Jenesis 6
6
Karei Ma Lomondra Ndra-in Ta Lau
1Na len iri lau weleyani kon munyak ma badih asahan ame len, 2eme iri lau rayah batun badu kandrah, badeh anyolom iri badih badeh konen konen, eme iri asoh iri ala seken tiri udu tiri. 3Ano Laban Kindrei anya eh, “Jo baseken kohak handru bado tiri luluwen bwe, iri ndramak leleyah labai. Na len dah ma len hamon eme kameh koha iri bado luwen bwe, winiya basakalawi jaha rinek lunoh bwe.” 4Na len doh badeh ma na len eme kameh iri lau tinan tinan le, ado bwele-e munyak. Iri badeh lundriye badih awas ma lau badu kandrah. Iri badeh lau ndra handru le ma lau nyara iri tinan le, na len mene ndra-au.
5Eme ya len Kindrei anyolom iri lau mari are bolo munyak badeh kandriyen tiri badeh ndrandra-i labai, ma budon tiri badeh ndra karei ma lomondra ndra-in na len mari. 6Eme iy tikisiy, tasah iy mene mwesekei iri ma atehei iri ado bwele-e munyak. Eme ma batun isi handru. 7Eme ma iy anya eh, “Jo tikisiy iri lau jo mwesekei ma hawe iri katin haka hawe sirih, arile jo kameh idi iri mari kameh amak ai.” 8Arile Kindrei ja badeh sekesek handru labai ta Nowa.
Nowa
9-10Ya i dah badeh nyala Nowa ai. Nowa badeh nadun mwan badeh taloh; Sem eh, Ham eh, hawe Jepet. Nowa bamwekes se lakou bandra-i bwe ai, na len iy udu loken. Iy badeh anuhun sahou ma lakou mari mwasin ta Kindrei badeh iy in hamon ta aliy le ai. 11Arile iri lau mari badeh amwekes lakou leleyah, amwekes karei ma lomondra ndra-in tinan labai udu mada Kindrei. 12Kindrei anyolom eme munyak badeh, iy anyolom karei ma lomondra ndra-in tiri lau ndrala labai ai, tasah lau badeh amwekes lakou leleyah udu le buku doh.
13Eme Kindrei tiye i ta Nowa, “Jo badeh ndratehei budon ta edeu sendrehendreh i tiri lau mari. Jo kameh idi iri ma munyak amak, tasah munyak badeh ndradah ta lomondra ndra-in tiri. 14Ou badeh awuri ra-ei ndron na kei ki tam; ou mwesekei rum kudu aliy ano ou alesei ka-u ndron manan ma bolon. 15Ou badeh tomondrohei nyaha ndron badeh kasahan rinek tonoh taloh (133) mita, ya tinan ta ndron badeh kasahan lunoh la-uh (22) mita ano tinan ta i loken badeh kasahan ronoh taloh (13) mita. 16Ano ou mwesekei ndruwi bolobon ma ka-un i loboho loke reu kudu aliy, ki winiya hanoh hahuw sentimita ma ka-un ale ki buku aliy. Ya ou mwesekei sarasar ki taloh ma ou atehei mada san kudu kabede ndron. 17Jo kameh bwidi kon munyak kameh atuh ma lakou mari mulin badeh kameh amak. 18Arile jo kameh amwekes sahou randra le hawem. Ano ou a ndron hawe udum, hawe nadum oro ma udu oro. 19-20Ou andrei iri lakou mulin, ari mwan ari badih badeh kawek ndron ta iri badeh samak. 21Ou kuhi saba nyamon ki nam ma tiri ale badeh kewek.”
22Eme Nowa badeh anuhun sahou ya iy mwekesei i le buku aliy.
Արդեն Ընտրված.
Jenesis 6: lidNTpo
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2001, Wycliffe Bible Translators, Inc. All rights reserved.