Luka 11

Jeso Wabayiisha ba Shiciiya bakwe Kukomba

(Matayo 6:9-13; 7:7-11)

1Ciindi cimwi Jeso wakaakukomba kubusena bumwi. Naakamana kukomba, umwi wa bashiciiya bakwe wakamwaambila ati, “Mwami, tuyiishe kukomba, ukoya Johani mbwakayiisha ba shiciiya bakwe.”

2Jeso wakabaambila ati, Ciindi nimukomba, kamwaamba ati,

“Taata,

alilemekwe izhina lyako,

abuzhize bwami bwako.

3Utupe bwasunu shilyo shesu shabuzuba u buzuba.

4Utulekelele milandu yesu,

nkaambo aswe mbutubalekelelalela bali milandu kulyuuswe.

Utatweenzha mukutepaulwa.”

5Ulimwi Jeso wakabaambila ati, “No mulatelaika buti, kuti umwi wenu waya kuŋanda yamulongwaakwe akati kamashiku, waya kwaamba ati, ‘mulongwaangu njohwa shinkwa shotatwe, 6ndaswaiwa mweenzu ndabula cilyo cakumupa.’ 7Inzho atwaambe ati, mulongwaako wezo uuli muŋanda wakutaba ati, ‘Utampenzha, sa tukubwene ku mulyango ati nkuyale? Ulimwi ume ubanangu toona kale. Nshikonzha kubuka kwaamba nkupe cinkwa.’ 8Inzho ume ndazanda kumwaambila bolya, nikuba kuti tazanda kubuka kwaamba akupe cinkwa nkaambo kakuti mulongwaako, ulabuka u kukupa shoonse nshuuzanda, ukaambo kakuti wiina kulisenda, ulimwi watatanana kulomba. 9Ubobo ndamwaambila ati, Amupumpe mulakatambula, amukapule mulakayana, amukonkomone mulakayalulilwa mulyango. 10Nkaambo kufwumbwa uupumpa ulatambula, aze ukapula ulayana, umulyango ulayalulwa kuli oonse wezo ukonkomona. 11No kuti mwana kapumpa inswi kwa ushi, sa ushi ulamupa muzoka? 12Na wapumpa iyi, sa ulamupa kapilili? 13Inzho naa kuti umwe nubashishibi mulicizhi kupa banenu shintu shibotu, sa Ushenu uuli kwizeulu, takaabaali kupa Moza Usalala kuli babo bamupumpa?”

Jeso u Belizebule

(Matayo 12:22-30; Maako 3:20-27)

14Jeso wakookusha moza mubiyabi wabushicintaamba mu muntu. Inzho moza mubiyabi niwakamuhwa, muntu wezo wakacilozha kwaamba. Ubobo, bantu banji banji bakaakuliwo bakazoowa cini cini. 15#Mat 9:34; 10:25Pele bamwi akati kabo bakaamba ati, “Ngu Belizebule, mwami wa myoza mibiyabi nguumupa insana shakukusha myoza mibiyabi.”

16 # Mat 12:38; 16:1; Mk 8:11 Bamwi kabali bashikumulingulula Jeso, ubobo bakamupumpa kwaamba acite maleele aatondezha ati cini cini Leza nguwakamutuma. 17Pele Jeso wakazhiba ncibaakutelaika, wakabaambila ati, “Bantu ba mucishi cili comwi, kuti baandaana mu mipampo mipampo, ceco cishi tacikatazha kuzunda. Ulimwi kuti bantu bamukowa balwishanya beni ubeni, mukowa wezo ulazundika. 18Abo bwami bwaka Shaatani kuti bwalilwisha bwini no bulazhima buti? Ndabuzha bobo kaambo mulaamba ati Belizebule nguumpa insana shakukusha myoza mibiyabi. 19Ume ndakusha myoza mibiyabi munzhila njiyona bamucilila njibasebezha. No nkaamboonzhi mulaamba ati ndakusha myoza mibiyabi munsana sha Belizebule? Mbubona bamucilila mbubakaamuzuzha ukumutondezha ati tamululeme. 20Tali Belizebule pe, Moza wa Leza nguumpa insana shakukusha myoza mibiyabi, calo citondezha ati Bwami bwa Leza bwashika kulyuumwe.

21“Kuti Shaatani kalibambile u shilwisho shakwe shoonse, kalinda iŋanda yakwe, lubono lwakwe lulalikalila muluumuno. 22Pele kuti kwashika uumwi umubaala insana, wamulwisha ukumuzunda, ulamunanga shilwisho shakwe nshaashoma ukwaabanya lubono ndwaakananga bantu.

23 # Mk 9:40 “Kufwumbwa uteendelezhanya ame, ati ngushinkondoma, u wezo ngututeembeli aze, ati ulasangaula.”

Moza Mubiyabi Wapiluka mu Muntu

(Matayo 12:43-45)

24“Kuti moza mubiyabi wamuhwa mu muntu, uleendeenda mulukula kuya bukapula kwakulyoocezhezha. Watayana ulaamba ati, ‘Ndabweela bulyo kuŋanda yangu nkundakahwa.’ 25Inzho apiluka, ulayana iŋanda ilibambilwe ilasalala. 26Amana ulapiluka kuya kuleta myoza mibiyabi iimwi iili ciloba iimubaala kubiya kwiza kunjila u kukala mu muntu wezo. Inzho ku mamanino bumi bwa muntu wezo bulabiya kubaala mbubwaakubele lutaanzhi.”

Kubotelwa Kwini Kwini

27Inzho Jeso nakamana kwaamba bobo, umwi mukaintu akati kankamu wakapozomoka wamwaambila Jeso ati, “Ulikwete coolwe mutumbu wakakunonsha!”

28Inzho Jeso wakamwiingula ati, “Kwaambisha, balikwete coolwe babo bateelela izwi lya Leza ukulicita.”

Bantu Balomba Maleele

(Matayo 12:38-42)

29 # Mat 16:4; Mk 8:12 Bantu nibakahula, Jeso wakakanka kubaambila ati, “Bantu ba mazuba ano mbabiyabi. Balazanda bulyo kubona maleele. Pele kwiina maleele ngubakaabona, cita ceco cakacitika ku mushinshimi Jona. 30#Jon 3:4Nkaambo mbubona Jona mbwaakaba citondezho ku bantu baku Ninive, aze Mwanaa Muntu mbwaati akabe citondezho ku bantu baano mazuba. 31#1 Bami 10:1-10; 2 Maka 9:1-12Mu buzuba bwa lubeta, mwami mukaintu waku Shiba,#11:31 Mwami mukaintu waku Shiba:Wezu ngu mwami mukaintu uuhwa kucibizhi ulakabazuzha bantu baba, kaambo walo wakeenda mushinzo kuhwa ku mamanino anshi kwiza kuteelela busongo bwa mwami Solomoni. Pele inzho nkwaali ano ubaala ali Solomoni. 32#Jon 3:5Ubobo, bantu baku Ninive balakamuzuzha mu buzuba bwa lubeta kaambo balo bakabeba ku shibi shabo naakabakambaucila Jona, pele ano ngaali ubaala ali Jona.

Mumuni wa Mubili

(Matayo 5:15; 6:22-23)

33 # Mat 5:15; Mk 4:21; Lk 8:16 “Kwiina muntu uzasha ilambe amana waliseseka na walihunicila intumba, pele ulalibika acibicilo ce lambe kwaamba limunikile bantu boonse benjila muŋanda. 34Menso enu ngu mumuni wamibili wenu. Kuti menso kaali kabotu, mubili woonse ulaakuli mu mumuni. Pele kuti menso kaatali kabotu, awo mubili woonse ulaba mu mushinze uushiya mbi. 35Ubobo ulyeelele kucenjela kwaamba mumuni uuli mwako utabi mushinze pe. 36Nkaambo kuti mubili wako koozwile mumuni, kakwiina mushinze nuuceya, ulaakuli mu mumuni, umbona ilambe mbulikumunicila mumuni walyo.”

Jeso Wabalemanina ba Falisi u ba Maayi ba Mulawo

(Matayo 23:1-36; Maako 12:38-40)

37Jeso nakamana kwaamba, umwi mu Falisi wakamukumbila kwaamba aye bakalye aze. Ubobo Jeso wakahumina bakaya kuŋanda yakwe kuya kulya. 38Inzho mu Falisi wakazoowa naakabona kwaamba Jeso wakakanka kulya katana kusamba kumatashi kwiingaina uciyanza cabo. 39Ubobo Mwami wakamwaambila ati, “Cini cini umwe nuba Falisi mulasanzha inkapu umitiba ngushili ansengwe, pele mukati kenu mulizwile bushaacihule mwangu ubusofwaazhi. 40Umwe nubalimbushi! Sa wakashilenga mukati aansengwe tali womwi? 41Inzho umwe nubashaacihule mwangu, amubape bapushi, shesho shili mukati munkapu uumitiba, kwaamba shoonse shikamusalalile. 42#Bale 27:30Mulakapenga umwe nuba Falisi, kaambo mulalipenzha kupa Leza cekumi catuntu twiina mukumo tulungwa mucilisho, pele mulaluba kucita shiluleme ku bantu u lufwuno lwa Leza. Nkaambo sheshi nshishintu nshimweelele kucita cakutaluba shimwi.

43“Mapenzhi alamulindila umwe nuba Falisi! Nkaambo mulasala shuuna shabulemu mu shikombelo shaba Juda, u kufwuna kwaanzhiwa ca bulemu. 44Mulakapenga umwe! Nkaambo muli ukoya shuumbwe shiina shizhibyo, awo bantu ngubalyatauka, pele tabazhibi ati ngaashuumbwe.”

45Inzho umwi waba shimulawo wakaamba ati, “Mwiiyi, bobo mbuwaamba, aswe watutuka!”

46Jeso wakamwiingula ati, “Mulakapenga umwe nuba Shimulawo! Nkaambo mulatwika bantu mikuli milemu ikatazha kubweza, nikuba bobo umwe lwenu tamuzanda kubayohwa bantu mikuli yezho naashoonto. 47Mulakapenga umwe! Nkaambo Mulazacila bashinshimi bakayayiwa umaushenu shuumbwe shibotu. 48Nkukwaamba ati, mwakahumina ceco ncibakacita baushenu, kaambo balo bakabayaya bashinshimi, umwe mulazaka shuumbwe shabo. 49Nciceco Leza mu busongo bwakwe ulaamba ati, ‘Ndakabatumina bashinshimi u batumwa, bamwi balakayayiwa, ulimwi bamwi balakapenzhewa.’ 50Inzho bantu bacikubucilo ceno balakasubulwa ukaambo kabashinshimi mbubakayaya kuhwa ku malenjelo anshi. 51#Mata 4:8; 2 Maka 24:20, 21Kukancila ku lufwu lwaka Abelo kushicila ku lufwu lwaka Zakaliya, wezo ngubakayaila akati ka cipaililo abusena busalalisha, muŋanda yaka Leza. Ee ndamwaambila ati bantu bankubucilo yezhi balakapewa mulandu ukaambo ka shintu shoonse sheshi.

52“Mapenzhi ngeenu umwe nuba Shimulawo! Mwakaseseka ciyaluzho ca luzhibo kaambo kakuti umwe tamukanjili, ubobo mulashincila babo bazanda kunjila.”

53Inzho Jeso nakahwa koko, balembi antoomwi u ba Falisi bakakanka kumutongauka cini cini ukumubuzha mibuzho ikwatilizha shintu shinji shinji. 54Kabasoleka kumuteya kwaamba bamuyanine kaambo mukwiingula kwakwe.

Jelenleg kiválasztva:

Luka 11: ILL

Kiemelés

Megosztás

Másolás