Lc 22

Eb max lajtinej el ba tzet ok yut mitx'on Jesús

(Mt 26.1-5,14-16; Mc 14.1-2,10-11; Jn 11.45-53)

1A yet lananxa jay tiempoal k'in Pascua, yet chi loon eb israel ixim pan c'am yich, 2max sayon eb sacerdote c'al eb meẍtol yin ley Moisés, tzet watx' ok yut yak'on cam eb Jesús yin ewantakil, yujtol chi xiw eb bay eb conob.

3Ay jun cuywom Jesús chi yik Judas, chi yik c'apax Iscariote. Max aytok Satanás yul c'ul. 4Yuj tu' xan max toj k'anjab yetok eb yajawil eb sacerdote, c'al eb yajaw bay templo. Max bet yalon bay eb tzet ok yut yaon oc Jesús yul k'ab eb. 5Axa tzaloj aj eb sic'libil tu'. Max yak'on eb trato, tol ok yak' eb tumin bay Judas tu'. 6Cax max chaon c'ul tzet max yal eb, axa sayon tzet ok yut yaon oc Jesús yul k'ab eb yin ewantakil tu', yet c'am anima ayic' yetok.

A Cena Cham Jajawil

(Mt 26.17-29; Mc 14.12-25; Jn 13.21-30; 1 Co 11.23-26)

7Axa max ajapnok tiempoal loon eb ixim pan c'am yich, yet chi yak'on cam eb no calnel yet Pascua. 8Max yalon Jesús bay Pedro yetok bay Juan axca ti':

—Asek, watx'nejek tzet ok co lo' yet Pascua, ẍi bay eb.

9—¿Baytal chochej chi co watx'nej? ẍi eb bay.

10—A yet ok ex apnok yul conob, ay jun winak ok ilchaj e yuj. Ibil oc jun moc aej yuj, lanan toj bay yatut. Chex tzakloj yintak, masantac'al chex apni yetok bay chi ca yapni. 11Cax ok e yalon bay cham aj na tu' axca ti': Tix max yut yalon co meẍtol on ti': ¿Baytal ay jun cuarto bay ok in low yetok eb in cuywom, yuj co naontek Pascua ti'? ẍi, quex chi bay. 12Cax ok tx'oxon jun cuarto ayex bay can, tol watx'xa yayji. A tu' che watx'nej tzet ok co lo' tu', ẍi Jesús bay eb.

13Max lajwi tu', axa toj eb tu'. A yet max apni oc eb, max yilon eb, caw wal yel ton max yal Jesús bay eb. Yuj tu xin, a tu' max watx'nej eb tzet ok lo' yet Pascua tu'. 14Axa yet max apni oc Jesús yetok juntzanxa eb is cuywom, max oc oyan eb yin meẍa lowok. 15Lajwi tu', max yalon bay eb axca ti':

—Caw wal max yochej in c'ul chin low yet jun Pascuail ti' e yetok, yak'ban c'amto chin cami. 16Yujtol chi wal ayex, c'amxa bak'in ok in low yet k'in Pascua ti' junelokxa, masantac'al ok oc junokxa Pascua bay ok occan Dios Yajawil, ẍi bay eb.

17Max lajwi tu', max yion aj jun vaso, max yalon yuj diosalil bay Dios yuj, cax max yalon bay eb axca ti':

—Chaek jun ti'. Wajan uc'nejek. 18Yujtol chi wal ayex, c'amxa bak'in ok wuc' yal sat uva ti', masantac'al yet ok occan Dios Yajawil, ẍi bay eb.

19Max lajwi tu', max yion aj jun pan, max yalon yuj diosalil yuj. Axa bijon ec' xol eb tu', max yalon bay eb:

—A ton in mimanil ok ak'lay e yuj. Loek ixim, yuj quin e naontek, ẍi bay eb.

20Cay c'apax tu' max yut jun vaso, yet max lajwi loon eb ixim pan tu'. Max yalon bay eb axca ti':

—A tzet ayay yul jun vaso ti', tx'oxbanil jun is cab trato Dios. Yuj in chiq'uil, xan ok yun jun trato tu', cax e yuj xan ok elok.

21Axa tinani xin, a mac ok in aon oc yul k'abej tu', ayoc yin meẍa ti' jetok. 22Ayin Chekbilintek yuj Dios xol eb jet animail ti', yowalil ok in paxok, atac'ala' yayjicanok, palta a wal jun ok in aon oc yul k'ab camich tu', ok'bal wal c'ul, ẍi bay eb.

23Yuj tu xan max k'anlej el eb xol yin junjunal, mac wal txel jun ok aon oc Cham yul k'ab camich tu'.

Is teyelejbail eb cuywom

24Ac'ala' yet tu' max teyelen ba eb cuywom yuj mac wal txel junok caw miman yelapnok xol eb, 25palta max yal Jesús bay eb axca ti': A eb rey bay junjun nación, caw wal yajaw chi yut ba eb, yetok eb yajaw, watx' eb yalon eb anima. 26Ayex ti', manchak e yut e ba axca eb yajaw tu'. A mac miman yelapnok e xol, yiokab aytek ba axca junok unin. Yetok c'apaxok, a mac yajaw yayji e xol, yutokab ba yin mosejal. 27K'inalok yet chi oc junok loj tinani', ¿mactxel caw miman yelapnok che na'? ¿A mi mac chi ay chotan lowok, ma a mac chi batxwi eltek loj? A mac chi batxlay low tu', caw miman yelapnok, palta ayin ti', axca mosejal wayji e xol, yin ex wak'on serbil.

28Ayex ti', max e tec'baj e ba e yayji ec' wetok yet max jay juntzan porobalil wiban. 29Yuj tu' xan ok ex waoc yin yajawil, axca ok yun woc yajawilal yuj co Mam Dios. 30Yuj tu' xan ok je' e low wetok yin in meẍa bay ayin oc Yajawilal tu'. Yetok c'apaxok, ok ex ay chotan bay junjunok e trono, cax ok e yak'on yajawilal yiban eb lajcaw makan jet israelal, ẍi Jesús bay eb is cuywom tu'.

Albil tol ok yiil Pedro Jesús yin

(Mt 26.31-35; Mc 14.27-31; Jn 13.36-38)

31Max yalon c'apax Cham Jajawil axca ti':

—Simón, ilabi a Satanás max k'an is permiso bay Dios yujtol chi yochej chex txayelay yuj, axca chi yun txayelay ixim trigo,*fn* 32palta caw wal max in tewi bay Dios oj, yet watx' c'am cheil a c'ul yin Cham. A yet ok meltzoj pax oc a nabal win, aoc tec'anil nabal eb oẍtak, ẍi bay.

33Xan max yal c'apax Simón tu' bay axca ti':

—Mamin, jichan in c'ul woc preso etok, caxc'al ok in cam etok, ẍi bay Cham.

34—Pedro, chi wal ayach, oxelxa quin eon el en, cax ok ok'aj no caẍlan yet jun ak'bal ti', ẍi Jesús bay.

Yowalil ok yun tzet chi yal tx'an Un Tz'ibbilcanok

35Max yal Jesús bay eb is cuywom axca ti':

—Che natek, yet max ex in chekontok junel, c'am jabok e moral max e yi', c'am e tz'um yet e tumin, c'am e xanab max e yi' max ex toji. ¿Ma ay tzet max majax ayex? ẍi bay eb.

—C'am tzet max majax ayon, ẍi eb bay.

36Axa tinani xin, a mac ex ay e moral, c'al e tz'um yet e tumin, iektok e yetok. A mac ex c'am e yespada, txonek el e jokan pichil, cax che manon ch'en e yet. 37Yujtol chi wal ayex, yowalil ok yuncan el masanil tzet albilcan yul tx'an Un Tz'ibbilcanok, bay chi yal axca ti': Max utlay axca chi utlay eb yobtakwom, ẍi yul tx'an Un tu'. Masanil wabixal tz'ib yayji yul tx'an Un tu', lanan yuneni, ẍi Jesús bay eb.

38Axa yalon eb is cuywom tu' bay:

—Mamin, tix cab espada ti', ẍi eb bay.

—K'okbil, ẍi Cham bay eb.

Yet max betic' Jesús txajlok bay Getsemaní

(Mt 26.36-46; Mc 14.32-42)

39Max lajwi tu', max eltek Jesús yul na, axa toj bay tzalan Olivo tu', axcata' is beybal. Max tzakloj eb is cuywom yintak. 40Max apnic'al ocok, max yalon bay eb axca ti':

—Txajlanek, yet watx' c'am chex ayc'ay yet ay mac chi yak'lej ex yikban yin yobtakil, ẍi bay eb.

41Lajwi tu', axa beson el ba bay eb tu'. Axcatac'a najatil bay chi apni junok ch'en chi k'oklaytok, caytu' bay max besil ba. Max ay jajan bay tu', cax max txajli. 42Max yal yin is txaj axca ti': Mamin, ta chi el yin a c'ul, cha tenil jun yailal ti' wiban, cax c'am chi wab yail; palta man axcaok chi wochej, palta axcaokab chochej, ẍi yin is txaj.

43Lajwic'al tu', max ayol jun ángel bay satcan, max ul ak'lay is tec'anil yuj. 44Caw wal max oc pitz'an cusc'ulal yin is c'ul. Yuj tu' xan max yiajtek c'ulok txajli sic'libil. Caw wal chi el yal, caw wal chi ay t'ujlabok axca mimek tz'uj, caytu' yel chiq'uil yalok, chi ayc'ay sat tx'otx'.

45Axa yet max lajwi txajli, max aj wan. Axa meltzoj bay max can eb is cuywom tu'. Axa yet max apni bay eb, max yiloni, waynak el eb. Max oc numnaj wayan eb yuj cusc'ulal. 46Yuj tu' xan max yal bay eb axca ti':

—¿Tzet yuj xan chex wayi? Ajanek wan. Txajlanek, yet watx' c'am chex ikbelay yin yobtakil, ẍi bay eb.

Is mitx'banil Jesús

(Mt 26.47-56; Mc 14.43-50; Jn 18.2-11)

47Lananto yalon Jesús bay eb axca tu', cax max jay bulnaj jun miman bulan anima bay tu'. A Judas, nak ayoc bisilok eb lajcawan, a' babel satak eb, max jayoc lemnaj yin Jesús, yuj ul tz'ubon el is ti'. 48Axa yalon Jesús bay axca ti':

—Judas, ¿tom axca ti' chin ot aon oc yul k'ab camich, ayin Chekbilintek yuj Dios xol eb jet animail ti', xan cha tz'ubil in ti'? ẍi bay.

49A yet max yilon eb ajun yetok Jesús tzet yetal lanan jayoc yiban, max k'anlen eb bay axca ti':

—Mamin, ¿chi mi je' co xikon eb yetok jespada ti'? ẍi eb bay.

50Yet jun bek tu', ay jun is cuywom tu' max xikon el is txiquin jun is moso cham sat sacerdote, c'uxanc'al a is watx' max michchaj yuj. 51Axa yalon Jesús bay eb is cuywom tu' axca ti':

—Bekek. Man e yut axca tu', ẍi bay eb.

Max lajwi tu', axa toj matxan yin is txiquin nak tu', max occan yuj junelxa. 52A eb sacerdote yetok eb yajawil templo Dios, c'al eb ichamtak winak ay yikbej, a eb max jayoc ul mitx'on Jesús. Yuj tu' xan max yal Cham bay eb axca ti':

—¿Tokwal ikbajwom in xol eb yob is nabal che yila', yuj tu' xan chex jay win yetok espada c'al te'? 53Ayinc'al ec' e yetok junjun c'u yul templo Dios, palta maj in e mitx' paxok; palta a ton yorail e yak'on e nabal ti', yetok c'apax nak yajawil k'ekk'inal, ẍi bay eb.

Yalnak Pedro tol man yojtakok mactxel Jesús

(Mt 26.57-58,69-75; Mc 14.53-54,66-72; Jn 18.12-18,25-27)

54Max lajwi tu', max oc mitx'naj eb yin Jesús. Max yiontok eb bay yatut cham sat sacerdote. A pax Pedro xin, najat tzakanxac'al chi yut ba. 55Max yaoc eb taynem templo is k'ak' bay yamak'il ti na tu', max ay chotan eb, max oc oyan eb yin k'ak', cax max jayoc Pedro, max ay chotan xol eb. 56Ay jun ix criada max ilon oc Pedro yet chotanxa ay xol eb tu', max oc t'anan ix yin, max yalon ix axca ti':

—A jun winak ti', yetbi ba yetok Jesús, ẍi ix.

57Palta maj tak'wejc'al oc Pedro yin.

—Ach ix, man wojtakok jun mactxel chal tu', ẍi bay ix.

58Junixto bek tu', ay junokxa mac max ilon oc yin, max yalon c'apax axca ti':

—Ach ti', et beyom a ba yetok eb, ẍi nak bay.

—C'amak cha, man wet beyomok in ba yetok eb, ẍi bay nak.

59Junixtom wal hora yalon jun tu', max watx' alnenxac'al junxa axca ti':

—A nak ti', wal yel yetbeyom ba yetok Cham max ilay jay ti', yujtol yet aj Galileail ba nak yetok eb, ẍi junxa tu'.

60Wal yel cha, caw wal man wojtakok tzet chal tu', ẍi Pedro tu' bay nak.

Lananto wal yaloni, cax max ok'aj no caẍlan. 61Axa meltzojtok acan Cham Jajawil yin Pedro tu', xan max natek tzet max yal Cham bay. Tix ton max yut yalon Cham bay ti': Oxelxa quin eon el en, ok aloni tol mayin ojtakok, cax ok ok'aj no caẍlan yet jun ak'bal ti', ẍi Cham bay. 62Axa yel besnaj xol eb tu', cax yeltok yok' sic'libil yina.

Is buchbanil Jesús

(Mt 26.67-68; Mc 14.65)

63A eb chi taynen Jesús, max buchwaj eb yin, cax max mak'on c'apax eb. 64Max makchen eb is sat, max c'oli tzak'ontok eb sat. Max lajwi tu', max tz'akon k'anlen eb bay axca ti':

—Al ayon, mac chach mak'on chabej, ẍi eb bay.

65Manxa wal jantakok tzet max yal eb bay yin buchwal k'anejal.

Yabixal yet max betic' Jesús bay satak eb sat yajaw

(Mt 26.59-66; Mc 14.55-64; Jn 18.19-24)

66Axa yet max sakbi, max wajban ba eb icham winak ay yikbej xol eb yet israelal, yetok eb yajawil eb sacerdote, c'al eb meẍtol yin ley Moisés. Max yiontok eb Jesús satak eb sat yajaw. Max k'anlen eb bay axca ti':

67—Al ayon, ¿tom yel ach Cristo ach? ẍi eb bay.

—Nabac'al chi wal ayex, tok ok e yaoc yin e c'ul. 68Yetok c'apaxok, ta ay tzet chin k'anlej el ayex, ¿tom ok e yal ayin? 69Palta ayin Chekbilintek yuj Dios xol eb jet animail ti', a tinani' ok in apnok chotan bay is watx' k'ab Dios, Cham chic'al je' yuj masanil, ẍi bay eb.

70—¿Tom C'ajol ach Dios chi yal tu'? ẍi eb bay.

—Ayin ti', C'ajol in ton Dios, axca e yalon ti', ẍi bay eb.

71Axa yalon eb axca ti':

—A tinani' manxa yowalilok ay co testigo. Ilab a wal caw chi aloni, ẍi eb.

Jelenleg kiválasztva:

Lc 22: ATBYK89

Kiemelés

Megosztás

Másolás