Matius 9
9
Yesus en ap mesik eʼgik oyuk soborak aʼge obaptegei wene
(Markus 2:1-12; Lukas 5:17-26)
1Asogo moʼgulegisema re, at Yesus ik so pam ʼgwi lagarik, ik so wusogo re, ik etle akhit libagarik o kota at owi pam laga ʼgal e, 2ap mesik eʼgik youk modok soborak welaga aʼge e ʼbiagan pam ʼbourak oruakhwe e yesogo woluk eʼbek wegesema, at Yesus en e,
“Is ai enede an nebam heʼberik pegesarik en woluk wegesa hegi,” oluk, il enagat entesirik e, ap eʼgik youk soborak aʼge ano disogo moʼgulesi,
“Nomlogo yo. Hagai homup o. Hat wiak taga legen aʼge re, an en erlagapsogo ukpegi o,” oluk, moʼgulesi. 3Asogo moʼgulesimu re, is ap Allah iak pelal wogo eiye aʼge logon onogola en,
“Eige! Ap yu re, ogola en Allah mi-miarak pasulat onuk wiagap pasu e,” oluk opogu legesa. 4Asogo epegesema, at Yesus en is enebabut enagat ʼbalegeitik e, disogo egei,
“His honogola en wene wiak aʼge oborogu legep ai nopaget. 5An en ap yu wene moʼgulom e, wene se ʼgelaʼge re, ʼge epegep.
Hat wiak taga legen aʼge ano arat erlagapsogo ukpegi o, oluk moʼgulegis ai se aʼge ʼgelaʼge moʼgulegis epegep a? Ye, at e,
Hebe inoroguntik lak o, oluk moʼgulom nak e, se ʼgelaʼge epegep a. Erlak o. Hebe inoroguntik lak, oluk moʼgulomma re, eʼginat o. 6Eʼgin aʼgeat de, an abat daklau wegi ai, ʼgwiangma yema welat aphwami di wiak yu wiak togwi aʼge an enat erlagapsogo ukpasu lemagoluk Allah en eiye taknebesi ai pobirak nebagup en,” oluk, ap eʼgik oyuk soborak aʼge ano disogo moʼgulesi,
“Hebe inoroguntik, hegerlis demogo nogo ese legen aʼge yu horloluk howi pam lak o,” oluk perakpesi. 7Perakpesimu, ap ano inagarik owi pam laga. 8Asogo tegeimu re, is aphwami ebano enil hegesarik onogorlok aʼbik agarik e,
“Allah en disogo togu lemagoluk aphwami aʼge edikpesimu ai nogorlok e,” oluk, Allah erliktigisa.
Yesus en Matius yoʼgo pesi wene
(Markus 2:13-17; Lukas 5:27-32)
9At Yesus o eba ukpoluk lasulat, ap mesik onuk Matius, kantor uang pemerintah aʼge paget ʼgonu oluk wogumu ebano hweriogo oruakma, il holuk,
“Neʼberlik suk o,” oluk moʼgulesimu re, inagarik e, eʼberlik laga. 10Lagarik, at owi pam Yesus eʼbirek ʼgwigisarik soʼboru nouwogoluk hweriogo oruakma re, is ap uang pemerintah paget ʼgonu oluk wogu legesa aʼge emin, is pema wiak til noʼgu legesa aʼge emin, esanat ʼgu egesarik, at Yesus ebe emin, osi iak wogu legesa aʼge ebano eminat mesikmu huregesarik soʼboru noʼgu legesa. 11Asogo noʼgwi oruakma, is ap Farisi aʼge en enil ʼgwelagontoluk e, is ap Yesus iak wogu legesa aʼge ebano disogo moʼgulentigisa,
“His honue wene moʼgulhentasu aʼge ai, is ap uang pemerintah paget ʼgonu oluk wogwi aʼge emin, is pema wiak til noʼgwi aʼge emin, soʼboru mesikmu noʼgwi yu re, nopaget,” oluk moʼgulentigisa. 12Asogo moʼgulentigisema, at Yesus esaʼgo hwelegeirik e, disogo moʼgulentesi,
“Is aphwami logon enebam op welat ou erlak aʼge, dokterlak en ou obabonobuagoluk yoʼgo onobo no? Erlak o. We, enebam ou oruak holugat dokterlak yoʼgo onobo yo. 13Allah iak mesik disogo egei,
An Allah nogola re, aphwami en onuam watnogwi ai re, nebit o. We, is aphwami logon enedeabonobogulom ai re, nagai o, (Hosea 6:6)
oluk egei wene ai pobirak pei lit o. An wegi ai re, aphwami enebabut op togwi aʼge yoʼgo enebaigoluk wegi erlak o. We, enebabut wiak togwi aʼgeat yoʼgo enebaigoluk wegi o,” oluk moʼgulentesi.
Seʼban uogoluk soʼboru ʼbonuk welagai wene
(Markus 2:18-22; Lukas 5:33-39)
14Asogo moʼgulentesirik eʼberlik e, is Yohanes osi iak wogu legesa aʼge ebano Yesus eʼbek wegesarik e, disogo moʼgulegisa,
“Nis emin, is ap Farisi aʼge emin, seʼban nin hwedik nan hwedik uogoluk, soʼboru ʼbonuk welege aʼgeat de, is ap hat hiak wogwi aʼge yema nak e, asogo togwi erlak ai nopaget,” oluk moʼgulegisa. 15Asogo moʼgulegisema re, at Yesus en e, disogo moʼgulentesi,
“Ap mesik ugwe wogogulat e, at arilak orokhwi eneminat welat e, is onogola wik-wiaksogo wolom no? Erlak o. Asogo aʼgeat de, arilak orokhwi onoboluk, ap ai woluk lo aʼge agauwa oruagat o. Asogo woluk loma nak e, is ai agauwa mesik soʼboru no erlakma en ʼbonuk welat seʼban ogwi modogat welema o,” oluk moʼgulentesi. 16Asogo moʼgulentesirik, mesik disogo moʼgulentesi,
“Aphwami en, sum naduk ʼbuktogwi aʼge derlep oso holuk, kain ʼget aʼge pam serleben tumo, pobuk kain ʼget aʼge ai dorloʼgok hai louwarik e, sum ai lokneat hi toluk louwa o. 17Ai ʼgelaʼge, aphwami en anggur eʼgen ʼberelogo aʼbosu ʼget aʼge ik eʼbe domba wam agap aʼge page heliʼgogo pogwi aʼge ogola naʼgogo pogwi erlak. Asogo naʼgogo pogwi holuk e, ik eʼbe ai sup eselat e, anggur eʼgen aʼbosu ai ʼgwesalogo alemat agalat, ik eʼbe ai harloksogo alemat agalat, tuano. Asogo tuano oluk e, anggur eʼgen aʼbosu ʼget aʼge holuk e, ik eʼbe ʼget heleʼgik aʼge pam holugat ogola naʼgu o. Asogo naʼgumu re, ʼbiren akhoat op wolom o,” oluk, moʼgulentesi.
Yesus en Yairus agalogo emin, hwe mesik emin, ou obabenebegei wene
(Markus 5:21-43; Lukas 8:40-56)
18Asogo moʼgulentasuam, ap mesik o ap Yahudi aʼge seʼban ogumu ebano eiye welat ʼgain welaga aʼge ai Yesus eʼbek wagarik, odogorlu pam welat disogo moʼgulesi,
“An nagalogo yogodak yayat waraga aʼge re, hat en heʼgik tenhai lagunmu re, elaluk emarik se ema o, oluk yoʼgo hobou wegi o,” oluk moʼgulesi. 19Asogo moʼgulesimu re, at Yesus ebe emin, ap ano emin, is ap Yesus iak wogu legesa aʼge ebano emin, enemin ʼberlegat legesa. 20-21Lagaimu re, hwe mesik emep lasu modok oruakhwe 12 tahun tegei aʼge, eneʼberlik lasulat ogola en e,
“Yesus ai osum neʼgik tenhaikmu re, nemep ʼgarok ua o,” oluk, Yesus osum ologun nak eʼgik tenhesi. 22Eʼgik tenhesimu re, at Yesus en orogole edenogo il oʼborl akhit ʼgwelakholuk e, disogo moʼgulesi,
“Nagalogo yo! Hogola hagai hemen o. Hede nebam heʼberik pegen ai en op egen o,” oluk, osokhwe erianoat, hwe ano arat op aga. 23Asogo til til e, at ap ʼgain Yesus yoʼgo waga aʼge ano owi pam legesa ʼgal e, aphwami loʼgu marogulat ʼbiʼgong worogwi aʼge worogulat, loʼgu ngai-wai aʼbik ogulat, ogumu il yerentesirik e, 24disogo moʼgulentesi,
“Hwele ai warom erlak. We, nogoso yo. Holuk e, lebemis o,” oluk moʼgulentesimu re, is aphwami aʼbik ebano en e, eidarak pegesa. 25Eidarak pegesema re, enebe legigonoboluk e, hwele ano oruakma ebano ʼgwi lagarik eʼgik tenakho edikpesimu elaluk aga. 26Asogo tegeimu re,
“Yesus en tegei o,” oluk, o doʼgo ʼberlek ebano obok modok saga egei.
Yesus en ap enebe ʼbiren enil hopnik aʼge dektak enebesi wene
27At Yesus o eba en lasumu ap enebe ʼbiren enil hopnik aʼge eʼberlik lagalat eniak loksogoat disogo moʼgulegisa,
“At Daud en dogoʼgwe aʼge nue o! Hedeapnenebemen o,” oluk moʼgulegisa. 28Asogo moʼgulegisema re, at Yesus ebe olema ʼgoluk oruakma, is ap enebe ʼbiren enil hopnik aʼge erianoat eʼbek wegesa. Wegesema re, at Yesus en e, disogo moʼgulentesi,
“His honogola en e,
At en elit obapnonobu o, oluk honogola opogu legep a?” oluk moʼgulentesimu re, is en e,
“I o. Nonue. Elirat obapnonobuat opogu lege o,” oluk moʼgulegisa. 29Asogo moʼgulegisema re, at Yesus en enil ano eʼgik tenak enebasulat e, disogo moʼgulentesi,
“Henede nebam heʼberik pegep hegitsogoat obaphenebaik o. Holuk e, op emit o,” oluk moʼgulentesi. 30Asogo moʼgulentasukhwe erianoat, enil ano deksogo op egesa. Op egesema re, at Yesus iak ningsogoat moʼgulentasulat e,
“An obaphenebegis aʼge yu, aphwami enaluk agomano oluk e, aphwami moʼgulentagup no yo,” oluk moʼgulentesi. 31Asogo moʼgulentesi aʼgeat de, ap ʼbiren eriano en, o ebano at obok sagarak pegesa.
At Yesus en ap mesik iak oso erlak aʼge iak hweregei wene
32O eba en libagaimu re, is aphwami logon en ap mesik muʼgat ebabut wiak aʼge ogola ʼgwegeimu iak erlak modok welaga aʼge Yesus eʼbek woluk wegesa. 33Woluk wegesema re, at Yesus en muʼgat ebabut wiak aʼge ap ano ogola ʼgwegeirik oruakma henokho lebikpesimu, ap ano iak husogo lasulat e, weneane egei. Asogo tegeimu re, is aphwami aʼbik welegesa aʼge ebano en Yesus erliktugulat e, disogo egesa,
“Nis aphwami Israel aʼge mesik en disogo togwiam nenil ontogu lege erlak aʼge nonogorlok o,” oluk erliktigisa. 34Asogo erliktigisa aʼgeat de, is ap Farisi aʼge ebano en, disogo egesa,
“At Yesus en Iblis osi onue ʼgain ano anni pamat, muʼgat ebabut wiak aʼge aphwami onogola ʼgwigisarik oruakma henokho lebikpasu yuat de,” oluk egesa.
At Yesus en aphwami edeabenebasulat moʼgulentesi wene
35At Yesus o seli wei oʼgwe lok oʼgwe, da ʼgwil ya ʼgwil, neselat, o seʼban ogwiʼgwe ʼgwegeirik e, op wene nenaik Allah en eragam enebasu wene ano moʼgulentasulat, di ou yu ou enebam oruak aʼge emin, enanni erlak maben aʼge emin, obabenebiselat, til denaga laga. 36Asogo tagenebil denagalat e, aphwami aʼbik ebano il yerentesirik e,
“Wam domba wam oʼgonogwi ʼgelaʼge, is yema oʼgononobu aʼge erlak en yogunat al sagal-ʼbagalsogo set hoporak noʼgwi yema nede e,” oluk edeabenebegei. 37Edeabenebegeitik e, at osi iak wogu legesa aʼge ebano disogo moʼgulentesi,
“Eʼgen egeik aʼbik oruak aʼgeat de, aphwami eʼgen ebe ʼbalu aʼge enebe weiyat o. 38Ai en e, ap iabuk Eiye aʼge ano en aphwami eʼgen ʼbalu aʼge logon peragonobouwagoluk, at yoʼgo pogu lomup o,” oluk moʼgulentesi.
Jelenleg kiválasztva:
Matius 9: WUL
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
