मत्ती 14

हेरोदेस हर यीशु कर बारे मे सुनिस

(मरकुस 6:14-29; लूका 9:7-9)

1ओ समय चवथाई देश कर राजा हेरोदेस अंतिपास हर यीशु कर बारे मे सुनिस। 2अउ अपन कमिया मन ला कहिस, एहर यूहन्ना बपतिस्मा देहे बाला है, ओहर मरल मन ले जिन्दा होईस है। एकरे बर ओकर से सामर्थ्य कर बुता परगट होथे।

यूहन्ना कर हत्या

3काबर कि राजा हेरोदेस हर अपन भाई फिलिप्पुस कर घरदारिन हेरोदियास कर कारन, यूहन्ना ला धईर के बांधे रहिस, अउ जेलखाना मे डाएल देहे रहिस। 4काबर कि यूहन्ना हर ओकर ले कहे रहिस कि एला रखे बर उचित नी है। 5अउ ओहर ओला माएर देहे बर चाहत रहिस। लेकिन लोग मन ले डरत रहिस काबर कि ओहर ओला अगमजानी मानत रहिस।

6पर जब राजा हेरोदेस कर जनम दिन अईस, त हेरोदियास कर बेटी हर खुशी मे नाएच के देखईस, अउ हेरोदेस ला खुश करिस। 7एकरे बर ओहर कसम खाए के बचन देहिस, जे कुछ ला तय मांगबे त, मैहर तोला देहू। 8ओहर अपन दाई कर फुसलाल बात ला कहिस, “यूहन्ना बपतिस्मा देहे बाला कर मूड़ ला छीपा मे एहिच ला मोला मंगवाए दे।” 9राजा हेरोदेस हर दुखी होईस, लेकिन अपन कसम के कारन अउ संग बईठोईया मन कर कारन, हुकूम देहिस, कि दे देईहा। 10अउ राजा हेरोदेस हर जेलखाना मे सिपाही मन ला भेज के यूहन्ना कर मूड़ ला कटवाए देहिस। 11अउ यूहन्ना कर मूड़ ला छीपा मे लानल गईस, अउ नोनी ला दे देहिन; अउ ओहर ओला अपन दाई जग ले गईस। 12अउ यूहन्ना कर चेला मन हर आए के यूहन्ना कर लाश ला ले जाए के गाएड़ देहिन अउ जाए के यीशु ला समाचार देहिन।

पाच हजार लोग मन ला खिलई

(मरकुस 6:30-44; लूका 9:10-17; यूहन्ना 6:1-14)

13जब यीशु हर एला सुनिस, त यीशु हर डोंगा मे चईड़ के हुवा ले कोनो सुनसान जगहा मे एकेच झन चईल देहिस। अउ लोग मन एला सुईन के नगर-नगर ले रेंगत ही ओकर पाछू होए लेहिन। 14ओहर हिकेल के एक बड़खा भीड़ ला देखिस, अउ ओमन मन पर तरस खईस, अउ ओहर ओमन मन कर बिमारी मन ला चंगा करिस।

15जब सांझ होईस त यीशु कर चेला मन हर ओकर लिघे आए के कहिन, एहर त सुनसान जगहा है, अउ देरी होवत है, लोग मन ला बिदा कईर दे, कि लोग मन गाव मे जाए के अपन बर भात खरीद लेही। 16यीशु हर ओमन मन ले कहिस, ओमन मन के जाए कर जरूरत नी है। तुमन मन ही एमन मन ला खाए बर देवा। 17ओमन मन ओकर ले कहिन, “हिया हमर जग पाच रोटी अउ दुई मछरी ला छोएड़ अउ कुछ नी है।” 18ओहर कहिस, ओला हिया मोर लिघे ले लाना। 19तब ओहर लोग मन ला घास मे बईठे ले कहिस अउ ओ पाच रोटी अउ दुई मछरी ला लेहिस, अउ स्वर्ग कती ला देख के धन्यवाद करिस। अउ चेला मन लोग मन ला, 20अउ जब सबेच झन खाए के अघाए गिन, अउ चेला मन बाचल टुड़का मन ले भरल बारह टुकना उठईन। 21अउ खाए बाला महिला अउ छउवा मन ला छोएड़ के पाच हजार आदमी मन रहिन।

पानी पर यीशु कर चलई

(मरकुस 6:45-52; यूहन्ना 6:16-21)

22अउ यीशु हर तुरतेच अपन चेला मन ला डोंगा मे चड़ईस, अउ ओमन मन ओकर ले आगू पार चईल जाए, जब तक कि ओहर लोग मन ला बिदा कईर लेहिस। 23ओहर लोग मन ला बिदा कईर के, प्रार्थना करे बर अलग पहार मे चईड़ गईस अउ सांझ ला ओहर हुवा एकेच झन रहिस। 24ओ समय डोंगा हर झील कर मांझा मे लहर मन ले डगमगात रहिस, काबर कि बईहर हर आगू कती कर रहिस। 25अउ यीशु राएत कर चाएर पहर झील मे रेंगत ओमन मन कर लिघे अईस। 26चेला मन ओके ला झील मे रेंगत देख के घबराए गईन, अउ कहे लागिन, “ओहर भूत है,” अउ डर के मारे किरलाए उठिन। 27तब यीशु हर तुरतेच ओमन ले गोठियईस, अउ कहिस, “हिम्मत बांधा, मैहर हो, झिन डरा।” 28पतरस हर ओला उत्तर देहिस, “हे प्रभु, अगर तय ही हस, त मोला अपन लिघे पानी मे चईल आए कर हुकूम दे।” 29यीशु हर कहिस, “आव!” तब पतरस डोंगा मे ले उतेर के यीशु कर लिघे जाए बर पानी मे चले लागिस। 30लेकिन बईहर ला देख के डईर गईस, अउ जे घनी डूबे लागिस त किरलाए के कहिस, “हे प्रभु, मोला बचाए ले।” 31यीशु हर तुरतेच हाथ ला बड़हाए के पतरस ला थाम लेहिस, अउ ओकर ले कहिस, “हे आधा बिश्वासी, तय काबर शंका करे?” 32जब ओहर डोंगा मे चईड़ गईस, त बईहर हर थईम गईस। 33एकर पर जेमन डोंगा मे रहिन, ओला जोहाएर के कहिन, “सहिच मे तय हर परमेश्वर कर बेटा हस।”

यीशु द्वारा गन्नेसरत मे कई ठे रोगी मन ला चंगाई

(मरकुस 6:53-56)

34ओमन मन ओ पार उतेर के गत्रेसरत परदेस मे पहुचिन। 35अउ हुवा कर लोग मन हर ओला पहिचाएन के आस-पास कर सबेच जगहा मे समाचार भेजिन, अउ सबेच बिमार मन ला ओकर जग लानिन। 36अउ ओकर ले बिनती करे लागिन, कि ओहर ओला अपन कपरा कर अचरा ही ला छुवे दे, अउ जेतेक मन ओला छुईन, ओमन मन चंगा होए गईन।

Jelenleg kiválasztva:

मत्ती 14: SGJNT

Kiemelés

Megosztás

Másolás