If you have would like a copy of this version please contact info@davaraudiobibles.org

Odki New Testament © The Pakistan Bible Society (Text), Odki New Testament Audio Bible ℗ 2024, Davar Partners International (Audio)

Odki New Testament

तीजे ङिओ गलील चे काना शहर मां काया बीहा हुता। ईशु ची आई वी ओठे आली हुती, ईशु ते ओचे चैला नु वी ओ बीहा चा छेड़ा ङिला गेलता ला। जिसे बेले दाखरस खत्तम हुती गेला, तां ईशु ची आई ने ईशु नु केहले, “वांचे गोढु नेरा दाखरस कोनी।”
ईशु ने विनु केहले, “हे माई, तु मनु ईं कां किही पली? हालि माया समय कोनी आला।”
ओची आई ने सेवका नु केहले, “जको कहीं वी ओ तम्हानु किहे, ऊंही करने।”
ओठे यहूदिया चे शोद्ध करने ची रीति चे अनुसार पत्थरा चे छाऔ बङे मटके पलते ले, हर हेक मटके मां ङोन जा तीन मण पाणी आते। ईशु ने सेवका नु केहले, “मटका मां पाणी भरती ङिया।” वाणे मटका नु मुँहा तक भरती नाखले। बल्ति ओणे वानु केहले, “हमा पाणी काढ़ती कर भोज़ चे प्रधाना कनु चती जावा।” ते वे चती गेले। ते जिसे बेले भोज़ चे प्रधाना ने ईं पाणी चाखले जको दाखरस बणती गेलते, ते ना जाणता कि ईं किठु आले, पर जिसा सेवका ने पाणी काढ़ले हुते वानु पता हुता। तु भोज़ चे प्रधाना ने बीन्दा नु हकारती, ते ओनु केहले, “हर हेक बन्दे पेहले आच्छा दाखरस ङिये, ते जिसे बेले बन्दी पीती कर रज़ती जई, बल्ति हल्का ङीवी, पर तु आच्छा दाखरस हमा तक मेहलती छोड़ला।”
ईशु ने जको अचम्भे चे काम गलील चे काना शहरा मां करले ईशु ने आपणा हा पेहला चैन्ह ङिखाणती कर आपणी महिमा प्रकट करली ते ओचे चैला ने ईशु उपर विश्‍वास करला।
ऐचे बाद ईशु ते ओचे चैले ते ओची आई ते ओचे भऊ कफरनहूम शहरा मां चाह्‍ली गेली। ते कोच्छ ङिये वे ओठे रेहली।


यहूदिया चा फसह चा तेंहवार गोढु आला, ते ईशु यरुशलेम सनु चाह्‍ला गेला। ओणे मन्दरा मां ङान्द, भेङा ते कबूतर बेचणे आला नु ते सराफा नु ब़ेहले आले ङेखले। तब ओणे बरहीयां चा कोड़ा बणाती कर, सब भेङा ते ङान्दा नु मन्दरा महु काढ़ती छोड़ले, ते सराफा चे पैसे खिंडाती ङिले ते तखत पलटती नाखले। ते कबूतर बेचणे आला नु केहले, “याहनु इठु गेहती जावा। माये ब़ा चे घरा नु व्यपारा चे घर ना बणावा।” बल्ति ओचे चैला नु चैता आला कि लिखले पले, “दुधे घरा ची धोन्‍न मनु खाली जाये।”
ऐचे उपर यहूदिया ने ओनु केहले, “तु अम्हानु किसा चमत्कार ङिखाण सग़ी, कि जाये कनु अम्ही समझु दुधे कनु हा अधिकार छै?”
ईशु ने वानु उत्तर ङिला, “ऐ मन्दरा नु ढाती नाखा, तीन ङिहां चे भीतर मैं ऐनू बणाती नाखी।”
यहूदिया ने केहले, “ऐ मन्दरा नु बणावणे मां छियालीस साल लाग़ले, ते का तु तीन ङिहां मां खड़ा करती ङिये?”
पर जिसे मन्दरा ची बात प्रभु ईशु ने करली वा आपणे शरीरा चे बारे मां केहले। जिसे बेले ओह मुड़दा महु जीती ऊठला, ते ओचे चैला नु याद आले कि जको ईशु ने आप केहले हुते। ते वाणे पवित्रशास्त्र ते ओह वचना उपर ते ईशु उपर विश्‍वास करला।

फसह चे तेंहवारा चे बेले ईशु यरुशलेम मां हुता, ब़ोहत लौका ने चैन्ह नु जको ओह ङिखाणता ङेखती कर ओचे नांवा उपर विश्‍वास करला। पर ईशु ने आपणे आप नु वांचे भरोसे कोनी छोड़ले, कांकि ओह सारा नु जाणता। ओनु ये बाते ची जरुरत कोनी हुती, कि कुई आती कर ओनु लौका चे बारे मां बावड़ो, कांकि लौका चे मना मां का छै, ओ ये बाते नु जाणता।

Լսել यूहन्‍ना 2