Juan 9
9
Jesús dule-ibyasuli-gwalulesad nudaksad
1Jesús nadapgu, machered-wargwen muu-neggi-ibyasuli-gwalulesad dakalid. 2Jesús-sapingan Jesúsʼse egichiarmalad:
—Odurdaked-saila: ¿Ibiga we-dule, ibyasuli gwalulesa? Weyob we gwalulesadi, ¿e-babgan-isgusad-ulale, igi, e-isgusad-ulale?
3Jesús e-sapingan-abin sogded:
—We-dule, e-isgusad-ulale, weyob gwalulessulid. Degi, e-babgan-isgusad-ular, weyob gwalulessurbalid. We-dule ibyasuli-gwalulesadi, adi, Bab-Dummad-ibmar-imaked we-dulegi oyolegegalad. 4Yoo mutik-gued-iduar, anmar dule-an-barmialidga arbaed imakergebed. Ar neg-mutik-gued danikid. Agi, dulemar bar arbaosulid. 5An we-napneggi-gudiidgi, an gwallu-meegwadyob gued. Ani an dulemar-bukwadga igar-napiragwad oyonaid.
6Jesús deyob-sogsad-sorba, napagi-wiaksagu, napa wiigi olli-olli imaksad. Degine, e-googi olli-ollid-wesgu, dule-ibyagi mage-mage imaksad. 7Geb degi, Jesús dule-ibyasulidga sogded:
—Dii-wilasar-naid-Siloéʼye-nugadse be-ibya be enukna.
(Siloé sogleged, Barmilesadye).
Agine dule-ibyasulid ibya-enukega nadsunnad. Ibya enuksagu, bato sunna mag-atake gunonikid. 8E-neg-dikarba-mamaid, degine, dule-ibyasuli-gudidaed-mag-dakmaladi, sogdemalad:
“¿Ar we, dule-ibyasuli, degi, aimarse mani-egisdidaedsursi?”
9Abar sokarmalad: “We, a-dule.” Baigandi sokarmarmogad: “Suli, binsa we a-sunnaa dakleged.”
Geb degi, e-ibeddi sokalid: “Ani an a-dule.”
10Ese egichiarmarsunnad:
—¿Igi nabir magar be atake gusa?
11Dule-nugusad, abin-imakdegu, sogded:
—Dule-wargwen, Jesús-nugadi, napa olli-olli imaksad. Agine an-ibyagi mage-mage imaksad. Geb anga sokalid: ‘Siloéʼse be-ibya be enuknae.’ Degisoggu, an ase nadsunnad. An-ibya an enuksagu, mag-atake an gunonisunnad.
12Geb degi, ega sogdemalad:
—¿Bia a-dule nadsunna?
Dule-nugusad abin-sogded:
—An wissuli, bia nade.
Fariseoʼmar, dule-ibyasuli-gudigusad-nugusad wisgubigualid
13Dule-ibyasuli-gudigusad Fariseoʼmarse senonimalad. 14Ar ade, Jesús napa olli-olli-imaksadi, degi, dule-ibyasulid-onudaksadi, obunnoged-ibagi imaksad. 15Fariseoʼmar dule-ibyasuli-gudigusadse egisdemarmogad:
—¿Igi nabir be ibya nugusa?
Dule-nugusad, abin-sogded:
—Jesús an-ibyagi olli mage-mage imaksad. Degi, an ibya-enuksagu, mag-atake an gunonikid.
16Fariseoʼmar abar sogdemalad: “We-dule Bab-Dummadgi danisulid. Agala, we-dule obunnoged-ibagi dule-nudaksad.” Fariseo-baigandi sogmalad: “Ar dule isgudiile, ¿sunna ibmar-wilubgan-dakledisurmalad imaksi? Suli, geg imake.” Agala, Fariseoʼmar na abin-abin imakarmarsunnad. 17Fariseoʼmar gannar dule-ibyasuli-gudigusadga sokarmalad:
—Dule-bega-ibya-nudaksadgi, ¿igi be sogmosunna?
Dule-nugusad, abin-sogded:
—Andi an soged, we, Bab-Dummad-gayaburba-barsoged-duleye.
18Ar Judíoʼmardi we-dule-ibyasuli-gudigusadi benmalad. Emidi, ibya-nikusye mag-atakye-soged benmalad. A-ulale, dule-ibyasuli-gudigusad-e-serganse gochamarsunnad. 19Ese egisdemalad:
—¿Ar we be-machi-sunnadi? ¿We, be-ibe ibyasuli-gwalulesye be sogmaladi? Ar degite, ¿ibiga emigindi nabir ataksunna?
20E-sergan sogdemalad:
—Anmar wisi, we anmar-machid, ibyasuli gwalulesad. 21Emigindi, mag-atakeddi an wissurmalad, ibiga nabir mag-atake. Anmar wissurbalid, doa ega nabir ibya nudaksa. Ar bato dummadsoggu, ese be egismardo, na e bemarga sogoed, doa ega ibya nudaksa.
22Dule-ibyasuli-gudigusad-e-sergan Judío-dummagan-dobedbali, weyob sogsamalad. Ar ade, Judío-dummagan bato igar-itosmalad, dule-wargwen sogdibeye, Jesús, Bab-Dummad-dule-wargwen-barmidagoye-sogsad-duleye, Judíoʼmar-onmakedneggi onomaloye. 23A-ulale, dule-ibyasuli-gudigusad-e-sergan sogsamalad: “Bato dummadsoggu, ese be egismarye, doa e-onudaksa.”
24Degine, Fariseoʼmar dule-ibyasuli-gudigusadse gannar gochamargu, ese egisdemalad, ega sogdemalad:
—Bab-Dummad-asabin napiragwadba be anmarga sogo, igi be nugusa. Anmardi wismalad, we-dule, dule-isganad.
25Dule-nugusad, abin-imakdegu, sogded:
—An wissulid, we-dule, dule-isgudiiddibe. Unnila ibmar-soggwennaa an wisid. Iduardi, aku an atakenad, emigindi, mag an ataked.
26Fariseoʼmar gannar dule-ibyasuli-gudigusadse egichiarmarbalid:
—¿Igi be-imaksa? ¿Igi-nabir bega ibya nudaksa?
27Dule-nugusad, abin-sogded:
—Ar bato bega an sogsamalad. Be an-itossurmalad. ¿Degite, ibiga gannar be itobimarsunna? ¿Ar bemar e-sapinganga gubimarmosi?
28Fariseoʼmar dule-ibyasuli-gudigusadse uluarmalad, ega sogdemalad:
—Bee be, Jesús-e-sapindo. Anmardi, Moisés-e-sapinganad. 29Anmardi wisid, Bab-Dummad Moisésʼga sunmaksad. We-duledi, anmar wissulid, bia daniki.
30Dule-ibyasuli-gudigusad abinsadgu, sogded:
—¡Ar deyobi! ¡We-ibmar nue-aku itolegedid! Bemardi wissurmalad we-dule bia daniki, degite, angardi ibya nudaksad. 31Ar anmar wisid, Bab-Dummad dule-isgudimalad ese gollalile, itosurdaed. Ar dule-wargwen Bab-Dummad-dobee nanadiirdi, degine, Bab-Dummad-sogedba ibmar imakdiirdi, Bab-Dummad, a-dule ese gollalile, adi, itodaed. 32Ar bipisaale, gwen itoledisulid, dule-wargwen, dule-gusgu-ibyasuli-gwalulesadga ibya nudaksaye. 33We-dule Bab-Dummadgi danisulina, gege deyob ibmar imakenad. Ar emigindi, deyob, ibmar-imakdisoggu, we-dule, Bab-Dummad-akar danido.
34Fariseoʼmar abinsadmargu, ega sogdemalad:
—Bede, isguedgi gwalulesadde, ¿be anmar-odurdakde? Be anmar-odurdakosulid.
Degi, Judío-dummagan, dule-ibyasuli-gudigusad, Judíoʼmar-onmakedneggi onosmarsunnad.
Jesús, burbar dule-ibyasuli-gudimaladgi sunmaksad
35Jesús itoalid, Fariseoʼmar Judíoʼmar-onmakedneggi dule-ibyasuli-gudigusad onosmarye. Geb degi, Jesús a-dule-amisgu, ega sogded:
—¿Dule-Machigi be bensuli?
36Dule-nugusad, abin-imakdegu, sogded:
—Dummad, ¿a-dule, doa-dulesunna? Adi, mer an egi benguegar.
37Jesús, abin-sogded:
—A-dule bato be daksad. Ani an a-duled, bebo sunmakgwichid.
38Dule-ibyasuli-gudigusad, abin-sogded:
—Dummad, an begi bensulid.
Geb degi, Jesús-nug-odummogega Jesús-abin yokorgi-sindigar sigisad.
39Jesús sogded:
—An dulemarga-igar-nabogega, we-napnegse an nonikid. Dule-aku-atakdimalad mag-ataksaega an nonikid. Degi, dulemar-mag-atakmalad, aku-atak-imakega an nonikid.
40Degine, Fariseo-gwenna-gwenna Jesús-walik-gwichimalad, Jesús-degi-soge-itosmargu, ega sogdemalad:
—Ar ¿anmar aku atakmarmode?
41Jesús, amar-abin sogded:
—Ar bemar aku-atakena, be isgued niksurmalanad. Emigindi, bemar sogsoggu, Bab-Dummad-Igar-Maid nue mag an dakmarye. A-ulale, be-isgued begi naimarsundo.
Արդեն Ընտրված.
Juan 9: cuk
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2014, Wycliffe Bible Translators, Inc. All rights reserved.