Luke 4
4
1လောက်ဘတ်နား ကိုယ်တော်ယေရှုနွို့ ဉာဏ်အလင်းတော်န ဟိုတွို့အနုဲင်နုဲင်ထာ အမ်ယန်းဘတ်တွိုတဂျော်ဒန်မြစ်ထာလဲ့ ဉာဏ်အလင်းတော် အမ်အွမ်ခေါင်းနွို့န ကူးကု့ဗွေကန္တာရကိုးနဲ့။ 2ကိုယ်တော်ယေရှုနောင်း မန်းတွို့ကနိုရှိသိုလ်ပွဉ်ကျင်ထာ မာရ်နတ် သွေးဆောင်နှောက်ယှက်အမ်နွို ခံအွေတော်မူမနနဲ့။ ရှိနွို့ဘို့ဘက်နား အမ်နွို့ ကထမ်မာ့အမ်ဆွေကား ထန်မှအမ်ထုံးကော တာဟို့ဘို့ကော ရှိနွို့ဘို့ဘက် ဆောင့်မေ့ပွန်နောင်း ဘာ့ဆာပိုနွို့နဲ့။ 3မာရ်နတ်ဆို့နွို့နား “ယေရှုမွို့ကွန်ဖြား လစစ်နွိုနွို့ ကမူးနီး အားလကလုဲင်စဲချိ” ဖြိုစနွို့နဲ့။ 4စနွိုလဲဉ်း ကိုယ်တော်ယေရှုနား “ကောင်လိတ်ကျမ်းနွို့ လို့နားအစွေအငွမ်းအမားစယ်နွို့နာ့ အထက်ပလုဲင်းဟောက်ကက်ကောနွို့ လိတ်ကျမ်းနွို့ဘာတဲင်းပွို့ဘို့” နွို့ဟောဖြိုမနနဲ့။ 5လောက်ဘတ် မာရ်နတ်နား အမ်ဟဲကူတို့ ကိုယ်တော်ယေရှုတကွေဗွေ အကံထပ်ဗေ့နွို့ထာ ဗဟိုကွေကမ္ဘာ ဖြိုင်နိုင်ငံ့မေ့မေ့နွို့ အစူးဝဲ့ အမ်ပလေဝဲ့နွို့နဲ့။ 6မာရ်နတ်နောင်း ကိုယ်တော်ယေရှုနွို့ “အို့နောင်း ဘာ့အာဘို့အို့ ဖုန်းတန်ခိုးတော်နီးမေ့မေ့န စည်းစိမ်နွို့နု့ အို့ပဆောင်အာနွို့ အာနိုင်းဟောင်ခေါင်း အို့အာလောက်မို့။ 7ဘာဝါးဘာ့ကိုးကွယ်အို့နွို့ ဇာ့နီးမေ့မေ့နွို့ အို့အာလောက်မို့” နွို့ဖြိုမန။ 8စနွိုလဲ ကိုယ်တော်ယေရှုနား “ကောင်လိတ်ကျမ်းနွို့ ဘာ့ကလုဲင်ဖြားမို့နွို့ ဖြားအပါးစယ် ဗင်ဝါးကိုးကွယ်ဟောက်၊ လိတ်ကျမ်းနွို့ဘာတဲင်းပွို့ဘို့” နွို့ မာရ်နတ်နား ဖြေရ်အွမ်ပလောက်နွို့နဲ့။ 9အခွပ် ကနံဆိုးနား ကိုယ်တော်ယေရှုနား ဗဟိုဂျေရုဆလင်နွို့ ဘာ့တောင်ကံထက်ဗေ့ တဗိမာန်တော်နွို့ ဟက်ကူကု့တွို့ထာ “မွိုနား ကွန်ဖြားလမှန်နွိုနွို ဇာ့တာ့လွက်နီး ခွမ်စွမ်းစန်း။” 10ဖြားနွို့ တာမောင်းထန်းလွမ်းမို့နွို့ကနံကလို့နွို့နား အ့်ဖြိုဘို့ဘို့ဟောက်နွို့လိတ်ကျမ်းနား ဘာတဲင်းပွို့နွို့ခေါင်း မို့လာ့မင်ကားအ့်ကစုကော။ 11“ကောက် မွို့နွိုနွို စိုမာန့်တွို့တာ့ကမူးထာ မင်ကဆူးကားအောင်တိခွို့န အမ်ပန်ဗို့လောက်ဟောက်”ဖြိုစနွို့နဲ့။ 12ဆောင်လောက်နွိုနို ကိုယ်တော်ယေရှုနား “ဖြားမို့နွို့နား ကောင် လိတ်ကျမ်းဘာ့ဖော်ပလေဘို့နွိုနွို လစမ်းသပ်ကောအောင်” မိန်ဖြိုစနွို့။ 13မာရ်နတ်နောင်းလဲဉ်း ကိုယ်တော်နွို့ အ့်မာ့ယော့အ့်မာ့အ့်မာ့ယာ့အမာ့မင်လှံစွေခံယော့နောင်း လေးပွန်တွို့ သကိုယ်တော်ယေရှုထာ လောက်အချန် အမ်ဆွတ်မဲ့ အခွင့်ကလိုလ်နွို့နဲ့။ 14နွို့ခေါင်း ကိုယ်တော်ယေရှုနား ဉာဏ်အလင်းတော် ဘာအွမ်ခေါင်းနွို့န ဖြိုင်ဂါလိလဲနွို့ ကြွပလောက်ပိုနွို့နဲ့။ ကတမ်းအမ်နောင်းလဲဉ်း တောလွက်အ့်နှံ့ နှံ့နောမနနဲ့။ 15ကိုယ်တော်ယေရှုနောင်း ဓမ္မာရုံaဘို့ဘက်နွို့ ဘာဟောဖြိုကရီပလေစ်မဲ့နွို့ လို့ဖုန်ကုန်းနောင်းလဲဉ်း အမ်နား ချီးမွမ်းထာယို့ကြဘို့ထာပနာနဲ့။ 16နွို့ခေါင်း ကိုယ်တော်ယေရှုနောင်း အမ်ဘာ့ကုန်းပိုမဲ့ မြိုနာဇရက်နွို့ ယန်းပိုကိုးနဲ့။ ရှိဥပုသ်နွို့ ကိုယ်တော်နောင်း ဘာ့ကု့ကြဘို့ ဓမ္မာရုံနွို့အတွိုန်း ကု့လောက်တွို့ထာ တာ့လွက်နွို့နု့ အမ်နောင်း မောင်းဖက်လိတ်ကျမ်းနား မုဲင်မနနဲ့။ 17ကိုယ်တော်နား ပရောဖက်ဟေရှာယ ဘာတဲင်းပွို့လိတ်ကျမ်းစာအုပ်နွို့ အာ့်ကွက်ကွက်နား အာဝဲ့နွို့ခေါင်း ခိုတွို့ထာ ဖတ်မနနဲ့။ 18ဉာဏ်အလင်းတော်ဖြားနောင်း အို့နဟိုအနုဲင်နုဲင်နွို့နဲ့။ရွားနွို့ပဒေကား “လို့ဆန်းရဲဘို့ဘက်နား ပနောင်ကတမ်းကလို့စ်နွို့မောင်းဟောဖြိုပလေနွို့ ဖြားနောင်း အို့နွို့ ရွီးချယ်ယော့လို့ဘာကလို့မဲ့ထောင်ဘို့ဘက်နား အ့်မင်လွတ်ဗင်အောင်လို့လာ့ငါးရင်ကောဘို့ဘက် အ့်ရင်ဘက်အောင်နွို့နလို့ဗင်ခံစွေဒုက္ခဆန်းရဲဘို့ဘက် တလွက်လွတ်မြောက်နွို့ မောင်းဖုနွို့န 19ချန်ကာလနီးနောင်း တဖြားနွို့ လို့မျိုးအမ်နွို့နား သနားကြင်နာအမ်နွို့အချန်ပလေနွို့ခေါင်း မောင်းညေညာနွို့ ပလွတ်အို့ကိုး”နွို့ကိုးနဲ့။ 20နွို့ခေါင်း ကိုယ်တော်နောင်း လိတ်ကျမ်းစာအုပ်နီးနွို့ ဗက်တွို့ထာ တာဝန်ခံဓမ္မာရုံနွို့နား အာတိုလ့်တွို့ယော့ ဆောင်ထု့ချန်နွို့ ဗဟိုတာ့ဓမ္မာရုံ လို့မေ့မေ့နောင်းလဲဉ်း ရေ့စဉ်းကြဘို့ကိုယ်တော်နွို့နဲ့။ 21နွို့ခေါင်း ကိုယ်တော်နွို့ အမ်နား “ပို့ပအွန်ကျမ်းစာပိုဒ်စားနီးနွို လိုရှိနိစယ် အမ်ကလုဲင်ပို့ အမှန်အကန် အမ်ဖြိုလို့စာနွိုစနွို့နဲ့။” 22ကိုယ်တော်ဘာဟောဖြိုဘို့နွို့ ဘာ့အွမ်မဲ့ လို့မေ့မေ့နောင်းလဲဉ်း အံ့သြကြဘို့ထာ “လို့နီးနား ကွန်ဖြောက်ယောသပ် ကက်ကားဟား” နွို့အချောင်းချောင်းဖြိုကြဘို့နွို့နဲ့။ 23ကိုယ်တော်ယေရှုနားလဲဉ်း “ဆာယာလငန်နား သိုလ်နသိုလ်အို့ ကရှိလိုလ့်ကုဟောက်နွို့ ပနောင်ကစာ့နု့အတွိုန်း မြိုကပေရနောင်နွို့ အို့ဘာ့ယိုဘို့မဲ့ အမှုအရာဇာ့နွို့နား တာ့အေ့ဘာ့မာန်းမြိုနွို့လဲ ယို့အာစေနွို့ ပွို့နွို့နား အို့နွို့နု့ လံဖြိုလောက်ဟောက်နွို့နဲ့။ 24စနွိုလဲဉ်း အိုလဖြိုပို့အ့်မှန်နွိုနား ဆောင်လို့ ပရောဖက်ဆောင်ကွေကွေနွို့ လက်ခံကားကျဗို့ ဇာတိမြိုအမ်နွို့နဲ့။ 25တာ့ဖြိုလောက်အမှန်တရားနွို့နု့ ခေတ်ဧလိယနား တက်ဒေသနွို့နား အွီနှမ်းခွဲလောက်ဟောက်နား ကလေ့ခေါင်ခေါင်း အန်ငက်ကျပိုဒဏ်နွို့နား တန်းဘာမင်ခံနွို့ တက်လို့မျိုးအစ္စရေးနွို့ မုတ်ဆိုးမလဲဉ်းဟိုဘို့ဘက်ကိုးနဲ့။ 26ဖြားနွို့ ဧလိယနွို့ ဘာ့ဟိုဖြိုင်အစ္စရေးနွို့ တာ့ကမြမိတ်ရန်းနို့နား အမ်မောင်းဆိုကူညီနွို့ ပလွှတ်ကောနား တာ့မေ့ဇိဒုန်နွို့ ဗဟိုမြိုဇရတ္တနွို့ တာ့မိတ်ရန်းအာ့်ကွက်နွို့ မောင်းကူညီ ပလွတ်ကူးကုဟောက်နဲ့။ 27ခေတ်ပရောဖက်ဧလိရှဲနား ကောင်လို့မျိုးအစ္စရေးနို့နား လို့ပကလုဲင်အ့်ကစုရောဂါကုန်း ဟိုဟောက်နုကိုးနဲ့။ စနို့လဲ ကောင်တခွို့အန်နား ဘာ့ကလုဲင်လို့ဖြိုင်ဆီရီးယား နေမန်ပဒေနို့ ဘာလိုလ့်တွို့လို့အာ့်ကွက်နွို့ ဆောင်ကွေမှ အာဗါပွန်ဘို့ကော” နွို့ ဖြိုမနနဲ့။ 28ကိုယ်တော်ဘာဖြိုပနောင်နွို့ ဆောင့်အွမ်နောင်း ကောင်ဓမ္မာရုံလို့ပရိသက်ဘာဟိုနွို့နောင်း နွက်ဆိုးကြဘိုနွို့နဲ့။ 29ချန်နွို့ ခွိုနွို့နား အောက်တွိုထာ ကိုယ်တော်နွို့ ဖက်ပလန်းမြိုနွို့န ဒေါက်လေးတွို့ထာ ကွေပါးမြွောင်းနွို့မှ တွိူကလို့တွို့ထာ မြိုဘာ့ဟို တာ့စောက်ဗွေနွို့ ဟက်ကူးကြဘို့နွို့နဲ့။ 30စနွတ်ခရိန်းဆယ် ကိုယ်တော်ယေရှုနား အန်ပို့ပိုးတို ကောင်ပြလို့ဘို့ဘက်နွို့မှ ဖြတ်ကု့တွို့ထာ ကြွတော်မူကု့ကိုးနဲ။ 31နွို့ခေါင်း ကိုယ်တော်ယေရှုနောင်း ဗဟိုဖြိုင်ဂါလိလဲ အန်ကူးလောက်တို့ တမြိုကပေရနောင်ထာ ရှိဥပုသ်နွို့ ဓမ္မာရုံနို့နား ဟောဖြိုကရီပလေဟောက်နဲ့။ 32ကိုယ်တော်ယေရှုနောင်း အခွင့်အာဏာန ဟောဖြိုကရီအာနွို့န လို့နွို့နောင်း အမ်ဘာ့ကရီနွို့နု့ အံ့ဩချီးမွမ်းကြဘို့နွို့နဲ့။ 33တာ့ဓမ္မာရုံနွို့နု့ ကနံဆို့စ်တာ့ဗောက်မဲ့ သန့်ရှင်းကောလို့အာ့်ကွက်ဟိုဟောက်နွို့နဲ့။ 34လို့နွို့နား “လို့မြိုနာဇရက် ယေရှု၊ မွိုဆောင်းဗင်တအို့တတ်ထား၊ မို့ပွို့ပိုမောင်းယို့ဖျောက်အေ့ဟား။ မွိုကွေ့ယားနွိုနွတ် အို့ငမ်းမန၊ မွိုနား အန်ပါကြွပိုမဲ့ ဘာ့မြတ်မဲ့လို့အာ့်ကွက်ကိုး” နွို့ကရက်အထန်ထောတွိုန်းန ကလေ့စ်ဖြိုမနနဲ့။ 35ချန်နွို့နု့ ကိုယ်တော်ယေရှုနွို့ ကနံဆို့နား “မန်းသက်သက်နေ၊ လေးပွန်တာ့အမ်နွို့” အာအမိန့်နွို့န အ့်နုဲင်နုဲင် ကနံဆိုးနောင်း လို့နွို့နား ကောင်ဗလလို့ဘို့ဘက်နွို့ ကွေကသေ့နွို့နု့ တာ့လန်ရေ့ယော့ အ့်ကစုကောအောင် လေးပွန်ကု့ဟောက်နွို့နဲ့။ 36ဓမ္မာရုံနွို့ လို့မေ့မေ့နောင်းလဲဉ်း အံ့ဩကုကြဘို့ထာ “နီးနောင်းပနောင်ကက်မာ့မား။ အမ်ဒေါက်လေးနိုင်းကနံဆို့နွို့ အခွင့်အာဏာန တန်ခိုးနွို့ တာ့အမ်နို့ ဟိုရား” နွို့အချောင်းချောင်းဖြိုကြဘို့နွို့နဲ့။ 37နွို့ခေါင်း ကတမ်းကိုယ်တော်ယေရှုနောင်းလဲဉ်း ဘာ့ဟိုကစာ့တာ့ဗို့နွို့ နှံ့နောကုမေ့မေ့ဟောက်နဲ့။ 38ကိုယ်တော်ယေရှုနောင်း အမ်လေ့ပွန်တိုကောင် ဓမ္မာရုံနွို့ တာညာ့ရှိမုန်ပဒေနွို့ ဆောင့်ကြွပိုအချန်နွို့နား ယာ့ရှိမုန်နောင်း မန်းသုလွှန်းကောနွို့ခေါင်း ခွို့နွို့နောင်း သမြနွို့ ကု့အာတွို့ထာ ကိုယ်တော်နား တောင်းလျှောက်ကြဘို့နွို့ နဲ့။ 39နွို့ခေါင်း ကိုယ်တော်နောင်း တာမေ့တာကမြနွို့ ကုတု့ထာ ဘာမန်သု ကောနွို့ ဗါ့ပွန်အောင် ဆောင်အာအမိန့်န သမြနွို့နောင်း ဗါ့ပွန်တွို့ထာ အတိ တွိုန်းအောက်တွို့ထာ ခွို့နွို့နား ဧည်ခံကြဘို့နွို့နဲ့။ 40ချန်ရှိကွက်ဆောင့်လောက် ရောဂါအမာ့မာ့ ဘာ့တာ့ဗောက်မဲ့ လို့ဘို့ဘက်နွို့နု့ ဟက်ပိုကြဘို့တကိုယ်တော်နွို့ထာ အမ်နောင်း လို့ကစုစေ့ကွက် ဒံတွို့တိအမ်ကွေသိုလ်ထာ ရောဂါအမာ့မာ့ဘို့ဘက်နွို့ အ့်ဗာပွန်ဟောက်နွို့နဲ့။ 41ကနံဆို့ဘို့ဘက်နောင်းလဲဉ်း တာလို့ကစုနွို့မှ လေပိုကြဘို့ထာ “မွို့နောင်း ကလုဲင်ကွန်ဖြားကိုး” နွို့ကလေ့လေမနနဲ့။ ကိုယ်တော်ယေရှုနောင်း ကလုဲင်မေရှိယနွို့ ခွို့ငန်းကြဘို့နွို့နောင်း ကိုယ်တော်နွို့ ခွို့နွို့နား လာ့ဖြိုကြဘို့ဇာ့နွို့အောင် အာအမိန့်ဘို့နွို့နဲ့။ 42လောက်ဘက်အ့်ရှိသေ့ဆောင့်လန်းနွို့ ကိုယ်တော်ယေရှုနောင်း ဗွေကန္တာရနွို့ လေးပွန်ကြဘို့နွို့နဲ့။ စနွို့လဲ လို့ဘို့ဘက်နား ရက်ရေ့တွို့ထာ ထွိကု့ကြဘို့ခေါင်း တာအေ့နီးမှ လေးပွန်ကောအောင် တောင်းပန်ဖြိုကြဘို့နု့နဲ့။ 43စနွို့ခေါင်း ကိုယ်တော်နား “အို့နား မြိုသခြားစနွိုလဲဉ်း ဘာ့ကလုဲင်ကတမ်းကလို့ ခံမ့်ထာထနာတော်ဖြားbနွို့ မင်ဟောဖြိုမဲ့။ မောင်ဖြိုဇနီးနွို့ ဖြားနား ပလွှတ်ပိုအို့ကိုး” နွို့ဖြိုမနနဲ့။ 44နွိုခေါင်း ကိုယ်တော်ယေရှုနောင်း ဗဟိုဖြိုင်ယုဒ ဓမ္မာရုံဘို့ဘက်နွို့ ဆက်တွို့ထာ ဟောဖြိုကရီပလေမနနဲ့။
Jelenleg kiválasztva:
Luke 4: dtpv-rv
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
