KAHTAMYENGHAN 12
12
Kahwangpawe Abramte Nyik
1 #
Lam 7.3; Heb 11.8. Sha-a Youngwanpawe Abram te i, “Nang chingshao nyoi mepu, hüyange nang kahtalan mepu, hüyange nangpa nok mepu yayonge Taowe nangte hüolak kahtok te taitüoh. 2#Kaht 15.5; 17.4,5; 18.18; 22.17; 28.14; 32.12; 35.11; 46.3.Taowe nanga jat üyongne lingtamlak. Taowe nang moiman tamlak hüyange nang min ütahpa ne menge tamlak, tüokaiye nanga moiman tüopa ja ne menglak. 3#Kaht 18.18; 22.17,18; 26.4; 28.14; Gal 3.8.Aoyinne nang moiman tamlakei, Taowe iman moiman tamlak; hüpoi aoyinne nang te phoiwümlakei Taowe imante phoiwümlak. Hüyange nang kaiye kahtoknyu jatlan üshei te moimanlak.”#nangte moimanpu kih-e moiman pha she, jatlan-e ilak
4Tüokhei Youngwanpawe Ite ipu kih-e Abram tai; hüyange Lot I phei tai. Haran mepu yayonge taiwante Abram nyupuh wangpeng denyit me nga ngoh yangki. 5Hüyange Abram-e I shekonyu Sarai, hüyange I nao üha Lot, hüyange iman-e yopu iman me nangpu üshei, hüyange kahta hangshin iman-e Haran me woijem, tüolan khongkümpu woiye tai, hüyange iman-e Kanan kahtok te taine yayong. Aope Kanan kahmük te iman pei, 6Abram Shekhem kahmük lin-e Moreh mepu longkhampee ngoi. Hüwante tüopa kahmük me Kananlan nyoi tei-e ngohyangki. 7#Kaht 13.15; 15.18; 17.8; 24.7; 26.3; 28.4,13; 35.12; 48.4; Lam 7.5; Gal 3.16.Hüwante Youngwanpa Abram tangte ngai, hüyange Ite i, “Nang huhayimlan te Taowe phalak kahmük-a tüopa ngohnang.” Hüwante tüokenme Youngwanpa ao I tangte ngaiye hüo, Iye I jingne wümjong ja ling. 8Tüophei me Iye tüomepu Bethel heong kahtang yete yayonge tai, hüyange Bethel henyip hüyange Ai heongye me Iye yoi nyenok we. Hüyange tüoken me Iye Youngwanpa jingne wümjong linge Youngwanpa min me nyik. 9Hüyange Abram nyoijing ja mepu ja she yelakpe Kanan heye kaote tai.
Egypt Me Abram Hei Sarai
10 #
Kaht 20.1-18; 26.7-11. Sha-a tüopa kahmük me seanyao yenglepu ngoh. Tüokhei Abram Egypt te tüo me yinpa ja kih-e nyoine tai, hangjingne tüopa kahmük me seanyaoyengle loi-e ngohyangki. 11Aope I Egypt te onglak owe pei, Iye yoi shekonyu Sarai te i, “Taowe nanga leilak jingne yeong shemei yaomapu sheko ja she mei mei-e shingnang; 12hüyange aope Egypt lan-e nang ngelakeih, iman-e ikülak, ‘hatüo-a I sheko’; tüophei me iman-e tao toikülak, hüpoi iman-e nanga yin angkülak. 13Nanga ü-nao üja she ikei, hüke nange ipu kaiye üjingne meikülak, hüyange nang kaiye ü-üyin yinpu okkülak.” 14Aope Abram Egypt te ongyapeih, Egyptlan-e shekonyuwa yeonge naoyha meiye nge. 15Aope Pharaoh ahnghalan ne yha nge, iman-e yha naoyha meipu jeng ahngpate i. Tüokhei yha-a Pharaoh nokte yah-e pei. 16Yha jing ne ahngpawe Abramte meimawe jon hüyange Ite nyee ükhong hüyange younlan, mahulan, gadolan, rhalan, hüyange udhlan pha.
17Hüyangpoi ahngpawe Sarai yahpu jingne Youngwanpawe nyam nyam shepu dak ümeng Ite hüyange ahngnok me ngohpu kahtalan te peine tam. 18Tüokhei ahngpawe Abramte nyik hüyange Ite tonge i, “Nange üte lingpu hatüowa hanghe shi? Hangne yha-a nenok shekonyu üja she üte ye-ipu? 19‘Yha ü-nao üja’ she hangne nange ipu? Tüokhei taowe yha-a ü-sheko ne yah. Sha-a hüma-a nenok shekote leiyah, yha yayah, hüyange tai te pha.” 20Hüyange Pharaohwe kahmük mepu Abram yanne taine tamlak jingne yoi kahtalan te ngao pha, hüyange iman-e I me nangpu üshei phei lünge teiye taine tam.
Jelenleg kiválasztva:
KAHTAMYENGHAN 12: KONYBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
