Genesis 11
11
Fa difrenti tongo bigin taki na grontapu
1Heri grontapu ben e taki a srefi tongo. 2Ma di den sma ben hari go na a oostsei, den doro na wan opo sabana ini a kondre Sinear,#11:2 Disi na wan tra nen gi Babilonia. dan den tan libi drape. 3Dan den taigi makandra taki: “Yu sabi san, wi kan meki ston fu kleidoti. Wi o baka den bun dan wi o fasi den kon na wan nanga tara.” 4Den taki tu taki: “Yu sabi san, kon meki wi bow wan foto nanga wan toren di e suku fu miti heimel. Dati sa gi wi bigi nen èn a sa meki taki wi no libi panyapanya abra heri grontapu.” 5Dan MASRA saka kon fu luku a foto nanga a toren di den sma ben e bow. 6Ne MASRA taki: “Luku, na wán folku èn den e taki wán tongo. Disi na a bigin wawan fu den sani di den o man du. Ala sani san den o wani fu du now, den o man du. 7Yu sabi san, meki Wi saka go bruya a tongo fu den fu den no ferstan makandra.” 8Na so MASRA meki den panya fu drape go abra heri grontapu èn den ben abi fu tapu a bow fu a foto. 9Dat' meki den e kari a foto Babel.#11:9 Babel wani taki bruya. Gi den sma fu Babilonia a wortu wani taki: a doro di e go na den Gado. Bika na drape MASRA bruya a tongo fu ala sma na grontapu, èn na fu drape MASRA panya den abra heri grontapu.
Den bakapikin fu Sem
10Disi na den bakapikin fu Sem. Di Sem ben abi wan hondro yari, a tron p'pa fu Arpaksad. Disi ben de tu yari baka a bigi frudu. 11Sem libi ete feifi hondro yari baka di a tron p'pa fu Arpaksad èn a kisi moro manpikin nanga umapikin.
12Di Arpaksad ben abi dritenti-na-feifi yari a tron p'pa fu Sela. 13Arpaksad libi ete fo hondro nanga dri yari baka di a tron p'pa fu Sela èn a kisi moro manpikin nanga umapikin.
14Di Sela ben abi dritenti yari a tron p'pa fu Eber. 15Sela libi ete fo hondro nanga dri yari baka di a tron p'pa fu Eber èn a kisi moro manpikin nanga umapikin.
16Di Eber ben abi dritenti-na-fo yari a tron p'pa fu Peleg. 17Eber libi ete fo hondro nanga dritenti yari baka di a tron p'pa fu Peleg èn a kisi moro manpikin nanga umapikin.
18Di Peleg ben abi dritenti yari a tron p'pa fu Rehu. 19Peleg libi ete tu hondro nanga neigi yari baka di a tron p'pa fu Rehu èn a kisi moro manpikin nanga umapikin.
20Di Rehu ben abi dritenti-na-tu yari a tron p'pa fu Serug. 21Rehu libi ete tu hondro nanga seibi yari baka di a tron p'pa fu Serug èn a kisi moro manpikin nanga umapikin.
22Di Serug ben abi dritenti yari a tron p'pa fu Nakor. 23Serug libi ete tu hondro yari baka di a tron p'pa fu Nakor èn kisi moro manpikin nanga umapikin.
24Di Nakor ben abi tutenti-na-neigi yari a tron p'pa fu Terak. 25Nakor libi ete wan hondro nanga tin-na-neigi yari baka di a tron p'pa fu Terak èn a kisi moro manpikin nanga umapikin.
26Di Terak ben abi seibitenti yari a tron p'pa fu Abram, Nakor nanga Haran.
Den bakapikin fu Terak
27Disi na den bakapikin fu Terak. Terak tron p'pa fu Abram, Nakor nanga Haran. Haran tron p'pa fu Lot. 28Terak, a p'pa fu Haran, ben de na libi ete di Haran dede. A dede ini a foto Ur fu den Kaldeasma, pe a ben gebore. 29Dan Abram nanga Nakor teki wefi fu libi. A frow fu Abram ben nen Sarai èn a di fu Nakor ben nen Milka. Milka ben de wan umapikin fu Haran. Haran ben de p'pa fu Milka nanga Yiska. 30Sarai no ben abi pikin fu di a no ben man kisi pikin.
31Dan Terak teki en manpikin Abram dan den libi a foto Ur fu den Kaldeasma fu go na a kondre Kanaan. Terak ben teki en granpikin Lot, a manpikin fu Haran, nanga Sarai, a frow fu en manpikin Abram tu fu go nanga den. Ma di den doro Haran den tan libi drape. 32Terak ben tapu tu hondro nanga feifi yari, dan a dede ini a foto Haran.
Jelenleg kiválasztva:
Genesis 11: SB16
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Tekst © Surinaams Bijbelgenootschap 2016
