Luk 6
6
Nana kʋt achukma he okʋno nitak hullo kia isht anta he ai ʋlhpesa hatuk a̱, Chisʋs ʋt anoli, 1: 8 mihmʋt ibbak shila yatuk a̱ hlakofichi. 12 Chisʋs ʋt ninak a̱ ʋba pit anumpohonli na onna mʋt, ʋbanumpeshi auah‐tuklo ka atokoli; 17 yohmi mʋt hatak abeka laua ka hlakofichi. 20 Hatak kaniohmi hosh holitopa he, mikma hatak kaniohmi ho̱ na‐palʋmmi kʋt onʋtula he puta ka, Chisʋs ʋt otʋnichi. 27 Pin tʋnʋp ʋhleha kia e holitoblit, nan isht ai achukma he puta ma il i̱ yʋmohma hi a̱ Chisʋs ʋt pi̱ miha; mikmʋt okla moyuma ka il i̱ kana hi ak o̱, pim ahni; 37 hatak inla a̱sha ka nan ik achukmo imma hokʋno im anukfillit kil anumpulo ka hi a, pim abʋchi. 43 Iti a̱ ilap ʋni akinli kak o̱ isht ithʋna chatuk: mikma hatak a̱ ilap nana a kaniohmi kak o̱ isht akostininchi chatuk.
1Yʋmohmi tuk osh ʋbanʋblit ont ia yatuk nitak atukla ka ai isht nitak‐hullo ʋmmona ho̱, yʋmmak ash ot osapa taloha ha̱ hlopullit a̱ya tok: yohmi ma nan im ai ithʋna ʋhleha hash ot onush ʋni ya̱ tʋptulit ibbak isht koyuhlit okla ʋpa tok.
2Mihma Falisi ʋhleha kaniohmi kʋt, Nanta katiohmi ho̱ nana ka nitak hullo nitak a̱ a yohma he ʋlhpesa keyu kʋno hʋchi yʋmohmi cho? im achi tok.
3Mihma Chisʋs ash ot afalaminchi mʋt, Lewi ʋt ilapo, micha apehʋt a̱ya tuk aiena kʋt hohchʋfo mʋt, nana a kaniohmi tok;
4Yohmi kʋt kaniohmit Chihowa im aboha ha̱ pit chukowʋt, pʋska otʋnni a̱ ishi cha ʋpa mʋt, apehʋt a̱ya tuk ash kia ipeta tok: yʋmmak oka ai ʋpa he ʋlhpesa keyu, amba na‐holitompa isht a̱sha ak illa ha tok oka, ilʋppak kia holisso ha̱ hʋch ik a peso chatuk oh cho? achi tok.
5Mihmʋt Hatak Ushi ʋt nitak‐hullo a̱ in Chitokaka akinli hoke, im achi tok.
6Atuk o̱ anonti yakohmi tok: nitak‐hullo inla ho̱ sinakak ont chukowa cha, nana ithʋnanchi tok: mihma hatak ʋt ibbak ishtimpak imma yʋt shila yosh yʋmma a̱sha tok.
7Mihma na‐holissochi ʋhleha, micha Falisi ʋhleha aiena kʋt nan ʋlhpisa onocha chi̱ hosh, nitak‐hullo nitak a̱ na hlakofichikmá, nanta chi̱ chishba? ahnit apesʋchi tok.
8Yohmi kia ilap ʋt okla im anukfila ha̱ im ithana hatuk osh, hatak ibbak shila yash, Wakaya cha, iklʋnnaka ya̱ ont hikiá, im achi tok Mihma yʋmmak ash ot wakaya mʋt, ont hikia tok.
9Mihma Chisʋs ash ot okla hash, Nana achʋfa ho̱ hʋchi̱ ponaklo lashke: Nitak hullo nitak a̱ nana achukma kak o̱ a yʋmohmi kak okmá, keyukmʋt nana ik ʋlhpeso yak o̱ a yʋmohmi kak okmá, ilhfiopak a̱ okchalinchi kak okmá, keyukmʋt tʋbli kak okmá, nana kak osh ai ʋlhpesa hoh cho? im achi tok.
10Mihmʋt filemoʋt okla hash o̱ mominchit pisa mʋt, hatak ash o̱, Chibbak a̱ chisemochí, im achi tok: mihma yʋmihchi tok: yohmi ma ibbak ash osh falamʋt achukmʋt taha mʋt, in tʋnnʋp akinli ho̱ chiyuhmi tok.
11Mihma okla hʋt anukhobela fehna tok: yohmi mʋt Chisʋs a̱ nana ho̱ kʋnihcha chi̱ kʋt it i̱ mihʋt aiasha tok.
12Mihma nitak yʋmma foka ka, yakohmi tok: ʋba pit anumpula chi̱ hosh kohchʋt nʋnih chaya yo̱ ont oiya tok; micha ninak a̱ Chihowa pit im asilhhʋt ahanta na onna tok.
13Mihmʋt ont onnʋt taha ma, ilap nan im ai ithʋna ʋhleha hash hoyot itahobi tok: mihmʋt yʋmmak ash auah‐tuklo ho̱ ai atokoli mʋt, yʋmmak ash ʋbanumpeshi hochifo tok.
14Saimon yʋmmakma ilap ak osh Pita yo̱ hochifo, mikmʋt itibapishi Antilu, Chemis, micha Chan, Filip, mikmʋt Bathlolomu,
15Mahlu, micha Tamas, Alfeʋs ushi Chemis, Saimon Selotes hohchifo:
16Micha Chutas Chemis itibapishi, mikmʋt Chutas Iskaliot, yʋmmak osh na haksichi yosh aiena tok.
17-18Mihmʋt yʋmmak ash ot awant akowa cha, yakni matali yo̱ ant hikia ma, nan im ai ithʋna yʋt la̱wa, mihmʋt okla chinto fehna Chutea yakni moma, Chelusalem aiena ka a minti; mikma okhʋta lapali ka Taia, micha Saiton aiena a̱sht minti; mihma shilombish okpulo yo̱ isht issikkopa yatuk aiena kʋt yʋmma im a haponakla chi̱, micha haknip ik in chukmo puta atuk ʋt im a hlakofohla chi̱ hosh im ai ʋlʋt hlakofohli tok.
19Mihma okla chito ash ot momʋt, nan‐isht a hlakofi ʋt yʋmmak o̱ a kohcha hosh mominchit hlakofichi hatuk oka, yʋmma potoli bʋnna tok.
20Mihma ilap nishkin ash nan im ai ithʋna ʋhleha ha̱ isht on talohli mʋt, Ilbʋsha hʋchia ma! Chihowa apehlichika yak osh hʋchimmi hokʋt na hʋchi yukpʋshke.
21Himonasi hokʋno hohchʋfot aiasha hʋchia mʋt, hʋchi kaiya hi okʋt na hʋchi yukpʋshke. Himonasi hokʋno yaha̱yʋt hʋsh aiasha mʋt, hʋsh yukpa hi okʋt na hʋchi yukpʋshke.
22Hatak Ushi pulla atuk mak o̱ hatak puta mʋt hʋchi̱ nukkillit, ilap ai itapeha ya̱ isht a hʋch il a filamohlichit, na hʋchi mihachit, hʋchi hohchifo ma nan okpulo yo̱ ai itilauechit kahancha hi oke: yohmikma na hʋchi yukpʋshke.
23Yakeh! nan‐isht‐ʋlhtoba hʋt chinto hosh ʋba ya̱ hʋchin tonla hokʋt, nitak yʋmma fehnakma, na ho yukpá: na hʋchi yukpʋt hʋsh mʋllashke: yʋmma in tikba ʋhleha hʋt hopaii puta ka yʋmmak inli ho̱ i̱ yʋmihchi beka tok oke.
24Amba nan in laua hʋchia hʋto nan‐isht a hʋchi yukpa ma hʋsh pisa hokʋt, na hʋchi̱ palʋmmi mak oke.
25Kaiya hʋchia hʋto hʋchi hohchʋfa hi okʋt na hʋchi̱ palʋmmi mak oke. Himonasi a̱ hʋchi yukpa hokʋto hʋchi nukha̱klot hʋsh yaha̱ya hi okʋt na hʋchi̱ palʋmmi mak oke.
26Hatak moma kʋt ahninchit isht hʋchi anumpohonlikma, na hʋchi̱ palʋmmi mak oke: in tikba ʋhleha hʋt hopaii ilahobi puta ka yʋmmak inli ho̱ i̱ yʋmihchi tok oka.
27Amba hʋsh ha̱klo hʋsh puta kʋno hʋchin tʋnʋp ʋhleha ma i̱ hullot, hʋchi̱ nukkillikma nana achukma ho̱ hʋsh i̱ yʋmohmashke.
28Nan ik ʋlhpeso isht hʋchim anukfillit na hʋchi̱ mihachi ya̱ na‐yukpali hosh anumpulit, anonti anumpa isht hʋchi a holʋbechikma, ʋba pit isht hʋsh anumpohonlashke.
29Micha kʋna hosh chitisukpi a̱ issokma, in tʋnnʋp ma pit ish i̱ welí makinlashke: mikmʋt kʋna hosh chim anchi a̱ chim ai ishi ka, chi̱ na‐fohka lumbo ma isha chi̱ ka, chik i̱ halanlo makinlashke.
30Kanima hosh nan chim asilhha ka ish imashke; micha kʋna hosh nana ka chim ai ishikma, falaminchit chik i̱ hoyo kashke.
31Micha hatak puta kʋt hʋchishno a̱ a hʋchi̱ yohma hi a̱, hʋsh aiahni hok mak osh, hʋchishno ak kia mih‐mak o̱ hʋsh ai i̱ yʋmohmi makinlashke.
32Micha hʋchishno a̱ hʋchi̱ hullo na mihi yo̱ hʋsh i̱ hullo hokʋto, nanta ho̱ isht a hʋchi yukpa cho? nan‐ashʋchi ʋhleha hʋt, kanima hosh ilap a̱ i̱ hullo chatuk akinli hoka.
33Micha kanima kʋt hʋchishno a̱ nana achukma ka isht a hʋchi̱ yʋmohmi ho̱ hʋchishno mʋt nan achukma ka isht hʋsh ai i̱ yʋmohmi hokʋto, nanta ho̱ isht hʋchi yukpa cho? nan‐ashʋchi ʋhleha ak kia yʋmmʋno yohmi chatuk oka.
34Micha yʋmmʋt hʋchim atobba hinla ka hʋchim ahoba hokmak osh hʋsh i̱‐pota hokʋto, nanta ho̱ isht a hʋchi yukpa cho? nan‐ashʋchi ʋhleha ak kia yʋmmak atuk ash inli ohmi ho̱ isha chi̱ kʋt, nanashʋchi bi̱ka ya̱ i̱ pota chatuk oka.
35Amba hʋchishno ʋto hʋchin tʋnʋp puta ka hʋsh i̱ hullo, mikmʋt nana achukma ho̱ hʋsh yʋmohmikmʋt; anonti nana kia isht ai ʋlhtoba hi a̱ ik aiahno hosh hʋsh i̱ potashke: yohmikma isht a hʋchim ʋlhtoba hokʋto chinta he; micha Nana moma imaiya im ʋlla hʋchia ha hi hoke. Yʋmmak okʋt ilap a̱ ik aiokpacho, micha nan ʋlhpesa keyu ʋhleha aiena ka i̱ kana achukma yoka.
36Yʋmohmi hoka hʋchishno mʋt na hʋchi nukha̱klo bano kʋt, hʋch I̱ki ʋt nan i̱ nukha̱klo bano yoka yʋmmak inli ho̱ hʋsh chiyuhmashke.
37Inla ya̱ ik ʋlhpesachot nan hʋch ik apeso kashke. Yohmik mak osh nan ik hʋchim ʋlhpiso ka he mak oke: isht a hotopa he anumpa ha̱ hʋsh onochi ná: yohmikmak osh hʋchishno ʋt isht a hotopa he anumpa hʋt ik hʋchi onʋtulo ka hi oke: inla ya̱ i̱ kashofit hʋchim i haksashke; yohmikmak osh hʋchishno mʋt hʋchi̱ kashofa hi oke.
38Hʋsh ihi̱mashke: yohmikmak osh hʋchishno mʋt hʋsh habihi̱na hi oke: ʋlhpisa achukma, ʋlhtekʋchit, mikmʋt faiokʋchit it ai isso hosh ont atampʋt hlaha̱ya ho, hatak ʋt hʋch il ai ʋskofʋchi anu̱kaka ya̱ pit hʋchim apitta hi oke. Nan isht ʋlhpisa hʋchishno ʋt isht hʋsh apesa tuk a̱, yʋmmak inli hosh hʋchishno ma isht hʋchim ʋlhpisa hi oke, hʋchim achi lishke.
39Mihmʋt nan isht apesʋt anumpulit, Lʋpa yʋt lʋpa ya̱ halʋllit isht a̱ya hinla̱? tu̱klot yakni chiluk kia pit ik kaho ka hinla ho̱?
40Nana ithʋna ʋt nan ithʋnanchi a̱ i̱ shahli chatuk keyu: amba nana ka imponnʋt aia̱hli hok mak osh moma kʋt nan‐ithʋnanchi ak o̱ ai itilaua hi oke.
41Micha nanta katiohmi ho̱ na hishonluk iskʋtinosi kʋt ish itibapishi nishkin a̱ fo̱ka na ish pisa hokak osh, anonti iti chito yʋt chi nishkin akinli ka fo̱ka kʋno chik akostinincho cho?
42Keyukmʋt anonti katiohmit ish itibapishi ha̱, Itibapishi li ma! na hishonluk iskʋtinosi kʋt chi nishkin a̱ fo̱ka ka ak chi̱ kohchí, ish acha hinla cho? chishno chi nishkin akinli kʋno iti chito yosh fo̱ka ka chik peso kʋt; nan‐ilahobi chia hoka, iti chito yak o̱ ti̱kba ishit chi nishkin a̱ ish a kohchashke; yohmikmak osh ish pisa achukma hosh ish itibapishi nishkin a̱ nahishonluk iskʋtinosi kʋt fo̱ka ka ish kohcha hinla hoke.
43Iti achukma kʋt ʋni ʋt okpulo yo̱ ʋnit waya chatuk keyu: yohmikma iti okpulo mʋt ʋni achukma ka ʋnit waya keyu chatuk oke.
44Iti puta kʋt ilap ʋni yak o̱ isht il ai otʋninchi chatuk: hatak ʋt kʋti hak o̱ fik a̱ ai ʋmo chatuk keyu: yohmikmʋt bissʋpi ak o̱ pa̱ki a̱ ai ʋmo chatuk keyushke.
45Hatak achukma yʋt chu̱kʋsh a̱ nana achukma kʋt i̱ fo̱ka hatuk osh, nana kʋt achukma ho̱ ai ishit kohonchi chatuk: mikma hatak ʋlhpesa keyu kʋto chu̱kʋsh a̱ nana okpulo yosh i̱ fo̱ka hatuk osh, nana kʋt ʋlhpesa keyu ho̱ ai ishit kohonchi chatuk: chu̱kʋsh ʋt isht alotowakmak o̱ itih hʋt kohchit anumpuli chatuk oke.
46Na katihmi ho̱ nana ka hʋchi̱ mihi̱ha li ka hʋsh yohmi keyu kak osh, Chitokaka ma! Chitokaka ma! hʋs si achi cho?
47Kʋna kia ʋm ʋlʋt, nana mihi̱ha li ka haponaklo cha, ai yʋmohmi kʋt, kʋna ho̱ holba ka hʋchim anoli lashke.
48Hatak ʋt chuka ya̱ ikbi kʋt, yakni a̱ kullit, hofobichit, tʋli yo̱ nutaka in tola ya̱ ai om bohli tuk mak o̱ chiyuhmi hoke: yʋmohmi tuk o̱ okchito hʋt a̱ya mʋt, chuka yʋmmak ash yanʋlli hʋt kʋllot ai isso fehna tok: yohmi kia tʋli yo̱ a toba ha tok oka, ik winalecho ki tok.
49Amba kʋna hosh haklo cha, mihma ik yohmo hokʋto, hatak ʋt nutaka in tonla yʋt iksho ho̱ yakni yak o̱ chuka ya̱ ai on talali tok mak o̱ chiyuhmi hoke: yʋmohmi tuk o̱ yʋmmak ash yanʋlli hʋt kʋllot ai isso fehna tok; yohmi ma chekosi makinli ho̱ kinafa mʋt, chuka yʋmmʋt okpulo kʋt ai oklu̱ha tok, im achi tok.
Jelenleg kiválasztva:
Luk 6: CHH
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Published by the American Bible Society 1848-1886, reprinted 1913
