GÉNESIS 8
8
Ɨporu guasu iyapɨ
1Jare Tumpa imaendúa Noé re, jare opaete mbaemɨmba reta jae ndive ñogüɨnoi arca pe vae re. Jare Tumpa ombou ɨvɨtu ɨvɨ iárambo, jare ɨ omboɨpɨ jagüe. 2Oyeokenda ɨguasu jɨru ɨvɨgüɨ kotɨ jare ama jape oyeokenda vi ara pe. Jare ama opoo. 3Ɨ jagüe mbegüe mbegüe pe ɨvɨ iárambo güi; jare ɨ opa jagüe ciento cincuenta araa pe ramo. 4Jare arca oguapɨ ɨvɨtɨ guasu Ararat jee vae iárambo chiúa yasɨ re, diecisiete araa pe. 5Kuae jae ko ara tenondegua jókuae yasɨ payandepoa re, ɨ jekuaeño jagüe oiko, jayave etei omboɨpɨ oyekuaa ɨvɨtɨ guasu reta iyapɨte.
6Cuarenta araa pe Noé oipea arca iventana jae oyapogüe. 7Jare omondo metei chucha, kuae ojo jare oyerova mbovɨ ye rupi, opa ɨ tɨpa ɨvɨ iárambo güi regua. 8Omondo vi metei pɨkasu, oikuaa vaerä opa ma ra ɨ tɨpa ɨvɨ iárambo güi vae. 9Jókuae pɨkasu mbaetɨ oväe kia pe oguapɨ vaerä, jare ou ye arca pe Noé oïa pe. Echa jekuaeño ɨ oime ɨvɨ iárambo. Jayave Noé omoë ipo jare oipɨɨ omoinge arca pe.
10Oäro ye chiu ara rupi, jayave ramo omondo ye pɨkasu arca güi ikatu kotɨ. 11Jare pɨkasu ou ye ikotɨ kaaru ma yave; güeru itï pe ɨvɨra olivo jee vae joogüe. Noé oikuaa ɨ opa ma ko jagüe vae. 12Ërei oäro ye ïru chiu ara, jayave ramo omondo ye pɨkasu, ërei añave mbaetɨ ma oyerova ye ikotɨ.
13Noé seisciento uno año ma güɨnoi yave ɨ opa tɨpa ɨvɨ iárambo güi, metei ara ma tenondegua yasɨa re. Noé oipea arca jare omae yave oecha opa ma ɨvɨ otini. 14Mokoía yasɨ re, veintisiete araa pe opa ɨvɨ otiniasɨ. 15Jayave Tumpa omomiari Noé, jei reve: 16“Eë arca güi nde jare nderembireko, jare nderaɨ reta jembireko reve reve toë reta nde ndive. 17Enoe vi opaete mɨmba reta ñogüɨnoi nde ndive vae: Güɨra reta, jevae reta jare opaete ipɨtía re oguata vae. Jare toyogüɨraja toñemuña reta ɨvɨ iárambo rupi.”
18Jayave Noé oë jembireko ndive jare taɨ reta jembireko reve reve ñogüɨnoe jae ndive. 19Jare vi opaete mɨmba reta, jare opaete ipɨtía re oguata vae jare opaete güɨra reta, jare opaete ɨvɨ iárambo omɨi vae ñavo oë reta arca güi. 20Noé omopüa mɨmba oyeyuka oyeapɨ jese vae yandeYa peguarä, jare oipɨɨ mɨmba oyeu vae ñavo güi, güɨra oyeu vae ñavo güi, oyuka omee opaetei oyeapɨ vae Tumpa pe. 21YandeYa oëtu yave ipiche katu mbota, jei ipɨa pe: “Ngaraa ye ma ayepopeyu ɨvɨ re kuimbae jeko pegua, yepe tëi kuimbae taɨrusu güive ipɨa pɨ̈chɨi yae vae reño; ngaraa ye ma amboai opaete oikove vae añave ayapo rami.
22Oime ɨvɨ oiko ramboeve
ngaraa opɨta maetɨ jare mbaarɨvo;
iroɨ jare araku,
araku guasu jare iroɨ guasu,
ara jare pɨ̈tu.”
Jelenleg kiválasztva:
GÉNESIS 8: GUABD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Biblia DC Guaraní Bolivia © Bolivian Bible Society, 2001.
