मत्ती 16

फारीसी मन कर द्वारा यीशु कर परखई

(मरकुस 8:11-13; लूका 12:54-56)

1फरीसी अउ सदूकी हर यीशु कर लिघे आए के ओला परखे बर ओकर ले कहिस, हमन ला स्वर्ग कर कोनो चिन्हा दिखाव। 2ओहर ओमन मन ला उत्तर देहिस, “सांझ कर बेरा मे तुमन कहथा मौसम हर बड़िया रहिस, काबर कि अकाश लाल है। 3अउ भिनसरहा मे कहथा, आएज आंधी आही, काबर कि अकाश लाल अउ धुन्धला है, तुमन अकाश कर लक्षन मन ला देख के ओकर भेद ला बताए सकथा लेकिन समय कर चिन्हा कर भेद काबर नी बताए सकथा? 4ये युग कर बुरा, अउ ब्यभिचारी लोग मन चिन्हा ला ढूढथे, पर योना कर चिन्हा ला छोएड़ ओला अउ कोनो चिन्हा नी देहल जाही।” अउ ओहर ओला छोएड़ के चईल देहिस।

फरीसी अउ सदूकी मन कर खमीर

(मरकुस 8:14-21)

5अउ चेला मन झील कर ओ पार पहुचिन। लेकिन ओमन मन रोटी लेहे बर भुलाए गईन। 6यीशु हर अपन चेला मन ले कहिस, देखा फरीसी अउ सदूकी मन कर खमीर ले सावधान रईहा। 7ओमन मन अपन मे सोचत रहिन, हमन रोटी नी लाने हन, एकर बर ओहर एकस कहथे। 8ये जाएन के, यीशु हर ओला कहिस, हे आधा बिश्वासी तुमन अपन मे काबर बिचार करथा, कि हमर जग रोटी नी है? 9का तुमन अझे ले नी समझे हा? अउ ओ पाच हजार कर पाच रोटी ला याद नी है? अउ न ये कि तुमन हर केतेक टुकना उठाए रहा। 10अउ न ओ चाएर हजार कर सात रोटी मन ला अउ न एहर कि तुमन हर केतेक टुकना उठाए रहा। 11तुमन मन काबर नी समझथा कि मैहर तुमन ला रोटी कर बारे मे नी कहे, लेकिन एहर कि तुमन फरीसी अउ सदूकी मन कर खमीर ले सावधान रईहा। 12त ओमन कर समझ मे अईस कि ओहर रोटी अउ खमीर कर बिषय मे नही, पर फरीसी अउ सदूकी मन कर शिक्षा ले सावधान रहे बर कहिस।

पतरस कर यीशु ला मसीह के रूप गरहन करई

(मरकुस 8:27-30; लूका 9:18-21)

13यीशु हर कैसरिया फिलिप्पी कर परदेस मे अईस अपन चेला मन ला पूछे लागिस, मैनसे कर बेटा कहथे? 14ओमन मन कहिन, कुछ मन त यूहन्ना बपतिस्मा देहे बाला कहथे, अउ कुछ मन हर एलिय्याह, अउ कुछ मन यिर्मयाह या अगमजानी मन ले कोनो एक कहथे। 15ओहर ओकर ले कहिस, लेकिन तुमन मन मोला का कहथा? 16शमौन पतरस हर उत्तर देहिस, तय हर जिन्दा परमेश्वर कर बेटा मसीह हस। 17यीशु हर ओला उत्तर देहिस, हे शमौन, योना कर बेटा, तय हर धन्य हवस, काबर कि मांस अउ लहू हर नही लेकिन मोर दाऊ हर जेहर स्वर्ग मे है, ये गोएठ ला तोर मे परगट करिस है। 18अउ मैहर भी तोर ले कहथो कि तय हर पतरस हस। अउ मैहर ये पखना मे अपन कलीसिया ला बनाहु, अउ अधोलोक कर दूरा, हर ओकर मे प्रबल नी होही। 19मैहर तोला स्वर्ग कर राएज कर कुंजी ला देहू, अउ जे कुछ तय हर धरती मे बधीहा, ओहर स्वर्ग मे बंधही, अउ जे कुछ तय धरती मे खोलिहा ओहर स्वर्ग मे खुलही। 20तब यीशु हर चेला मन ला चेतईस कि “कोनो ला झिन कहबे कि मैहर ही मसीह हो।”

अपन मरे कर बिषय मे यीशु कर भविष्यवानी

(मरकुस 8:31-9:1; लूका 9:22-27)

21ओ समय ले यीशु अपन चेला मन ला बताए लागिस, मोला जरूरेच है, कि मैहर यरूशलेम शहर ला जाहू। अउ पुरनिए अउ प्रधान याजक, अउ शास्त्री मन कर हाथ ले ढेरेच दुख उठाहू, अउ माएर देहल जाहू। अउ तीन दिन मे फिर ले जी उठहू। 22एकर बर पतरस हर यीशु मसीह ला अलग ले जाए कर डाएट के कहे लागिस, हे प्रभु, परमेश्वर झिन करे! तोर संग एकस कभो नी होही। 23ओहर मुईड़ के पतरस ले कहिस, हे शैतान, मोर आगू ले दुरिहा होए जा, तय हर मोर बर ठोकर कर कारन हस, काबर कि तय परमेश्वर कर बात मन पर नही, लेकिन लोग मन कर बात मे मन लगाथस।

यीशु के पीछू चले कर मतलब

24तब यीशु हर अपन चेला मन ले कहिस, अगर कोनो हर मोर पाछू आए बर चाही त अपन आप ला इनकार करही, अउ अपन क्रूस ला उठाए, अउ मोर पाछू मे होए ले। 25काबर कि जे कोनो हर अपन प्रान ला बचाए बर चाहथे, ओहर ओला खोही, अउ जे कोनो हर मोर बर अपन प्रान गवाही, ओहर ओला पाही। 26अगर लोग सबेच संसार ला हासिल करही, अउ अपन प्रान कर हानी उठाही, त ओला का फायदा होही? या लोग मन हर अपन प्रान कर बदला मे का देही? 27मैनसे कर बेटा अपन स्वर्गदूत मन कर संग अपन दाऊ कर महिमा मे आही, अउ ओ समय ओहर एक ला ओकर बुता कर प्रतिफल देही। 28मैहर तुमन मन ले सहिच कहथो, कि जेहर हिया ठड़होईन है, ओमन मन ले कुछ एसन है, कि ओमन मन जब ले मैनसे कर बेटा ला ओकर राएज मे आत नी देख लेही, तब ले मृत्यु मन कर स्वाद ला कभो नी चईख सकही।

Jelenleg kiválasztva:

मत्ती 16: SGJNT

Kiemelés

Megosztás

Másolás