Juan 11
11
Sa Pagpatay Hi Lazaro
1Amin etaw ha agkatungkayan hu dalu ha tagngaranan ki Lazaro. Saena diyà tagtimà ta Betania daw sa atebay din ha si Maria daw si Marta diyà daan tagtimà. 2Saini ha Maria ha agkadaluwan sa suled din ha maama iyan su bahi ha mighudhud hu pahumut duun hu paa hi Jesus daw tarapuwi ta buhuk din. 3Pinaelegan ku daruwa ha bahi si Jesus daw ikagiyi, “Ginuu, agkatungkayan hu dalu sa palanggà nu ha amigu.”
4Su mapaliman haena hi Jesus bà dà minikagi, “Harì din iyan ipatay sa dalu ba iyan igkadaluwi din ta daw madayè sa Dios ha Amay ku daw madayè a daan sa Batà din pinaagi taena.”
5Pinalanggà hi Jesus si Marta daw sa suled din daw si Lazaro, 6ba su mapaliman din ha agkatungkayan hu dalu si Lazaro hurà pa haena sagunà diyà ta mig-angat pa hu daruwa ha aldaw.
7Su maiwas haena inikagiyan din sa mga tinun-an, “Dumiyà kuy ta Judea.”
8Ba tuminubag sa mga tinun-an din, “Manunudlù, imbà ka aglikù diyà sa bag-u pa ha agbatuwen kad ngaay hu mga Judio?”
9Inikagiyan sidan hi Jesus, “Sampulù daw daruwa ha uras sa kapawà hu nangkaaldaw. Bisan sin-u sa taghipanaw ku aldaw harì gayed pakasipà ta mapawà, 10ba saena ha taghipanaw ku daleman pakasipà gayed ta masukilem man.”
11Daw minikagi pa daan, “Tuminiduga en sa amigu taw ha si Lazaro ba dumiyà kuy ta agpukawen ku.”
12Tuminubag haena sa mga tinun-an din, “Ginuu, ku nakatiduga en saena agkaulian en.” 13Ba iyan ngaay kahulugan hu inikagi hi Jesus sa minatay en si Lazaro ba abi dan ha bà dà tagtiduga.
14Aman ben paman sidan inikagiyi en, “Minatay en si Lazaro, 15ba maayad ha hurà a diyà su matay ta daw makatuu kaw gayed kanak. Diyà kuy en.”
16Dayun si Tomas ha tagngaranan dan hu Saleping minikagi duun ku duma din ha mga tinun-an, “Dumiyà kuy en ta daw mangamatay kuy daan duma hu Manunudlù taw.”
Si Jesus Pakabanhaw
17Su makauma si Jesus diyà ta Betania haepat en ha aldaw sa kalebenga ki Lazaro. 18Sa banuwa ta Betania ubay dà diyà ta Jerusalem ta mga tatulu dà ha kilumitru sa pig-elangan din, 19aman si Marta daw si Maria inelegan hu mga taga-Jerusalem hu paglipay kandan ta minatay sa suled dan. 20Su mapaliman hi Marta ha tagdiyà en si Jesus sagunà haena tuminalagbù, ba si Maria diyà dà ta balay dan.
21Dayun inikagiyan hi Marta si Jesus, “Ginuu, ku dini ka pa ngaay harì gayed matay sa suled ku. 22Ba natun-an ku ha bisan iman ku amin nu agpanayuen duun hu Dios ig-ila din ikaw.”
23Tuminubag si Jesus, “Mabanhaw dà sa suled nu.”
24Minikagi si Marta, “Natun-an ku ha mabanhaw dà haena ku malugay.”
25Ba si Jesus minikagi, “Iyan a pakabanhaw daw iyan a daan pakaila hu kinabuhì. Ku amin agtuu kanak, bisan ku matay ba mabanhaw dà 26ta saena ha agtuu kanak amin din kinabuhì daw harì en gayed matay. Agtuu ka ba daan taena?”
27Tuminubag si Marta, “Hee, Ginuu, agtuu a ha iyan ka su Misiyas ha Batà hu Dios ha intagnà ha dumini ta kalibutan.”
28Su maikagi haena hi Marta luminikù diyà ta balay dan daw muymuyahi si Maria, “Tagdini en labi sa Manunudlù na dumiyà ka kun ta kandin.” 29Su mapaliman haena hi Maria sagunà tuminalagbù ki Jesus. 30Hurà pa si Jesus makauma diyà ta banuwa ta duun pa hu tinalagbuan dan ki Marta. 31Sa mga etaw diyà ta balay hi Maria ha taglipay kandin naahà dan si Maria ha tigkan huminitindeg daw hipanaw, aman linupug dan ta abi dan ha bà dà ag-agalà duun ku lebeng hi Lazaro.
32Su makauma si Maria diyà ki Jesus sagunà luminuhud duun hu atubangan din ha minikagi, “Ginuu, ku dini ka pa, harì ngaay matay sa suled ku.”
33Su maahà hi Jesus si Maria daw sa mga Judio ha duminuma kandin ha tag-agalà suminakit daan sa gahinawa din, 34aman ininsaan din sidan, “Hindu duun inlebeng si Lazaro?”
Tuminubag sidan, “Diyà kuy ta daw maahà nu.”
35Dayun nakaagalà si Jesus. 36Aman minikagi sa mga Judio, “Ahaa nuy ku inu kaadagi sa pagpalanggà din ki Lazaro.”
37Ba sa duma minikagi, “Imbà din hurà kaulii si Lazaro na su buta naulian din man?”
Sa Pagkabanhaw Hi Lazaro
38Su tagduun en si Jesus ku linebengan ki Lazaro suminakit en paman sa gahinawa din. Sabuwa ha liyang su lebeng daw inipelan hu batu 39aman suminugù si Jesus, “Awaa nuy haini sa batu.”
Ba si Marta sa suled hi Lazaro minikagi, “Ginuu, mahudù en iman hayana ta haepat en ha aldaw sa kalebenga kandin.”
40Dayun tuminubag si Jesus, “Dì ba inikagi kud ikaw ha ku tumuu ka maahà nu sa pagkagamhanan hu Dios?”
41Aman inawà dan su batu ha in-ipel ku lebeng. Dayun huminangad si Jesus diyà ta langit sa mig-ampù, “Amay ku, tagpasalamat a ikaw ta migpaliliman ka kanak. 42Natun-an ku ha dayun ka dà tagpaliliman kanak, ba tumenged taini ha mga etaw ha tagtiyadeg dini inikagi ku haini ta daw makatuu sidan ha sinugù a gayed ikaw dini ta kalibutan.”
43Su makapenga en haena mag-ampù uminikagi hu madaging, “Lazaro, guwà ka duun tayan.” 44Sagunà guminuwà si Lazaro ha nabungkusan pa sa lawa din hu maputì ha manggad daw nabungkusan daan sa weleng din hu panyù. Aman inikagiyan sidan hi Jesus, “Badbadi nuy hayana ta daw makahipanaw.”
Sa Paglalang-lalang Hu Kadakepa Ki Jesus
(Juan 11:45-57; Mateo 26:1-5; Marcos 14:1-2; Lucas 22:1-2)
45Madakel sa mga Judio ha namisita ki Maria sa nakatuu gayed ki Jesus su maahà dan sa binuhat din. 46Ba sa duma kandan migsumbung hu binuhat hi Jesus duun hu mga Parisiyu. 47Aman sa mga labaw ha sinaligan hu paghalad daw sa mga Parisiyu inamul-amul dan sa alan ha duma dan ha mga labaw ha agalen hu mga Judio.
Miglalang-lalang sidan, “In-inuwen taw haena sa etaw ha madakel en sa nabuhat din ha belenganen? 48Ku ipatayà taw iman haena madakel gayed sa tumuu kandin daw elegan kuy hu mga sundalu ta Roma. Kagasen dan haini sa Timplu daw daetan dan haini sa nasud taw.”
49Ba si Caifas ha iyan tungkay labaw ha sinaligan hu paghalad duun taena ha tuiga minikagi, “Buang-buang kaw pa gayed. 50Harì nuy ba diay agkatun-an ha maayad pa ku sabuwa dà sa matay para hu alan ha mga etaw dì ku madaetan pa haini sa nasud taw?”
51Saena ha naikagi din kenà kandin dà ha henà-henà, ba tumenged ta iyan tungkay labaw ha sinaligan hu paghalad pakatagnà daan ha si Jesus matay para hu alan ha mga Judio. 52Daw kenà para dà hu mga Judio ba para daan hu alan ha mga etaw hu Dios ha nakagsusuwayà dini ta kalibutan ta daw makag-amulà dà sidan ku malugay. 53Sugud taena ha aldaw sa mga labaw ha agalen hu mga Judio nan-ahà hu paagi ha mapatay dan si Jesus.
54Aman si Jesus daw sa mga tinun-an din harì en pakahipanaw duun hu kadakelan diyà ta prubinsya ta Judea. Ba namandiyà sidan ta banuwa ta Efraim ha ubay duun hu pinakabulung-bulung ha lugar daw diyà sidan migtimà.
55Su madani en agsaulugen sa Aldaw hu Paglabay madakel ha mga etaw sa duminiyà ta Jerusalem ha nangapuun duun hu migkalain-lain ha banuwa ta agtumanen dan diyà sa tulumanen hu paglimpyu. 56Su mangaamul-amul sidan duun hu Timplu pigpan-ahà dan si Jesus daw migpainsaay sidan, “Inu sa henà-henà nuy? Tumampu ba gid haena hu pagsaulug daw ku harì?” 57Ba sa mga labaw ha sinaligan hu paghalad daw sa mga Parisiyu daan en mig-ikagi ha ku sin-u sa makatuen ku hindu duun si Jesus kinahanglan gayed ha magsumbung ta agdakepen dan haena.
Արդեն Ընտրված.
Juan 11: bkd
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2015, Wycliffe Bible Translators, Inc. All rights reserved.