Muria, Far Western: Muria Far Western (NT)

Muria Far Western

येसु इद भीळतुन हुळस मटा पोरो अन्जुन उदितुर असके ओनोर चेलालोरक ओना हेरे वातुरक। अनि येसु ओरकुन इदाम उपदेश हियाला लागतुर: येसु इतुर, “मन्दे गरिब मन्तोरक ओर लोकुरक धन्य मन्तोरक बाक्याकि स्वरग राज्य ओराय मन्ता। दुःख किन्तोरक ओर लोकुरक धन्य मन्तोर बाक्याकि ओरकुन शान्ति पुटार। नम्र मन्तोरक ओर लोकुरक धन्य मन्तोर बाक्याकि ओरक दरतिता वारिस आयनुरक। आपुना मेन्दुल साटि करवस्ता अनि एर उन्डावसता लेहका परमेस्वरना मुने येताना योग्य बुतो कियान साटि पकाय विचार किन्तोर ओर लोकुरक धन्य मन्तोरक बाक्याकि ओरक संतुष्ट आयनुरक। दया केवाल लोकुरक धन्य मन्तोरक बाक्याकि ओरकुन परमेस्वर दया कियानुर। मन शुद्ध मन्ता ओर लोकुरक धन्य मन्तोरक बाक्याकि ओरक परमेस्वरतुन हुळानुरक। लोकुरकुन मेल मिलेह किस दरतितिगा शान्ति बनेकेवाल ओर लोकुरक धन्य मन्तोरक बाक्याकि ओरकुन परमेस्वरनोर बालक इन्दानुरक। परमेस्वरना मुने येताना योग्य बुतो कियानाता कारण पकाय तकलिप सहेन किन्तोरक ओरक धन्य मन्तोरक बाक्याकि स्वरग राज्य ओराय मन्ता। नावा पोल्लो मानेमान्तोर ओद कारणते मानेय मिकुन अपमान कियानुरक अनि पकाय तकलिप हियानुरक अनि मिया विरोदते सबोय प्रकारता खराब पोल्लोंग खोटाल इन्दानुरक असके निमाट धन्य मन्तोरिट। स्वरगतिगा मिया प्रतिफळ पकाय हजोर मन्ता इन्जोर पकाय गिरदा किम्ट। ओरक मिया मुने मतोर ओरक परमेस्वरना पोल्लो वेहवालोकुरकुन वने इदे रितिते पकाय तकलिप किस मतोर।”


येसु असा ओरकुन इतुर, “निमाट दरतिता हवोर आन्दिट, मति हवोरता स्वाद बिगळेमात ते अदेन असा बोद चिजते हवोरता स्वाद बनेकियाकिट? अदेन बाहरो हरचियानुर अनि मानेयक अदेन ओवकानुरक दुसरो बोदे बुतोता आय परो। निमाट दुनियाता वेळिचि आन्दिट। मटा पोरो उदिता मन्ता सहेर मकिला परो। अनि लोकुरक टिवरि पयटे किसुन दळिया अडिय इरोर मति अदेन कोपेलातिगा इरान्तोरक। असके अदेनते लोतोर सबोय लोकुरकुन वेळिचि अवान्ता। अदामे दुसरो लोकुरक मिया सोबाय बुतोतुन हुळसुन स्वरगतिगा मन्तोर मिया बाबोना महिमा केविर इन्जोर मिया वेळिचि मानेयकना मुने मान्जि।”

येसु असा ओरकुन इतुर, “नना मूसाना नियम या परमेस्वरना पोल्लो वेहवालोरा पोल्लोतुन नाश कियाला वातोना इन्जोर समजेमायमाट; नाश कियाला आयो मति अदेन पुरा कियान साटि वातोना। बाक्याकि आबार अनि दरति बदलेमायार अचोवनाह मूसाना नियमता उन्दि काना या मात्रा बसकेय बदलेमायो आयार इन्जोर नना मिकुन खरोय इन्तोना। इन्जोर बोरायि इव हुडलाताल हुडला आग्यातिगाडाल बोदे उन्दितुन मानेमायोर अनि अदामे करहानुर ओर स्वरग राज्यतिगा सबोयताल हुडलोर इन्दानुर; मति बोरायि इव आग्याता पालन कियानुर अनि अदेन करहानुर, ओरे स्वरग राज्यतिगा हजोर इन्दानुर। परमेस्वरना मुने येताना योग्य मन्ता मिया बुतो मूसाना नियमतुन करिहवालोर अनि परीसिलोरा सोबाय बुतोताल वने सोबाय आयवि आयकिट ते निमाट स्वरग राज्यतिगा बसकेय हनविट आयकिट इन्जोर नना मिकुन इन्तोना।”

येसु असा ओरकुन इतुर, “हव्कमाट अनि बोरायि बोने हव्कानुर ओर कोरटतिगा दन्डता योग्य आयनुर इन्जोर पुरकातोर लोकुरकुन इतोर निमाट केन्जतोरिट। मति नना ते मिकुन इन्तोना, बोरायि आपुना तमोन होंग कियानुर ते ओर दन्डता योग्य आयनुर, अनि बोरायि आपुना तमोना अपमान कियानुर ते ओर हजोर सभातिगा दन्डता योग्य आयनुर, अनि बोरायि आपुना तमोन मुर्ख इन्दानुर ते ओर नरकता किसता दन्डता योग्य आयनुर। इन्जोर निया दान वेदिता हेरे ततोन असके निया तमोना मन्दिगा निया विरोदते बोदे पोल्लो मन्ता इन्जोर निमा आलिहकि, ते आपुना दान अगाय वेदि मुने इरसिम अनि पहले हन्जुन आपुना तमोन मिलेमाम अनि पजा हन्जुन परमेस्वरना मुने दान सोपे किम। निमा आपुना दुश्मनासंग हरितिगा मन्तोन असके सान्डेय ओन गोतियाल बनेहकिम आयो ते ओर निकुन न्याय केवालिन सोपे कियानुर अनि न्याय केवाल निकुन सिपायि लोकुरकुन सोपे केविर, अनि ओर निकुन जेहलदिगा वाटसियानुर। निमा जुरनामा पुरा-पुरा निहवि आयकि अचोनवनाह अगडाल बाहरो पसियवि आयकि इन्जोर नना निकुन खरोय इन्तोना।”

येसु असा ओरकुन इतुर, “व्यभिचार केमाट इदाम इन्ज मतोर निमाट केन्जतोरिट। मति नना ते मिकुन इन्तोना, बोरायि वासनाता इच्चाते आळदुन हुळान्तोर ओर सबोय लोकुरक आपुना मन्दिगा अदेनसंग व्यभिचार कितोर। निया तिन्दानबासाडा कोन्डा निकुन पाप कियाना कारण आयि ते अदेन टन्डस हरचिम; बाक्याकि निया सबोय मेन्दुल नरकतिगा हरचियानाताल निया मेन्दुलतिगाडाल उन्दि मेन्दुल नाश आयाना मिया साटि सोबाय मन्ता। निया तिन्दान कय निकुन पाप कियाना कारण आयि ते अदेन कदियस हरचिम, बाक्याकि निया सबोय मेन्दुल नरकतिगा हरचियानाताल निया मेन्दुलतिगाडाल उन्दि मेन्दुल नाश आयि ओद निया साटि सोबाय मन्ता।”


येसु असा ओरकुन इतुर, “बोने आपुना मुत्तेन तलाक हियाना इच्चा मन्ता, ते अदेन सोळ चिटि हेविर इन्जोर इन्ज मतोर। मति नना ते मिकुन इन्तोना बोरायि आपुना मुत्तेन व्यभिचारता सिवायि दुसरो बोदायि कारणते तलाक हिन्तोर ते ओर अदेन व्यभिचार किहिन्तोर, अनि बोरायि तलाक हितानसंग मरमिंग किन्तोर ते ओर व्यभिचार किन्तोर।”

येसु असा ओरकुन इतुर, “ ‘खोटाल शपथ केमाट मति आपुना शपथुन प्रबुन साटि पुरा किम्ट’ इन्जोर पुरकातोर लोकुरकुन इन्ज मतोर निमाट केन्जतोरिट। मति नना ते इन्तोना बसकेय शपथ केमाट: स्वरगता पोरोयते शपथ केमाट बाक्याकि ओद परमेस्वरना सिंहासन आन्दु, दरतिता पोरोयते शपथ केमाट, बाक्याकि ओद ओना काल्कना जागा आन्दु, येरुसलेमता पोरोयते शपथ केमाट, बाक्याकि ओद हजोर राजाना सहेर आन्दु। आपुना तलाता पोरोयते शपथ तिनमा बाक्याकि निमा उन्दि वने कलकुन पान्डरि अनि कारयाल कियाला परवि। मति मियांग पोल्लो इंगो ते इंगो या आयो ते आयो मनिंग बाक्याकि बारायि इदेनते पकाय आन्ता ओद खराब केवाल सयतानताल वान्ता।”


येसु असा ओरकुन इतुर, “ ‘कोन्डाता बदला कोन्डा, अनि पलदा बदला पल’ इन्जोर निमाट केन्जतोरिट। मति नना ते मिकुन इन्तोना खराब मानेयना विरोद केमाट; बोरायि निया तिन्दानबासाडा कोरवितिगा हेविर ते ओना मुने दुसरो कोरवि वने किम। नियागा केस किस बोरायि निया मनिला येताना इच्चा केविर ते ओन निया दुपटा वने हिसिम। बोरायि निकुन उन्दि कोसमेन्ड ताकिहिर ते ओनासंग रन्ड कोसक हन। बोरायि नियाकेडाल तलकिर ते ओन हिम अनि बोर नियाकेडाल उदार येताना इच्चा किन्तोर ओन आयो इन्मा।”


येसु असा ओरकुन इतुर, “ ‘निमा आपुना हेरेटोरकुन मया इरा, अनि आपुना दुश्मनसंग दुश्मनि’ इन्जोर निमाट केन्जतोरिट। मति नना ते मिकुन इन्तोना, आपुनोर दुश्मनतुन मया किम्ट अनि आपुनतुन सतेह केवालोर साटि प्रार्थना किम्ट। अदेनते निमाट आपुनोर स्वरगतोर बाबोना बालक ठहरे मायकिट, बाक्याकि ओर दुष्ट अनि खरोय इवुरास पोरो पोळदता वेळिचि मान्जाहन्तोर। परमेस्वरना नियमतुन मानेमातोरक अनि परमेस्वरना नियमतुन मानेमायोर इदाम सबोय लोकुरा पोरो पिर अरहान्तोर। निया मया केवालिन निमा वने मया कियाकि ते निकुन बाताल प्रतिफळ पुटार? टाक्स येतवाल वने इदामे केवोर बहे?”
येसु असा इतुर, “निमाट केवल आपुनोर तमोने नमस्कार कियाकिट ते निमाट बोद हजोर बुतो किन्तोरिट? यहुदि आयोर लोकुरक वने बाताल इदाम केविट बहे? इन्जोर मिवोर स्वरगतोर बाबो परिपूर्ण मन्तोर अदाम लेहका निमाट वने सबोय रितिते परिपूर्ण बनेमाम्ट।”

Լսել मत्ति 5