Mataayo 8
8
Yeesu kaawosha omuunu wa ebhigenge
(Maariko 1:40-45; Ruuka 5:12-16)
1Bhunu Yeesu ꞉eekire okusooka mu-kiima ayo, esangi enene erya abhaanu ndimuseeta. 2Niwe omuunu owumwi unu ꞉aariga ari na ebhigenge ˆnaamuuja-ko ˆnaamwifukamira ˆnaakuunʼya ansi ekisuusu kyaye, ˆnaaika ati, “Raatabhugenyi, uri na obhuturo obhwa okuuwosha. Ukeenda, enikusabha uuwoshe nisige okubha munaabhi.”#8:2 Munaabhi. Ringira riingʼana Obhunaabhi mu-Mangʼana Amakomeeye. 3Yeesu ˆneemusha okubhoko ˆnaamukuunʼya-ko, ˆnaamubhwira ati, “Eneenda, nuuwore!” Ayoayo, ebhigenge bhyaye mbiwora. 4Yeesu ˆnaamubhwira ati, “Waasiga okubhwira muunu! Tari, nuugende ku-mushengesi#8:4 Ku-mushengesi. Okuriingʼaana na ebhiraagiro bhya Musa, omushengesi niwe ꞉aariga ˆnaamenyegesha raabhe omuunu aawosibhwa ebhigenge. Ringira Abharaawi 14:1-32. akurore, usooshe omugabho ogwa obhwiyesha bhwawo rwa kutyo omuragi Musa ꞉aaragiriiye, insonga abhaanu bhamenye ati waawora.”
Obhwikirisha bhwa omukuru wa abhasirikare
(Ruuka 7:1-10; Yowana 4:43-54)
5Mmbe, Yeesu ˆneengira mu-musi gwa Kaperinawumu. Omukuru owumwi wa abhasirikare bha Ekiruumi ˆnaamuuja-ko ˆnaamusabha obhusakisi. 6ˆNaamwisaasaama ati, “Ee Raatabhugenyi, omujuuma waani ari iika, afuuye omubhiri, ni murwaye musinge.” 7Yeesu ˆnaamusubhya ati, “Eniija iika eyo okumuwosha.” 8Omukuru uyo ˆnaasubhya Yeesu ati, “Ee Raatabhugenyi, anye niteesire awe wingire mu-waani. Nawe yaaika engʼana rimwi era, omujuuma waani kaaja okuwora. 9Anye noone niri emwaro wa abhakuru bhaani, na niri na abhasirikare bhanu bhari emwaro waani. Nikabhwira owumwi ati, ‘Nuugende,’ kaagenda. Nikabhwira owundi ati, ‘Nuuje,’ woone kaaja. Na omugaya waani, nikamubhwira ati, ‘Kora kutya,’ nikwo kutyo kaakora.”
10Yeesu ꞉eejire oongwa amangʼana gayo, ˆnaaruguura muno. ˆNaabhwira abhaanu bhanu ꞉bhaamuseetaga ati, “Kimari enibhabhwira ati, agati wa Abhaijirayeeri bhoone kutyo, nikyariga kurora obhwikirisha obhunene, rwa bhunu! 11Enibhabhwira ati, bhaanu bhaafu bha mu-bhyaro ebhindi bharisooka ebhuwuruka esuubha na ebhugwa esuubha na bhariikara amwi kw-igari, na Bhurayimu, Isaaka na Yakobho mu-bhukama bhwa mu-rwire. 12Nawe abhaana bha obhukama bharyeswa anja mu-kisuute. Eyo niwe bharirira kutyo bhakumye.”
13Mmbe, Yeesu ˆnaabhwira omukuru uyo ati, “Subha iika. Nyamuwanga akukorere okuriingʼaana na obhwikirisha bhwawo.” Kimwi omujuuma waaye ˆnaawora ku-kabhaga kayokayo.
Yeesu kaawosha bharwaye bhaafu
(Maariko 1:29-34; Ruuka 4:38-41)
14Yeesu ˆnaayika ewa Peetero, ˆnaanyoora nyaabhuko Peetero arwaye, ari na omuswija amaamirega ku-bhuriri. 15Yeesu ˆnaamukuunʼya ku-kubhoko, omuswija ngumuwa-ko, ˆnaawora. ˆNeemuka, ˆnaamba okubhayaana ebhyokurya.
16Anu riisuubha ꞉ryaguuye, mbareetera Yeesu bhaanu bhaafu bhanu ꞉bhaariga bhawungirwe ebhiwi. Omwene woone ˆnaasiiga ebhiwi bhiyo mbisooka mu-bhaanu. ˆNaawosha na abhaanu bhanu ꞉bhaariga bharwaye bhoone kutyo. 17Yeesu ꞉aakorere gayo goone kutyo, insonga riingʼana rinu Nyamuwanga ꞉aaikire okuturira ku-muragi Isaaya rikuumire ati
“꞉Aagegere amarwara geeswe,
ˆnaakikora kibhe bhaworu.”#8:17 Ringira Isaaya 53:4.
Bhanu bheesire okuseeta Yeesu
(Ruuka 9:57-62)
18Bhunu Yeesu ꞉aarorere ati bhaanu bhaafu bhamwiyindiriiye, ˆnaabhwira abheeyigira bhaaye ati bhaambuke omwaro bhagende ngʼambu. 19Mmbe, omwiyigisha owumwi wa ebhiraagiro bhya Musa ˆnaafugerera Yeesu, ˆnaamubhwira ati, “Mwiyigisha, eneenda nikuseete woonewoone anu uraagende.” 20Yeesu ˆnaamusubhya ati, “Ebhibhwe bhiri na ginsenga na giinyonyi giri na amoosu, nawe Omwana wa Adaamu,#8:20 Omwana wa Adaamu. Ringira riingʼana rinu mu-Mangʼana Amakomeeye. atari na owa okumaamya omutwe gwaye!”
21Omuunu owundi mu-bhaanu bhanu ꞉bhaariga mbaseeterera Yeesu, ˆnaamubhwira ati, “Raatabhugenyi, nuunyiikirisishe okwamba nigende nibhiike raata afuuye.” 22Yeesu ˆnaamusubhya ati, “Awe nseeta, siga abhafuuye bhabhiike abhafuuye bheejaabho.”
Yeesu kaasiiga riiyaga na amabhooka bhitemekere
(Maariko 4:35-41; Ruuka 8:22-25)
23Mmbe, Yeesu ˆnaariinya mu-bhwato, na abheeyigira bhaaye. 24Bhunu ꞉bhaayikire ebhusibha agati, riiyaga nditiimuka ryafu muno na amabhooka ngarebherera okusikya obhwato. Nawe Yeesu omwene ꞉aariga awongeeye ntiro. 25Abheeyigira bhaaye mbamuramusha, mbamwayaga ati, “Raatabhugenyi, kyerushe! Kyaweerera!”
26Yeesu ˆnaabhabhwira ati, “Kubhaki omuubhaya, emwe bhanu muri na bhwikirisha bhutooto?” Niwe ˆneemuka, ˆnaasiiga riiyaga na amabhooka bhitemekere. Omuyaga ngutemekera, ndibha etore. 27Abheeyigira bhaaye mbaruguura, mbaaika ati, “Ni muunuki unu omuyaga na amabhooka ebhimuungwa?”
Yeesu kaabhirimya ebhiwi mu-Bhagadara bhabhiri
(Maariko 5:1-20; Ruuka 8:26-39)
28Yeesu ꞉eejire aayika ngʼambu, mu-kyaro kya Abhagadara,#8:28a Mu-kyaro kya Abhagadara. Amakaamo agandi aga kara aga Ekiyunaani agaaika ati, Abhageraasi. ˆnaanyookana na bhaanu bhabhiri bhanu ꞉bhaariga bhawungirwe ebhiwi. Abhaanu bhayo ꞉bhaariga bharurire muno, mbasookaga mu-nsenga ginu ꞉bhaabhiikaga-mo abhafuuye. Muyo nimwo ꞉bhaariga bheekaaye.#8:28b Abhayawudi ꞉bhaariga mbabhiika abhafuuye mu-nsenga, egindi ꞉gyariga gibhaajirwe mu-matare ga mu-bhiima. ꞉Aariga atariwo muunu woonewoone unu ꞉aayaaraga okutura ku-njira iyo.
29Mmbe, abhaanu bhayo ꞉bheejire bhaarora Yeesu, ebhiwi mbimwaya mbyaika ati, “Omwana wa Nyamuwanga, owukyagara-koki? Waaja okukinyansha, enu akabhaga ka okukinyansha kakyari okuyika?” 30Ku-mbarika ayeeyi nabho, ꞉ryariga ririwo eyijo enene erya gingurubhe ngireebhaga. 31Niwe ebhiwi bhiyo mbiisaasaama Yeesu ati, “Raabhe owukibhirimya, nuukisige kiingire mu-ngurubhe giyo.” 32Niwe Yeesu ˆnaabhibhwira ati, “Mugende!” Mmbe, ebhiwi mbisooka mu-bhaanu bhayo, mbiikuurira mu-ngurubhe giyo. Ayoayo, riiyijo riyo ryone kutyo ndyoromoka ribhirimire muno okwingira mu-nyanja, ngifwira muyo gyone kutyo.
33Bhunu abhareefi bha gingurubhe giyo ꞉bhaarorere kutyo, mbabhirimira mu-musi agati. Mu-musi agati eyo, mbabhwira abhaanu amangʼana goone kutyo ganu ꞉bhaarorere, na kutyo abhaanu bha ebhiwi ꞉bhaawosiibhwe. 34Abhaanu bhoone kutyo mu-musi eyo, mbeemuka okugenda okurora Yeesu. Anu ꞉bhaamurorere, mbamwisaasaama muno ati asooke mu-kyaro kyebhwe.
Jelenleg kiválasztva:
Mataayo 8: kya
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2023, Wycliffe Bible Translators, Inc. All rights reserved
