Nar 9
9
1Mero Saul ramamigahwohwa to nakartetan mene hnoan neremim te Ieremera.
2Neteruan to ieremera le nuhwasigenan mamehrapkin pen ton nawowa to Damaskas to nimwa ahwak min, moma takama terahm nevin taha Suata ka, naman mene neberavin, terepelis ilar miripa ilar Jerusalem.
3An le nuenan tahan neterua iwaket to Damaskas, an ihwe am nisia le neai neterasiakapun in,
4An neteram le nemapten, netererou nakaran ker rameni ton, Saul, Saul, retol nakamalikiamta io?
5An netereni, Ik pehe, Ieremera? An netereni, Io Iesu ierem ik nakamalikiamta io.
6Mero armig muan lauanu, an kapeni tonik nar tenakakeikei mol.
7An neremim kamaivan ilar min netakailil marika aken, netakairou nakaran mero kasaihman til.
8An Saul neterermig le nemapten, an nemrin neterait mero remesahman nar; an netakarhiapatin nelimin marir in maruan Damaskas.
9An ramarik le nian kisil mesahman nar, an remesauganan mesamnuman.
10An iahwak ker ramarik Damaskas, netigen Ananaias, an Ieremera netereni ton le nar pa, Ananaias. An netereni, Ahm ru io apa, Ieremera.
11An Ieremera netereni ton, Armig muan le suatu netigen Etuatu, mahrapuk le nimwa taha Judas to ieremim ker netigen Saul ierem Tarsas, mero in ka ahm ru ramohwak,
12An reknahm le nar pa ieremim ker netigen Ananaias rakava ton mehlau nelimin lan moma terahm mun nar.
13An Ananaias neteraram, Ieremera, iemerou to neremim ribor le ieremim uk moma noletetan kuhu in ramamol to neremim ut min taham Jerusalem.
14An ietuk in reknos nesanenan to neremera le nuhwasigenan to nelisan nerem kamaisak hatigen Netigam.
15An Ieremera netereni ton, Uan, mero in ka in nevige nar iaknahmpen moma terepos Netigok le nemri Jentail min mene neremera mene nereri Israel,
16Mero in ka io tiapetikun in le nahmean min in terakeikei merou to netigok.
17An Ananaias neterier mua le nimwa ka, an neterehlau nelimin lan mameni, Piak Saul, Ieremera, Iesu ierem remier tonik le suatu nava lan, rehmalipa io moma tenepahm mun nar an moma nekim terepet iau le Nanumun Ausim.
18An ihwe am neteram ita le nemrin rolkoma nevilige nam, an neteramahm mun nar, an netererermig kaui,
19An neteraugan mos nesanenan. An netakairik was ilar nahwak min Damaskas le nian nevin.
20An ihwe am le nimwa ahwak min neteramausito in Iesu moma in Neri Wuhgin.
21An nerem kamairou nanumun ilar neterakamuka, netakamani, Resolan moma in uk ierem ramasulasul nerem kamaisak hatigen Netig uk Jerusalem, an reknua ietuk to nar uk moma terelis mos ilar kam neremera le nuhwasigenan.
22Mero Saul neteramesanen aken, an neteros nenrou Ju min kamairik Damaskas, neterameni esas lan moma in Kristo.
23An nian min nevin neterua muan an Ju min netakamaraihun hnoan in.
24Mero neraihunan tenilar kenerou apu to Saul. An netakamarit in le nukulu min le nian mene lapin mama takahro in.
25An nahwak min netakaros in lapin maihwa iau in le nemata nipai maruatevata le karam.
26An neterua Jerusalem neterolkeikei moma terapitipen le nahwak min. An ilar muka netakamarigen ten in, mesanian nuparhienan lan mama in iahwak.
27Mero Barnabas neteros in mir mua to apostelo min, an neteramausito in kam ilar moma ramahm Ieremera le suatu an moma ramakar kam in, an moma le Damaskas in ramamakar asanen le netige Iesu.
28An netakamairik was ilar min ramakava makamier le Jerusalem.
29An neteramakar asanen le netige Ieremera, neteramakar meraita nakaran te Ju min nerem Krik. An netakama takahro.
30An pian min netakairou netakarir in maitite maruan Sesaria, mahilipen in Tarsas.
31An neli nahwak min le Judia petum mene Kalili mene Sameria netakairik amelinu, an mekneisanen, an netakamaivan le nesiaian Ieremera mene le nasituan taha Nanumun Ausim, an ilar neterol nahuto.
32An Piter neteramavan petum le ten min, neterua mun to neremim ut kamairik Lida.
33An neterahm iken ieremim ker netigen Eneas, ierem ramakamelpen am le nihmawa le nu katilum mekisil an makamis le palsi.
34An Piter netereni ton, Eneas, Iesu Kristo terol ut ik. Armig mol nihmawa taham. An ihwe am neterermig.
35An neremim petum kamairik Lida mene Saron netakaihm in, netakaleleg marua to Ieremera.
36An beraiahwak ker ramarik Jopa netigen Tabitha, ierem takani le nakaran uk kama, Dorkas. Beravin uk nolan nar ut ramibor ton mene nasakan in til in ramol.
37An loanian ka neterakamis an memis; an netakahipel meihlau le nowa nimwa iles.
38An mero in ka Lida iwaket to Jopa nahwak netakairou mama Piter iken, netakahilipen ieremim kiu ton mama takaikeikei kam in, Tenesarikan mero tenekua to kamar.
39An Piter neterermig meroupen ilau. An neterua netakarir maret maruan le nowa nimwa iles, an neberavin min kamemis etag ilar netakamailil iwaket ton mamaisak, netakamarhinhin nar kamarviu ilar in mene niuh min Dorkas ramol loanian kamemairik ilar min.
40An Piter neterhaliatou ilar etahun, an neterenam noulin mamohwak, an neterhwin to nubalakin mameni, Tabitha, armig. An neterait, an neterahm Piter neteramowata.
41An neterofen nelimin kam in muit in, an neteraunin neremim ut mene neberavin kamemis etag ilar, an neterofen in rakamiuh.
42An netikhinatin le nauanu petum Jopa, an neremim ribor netakani nuparhienan le Ieremera.
43An neteramarik Jopa nian nevin ilau Saimon ierem ramol work le nevige natipun.
Jelenleg kiválasztva:
Nar 9: LEN1902
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Published by the British and Foreign Bible Society in 1902, reprinted in 1935.
