ba atiyuay dà sa agdawat hu mga lalang din. 33Ba bisan sin-u sa agdawat taena makatuen gayed ha kamatuuran sa lalang hu Dios. 34Ta saena ha sinugù hu Dios tag-ikagi hu lalang hu Dios ta agpaulinan gayed hu Balaan ha Ispiritu. 35Pinalanggà hu Dios ha Amay sa Batà din daw iyan sinaligan ha magharì hu alan. 36Bisan sin-u sa tumuu hu Batà hu Dios amin din kinabuhì ha hurà din katapusan, ba saena ha harì tumuu kandin hurà din kinabuhì ta agsilutan hu Dios hu hinangturan.
Արդեն Ընտրված.
Juan 3: bkd
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2015, Wycliffe Bible Translators, Inc. All rights reserved.