Lucas 20
20
Jesús doa-nuggi ibmar-imake
(Mateo 21:23-27; Marcos 11:27-33)
1Ibagwengine, Jesús Bab-Dummadse-goled-neggi dulemar-odurdaksigu, degine, Bab-Dummad-Gayaburba-Nuedgi-sunmaksigu, dule-irwa-Bab-Dummadse-gormalad-e-dummagan, Garda-Narmaked-Dulemar, degine, Judíoʼmar-girmar-dummagan Jesúsʼse nonimalad. 2Amar Jesúsʼga sognonimalad:
—Be anmarga soge: ¿Doa-nuggine wede be we-ibmar imakdii? We deyob be ibmar imakega, ¿ar doa bega gangued uksasunna?
3Jesús, abin-sogded:
—An bemarse ibmar-soggwen an egismogodo. Bemar anga sogmalana: 4Bab-Dummad-diigi-ogleged-igar imakega, ¿doa Diigi-dule-oged-Juan-barmiar be insae? ¿Bab-Dummad barmiali, igi, dulemar barmiali? Anga be sogmalana.
5Degi, Judío-dummagan muchub-muchub na sogdemalad: “Bab-Dummad barmiarye anmar sogmalale, anmarga sogdagoed: ‘Degite, ¿ibiga bemar Diigi-dule-oged-Juan-bengusmarsunna?’ 6Dulemar barmiarye anmar sogbalile, dulemar bela akwagi anmar-makmaloed. Ar ade, bela nue sogmalad, ‘Diigi-dule-oged-Juan, Bab-Dummad-gayaburba-barsoged-sunnadye.’ ”
7Degisoggu, Judío-dummagan, Jesús-abin sogdemarsun:
—Anmar wissurmala, doa Diigi-dule-oged-Juan-barmiali.
8Degi, Jesús, abin-imakdemosun:
—An bemarga sogosurmarmodo, wede doa-nuggi we-ibmar an imakdiiye.
Dule-arbamalad-isganagi Jesús sunmaksad
(Mateo 21:33-46; Marcos 12:1-12)
9Geb degi, Jesús dulemarga burbar-sunmaklegedgi sunmakdesun, sogded: “Ibagwengi, dule-wargwen nainugi uva digsado. Nainu-ibed dulemar-arbamaladga na e-nainu urmaksado. Geb degi, nainu-ibeddi undar na yoggunaded.
10”Uva-weed-ibagan-mosgu, nainu-ibed na e-mai nainugi-arbamaladse barmialid. Adi, uva-na-egadid abala suegar. Ar nainugi-arbamaladdi nainu-ibed-e-mai ese nonigu, sabsur sarsosmalad. Geb degi, unnila arganagwabi gannar barmismalad.
11”Geb degi, nainu-ibed e-mai-baid-barmiarbalid. Ar we-mai sabsur sarsosmarbalid, degi, sabsur-wiosmarbalid. Geb degi, unnila arganagwabi barmismalad. 12Degi, nainu-ibed irbaagi gannar na e-mai-baid barmiarbalid. Ar dulemar-nainugi-arbamalad we-mai nue-naibi imaksamarbargu, nainu-dikarba metemalad.
13”Geb degi, nainu-ibed sokarsunnad: ‘¿Emide, igi an saosunna? An-machi na nue-sabedi an barmidodo. Ar an-machi-dakdamalogu, adi, egi-binsaed-nikaadamaladba gwen oakalogosurmarsua.’
14”Ar nainugi-arbamalad, nainu-ibed-machi dani dakarmargu, na ega sogdemalad: ‘We-dule-danikidi e-bab-burgwisar, nainu bela egadbi guoed. Degisoggu, anmar we-machi-oburgwemarsun, adi, nainu anmargadga guegar.’ 15Machigwa-gasmargu, nainu-dikarba metemalad, geb degi, oburgwismarsunnad.”
Jesús dulemar-e-itobukmaladga sogded: “¿Degite, nainu-ibed, igi dulemar-nainugi-arbamalad-imaknoniko be insae? 16Nonikogu, dulemar-nainugi-arbamalad-oburgwenonikoed. Geb degi, dule-baiganga na e-nainu urmaknonikoed.”
Ar weyob Jesús ibmar soge itosmargu, sogdemalad:
—Bab-Dummad mer deyob anmar-imakena gadin.
17Jesús, nuu Judío-dummagan-dakdegu, amarga sogded:
—Bab-Dummad-Gardagi narmakar naid:
‘Akwa dule-neg-sobmaladse-oballesadi, neg-sobleged-e-akwasailaga gunonikid.’
Salmo 118:22
”¿Wede ibi obarsunna? 18Ar we-akwa-nuedgi dule argwachale, we-dule, ese bibisgoed. Ar we-akwa dulegi argwachardi, we-dule ese ubigwar guoed.”
19Dule-irwa-Bab-Dummadse-gormalad-e-dummagan, degine, Garda-Narmaked-Dulemar, magar-itosmalad, Jesús we-ibmar-burbar-sogsadi yamo emarga sognaid. Degisoggu, Jesús-gabi guarmalanad. Degi-inigwele, dummagan dulemar-dobedba Jesús-gassurmalad.
Roma-dummadga-mani-galeged-igargi sunmaklesad
(Mateo 22:15-22; Marcos 12:13-17)
20Judío-dummagan yamo-Jesús-argaega dulemar-barmisad. Amar yamo dule-nuedyob na imakarmalad, adi, Jesús ibmar-noar-sunmakedgi gamalagar. Jesús ibmar-noar-sogele, dummad-negdakmaidga-ukmalaga gamaloed. Adi, Jesúsʼga igar-itogegar.
21Yamo-Jesús-argamaladi Jesúsʼse egichiarmalad, ega sogdemalad:
—Odurdaked-saila, anmar be-wisdo, be innikigwadba ibmar soged, degi, innikigwadba be ibmar odurdakbalid. Degine, bedi dulemar emarbi be daked, ar ade, Bab-Dummad-Igar-Maidgi napiragwadba be dulemar-odurdakdiid. 22Emide, anmar bese egisdo, Roma-dummad-Césarʼye-nugad-bennuked, ¿wede igar-nuedi? ¿Anmar bennukoe, igi, bennukosuli? ¿Igi be sogmosunna?
23Ar Jesúsʼdi wemar-yamo-e-yardakdanikid mag daksoggu, amarga sogded:
—¿Ar ibiga bemar yamo an-wilubdakdanimala? 24Mani be anga oyogena.
Jesúsʼse mani oyosmargu, Jesús sogded:
—¿Ar wede we-manigi doa-wagar-wilub sisunna, degine, doa-nug narmakar-naibarsunna?
Jesús-abin sogdemalad:
—Roma-Dummad-César-wagar-wilub sii, degine, a-nug narmakar naibali.
25Geb degi, Jesús, abin-imakdemosunnad:
—Ar ibmar, Césarʼgadir, Césarʼba be ibsamardo. Ar ibmar Bab-Dummadgadirdi, Bab-Dummadba be ibsamardo.
26Ar we-dulemar Jesús-sunmakedgi dulemar-asabin geg Jesús-yardakgusmalad. Ar bur bule geger dakdemalad igi Jesús e-abin imaksad. Degisoggu, gwen bar-akar ega sogsasurmalad.
Saduceoʼmar gannar-durgued-igar Jesúsʼse egichisad
(Mateo 22:23-33; Marcos 12:18-27)
27Geb degi, Saduceoʼmar Jesúsʼse nonimarmogad. Amarde sogmalad, “Dule burgwisale, gannar geg bar durguye.” Agala, Saduceoʼmar Jesúsʼse we-igar egichiarmalad, 28ega sogdemalad:
“Odurdaked-saila, Moisés anmarga Bab-Dummad-Gardagi narmakar obesad:
‘Ia mimmi-nikussuli ome-idu burgwisale, e-urba a-ome-nikuoye,
adi, e-iaga anagan-urbegar.’
Deuteronomio 25:5
29”Dakargu, machimala gwenadgan-walagugle-gumaladi (7) weyob gusdo. Ia-dummad ome-nikusgu, anagan-urbissuli burgwisad. 30A-sorbalid, a-ome-nikunonimogu, amba e-iayob mimmi-nikussuli burgwismogad. 31Geb degi, a-sorbalid, amba a-ome-nikunonimogad. Deyob bela e-walagugled (7) a-ome-nikusmaladbiid, anagan-gwen-obessuli bela burgwismalad. 32Geb a-sorba ome burgwismosunnad.
33”Ar dule-gannar-durguoed-iba nonikile, a-omede, ¿doa-omega guosunna, ar bela na e-gugle-nikusmaladbiid (7)?”
34Geb degi, Jesús, Saduceoʼmar-abin-imakdegu, sogded:
“Dulemar we-napneggi, na ome nikumalad, degi, sui-na-nikudamalad. 35Ar dulemar-nabir-Bab-Dummad-negse-dogmaloeddi, degi, gannar-durgumaloeddi, gannar ome-nikunai, degi, sui-nikunai guosurmalad. 36Ar ade, we-dulemar bar burgosurmalad. Amar baliwiturmaryob gunonimaloed, Bab-mimmiganga gumaloed.
37”Ar burgwismalad-gannar-durguoye-soglegedi, Moisés anmarga oyosmogad. Deun sapi-bula-gummakmai-daksadgi narmaksagu, Bab-Dummadgi sogsagusad, Bab-Dummadi Abraham-e-Bab-Dummadye, Isaac-e-Bab-Dummadye, degine, Jacob-e-Bab-Dummadye. Degisoggu, Moisés anmarga oyodo, dule-burgwismalad gannar durguoye. 38Ar ade, Bab-Dummad, dulemar-burgwarmalad-e-Bab-Dummadsulid. Bab-Dummad, dulemar-dula-gudidimalad-e-Bab-Dummadid. Ar Abraham, Isaac, degi, Jacob burgwismar-inigwele, Bab-Dummadgardi amba we-dulemar dula gudidimalad.”
39Abala Garda-Narmaked-Dulemar Jesúsʼga sogdemalad:
—Odurdaked-saila, nue imas be sogsado.
40A-sorbali, dulemar gwen bar Jesúsʼse ibmar-egisbi ito nadsurmalad.
¿Wede Cristo doa-wagwasunna?
(Mateo 22:41-46; Marcos 12:35-37)
41Geb degi, Jesús Judío-dummaganga sogded: “¿Degite, ibiga sogmarsunna, we-Cristo, Rey-David-wagwaye? 42Ar David-sunnad soged, Namakleged-Gardagi:
‘Bab-Dummad an-Dummadga sogsad: An-argan-nuedsik be sige,
43be-isdarmalad an bela ogalakuedse be sige.’ ”
Salmo 110:1
44“Ar David, Cristoʼga soged, be an-Dummadye. Degite, ¿Igi-e-wagwaga Cristoʼde gubarsunnoe?”
Jesús, Garda-Narmaked-Dulemargi sunmaksad
(Mateo 23:1-36; Marcos 12:38-40; Lucas 11:37-54)
45Bela dulemar Jesús-itobukwadgi, Jesús na e-sapinganga sogded: 46“Garda-Narmaked-Dulemargi nue salakarmar, mer amaryob be damalo. Ar amardi mor oyaarmakdiir na yeer itodamalad, degine, dulemar bela ese ibmar-ukleged-neggi goledbimalale, yeer itodamarbalid. Amardi Judíoʼmar-onmakedneggi dule-dummagan-gan-sigedginbi sigbidamalad, degine, ibagi mas-gullealir, dummagan-gan-sigedginbi sigbidamarbalid.
47”We-Garda-Narmaked-Dulemar yamo-yardakar ammormar-ei-sui-burgwismalad-ibe neg atursadamalad, degine, dulemar yeer e-dakegala yamo suitii Bab-Dummadse-gorgwisdamalad. Ar we-Garda-Narmaked-Dulemar deyob damaladba bur bule dule-baiganba sabsur-odurdaklemaloed.”
Արդեն Ընտրված.
Lucas 20: cuk
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2014, Wycliffe Bible Translators, Inc. All rights reserved.