मर्कुस 14
14
येसुलाइ मार्नार दाउ
(मति २६:१-५; लुका २२:१-६)
1अखमिरि पिठो खाइनार चाड अर्थात निस्तार चाड आइ दुइ दिन बाकि रल्ति। मुख्य पुजारि र धर्म-गुरुकिन येसुलाइ किनिखे सुटुक्क आठाइके मार्नार बाजिके दाउ हेरिधर्लाइ रइला।#पर १२:१-२७ 2तर होल्किन इन्खा बिचार गर्ला, “चाडकर बेलानाइ चाइ हाइनिन ह्य काम गरइ बइहक, नत्र भने मान्छेल्को माजनाइ बड्खो होहल्ला हक्नार आछि।”
येसुलाइ अत्तर लाइदिल
(मति २६:६-१३; युहन्ना १२:१-८)
3येसु बेथानिया गाउँनाइ कुस्ठ रोगबान बिसेक हक्ल सिमोनकर घरनाइ जाइले। येसु खाइ धर्ल बेलानाइ एउटि बेटि जटामसिकर धेरे मङ्गो अत्तर सिङ्गमरमरकर सिसिनाइ लिके आइलि। होइनिन सिसि फुटाइके ह्व मङ्गो जटामसिकर अत्तर येसुकर कापालनाइ खनाइदिलि।#लुक ७:३७-३८ 4तर कोइ-कोइकिन रिस गरिके आपसनाइ बाजइ लाग्ला, “इन्खा मङ्गो अत्तर किनारे इत्तिके खेरो फ्याङ्लि? 5बुरु ह्यलाइ बेचिके ह्वबान आइल पइसा गरिबकाइ बाड्दिलासिन मजार हक्नाल्ति। ह्य बेच्ल हक्लासिन तिन सय भन्दा बढ्ता चाँदिकर सिक्का आइनाल्ति।” अनि होल्किन ह्व बेटिलाइ हाकार्ला।
6तर येसुन होल्काइ बल्-ल्याक,“हकिहाल्लो, किनारे तोरा ह्यलाइ हाकार्छो? हेइनिन मोर लागि माहाल काम गर्लाछि। 7किनारइभने गरिबलत ता सदइ तोराल्कोसिन हक्छत, र तोराल्काइ मन लाग्ल बेला होल्को भलाइ गरइ सक्छो। तर मुइ ता सदइ तोराल्कोसिन बइहकु।#बेब १५:११ 8हेइनिन जे गरइ सक्लि होइ गर्लि। हेइनिन मोर सरिरलाइ गड्काइकर लागि अगाडि ने अत्तर खन्याइकइ तयार पार्लाछि। 9साँच्चि मुइ तोराल्काइ बल्छु, सन्सारनाइ जछि-जछि ह्य सुसमचारकर पर्चार हक्छि, ह्व सेब्बे ठउँनाइ हेइनिन गर्ल ह्य कामकर पुनि सम्जना हक्नारआछि।”
यहुदान येसुलाइ पक्राइदेइ तयार हक्ल
(मति २६:१४-१६; लुका २२:३-६)
10येसुराइ बारुटाइ चेलालत मद्दे यहुदा इस्करियोत बल्ल चेला, मुख्य पुजारिलत हक्लनाइ जाइके येसुलाइ पक्राइदिनार कुरो गर्ले। 11यहुदाकर कुरो सुनिके होलत एकदम खुसि हक्ला, र होलाइ पइसा दिनार कबुल गर्ला। अनि होइनिन येसुलाइ किनिखे पक्राइदेइ सक्छु बाजिके मउका हेरइ लाग्ले।
निस्तार चाडकर लागि भोज तयार
(मति २६:१७-२५; लुका २२:७-१४,२१-२३; युहन्ना १३:२१-३०)
12अखमिरि पिठो खाइनार चाडकर पइलो दिन आल्ते, ह्व दिननाइ इज्राएलिल्किन निस्तार चाडकर थुमा बलि चाराइतेला। येसुराइ चेलाल्किन येसुलाइ सोद्ला, “हाइ कछि जाइके तोर लागि निस्तार चाडकर भोज ठिक पारु?”
13अनि येसुन दुइटाइ चेलाल्काइ इन्खा बलिके पाठाइल्याक,“तोरा सहरनाइ जाओ, उछि तोराल्किन गाग्रिनाइ पानि बोकिके जाइनार एउटो मानुसलाइ भेट्टाइनार आछो। होक्र पछि लागो। 14ह्व मानुस जछि पस्छइ ह्व घरकर मालिकलाइ बलो, ‘हाम्रो गुरुन सोद्लाछ, मोर चेलाल्कोसिन निस्तार चाडकर भोज खाइनार पाउना कोठा कछि आछि?’ 15अनि होइनिन तोराल्काइ उपल्चो तालानाइ मजसिन सजाइकइ धर्ल बड्खो कोठा देखाइनार आछ, र उछि ने हाम्रो लागि भोज तयार पारइ।”
16अनि ह्व चेलालत सहरनाइ जाइतिन येसुन बल्लजिन्खाए ने भेट्टाइला, र होल्किन निस्तार चाडकर भोज उछि ठिक पार्ला।
17साँझ पर्लपछि येसु बारेउटाइ चेलाल्कोसिन आइले। 18होलत बसिके भोज खाइतिन गर्तिन येसुन बाज्ले,“साँच्चि मुइ तोराल्काइ बल्छु, तोरा मद्दे मुइसिन खाइनार एउटोन मुइलाइ धोका दिनारआछ।”#भजन ४१:९
19ह्य कुरो सुनिके चेलालत दुखित हक्ला, र पालेपाल सेब्बाल्किन येसुलाइ सोद्ला, “पर्भु, ह्व मुइ हो?”
20येसुन होल्काइ बल्-ल्याक,“तोरा बारुटाइ मद्दे एउटो हो, जुनिन मुइसिन थालनाइ पिठो चोपिधर्लाछ। 21किनारइभने मानुसकर बेटाक ता धर्मसास्तरनाइ लेख्ल अन्सार जाइ ने पर्छि, तर धिक्कार ह्व मानुसलाइ जुनिन मानुसकर बेटाकलाइ धोका दिछि। बुरु होक्र ता जन्म ने बइहक्लासिन माहाल हक्नाल्ति।”
अन्तिम भोज
(मति २६:२६-३०; लुका २२:१४-२०; १ कोरिन्थि ११:२३-२५)
22खाइधर्ल बेलानाइ येसुन पिठो लिले र परमेसोरलाइ धन्नेबाद दिके पिठो भाच्ले, अनि चेलाल्काइ दितिन बल्-ल्याक,“लिओ र खाओ, ह्य मोर सरिर हो।” 23ह्व पछि येसुन कचउरा लिले र परमेसोरलाइ धन्नेबाद दिके चेलाल्काइ दिल्याक र होलत सेब्बाल्किन ह्व कचउराबान पिला। 24अनि येसुन होल्काइ बल्-ल्याक, “ह्य नयाँ करारकर मोर रकत हो, जुन धेराइ मान्छेल्को लागि ब्वाइनार आछ।#पर २४:८; यर ३१:३१-३४ 25साँच्चि मुइ तोराल्काइ बल्छु, परमेसोरकर राज्यनाइ नयाँ गरिके नपिउन्जेलसम्म मुइ फेरि अङ्गुरकर रस पिनार बइने।”
26अनि होलत एउटो गित गिदाइकइ जइतुन डाँरादिस जाइला।
पत्रुसकर इन्कारबारे येसुकर भबिस्यबानि
(मति २६:३१-३५; लुका २२:३१-३४; युहन्ना १३:३६-३८)
27येसुन चेलाल्काइ बल्-ल्याक,“तोरा सेब्बाल्किन मुइलाइ छाडिके जाइनारआछो, किनारइभने इन्खा लेख्लाछ, ‘मुइ गोठ्लालाइ मार्नारआछु, र भेडिलत तितरबितर हक्नारआछत।’#जक १३:७ 28तर मुइ मर्लबान जिउँते हक्लपछि तोरा भन्दा अगाडि गालिलनाइ जाइनारआछु।”#मति २८:१६
29पत्रुसिन येसुलाइ बलल्ते, “सेब्बाल्किन छाडिके जाइतिन पुनि मुइ तुइलाइ छाड्नार बइने।”
30येसुन होलाइ बलल्ते,“साँच्चि मुइ तुइलाइ बल्छु, आज राति दुइ फेरा भाले बासइ भन्दा अगाडि तुइनिन मुइलाइ तिन चोटिसम्म बइचिनु बाजिके इन्कार गर्नारआछस।”
31तर पत्रुसिन झन जोड दिके बाज्ले, “तुइसिन मरइ पर्तिन पुनि मुइ तुइलाइ इन्कार गर्नार बइने।” अनि आने सेब्बाइ चेलाल्किन पुनि उन्खाए बाज्ला।
गेतसमनि बगइचानाइ येसुकर पार्थना
(मति २६:३६-४६; लुका २२:३९-४६)
32ह्व पछि येसु आफ्ने चेलाल्कोसिन गेतसमनि बल्ल बगइचानाइ जाइले। उछि पुगिके येसुन चेलाल्काइ बल्-ल्याक,“मुइ पार्थना गरुन्जेल तोरा इछि बसो।” 33तर येसुन पत्रुस, याकुब र युहन्नालाइ आफिसिन लाकाइल्याक, र येसु एकदम दुखित हकिके छटपटाइ लाग्ले। 34येसुन होल्काइ बल्-ल्याक,“मोर मन पिडान छट्पटिकइ मर्तेठि हक्लाछि। तोरा इछि जागे बसो।”
35अनि येसु अलि ओभर जाइके भुइनाइ घोप्टो परिके, हकइ सक्छइ भने मुइ उप्रान आइ लाग्ल कस्ट मुइबान हटाइदेउ बाजिके पार्थना गर्ले। 36येसुन बाज्ले, “अब्बा, ब्वा, तुइनिन सेब्बे कुरो गरइ सक्छस। ह्य दुखकर कचउरा मुइबान हटाइदेउ। तर मुइनिन इछ्या गर्लठि बया, तुइनिन इछ्या गर्लठि हक्दिक।”
37येसु फर्किके आइतिन चेलाल्काइ निदाइधर्ल भेट्टाइले। येसुन पत्रुसलाइ बलल्ते,“सिमोन, केति तुइ निदाइधर्लाछस? केति एक घन्टा पुनि जागे बसइ बइसक्लइ? 38जागे बसो, अनि पार्थना गरो, र तोरा परिछ्यानाइ जुनपरो। आत्मा ता तयार आछि, तर सरिर कमजोर आछि।”
39येसु उछ्यान फेरि जाइले र दोहोराइकइ होइ पार्थना गर्ले। 40फेरि येसु होलत हक्लनाइ आइतिन होल्काइ निदाइधर्ल भेट्टाइले, होल्किन निन्रान आँखि खोलइ बइसक्ला र येसुलाइ केइ जबाफ देइ बइसक्ला।
41येसु तेस्रो फेरा आइके होल्काइ बल्-ल्याक,“केति तोरा अजइ सुतिकइ आराम गरिधर्लाछो? अब सुत्नार बेला सकल्ते। हेरो, मानुसकर बेटाक पापिल्को हातनाइ पक्राउ परइ आँट्लाछ। 42अब उठो, जिउँ। हेरो, मुइलाइ आठाइनार नजिके आछ।”
येसुलाइ आठाइलाइ
(मति २६:४७-५६; लुका २२:४७-५३; युहन्ना १८:३-११)
43येसुन ह्य कुरो बाज्तिन गर्तिन बारुटाइ चेलालत मद्दे एउटो यहुदा बल्ल चेला उछि आइले। होइसिन मुख्य पुजारिल्किन, धर्म-गुरुकिन र आने अगुवाल्किन पाठाइलाइ मान्छेल्को भिड लउरि र तरवार लिके उछि आइला। 44येसुलाइ पक्राइदिनार यहुदान होल्काइ इन्खा सङ्केत दिल रइल, “मुइ जुनलाइ मइँ खाइछु, होइ ने येसु हो, होलाइ पक्रो र सुरछ्या दिके लाकाओ।”
45अनि यहुदा सरासर येसु हक्लनाइ जाइके “रब्बि” बाज्तिन मइँ खाइले। 46होइ बेला ने होल्किन येसुलाइ पक्रिला। 47उछि येसुकर नजिके ठडाइलाइ मद्दे एउटोन आफ्ने तरवार निकालिके पर्धान पुजारिकर नोकरलाइ हिर्काल्ते र होक्र कान च्वाटइ काटल्ते। 48येसुन होल्काइ बल्-ल्याक,“केति तोराल्किन डाकालाइ जिन्खाए मुइलाइ पक्रइलाइ लउरि र तरवार लिके आइलाइ? 49मुइ दिन्ने तोराल्कोसिन बसिके मन्दिरनाइ सिछ्या दितेनाइ खइ, तोराल्किन मुइलाइ बइपक्रिलो। तर धर्मसास्तरनाइ मोर बारेनाइ लेख्ल कुरो पुरा हकइ ने पर्छि।”#लुक १९:४७;२१:३७
50होइ बेला ने सेब्बाइ चेलाल्किन येसुलाइ छाडिके भाग्ला।
51सुतिकर एउटो मात्र लुगा ओड्ल एउटो छोडारि येसुकर पछि लाग्ले। होल्किन ह्व छोडारिलाइ आठाइ हेर्ला, 52तर लुगा छाडिके ह्व लाङ्टे भाग्ले।
येसु महासभाकर अगाडि
(मति २६:५७-६८; लुका २२:६६-७१; युहन्ना १८:१२-१३,१९-२४)
53होल्किन येसुलाइ पर्धान पुजारिकर घरनाइ लाकाइला। उछिका सेब्बाइ मुख्य पुजारिलत, धर्म-गुरुलत र अगुवालत जम्मा हक्लाइ रइला। 54पत्रुसचाइ बद्दुरेबान येसुकर पछि-पछि लागिकइ पर्धान पुजारिकर चात्रानाइ आइले, र पालेल्कोसिन बसिके आगि तापइ लाग्ले। 55ह्व पछि महासभाराइ सेब्बाइ सदस्यल्किन खास गरिके मुख्य पुजारिल्किन येसुलाइ मारइकर लागि पर्मान हेरइ लाग्ला, तर होल्किन केइ पर्मान बइभेट्टाइला। 56येसुकर बिरुद्दनाइ धेराल्किन झुटो साछि दिला, तर कुनुल्को कुरो बइमिलल्ते।
57अनि कोइ-कोइकिन ठडाइके येसुकर बिरुद्दनाइ इन्खा झुटो दोस लाइ लाग्ला, 58“हेइनिन इन्खा बाज्ल हाइनिन सुन्लाछे, ‘मान्छेल्को हातिन बानाइल ह्य मन्दिर मुइ भत्काइनारआछु, र तिन दिननाइ मान्छेल्को सयोग बिना मुइ अर्को मन्दिर बानाइनारआछु।’”#युह २:१९ 59तर हेइनाइ पुनि होल्किन बाज्ल कुरो बइमिलल्ते।
60तब पर्धान पुजारिन सेब्बाल्को अगाडि ठडाइके येसुलाइ सोदल्ते, “तोर बिरुद्दनाइ हेल्किन दिल साछि केति हो? किनारे तुइनिन केइ जबाफ बइदिल?”
61तर येसुन केइ जबाफ नदिके चुप लाग्ले। फेरि पर्धान पुजारिन येसुलाइ सोदल्ते, “केति तुइ परमधन्यकर बेटाक खिरिस्ट हो?”
62येसुन बाज्ले,“मुइ हो, अनि एक दिन तोराल्किन मानुसकर बेटाकलाइ सर्बसक्तिमानकर दाइनेपटि सिहासननाइ बसिधर्ल र स्वर्गबान बादलनाइ आइधर्ल देख्नारआछो।”#दा ७:१३
63ह्य सुनिके पर्धान पुजारिन आफ्ने लुगा च्यात्तिन बाज्ले, “अब हाइलाइ आने केति पर्मान चाइलो र? 64तोराल्किन हेइनिन गर्ल परमेसोरकर निन्दा ता सुनिहाल्लो। अब बाजो, तोराल्को केति बिचार आछि?”
अनि सेब्बाल्किन बाज्ला, “ह्य अपराधि हो, ह्यलाइ मिर्त्यु दन्ड देइ पर्छइ।”#ले २५:१६
65होलतमद्दे कत्ताल्किन येसुलाइ थुक्ला, र येसुकर आँखि छोपिके हिर्काइतिन बल्ला, “लु अगमबानि गर, तुइलाइ कुनिन हिर्काइल्यास?” अनि मन्दिरकराइ पालेल्किन पुनि येसुलाइ हिर्काइतिन लाकाइला।
पत्रुसकर इन्कार
(मति २६:६९-७५; लुका २२:५६-६२; युहन्ना १८:१५-१८,२५-२७)
66पत्रुस हेठ्ठ चात्रानाइ बसिधर्ल बेलानाइ पर्धान पुजारिकर नोकर्निलत मद्दे एउटि उछि आइलि। 67होइनिन पत्रुसलाइ आगि तापिधर्ल देखिके मजसिन हेर्तिन बाज्लि, “तुइ पुनि नासरतकर येसुसिन रइलइ।”
68तर पत्रुसिन इन्खा बाज्तिन इन्कार गर्ले, “बया, तुइनिन ह्य किन्खा कुरो गर्लि, मुइनिन ता केइ कुरो बइबुज्नाइ।” अनि पत्रुस बाइर जाइनार ढोकादिस जाइले, र होइ बेला भाले बास्ले।
69ह्व नोकर्निन उछि हक्लाइ मान्छेल्कोसिन फेरि बाजइ लाग्लि, “ह्य पुनि होलत मद्देकर एउटो हो।” 70तर पत्रुसिन फेरि इन्कार गर्ले।
केइ बेरपछि उछि ठडाइनारकिन पत्रुसलाइ बल्ला, “पक्कइ तुइ होलत मद्देकर एउटो हो, किनारइभने तुइ पुनि गालिलि हो।”
71फेरि पत्रुसिन कसम खाइतिन बाज्ले, “यदि मुइनिन झुक्काइल हो भने मरिजाउ, जुनकर बारेनाइ तोरा बाज्छो ह्व मानुसलाइ मुइ चिनइ बइचिनु।”
72तुरुन्तइ दोस्रो फेरा भाले बास्ले, अनि पत्रुसलाइ येसुन इन्खा बल्ल कुरो याद हकल्ते,“दुइ फेरा भाले बासइ भन्दा अगाडि तुइनिन मुइलाइ तिन फेरा बइचिनु बाजिके इन्कार गर्नारआछस।” ह्व कुरोलाइ सम्जिकइ पत्रुस धुरु-धुरु कान्ले।
Jelenleg kiválasztva:
मर्कुस 14: MAJH
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2024 (Active), Mother Tongue Translators Society and Wycliffe Bible Translators, Inc. All rights reserved.
