Mat 1

Muloongo kinkaaka kya Yesu

(Luk 3.23-38)

1Mukaanda kinkaaka kya Yesu Kiristo, mwaana Davidi, mwaana Abalaami.

2Abalaami wabuta Isaki, Isaki wabuta Yakobe, Yakobe wabuta Yuda na bampaangi baandi. 3Yuda wabuta Fare na Dzara mu Tamara. Fare wabuta Eseromo, Eseromo wabuta Arama. 4Arama wabuta Aminadaba, Aminadaba wabuta Naasoni. Naasoni wabuta Salemoni, 5Salemoni wabuta Bwese mu Lakabi, Bohese wabuta Yobede mu Luta, Yobede wabuta Yesayi, 6Yesayi wabuta Davidi mbyaasi.

Davidi wabuta Solomo mu mukasi Urya, 7Solomo wabuta Lobohami, Lobohami wabuta Abya, Abya wabuta Asafi, 8Asafi wabuta Yosafati, Yosafati wabuta Yorama, Yorama wabuta Odzya, 9Odzya wabuta Yohatama, Yohatama wabuta Akadzi, Akadzi wabuta Edzekya, 10Edzekya wabuta Manase, Manase wabuta Amosi, Amosi wabuta Yosya, 11Yosya wabuta Yekonya na bampaangi baandi, mu ntaangu ya natunu baatu ku Babiloni.

12Ha mambisa ma natunu baatu ku Babiloni, Yekonya wabuta Salatyeli, Salatyeli wabuta Dzorobabele, 13Dzorobabele wabuta Abiyudi, Abiyudi wabuta Elyakimi, Elyakimi wabuta Adzoro, 14Adzoro wabuta Sadoki, Sadoki wabuta Akimi, Akimi wabuta Eliyudi, 15Eliyudi wabuta Eleyadzara, Eleyadzara wabuta Matani, Matani wabuta Yakobe, 16Yakobe wabuta Yosefi, mulumi Mariya, maba buta Yesu wubateelaa ti Kiristo.

17Biseendu byobinso: kuholosono mu Abalaami natee mu Davidi, biseendu kuumi na bina; kuholosono mu Davidi natee natunu baatu ku Babiloni, biseendu kuumi na bina; kuholosono natunu baatu ku Babiloni natee mu Kiristo, biseendu kuumi na bina.

Mbutulu Yesu

(Luk 2.1-7)

18Mbutukulu ya Yesu Kiristo yaba bumabu. Mariya, nguri yaandi, waba na lulelusunu lwa makweele na Yosefi. Tekesele badzakala nzo mosi, nde wabaka yimi mu mpinu dza Mpeeve Yangisi. 19Yosefi, mulumi waandi, bu kaba muutu wasuunguma na bu kaba wahele kutya kumusaana ha busu bwa baatu, watsima kuhambikisa na nde mu nsweeki. 20Bu kaba mu kwetsima mimyo, mbasi ya Mfumu yamumonokono mu ndosi, yamuleele ti: «Yosefi, mwaana Davidi, yaa ba na boomo ko mu kuholo Mariya, mukasi waaku, bukuri mwaana wubutuka mu nde, mu mpinu dza Mpeeve, wangisi. 21Nde sa kabuta mwaana wa mubakala na ye sa wamuteele nkuumbu Yesu; bukuri nde sa kabvuukisa baatu baandi mu masumu ma bo.»

22Myominso mimyo mayirimini, mpisi heki ma leeriri Mfumu mu mubikiri, meende mu mana:

23«Mono, mwaa-ntuumba ya nswaasa sa kabaka yimi,

na sa kabuta mwaana wa mubakala,

na sa bamuteele nkuumbu Emanweli.»

– Mbangukulu ti: «Nzaambi wuri na beetu». –

24Yosefi kamanaa kusiimbika tolo, wayirika bunu bwa mutumini mbasi ya Mfumu, na waholo mukasi waandi. 25Ngo nde kasii yaaba kimpene kya mukasi ko, natee ku kabutiri mwaana, na wamuteele nkuumbu Yesu.

Jelenleg kiválasztva:

Mat 1: MW2013

Kiemelés

Megosztás

Másolás