Luk 8
8
Chisʋs ʋt im anumpeshi ʋhleha, micha nan‐isht im ʋtta ʋhleha ohoyo aienʋt api̱hʋt a̱ya ho̱, ʋbanumpa isht anumpuli, 1, 4 Na hokchi isht ʋlhpisa anumpa; 6 micha yʋmmak atuk ʋt ʋlbitʋt achukma annoa. 16 Pʋla tohwikeli isht ʋlhpisa; 21 kʋna hosh Klaist im anumpa puta ka im antia hokʋto, yʋmmak o̱ i̱ kanomi fehna mak oke. 22 Chisʋs ʋt kocha umba mahli kʋllo ka yukobli; 26 mihmʋt nan‐isht‐ahullo okpulo la̱wa ho̱ hatak achʋfa ka a kocha weli: yohmi ma, shukha lokoli achʋfa ho̱ ont abeha chi̱ ka, ʋlhpesa im ahni; 43 ohoyo issish ont ia ʋbi yatuk o̱ hlakofichi; 49 mihmʋt Chailʋs ushetik illi tuk a̱ falaminchit tanichi.
1Atuk osh i̱ himmakma yakohmi tok: tʋmaha, micha chuka lokoli puta aiena ka mominchit a hlopullit a̱yʋt, ʋbanumpa isht anumpohonli; micha Chihowa apehlichika ai isht ilaiyukpa anumpa ha̱ otʋninchit isht anumpohonli tok: mihma auah tuklo kash ot apehʋt a̱ya ma,
2Micha ohoyo kanohmi, yʋmmʋt shilombish okpulo puta, micha haknip ik in chukmo puta aiena tuk osh a hlakofi tok, Meli Maktalene hohchifo yʋmmak o̱ nan‐isht‐ahullo okpulo untuklot a kohcha tok.
3Mihmʋt Choanna Helot a̱ nan‐isht im ʋtta Chusa a̱ tekchi, micha Susanna, mikmʋt inlaka mʋt laua hosh nana im a̱sha tuk ʋt, Chisʋs a̱ isht apelʋchi tuk ʋt apehʋt a̱ya akinli tok.
4Okla la̱wa fehnʋt tʋmaha moma a̱shʋt minti kʋt im ai itʋnaha ma, nana isht apesa hosh im anumpuli tok.
5Na hokchi ʋt i̱ nanihi hokchit ia tok; atuk osh hokchi ina, kanimi kʋt hina lapalika yo̱ kaha tok: atuk o̱ a hʋhlichi; yohmi na hushi puta ʋba itʋnowa kʋt ant aiowʋt ʋpa tok.
6Mihma kanimi kʋto tʋli yo̱ ai o̱ kaha tok: atuk osh offo mak inli hosh a shummi takanli kʋt ik im iksho hatuk okʋt, bʋshit kʋnia tok.
7Anonti kanimi kʋto kʋti foka yo̱ a kaha tok: atuk o̱ kʋti ash ot awant offo cha, olʋbbit ishi tok.
8Yohmi ma inla kʋto yakni achukma ho̱ ai o̱ kaha tuk osh offot, nihi achʋfa tuk kia tahlepa achʋfa ʋnit waya tok: ilʋppa puta ka achit ont in taiyaha mʋt, Kʋna hosh isht haponakla he haksobish ʋt i̱ hinlikmʋt, haklashke, chitoli hosh achi tok.
9Mihma nan im ai ithʋna ʋhleha hash ot, Ilʋppʋt nan‐isht ʋlhpisa katiohmi ha hinla hoh cho? achit i̱ ponaklo tok.
10Mihma, Hʋchishno ano Chihowa apehlichika ya̱ nana kʋt ik otaiyano ke tuk a̱ hʋsh akostinincha he mak osh hʋchim ʋlhpisa hoke: amba inla ka yokʋto pi̱sa kia, pisa he keyu; mikmʋt ha̱klo kia, ik akostinincho ka chi̱ ho̱ nan‐isht ʋlhpisa anumpa ha chi̱ ha tok.
11Nan‐isht ʋlhpisa kʋt ilʋppak oke. Na‐nihi ak osh Chihowa im anumpa mak oke.
12Hina lapalika kaha kʋt, anumpa ha̱ haklo kak oke: yohmi ma Setan ʋt a̱yʋt, okla yimmit ik okcha̱yo ka chi̱ ka, anumpa ha̱ chu̱kʋsh ash a kohchit im ishi chatuk oke.
13Tʋli yo̱ ai o̱ kaha kʋto, anumpa ha̱ haklokmʋt, na yukpa hosh ahninchi kak oke; yakohmi kak osh hakshish ʋt iksho; yohmi hosh chekosi takla hokʋno yimmi tuk osh, nana kʋt ont a palʋmmikma, mokohli hoke.
14Mikma kʋti foka yo̱ a kaha kʋto, anumpa ha̱ haklo tuk kia, yakni pakna ahantʋt nan‐isht a kaniohmi puta, mikmʋt nan in laua bʋnna, micha na‐washoha puta isht a nukfoyuka kak osh ai im olʋbbi na ʋnit a̱hlit ik wayo kak oke.
15Amba yakni achukma yo̱ ai o̱ kaha kʋto, yʋmmʋt chu̱kʋsh achukma aia̱hli mak osh anumpa ha̱ haklokmʋt, ieshit achunanchi cha, ʋnit waya kak oke.
16Hatak nan ak osh pʋla ha̱ luachi mʋt, nan‐aiʋlhto yo̱ isht ompohomokmá, keyukmʋt topa nutaka yo̱ pit talalikmá, nana chatuk keyu; amba kʋna hosh ant chukowakmʋt tohwikeli ka pisa chi̱ ka, pʋla ai‐o̱‐hikia yak o̱ o̱ hilechi chatuk oke.
17Na luma nana hatuk osh ik otaiyano ka hi ʋt iiksho: mikma nana hosh luma tuk ak o̱ ik akostinincho ki̱, ik otano ka he mʋt iksho hoke.
18Yohmi hoka nana ka hʋsh haklo kʋt, Ahah! hʋsh ahnashke; kʋna hosh i̱shi hokmak o̱, mihi yo̱ ima hi oke: mikmʋt kʋna hosh i̱shi keyu tuk mʋno, mihi yo̱ i̱shi ahomba tuk ash kia aieninchit im ai isha hi oke, achi tok.
19Yohmi ma ishki, micha itibapishi ʋhleha aiena kʋt im ai ʋla kia, okla hak osh atehlefʋt kʋnia hatuk o̱, a hikia ka ona he keyu ki tok.
20Mihma, Chishki, micha chitibapishi ʋhleha aiena kʋt chi pisa bʋnna hosh, kocha ya̱ hiohma̱yʋshke, achit im anoli tok.
21Mihma yʋmmak ash ot afalaminchi mʋt, Chihowa im anumpa ha̱ haponaklo cha, mihi yo̱ ai yʋmohmi ʋhleha ilʋppak osh ʋshki, micha itibapishi li ʋhleha aiena mak oke, im achi tok.
22Atuk osh nitak kaniohmi ho̱ yakohmi tok: nan im ai ithʋna ʋhleha hash ai it apehʋt peni ont chukowa tok; mihmʋt, Okhʋta mish‐tʋnnʋp ak o̱ pit eho tanʋblashke, achi tok. Mihma peni ash okla oka tobli tok.
23Atuk o̱ yakohmit peni a̱ a̱sht itʋnowa ma, yʋmmak amo nusi tok: atuk o̱ mahli chito kʋt okhʋta hash on ituyula; yohmi ma oka yʋt ibai alota na ai isht‐kʋnʋpʋt ai i̱ palʋmma he pullʋt aiasha tok.
24Yohmi cha okla onʋt yʋmmak ash okchʋli mʋt, Pithʋnanchi ma! Pithʋnanchi ma! pilli mak oke, achi tok. Mihma yʋmmak ash ot tani cha, mahli micha oka poakʋchi aiena kash im alʋmmi tok: mihma yʋmmak ash ot yokopa na chulusʋt talaia tok.
25Mihma yʋmmak ash ot, Na hʋchi yimmika mʋto? im achi tok. Mihma okla nukshopa hatuk okʋt, nukhlakanchʋt, Ilʋppʋt hatak katiohmi mak oh cho? ilʋppʋt mahli, oka aiena kak kia nan i̱ miha ma, im antiʋshke, it im achit ma̱ya tok.
26Atuk osh Katalenes okla i̱ yakni Kalili auet i chapa ka talaia ka, okla ont ataiya tok.
27Yohmi na yʋmmak ash ot pit kohchʋt ia ma, hatak achʋfa kʋt nan‐isht‐ahullo okpulo puta kʋt ai i̱ fo̱ka tok hopaki hosh, na fohka kia fohka chatuk keyu, mihmʋt chuka yo̱ ai ʋtta chatuk keyu, amba hatak illi aiasha yak o̱ ai ʋtta chatuk osh, tʋmaha ha̱ a kohchʋt a̱ya hosh afama tok.
28Mihmʋt Chisʋs a̱ pisa mʋt, chitolit tahpʋla mʋt, yʋmmak ash itikba ya̱ aka hlipiʋt chitoli hosh anumpulit, Chisʋs Chihowa nana moma imaiya Ushi chia ha̱, ʋno ʋt nanta ho̱ isht chi ahalaia li cho? chik sʋlbʋshalo ka chi̱ mak o̱, chim asilhha lishke, achi tok.
29Yʋmmak okʋt shilombish okpulo ʋt hatak ash a kohcha chi̱ ka, im apesa ha tok. Yʋmmak okʋt himonna̱ haksinchit hoho̱kli beka tok; yohmi hatuk a̱ yʋmmak okʋt tʋli ita‐takʋli, micha iyi ai ʋlhpitta tʋli aiena isht talakchi ho̱ okla apesʋchi ha tok: yohmi kʋt isht a kamʋssa yatuk a̱ kobʋffikma, nan‐isht‐ahullo okpulo ash osh chʋffichi na yakni haiaka a kʋnia beka tok.
30Yohmi hatuk o̱ Chisʋs ash ot i̱ ponaklot, Chi hohchifo hʋt nanta ho̱? achi tok: mihma yʋmmak ash ot nan‐isht‐ahullo okpulo ʋt laua hosh pit ai abeha hatuk oka, Lechʋn sia, achi tok.
31Yohmi ma kohchʋt ahofobika ai‐ilbʋsha mak o̱ okla ia hi a̱ ik im apeso ka chi̱ ka, okla im asilhha tok.
32Yohmi ma nʋnih pilla yʋmmak oka shukha laua yʋt ai impa hosh aiasha tok: yohmi ma yʋmmak o̱ okla ont abeha chi̱ ka ʋlhpesa, im ahna chi̱ ka, im asilhha tok. Yohmi ma ʋlhpesa, im ahni tok.
33Yohmi ma‐nan‐isht‐ahullo okpulo puta kash ot hatak ash a kocha wihʋt ia mʋt, shukha yash o̱ ont chukowa tok. Yohmi ma shukha laua yash osh nʋnih chakpatali ka a̱sht aka pit yihlepa fehnʋt, okhʋta ont ai oka kahʋt, nuksakkit illi tok.
34Yohmi ma yʋmma apesʋchi ʋhleha hʋt nana kʋt ai yʋmohmi ka pisa mʋt, yihlepʋt iʋt, tʋmaha mikmʋt haiaka aiasha tuk aiena ka ai im anoli tok.
35Yohmi ma nana kʋt ai yʋmohmi tuk ash okla pisʋt ilhkoli tok. Atuk osh Chisʋs ash im ai ʋla cha, hatak nan‐isht‐ahullo okpulo puta kʋt a kocha wiha tuk ash, ilefoka fohka cha, im anukfila mʋt hopoyuksa achukma hosh, Chisʋs iyi ituma ya̱ binili ho̱ okla pisa tok: yohmi mʋt okla nukshopa tok.
36Yohmi ma nan‐isht‐ahullo okpulo puta ai i̱ fo̱ka tuk ʋt kaniohmit a hlakofi na okla pisa tuk ash kia im anoli tok.
37Yʋmohmi ma Katalenes yakni ai i̱ bili̱ka tuk ʋt okla laua kʋt nanukshopa chinto kʋt ai onʋtuyula hatuk osh, yʋmmak okʋt i̱ filʋmma hinla ka, momʋt okla im asilhha tok. Yohmi na yʋmmak ash ot oiyʋt peni ash pit chukowa mʋt, falamʋt a̱ya tok.
38-39Mihma nan‐isht‐ahullo puta kʋt a kocha wiha tuk hatak ash ot awant a̱ya hinla kʋt, im asilhha tok: yohmi kia Chisʋs ash ot, Chin chuka yak o̱ falamʋt ish ona cha, Chihowa hʋt nana chinto nana mak o̱ a chi̱ yʋmihchi tuk a̱, ont ish anolashke, achit pit chʋffichi tok. Mihma yʋmmak ash ot ia mʋt, nana chinto fehna nana mak o̱ Chisʋs ʋt i̱ yʋmihchi tuk a̱, tʋmaha hash mominchit ai anoli tok.
40Atuk o̱ yakohmi tok; Chisʋs ash ot falamʋt ʋla ma, okla hʋt momʋt hoyo hosh aiasha tuk okʋt, okla na yukpʋt aiokpʋchi tok.
41Yohmi ma hatak ʋt Chailʋs hochifo hosh, sinakak apesʋchi yosh ʋla tok; mihmʋt Chisʋs iyi ituma ya̱ aka ant hlipia cha, in chuka ya̱ ona hinla ka, im asilhha tok.
42Yʋmmak okʋt ushetik ʋt achʋfa illa hosh, afʋmmi auah‐tuklo foka tuk osh, illa̱ hosi hosh itonla ha tok. Yohmi ma yʋmmak ash ot ia hosh a̱ya ma, okla chinto kʋt ai a folublit kʋnia tok.
43Yohmi ma ohoyo hʋt issish um‐bokafa tok afʋmmi auah‐tuklo hatuk osh, nana im a̱sha tuk a̱ mominchit alikchi puta kak o̱ ai ataiyaha kia, achʋfona ma a hlakofa he mʋt iksho hosh, a̱ya tuk osh,
44Im ashaka ona cha, im anchi aposhokʋchi ya̱ pit potoli tok: yohmi ma ashali̱ka issish ont ia tuk ʋt i̱ hokofa tok.
45Mihma Chisʋs ʋt, Kʋta hosh sa potoli cho? achi tok. Kʋna hatuk keyu ka momʋt miha ma, Pita yʋt, micha apehʋt a̱ya tok aiena kash ot, Pi̱ shahli ma! okla chito ʋt chi a folublit chi atehlifichi fehna hokak o̱, Kʋta hosh sa potoli, ish achi cha? achi tok.
46Mihma Chisʋs ash ot, Kʋna hosh sa potoli tuk, nan‐isht aia̱hlika yʋt a si a kohcha ka akostininchi li hoka, achi tok.
47Yohmi ma ohoyo hash ot ilapʋt luma keyu kʋt akostininchi mʋt, wʋnihinchit ona mʋt, itikba ya̱ aka ont hlipia cha, nana kaniohmi ho̱ yʋmmak oka potoli tuk, micha kaniohmit ashali̱ka hlakofi tuk aiena kʋt okla moma itikba ya̱ ai im anoli tok.
48Mihma yʋmmak ash ot, Sʋsotek ma! na chi yukpa achukmashke; na chi yimmika yak osh chi hlakofichi hoka, na‐yukpa bieka anukfoyuka hosh ish a̱yashke, im achi tok.
49Yʋmmak okʋt anumpuli moma ho̱, sinakak apesʋchi in chuka ya̱ achʋfʋt minti hosh ʋla mʋt, Chiso‐tek ʋt illishke; nan‐ithʋnanchi ma chik im ahchibalo kashke, im achi tok.
50Yohmi kia Chisʋs ʋt pit haklo mʋt nan i̱ mihʋt, Ik chi komunto kashke; pilla ik chi yimmí, mikma yʋmmak okʋt hlakofa chi̱ hoke, im achi tok.
51Atuk osh aboha yash ont chukowa mʋt, hatak nana kia ik chukowá, ik aiahno; amba Pita, micha Chemis, mikmʋt Chan, micha ohoyo himita ya̱ i̱ki, mikmʋt ishki itatuklo kak illa tok.
52Yohmi ma moyumʋt ilbʋshʋt isht yaha̱ya tok: yohmi kia yʋmmak ash ot, Hʋsh yaiya ná; illi keyu; pilla nusi hoke, achi tok.
53Mihma yʋmmak okʋt illi hoka, okla ithana hatuk osh, yʋmmak ash ik ahobalot olʋli tok.
54Yohmi ma yʋmmak ash ot mominchit kohchichit tahli mʋt, yʋmmak ash ibbak a̱ halʋlli cha, i̱ howʋt, Ohoyo himita ma! taní, achi tok.
55Mihma shilombish ʋt falamʋt im ʋla cha, yʋmmak ash ot ashali̱ka tani tok; mihma nan‐ilimpa i̱ hoya hinla ka, miha tok.
56Mihma i̱ki, ishki itatuklo kash ot nukhlakancha fehna tok. Yohmi ma nana kʋt a yʋmohmi tuk ash hatak nana kia ik im anolo ka hi o̱ i̱ miha tok.
Jelenleg kiválasztva:
Luk 8: CHH
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Published by the American Bible Society 1848-1886, reprinted 1913
