These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᒋ ᑕᐤ ᒪᒃ ᓇᐸᐤ ᐊᓇᓇᔭᔅ ᐊ ᐃᓯᓂᐧᑲᓱᑦ, ᐎᐛ ᒪᒃ ᓴᐸᐃᕋ ᒋ ᐃᓯᓂᐧᑲᓱᔪᐛ᙮ ᒋ ᐊᑕᐛᐤ ᒪᒃ ᐱᔅᒐ ᐊᓂᔭᔪᐤ ᐊᔅᒋᔪᐤ ᑕᓐ ᑲ ᐃᓯ ᑎᐱᔨᐛᐅᓯᒡ᙮ ᑕᐱᔅᑯᓐ ᒋ ᓂᔅᑯᒧᐅᒡ ᒋᒧᑦ ᒐᒋ ᑭᓄᐛᔨᑎᒪᓱᒡ ᐱᔅᒐ ᐊᓂᔭᔪᐤ ᓱᓇᔭᔪᐤ ᐊᑯ ᒂ ᐃᑐᑐᐛᒡ ᐊᓂᔭᔪᐛ ᐊᑈᔅᑕᓇ ᐊᓂᔭ ᑲ ᐃᔅᐱᔅ ᐃᔅᑯᓇᒡ᙮ ᐊᑯ ᐱᑕᕐ ᒂ ᐃᑕᑦ, “ᐊᓇᓇᔭᔅ, ᒐᒂᓐ ᐛᒋ ᐱᔅᑎᓂᑦ ᒥᒋᒥᓂᑐᐤ ᒐᒋ ᐱᒐᑦ ᒋᑕᐃᒡ, ᒐᒋ ᐃᑐᑕᔅᒃ ᒐᒋ ᑭᑭᒋᔭᒥᑦ ᑲ ᐸᔭᒋᓯᑦ ᐊᒐᐧᒄ, ᒋᒧᑦ ᐊ ᑭᓄᐛᔨᑎᒪᓱᔨᓐ ᐱᔅᒐ ᐊᓐ ᓱᓇᔭᐤ ᑕᓐ ᑲ ᐃᔅᐱᔅ ᑲᓂᔪᐅᔨᓐ ᑲ ᐊᑕᐛᔨᓐ ᐊᓐ ᑲ ᐃᓯ ᑎᐱᔨᐛᐅᓯᔨᓐ ? ᐊᔅᒄ ᐊᑲ ᐅᒋ ᐊᑕᐛᒐᔨᓐ ᒋᑦ ᐊᔅᒋᔾ ᒋᔾ ᔅᒋ ᑎᐱᔨᐛᐅᓯᓐ ᐃᔅᐱ ᒪᒃ ᑲ ᐊᑕᐛᒐᔨᓐ ᔅᒋ ᒥᔨᑯᐅᓐ ᒐᒋ ᐎᔭᔨᑎᒥᓐ ᑕᓐ ᒐ ᐃᑐᑎᒥᓐ ᐊᓐ ᓱᓇᔭᐤ᙮ ᒐᒂᓐ ᑲ ᒪᒥᑐᓇᔨᑎᒥᓐ ᐛᒋ ᐎᔭᔨᑎᒥᓐ ᐅ ᒐᒋ ᐃᑐᑎᒥᓐ᙮ ᓇᒪ ᓇᐸᐤ ᒋ ᑭᑭᒋᔭᒪᐤ, ᒋᓴᒪᓂᑐᐤ ᐊᐅᒄ ᑲᑭᒋᔭᒥᑦ᙮”
ᐃᔅᐱ ᒪᒃ ᐱᔭᑕᐧᒃ ᐊᓇᓇᔭᔅ ᐅᔭ ᐊ ᐃᑕᑭᓄᐅᑦ ᒋ ᐊᑎ ᐸᒋᓯᓄᐤ ᒂ ᐊᑎ ᐳᓂᐱᒪᑎᓯᑦ᙮ ᒥᓯᐛ ᒪᒃ ᐊᓐᒡ ᑲ ᐸᑕᐧᑲᐤ ᒋ ᓴᒋᓱᐅᒡ᙮ ᐅᔅᒋᓂᒋᓱᐅᒡ ᒪᒃ ᒋ ᐸᒋ ᐱᒐᐅᒡ, ᒂ ᐎᔎᔭᒋᓂᒧᐛᒡ ᐊᓂᔭᔪᐤ ᐎᔭᔪᐤ, ᒂ ᐎᐎᑕᐊᒡ, ᑭᔭ ᒂ ᓇᐃᐧᑯᐛᒡ᙮
ᓂᔅᑐ ᑎᐸᐃᑭᓇ ᒪᒃ ᐃᔅᐱᔅ ᐎᐛ ᒂ ᐸᒋ ᐱᒐᔨᒋ, ᒥᒄ ᓇᒪ ᐅᒋ ᒋᔅᒐᔨᑎᒥᔪᐛ ᑕᓐ ᑲ ᐃᔅᐱᔨᒡ᙮ ᐊᑯ ᐱᑕᕐ ᒂ ᐃᑕᑦ, “ᐸᒋ ᐎᑎᒧᐎ, ᐊᐅᒄ ᐊ ᐅ ᒥᓯᐛ ᑲ ᒥᔨᑯᐅᔭᒄ ᓱᓇᔭᐤ ᒋᓇᐸᒻ ᑲ ᐊᑕᐛᒐᔭᒄ ᒋᑦ ᐊᔅᒋᐛᐤ ?” ᒂ ᐃᔅᒋᔄᑦ ᐊᓐ ᐃᔎᐤ, “ᓂᐦᐃ, ᐊᐅᑯᓐ ᐊᓐ ᒥᓯᐛ᙮”
ᐊᑯ ᐱᑕᕐ ᒂ ᐊᑎ ᐃᑕᑦ, “ᒐᒂᓐ ᑕᐱᔅᑯᓐ ᒋᓇᐸᒻ ᐛᒋ ᒋ ᐃᑕᔨᑎᒥᐃᑯᔭᒄ ᒐᒋ ᑯᒂᒋᐃᒪᑯ ᐅᑎᐸᔨᒋᒐᐤ ᐅᑦ ᐊᒐᒂ ? ᐊᓐᒡ ᓇᐸᐅᒡ ᑲ ᓇᐃᐧᑯᐛᒡ ᒋᓇᐸᒪ ᓴᔅ ᒋ ᑎᑯᓯᓄᐅᒡ, ᓇᑕ ᒋᐱᔎᒡ ᓂᐳᐅᒡ᙮ ᑭᔭ ᒋᔾ ᒋᑭ ᐎᐎᑕᐃᑯᒡ ᒧᔭᒻ ᒋᓇᐸᒻ ᑲ ᐃᓯ ᐎᐎᑕᐊᑭᓄᐅᑦ᙮” ᐊᑯ ᐊᓐ ᐃᔎᐤ ᒂ ᐸᒋᓯᐧᒃ ᐊᓐᑕ ᐅᑎᔅᑯᐤ ᐊ ᑕᔨᒋ, ᐊ ᓂᐱᑦ᙮ ᐊᓐᒡ ᒪᒃ ᐅᔅᒋᓂᒋᓱᐅᒡ ᒋ ᐸᒋ ᐱᒐᐅᒡ, ᒂ ᐛᐱᑯᒡ ᒪᒡ ᐊ ᓂᐱᔨᒋ᙮ ᐊᑯ ᒂ ᐎᐎᑕᐊᒡ, ᒂ ᓇᐃᐧᑯᐛᒡ ᐊᓐᑕ ᐅᐱᒪ ᐅᓇᐸᒥᔪᐛ ᑲ ᐱᒥᓯᒪᑭᓄᔨᒋ᙮ ᒥᓯᐛ ᒪᒃ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᑭᔭ ᑯᑎᑭᒡ ᐊᐛᓐᒋ ᑲ ᐸᑕᒡ ᐅᔭ ᐊᒋ ᐃᔅᐱᔨᒡ ᓇᔅᒡ ᑕᑈ ᒋ ᓴᒋᓱᐅᒡ᙮

ᒥᒐᑦ ᒪᒥᔅᑲᒡ ᐛᐸᑎᔨᐛᐅᓇ ᒋ ᐛᐸᑎᔨᐛᐅᒡ ᑭᔭ ᒋ ᐃᑐᑎᒧᒡ ᐊ ᒪᒥᔅᑲᑕᔨᑕᑯᓂᔨᒋ ᒐᒂᔪᐛ ᐊᓐᒡ ᐊᑈᔅᑕᓇᒡ ᐊᓐᑕ ᐊᓂᔭᔪᐤ ᐃᔪᐛ ᐊ ᑕᔨᒋ᙮ ᒥᓯᐛ ᒪᒃ ᐊᓐᒡ ᒧᔅ ᑲ ᒪᒧᐊᔭᒥᐊᒡ ᒋ ᒪᒧᐎᐅᒡ ᒪᓐ ᐊᓐᑕ ᓴᓚᒥᓐ ᐅᒋᐱᔎᒻ ᑲ ᐃᓯᓂᐧᑲᑕᔨᒡ᙮ ᑯᑎᑭᒡ ᒪᒃ ᐊᐛᓐᒋ ᒋ ᓴᒋᓱᐅᒡ ᒐᒋ ᐎᒐᐛᒡ ᒥᒄ ᒪᒃ ᐃᔭᐱᒡ ᓇᔅᒡ ᒋ ᒋᔅᑕᔨᒪᐅᒡ᙮ ᐃᔭᐱᒡ ᒪᒃ ᐊᑐᐎᔅ ᒋ ᐊᑎ ᒥᒐᑐᐅᒡ ᐊᓂᔭᔪᐤ ᑲ ᑎᓯᒡ ᐊᓐᑕ ᐊᓂᔭᔪᐤ ᐊ ᐸᐃᑯᒪᒧᐎᒡ, ᑕᐱᔅᑯᓐ ᓇᐸᐅᒡ ᑭᔭ ᐃᔎᐅᒡ ᒋ ᐊᑎ ᑕᑈᔭᔨᒪᐅᒡ ᒋᓴᓴ᙮
ᐊᓐᒡ ᒪᒃ ᐃᔪᒡ ᐎᔭᐱᒪᒡ ᐊᓂᔭᔪᐛ ᐊᑈᔅᑕᓇ ᐊ ᐃᓯ ᒪᒥᔅᑲᒡ ᐃᑎᔨᒋ ᒋ ᐃᑐᑕᐊᐅᒡ ᐊᓂᔭᔪᐛ ᑲ ᐊᐧᑯᓯᔨᒋ ᐊᓐᑕ ᒪᔅᑭᓇᒡ ᐊᔅᐱᓯᒧᐅᓂᒡ ᑭᔭ ᑕᑎᔭᒋᓂᑭᓂᒡ ᐊ ᐱᒥᓯᓂᔨᒋ, ᐊ ᐃᑕᔨᑕᒡ ᐊᑎ ᒥᒄ ᑕᐅᐅᑯᑥᐛ ᐱᑕᕋ ᐊ ᑎᑲᔅᑕᓯᓂᔨᒋ ᒋᑭ ᒋ ᒥᓏᑎᓯᐅᒡ᙮ ᒥᔅᑎ ᒥᒐᑦ ᒪᒃ ᐃᔪᒡ ᒋ ᑎᑯᓯᓄᐅᒡ, ᐊᓐᑕ ᓂᓇᐧᑯᐤ ᐅᑕᓇᒡ ᐊ ᐅᑐᑕᒡ ᐊᓐᑕ ᐛᔅᑲ ᒋᕈᓯᓕᒥᒡ, ᐊ ᐸᓱᐛᒡ ᐊᐛᔪᐛ ᑲ ᐊᐧᑯᓯᔨᒋ ᑭᔭ ᐊᓂᔭᔪᐛ ᐊᐛᔪᐛ ᑲ ᐱᒋᔅᑲᑯᔨᒋ ᒥᒋ ᐊᒐᒂ᙮ ᒥᓯᐛ ᒪᒃ ᒋ ᒥᓏᒋᐊᑭᓄᐅᔪᐛ᙮

ᐊᑯ ᐊᓐ ᒋᓴᐊᔭᒥᐊᐅᒋᒪᐤ, ᑭᔭ ᒥᓯᐛ ᐊᓂᔭᔪᐛ ᑲ ᐎᒋᐃᑯᑦ ᐊᓂᔭᔪᐛ ᓴᑎᔪᓯ ᑲ ᐃᓯᓂᐧᑲᑕᑭᓄᔨᒋ ᒋ ᐅᑕᔨᒪᐅᒡ ᐊᓂᔭᔪᐤ ᐊᑈᔅᑕᓇ ᐊᑯ ᑲ ᓇᓂᑐᐤ ᒥᔅᑲᒡ ᑕᓐᑕ ᒐᒋ ᐅᒋ ᒋᐱᒋᐊᒡ᙮ ᒋ ᒪᑯᓇᐅᒡ ᐊᑯ ᒂ ᐱᑎᑲᐊᒡ ᐊᓐᑕ ᑲᒪᑯᓄᐛᓯᐅᒋᐛᐱᒡ᙮ ᒥᒄ ᒪᒃ ᐊᓂᔭᔪᐤ ᐊ ᐊᑎ ᑎᐱᔅᑲᔨᒡ, ᐅᑎᐸᔨᒋᒐᐤ ᐅᑦ ᐊᓐᒋᓂᒪ, ᒋ ᓴᓇᔪᐛ ᔅᑐᐧᑭᓇ ᐊᓐᑕ ᑲᒪᑯᓄᐛᓯᐅᒋᐛᐱᒡ, ᐊᑯ ᒂ ᐎᐎᑕᐊᑦ ᐊᓂᔭᔪᐛ ᐊᑈᔅᑕᓇ ᒂ ᐃᑕᑦ, “ᒪᒋᒄ ᓇᑕ ᐃᑐᑕᒄ ᒋᓴᐊᔭᒥᐊᐅᒋᐛᐱᒡ, ᒐ ᐛᐎᑎᒧᐛᑯᒡ ᒥᓯᐛ ᐊᐛᓐᒋ ᐅᔭ ᑲ ᐅᔅᑲᔨᒡ ᐱᒪᑎᓯᐅᓂᔪᐤ᙮”
ᐊᓐᒡ ᒪᒃ ᐊᑈᔅᑕᓇᒡ ᒋ ᓇᐃᑐᐛᐅᒡ ᐅᔭ ᑲ ᐃᑎᑯᒡ᙮ ᐃᔅᐱ ᒪᒃ ᐊ ᐊᑎ ᐸᑕᐱᓂᔨᒡ ᒋ ᐱᒐᐅᒡ ᒋᓴᐊᔭᒥᐊᐅᒋᐛᐱᒡ, ᐊᑯ ᒂ ᒋᒋ ᒋᔅᑯᑎᒪᒐᒡ᙮
ᐊᑯ ᐊᓐ ᒋᓴᐊᔭᒥᐊᐅᒋᒪᐤ ᑭᔭ ᐊᓂᔭᔪᐛ ᑲ ᐎᒋᐃᑯᑦ ᒋ ᐎᓴᒪᐅᒡ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ ᒥᓯᐛ ᒪᒧᐤ ᒐᒋ ᒪᒧᐎᒡ᙮ ᐊᑯ ᒂ ᐃᑎᓴᐛᒡ ᐊᐛᔪᐛ ᐊᓐᑕ ᑲᒪᑯᓄᐛᓯᐅᒋᐛᐱᒡ ᒐᒋ ᐸᓱᐛᑭᓄᔨᒋ ᐊᓂᔭᔪᐛ ᐊᑈᔅᑕᓇ ᐊᓐᑕ ᐊ ᑕᒡ᙮ ᒥᒄ ᒪᒃ ᐃᔅᐱ ᑕᑯᓯᓂᒡ ᐊᓐᒡ ᐊᓯᒪᑭᓂᓯᒡ ᐊᓐᑕ ᑲᒪᑯᓄᐛᓯᐅᒋᐛᐱᒡ, ᓇᒪ ᐅᒋ ᒥᔅᑯᐛᐅᒡ ᐊᓂᔭᔪᐛ ᐊᑈᔅᑕᓇ ᐊᓐᑕ᙮ ᐊᑯ ᑲᐤ ᒂ ᒋᐛᒡ ᐊᓐᑕ ᑲ ᒪᒧᐎᓇᓄᐎᒡ, ᒂ ᐎᑕᒡ ᐊ ᐃᔅᒋᔄᒡ, “ᐃᔅᐱ ᑲ ᑎᑯᓯᓂᔭᒡ ᓇᑕ ᑲᒪᑯᓄᐛᓯᐅᒋᐛᐱᒡ, ᒥᓯᐛ ᓇᔅᒐ ᒋ ᐊᑎᓴᑲᐃᑭᓄᐤ, ᑭᔭ ᐊᓐᒡ ᐊᓯᒪᑭᓂᓯᒡ ᑲ ᓂᓇᑭᑐᐛᔨᑕᒡ ᒋ ᑕᐅᒡ ᐊᓐᑕ᙮ ᒥᒄ ᒪᒃ ᐃᔅᐱ ᑲ ᓴᓇᒋᒡ ᐊᓐᒡ ᔅᑐᐧᑭᓐᒡ, ᓇᒪ ᓂ ᐅᒋ ᒥᔅᑯᐛᓇᓐ ᐊᐛᓐ ᒐᒋ ᑕᑦ ᐊᓐᑕ ᐱᑎᑭᒥᒡ,” ᒋ ᐃᑕᐅᒡ᙮ ᐃᔅᐱ ᒪᒃ ᐊᓐ ᑲ ᐅᒋᒪᐅᑦ ᐊᓂᔭᔪᐤ ᐊᓯᒪᑭᓂᓴ ᐊᓂᔭᔪᐤ ᒋᓴᐊᔭᒥᐊᐅᒋᐛᐱᔪᐤ ᑲ ᓂᓇᑭᑐᐛᔨᑎᒥᔨᒋ, ᑭᔭ ᐊᓐᒡ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᐱᔭᑕᒡ ᐅᔭ, ᒋ ᒥᔅᑲᑕᔨᑎᒥᐃᑯᐅᒡ ᑕᓐ ᑲ ᐃᔅᐱᔨᒋ ᐅᔭ ᐊᑈᔅᑕᓇ᙮
ᐊᑯ ᐸᐃᒄ ᐊᐛᔪᐛ ᑲ ᐸᒋ ᓂᑐᐛᐱᒥᑯᒡ ᐊ ᐃᑎᑯᒡ, “ᐊᓐᒡ ᓇᐸᐅᒡ ᑲ ᒪᑯᓇᑯᒡ, ᒪᒂᒡ ᒋᔅᑯᑎᒪᒐᐅᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ,” ᒋ ᐃᑕᐤ᙮ ᐊᑯ ᒪᒃ ᐊᓐ ᐊᓯᒪᑭᓂᓴ ᑲ ᐅᒋᒪᐅᑦ, ᑭᔭ ᐊᓂᔭᔪᐛ ᐅᑦ ᐊᓯᒪᑭᓂᓯᒪ ᒂ ᓂᑐᐛᐱᒪᒡ ᐊᓂᔭᔪᐛ ᐊᑈᔅᑕᓇ ᒂ ᐸᓱᐛᒡ ᒥᓐ ᐊᓐᑕ ᑲ ᒪᒧᐎᓇᓄᐎᒡ᙮ ᒋᔭᒻ ᒋ ᐃᑐᑕᐊᐅᒡ ᐊᓐᑕ ᐊᓂᔭᔪᐛ ᐊᑈᔅᑕᓇ ᐛᔅ ᒋ ᑯᔅᑕᐅᒡ ᐊᓂᔭᔪᐛ ᐃᔪᐛ ᒐᒋ ᓂᐸᐃᑯᒡ ᐊ ᐱᐳᒧᓯᓇᑕᐅᑯᒡ᙮

ᒋ ᐸᓱᐛᐅᒡ ᐊᓂᔭᔪᐛ ᐊᑈᔅᑕᓇ ᒂ ᐅᑎᔅᑯᑲᐳᐊᒡ ᐊᓐᑕ ᑲ ᐊᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ ᐊ ᑕᔨᒋ᙮ ᐊᑯ ᐊᓐ ᒋᓴᐊᔭᒥᐊᐅᒋᒪᐤ ᒂ ᐃᑕᑦ, “ᔅᒋ ᐃᑎᑎᓇᓐ ᔭᐃᑕᔾ ᒐ ᐊᑲ ᒥᓐ ᒋ ᒋᔅᑯᑎᒪᒐᔭᒄ ᒋᓴᔅ ᐅᑦ ᐃᓯᓂᐧᑲᓱᐅᓐ᙮ ᑕᓐ ᑲ ᐃᑎᔭᒄ ᒪᒃ᙮ ᒥᓯᐛ ᐊᓐᑕ ᒋᕈᓯᓕᒥᒡ ᔅᒋ ᐃᓯ ᒋᔅᑯᑎᒪᒐᓇᐛᐤ, ᑭᔭ ᒋ ᐎ ᐃᑐᑐᐅᓇᓐ ᓂᔭᓐ ᒐᒋ ᐊᑕᒪᔨᒥᑯᐅᔭᒡ ᒋᓴᔅ ᑲ ᓂᐸᐊᑭᓄᐅᑦ᙮”
ᐱᑕᕐ ᑭᔭ ᐊᓐᒡ ᑯᑎᑭᒡ ᐊᑈᔅᑕᓇᒡ ᒋ ᐃᓯ ᐎᑎᒧᐊᐅᒡ ᐊ ᐃᑕᒡ, “ᐊᔪᐛᒃ ᐃᑕᔨᑕᑯᓐ ᒋᓴᒪᓂᑐᐤ ᒐᒋ ᓂᓇᐃᑐᐎᒋᑦ ᐃᔅᐱᔅ ᑯᑎᒃ ᐊᐛᓐ᙮ ᐊᓂᔭᔪᐛ ᒋᓴᒪᓂᑐᐛ ᑲ ᐊᑐᔅᑯᐛᒡ ᐊᓂᔭᐧᑲ ᐊᓂᔅᒐ ᒍᑕᐎᓄᒡ, ᐊᐅᒄ ᐅ ᑲ ᐅᓂᔅᑲᓇᑦ ᒋᓴᓴ ᐊᓐ ᑲ ᓂᐸᐊᒄ ᒋᐱᔭᑎᑯᒡ᙮ ᒋᓴᒪᓂᑐᐤ ᒪᒃ ᒋ ᒋᔅᑕᔨᑕᑯᐊᐤ ᒋᓴᓴ ᐅᒥᔪᐅᓂᒡ ᐃᑕᒐ ᐊᒋ ᐊᔭᑦ, ᒐᒋ ᐅᒋᒪᐎᔨᒋ ᑭᔭ ᒐᒋ ᐱᒪᒋᐃᐛᔨᒋ, ᑭᔭ ᒐᒋ ᐃᑐᑐᐛᑦ ᐃᔅᕋᐃᓪ ᐃᔪᐛ ᒐᒋ ᒂᔅᑲᑎᓯᔨᒋ ᑭᔭ ᒐᒋ ᐛᐸᔨᑎᒧᐛᑭᓄᔨᒋ ᐅᒥᒋᑥᐅᓂᔪᐛ᙮ ᓂᔭᓐ ᒪᒃ ᓂ ᑎᐸᑐᑕᓇᓐ ᐛᔅ ᓂᒋ ᐛᐸᑕᓇᓐ ᐅᔭ ᑲ ᐃᔅᐱᔨᒋ, ᑭᔭ ᑲ ᐸᔭᒋᓯᑦ ᐊᒐᐧᒄ ᐊᓂᔭᔪᐛ ᒋᓴᒪᓂᑐᐤ ᑲ ᒥᔭᑦ ᐊᐛᔪᐛ ᑲ ᓂᓇᐃᑕᑯᑦ ᑭᔭ ᐎᔾ ᐎᑎᒪᒐᐤ ᐊ ᑕᑈᒥᑭᓂᔨᒡ ᐊᓂᔭᔪᐤ ᑲ ᐃᔅᐱᔨᒡ᙮”
ᐃᔅᐱ ᒪᒃ ᐱᔭᑕᒡ ᐅᔭ ᐊᓐᒡ ᑲ ᒪᒧᐎᒡ ᐊᓐ ᑲ ᓂᑲᓂᐱᑦ ᒋᓴᐊᔭᒥᐊᐅᒋᒪᐤ ᑭᔭ ᐊᓂᔭᔪᐛ ᑲ ᐎᒋᐃᑯᑦ ᒋ ᒥᔅᑎ ᒋᔄᓱᐅᒡ, ᐊᑯ ᒂ ᑯᒂᑕᔨᑕᒡ ᒐᒋ ᐃᔅᒋᔄᒡ ᒐᒋ ᓂᐸᐊᑭᓄᔨᒋ ᐅᔭ ᐊᑈᔅᑕᓇ᙮ ᒋ ᑕᐤ ᐸᐃᒄ ᐸᕆᓯ, ᐊ ᐊᔅᑎᐱᑦ ᐊᓐᑕ ᐊ ᐊᐱᔅᑕᑭᓄᐎᒡ ᑎᐸᔅᑯᓂᒐᐅᓂᔪᐤ, ᑲᒪᓕᔭᓪ ᐊ ᐃᓯᓂᐧᑲᓱᑦ᙮ ᐅ ᓇᐸᐤ ᐊ ᒋᔅᑯᑎᒪᒐᑦ ᐊᔭᒥᐊᐅ ᐎᓱᐛᐅᓂᔪᐤ ᒋ ᐃᑕᐱᑎᓯᐤ, ᓇᔅᒡ ᒪᒃ ᒋ ᒋᔅᑕᔨᒪᑭᓄᐤ᙮ ᒋ ᐅᐱᑲᐳᐤ ᐊᓐᑕ ᐊᓂᔭᔪᐤ ᐊ ᒪᒧᐎᓇᓄᐎᒡ, ᒂ ᐃᑎᓱᐛᑕᑦ ᐊᓂᔭᔪᐛ ᐊᑈᔅᑕᓇ ᒐᒋ ᐎᐎᔨᒋ ᐸᑎᒪ᙮ ᐊᑯ ᑲᒪᓕᔭᓪ ᒂ ᐃᑕᑦ ᐊᓂᔭᔪᐛ ᑲ ᒪᒧᐎᔨᒋ, “ᒋᔨᐛᐤ ᓇᐸᑐᒄ ᐅᑕ ᐃᔅᕋᐃᓪ ᑲ ᑕᔭᒄ, ᐃᔭᒂᒥᒄ ᑕᓐ ᐛ ᐃᑐᑐᐛᑯᒡ ᐅᒡ ᓇᐸᐅᒡ᙮ ᒋ ᒋᔅᒋᓯᑐᑐᐛᐛᐤ ᐊ ᐛᔅᑭᒡ ᓇᐸᐤ ᑎᔪᑕᔅ ᑲ ᐃᓯᓂᐧᑲᓱᑦ ᑲ ᑎᑯᓯᐧᒃ ᐊ ᐃᔅᒋᔄᑦ ᓇᔅᒡ ᐊ ᒋᔅᑕᔨᑕᑯᓯᑦ ? ᒂᔄᓐ ᒪᒃ ᓇᐤ ᒥᑕᓯᒥᑎᓄᐤ ᓇᐸᐛ ᒋ ᓇᓴᐅᑯᐤ᙮ ᒥᒄ ᒪᒃ ᒋ ᓂᐸᐊᑭᓄᐤ, ᒥᓯᐛ ᒪᒃ ᐊᓂᔭᔪᐛ ᑲ ᓇᓴᐅᑯᑦ ᑕᑎᐸᓐ ᒋ ᑕᔪᐛ ᑭᔭ ᐊᓂᔭᔪᐤ ᑲ ᐃᑎᑦ ᓇᒪ ᓴᔅ ᐊᐱᑕᔨᑕᑭᓄᐅᔪᐤ᙮ ᒪᒂᒡ ᒪᒃ ᒍᑎᔅ, ᐊᓐ ᑲᓕᓕ ᑲ ᐅᒋᑦ, ᒋ ᑎᑯᓯᓐ ᒪᒂᒡ ᑲ ᐊᒋᒪᑭᓄᔨᒋ ᐃᔪᐛ᙮ ᑭᔭ ᐎᔾ ᒪᒃ ᒋ ᒥᒐᑎᔪᐛ ᐊᐛᔪᐛ ᑲ ᓇᓴᐅᑯᑦ, ᒥᒄ ᒪᒃ ᑭᔭ ᐎᔾ ᒋ ᓂᐸᐊᑭᓄᐤ ᑭᔭ ᒋ ᐃᒐᔭᒧᒐᓄᐎᔪᐛ ᐊᓂᔭᔪᐛ ᑲ ᓇᓴᐅᑯᑦ᙮ ᐅ ᒪᒃ ᒋ ᐎ ᐎᑎᒪᑎᓇᐛᐤ, ᐊᑲᐎᔾ ᒐᒂᔪᐤ ᐃᑐᑐᐛᐧᑯᒡ ᐅᒡ ᓇᐸᐅᒡ ᐊᑈᔅᑕᓇᒡ ᑲ ᐃᓯᓂᐧᑲᑕᑭᓄᐅᒡ, ᐛᔅ ᐅᒋᔅᑯᑎᒪᒐᐅᓄᐛᐤ ᑭᔭ ᐅᑦ ᐃᑐᓄᐛᐤ ᐎᔨᐛᐤ ᐊ ᑕᒡ ᐛᒋᒥᑭᓂᒂᓂ ᓇᒪ ᓇᐅᔅ ᒋᑭ ᐅᒋ ᐊᐱᑕᔨᑕᑭᓄᐅᔪᐤ᙮ ᒥᒄ ᒪᒃ ᒋᓴᒪᓂᑐᐛ ᐊ ᑕᔨᒋ ᐛᒋᐱᔨᒂ ᓇᒪ ᒋᑭ ᒋᐱᒐᐊᐛᐅᒡ ᐛᔅ ᒧᔭᒻ ᐎᔾ ᒋᓴᒪᓂᑐᐤ ᐊ ᓂᔅᑯᔅᑐᐛᒄ ᐊᐅᑯᓐ ᒐ ᐃᓯᓇᑯᓯᔭᒄ᙮” ᐊᐅᑯᓐ ᒂ ᐃᔅᒋᔄᑦ ᑲᒪᓕᔭᓪ᙮
ᐊᓐᒡ ᒪᒃ ᓇᐸᐅᒡ ᑲ ᒪᒧᐎᒡ ᒋ ᑕᑈᑐᐛᐅᒡ ᐊᓂᔭᔪᐛ ᑲᒪᓕᔭᓚ ᐅᔭ ᑲ ᐃᔅᒋᔄᔨᒋ᙮ ᐊᑯ ᒂ ᐎᓴᒪᒡ ᐊᓂᔭᔪᐛ ᐊᑈᔅᑕᓇ, ᐊᑯ ᒂ ᐃᔅᒋᔄᒡ ᒐᒋ ᐸᐱᓯᔅᑕᐛᑭᓄᔨᒋ, ᑭᔭ ᒋ ᐃᑎᓱᒪᐅᒡ ᐊᑲ ᒥᓐ ᓂᑕ ᒐᒋ ᐛᐎᑎᒥᔨᒋ ᒋᓴᓴ ᐅᑦ ᐃᓯᓂᐧᑲᓱᐅᓂᔪᐤ, ᐊᑯ ᒂ ᐱᔅᑎᓇᒡ᙮ ᐊᓐᒡ ᒪᒃ ᐊᑈᔅᑕᓇᒡ ᒋ ᔅᑐᑕᐅᒡ ᐊᓐᑕ ᑲ ᒪᒧᐎᔨᒋ ᐊᓂᔭᔪᐛ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ ᐊ ᓯᒋᔭᓯᒡ ᐊᒋ ᑕᐱᒐᔨᒥᑯᒡ ᒋᓴᒪᓂᑐᐛ ᒐᒋ ᓂᓇᐧᑲᑕᔨᒧᒡ ᒋᓴᓴ ᐅᑦ ᐃᓯᓂᐧᑲᓱᐅᓂᔪᐤ ᐅᒡ᙮
ᐊᑯ ᒪᒃ ᐊᓯᑯᒻ ᒋᓯᑲᐛ ᐊᓐᑕ ᒋᓴᐊᔭᒥᐊᐅᒋᐛᐱᒡ ᑭᔭ ᐊᓐᑕ ᐊᐛᔪᐛ ᐎᒋᔨᒡ, ᐃᔭᐱᒡ ᒋ ᒋᔅᑯᑎᒪᒐᐅᒡ ᑭᔭ ᒋ ᑭᒐᔅᒋᒧᐅᒡ ᒋᓴᔅ ᙭ᑕ ᐊ ᐊᔨᒧᒪᒡ, ᐊᓂᔭᔪᐛ ᒋᓴᒪᓂᑐᐛ ᑲ ᐸᒋ ᐃᑎᓴᐛᔨᒋ᙮

Լսել ᐊᑈᔅᑕᓇᒡ 5