मत्ती 2
2
चीबा खेसीगी येशु ज्याब १-१२
1हेरोद् ज्याबी़ ङोल येशु यहुदीया लुङ्बे बेथ्लेहेम्गी युदु कीब बेत्। ॱनी हुगी यङ्ल ॱस्यर् ङो़गी लुङ्ब च्यीक्नी छुल्ल चीबा खेसीगी मी यरी यरुशलेम्ल युङ बेत्। 2युङ्नी, हुबे हुदु मी घयेत्ल यहुदी घयेक्की ज्याबु च्यीक् कीन यो़प्पेत्। घन च्यीक् यो़प्प न? हुगी ढीक्ल कर्म च्यीक् ङीक्की लुङ्बदु थोङ्ज्युङ्। हुनी ङीत् खोङ्ल छ्यक् छेन ज्यादु युङेन् झ्यीब बेत्।
3ॱनी हीगी केच्च्य हीगो ज्याबु हेरोद्गी ॱह घोनी हेरोद् रोरङ् धङ् यरुशलेम्गी मी घयेत्ल च्युगा लङ बेत्। 4हुनी हेरोद्गी रोरङ्गी लुङ्बे छ्यो़प्पो़न् चो छ्यीया घयेत् धङ् छ्यो़डीम्गी चयेलम घयेत् भो़न हुब घयेत्ल को़न्ज्योक्की को़बे च्यप्को़न् ख्रीष्ट् दी लुङ्ब घदु कीगेन् बेक्क? सीन्न ढीब बेत्। 5ॱनी हुबे लेल्ल यहुदीया लुङ्बे बेथ्लेहेम्दु कीगेन् बेत्। हीगी ढीक्ल कलुङ् ॱस्यो़क्केन् च्यीक्की ॱसुङ्रप्ल हीन्दुक् झ्यीन ढीन यो़क्केन् बेत्।
6ॱवे यहुदीयागी बेथ्लेहेम् रङ् नन्दक्की दुक्परङ् मेम्बेत्। रङ् च्येन्नी ङे मीस्सीर् इस्राएली घयेत्ल तगेन् ॱवङ् च्योङ्गेन् च्यीक् थो़ङ्गेन् बेत्। (मीका ५:२)
7हुनी हेरोद्गी हुगी चीबा खेसी दीब ॱसोप्ल ठीक्न हुगी कर्म दी थो़म्बे धी़ दी ॱह घोज्येल हुबल ॱस्यीप् धक्पोक्म ढीब बेत्। 8हुनी हेरोद्गी हुबल खीत्रङ् बेथ्लेहेम्ल ज्युक्ल हुगी भीज दी चर च्यो़त्लेत्। ॱनी चर छ्यो़त्न ॱनी, ङल अक् ॱसा तोङ्लेत्। हुनी ङ अक् छ्यक् छेन ज्यादु डोगेन् झ्यीब बेत्।
9-10हुनी चीबा दीब हील नेन्न टप्नर बेत्। ॱनी हुबल यङ् लम्ल एल्ला रोरङ्सो़ लुङ्बदु थोङे कर्म दीरङ् ॱनम्दु थो़म्ब थोङ बेत्। हुनी हुबल गेस छ्यीम्मु झ्युङ बेत्। ॱनी हुगी कर्म दी घङ् डोस्सल हुब तीङ् दीत्न फीन्नी, कर्म दी भीज दी यो़स्से खीम् दीगी ॱसोरीदु ॱलीत्नी हुदु देत् तङ बेत्। 11ॱनी हुब हुगी खीम् दीगी नङ्ल स्युन फीन्नी, हुदु मरीयम् मेमेत् ठेप्प बेत्। ॱनी भीज दील हुबे छ्यक् छेन रीन् छ्यीम्मु च्येम्मे ज्याज्यक् ॱनम्ब ॱसुम् पुब बेत्। हुगो ॱसीर्, पो़गर्की पो़ धङ् ढीम स्यीम्सी ॱहीक्केङ्गी ॱमुर् बेत्।
12हुनी चीबा दीबल ॱङीनम्ल हेरोद् च्याल मत् डो सीन्न को़न्ज्योक्की तो़म्ब बेत्। ॱनी हुब हुल नेन्न लम् ॱयोङ्नी फल्ल झ्यीन रोरङ्सो़ लुङ्बल लोक्नर बेत्।
येशु हेरोद्गी ॱसो़च्च्येल ॱयेङ्गेन् १३-१५
13हुनी युसुफ्ल ॱङीनम्ल चोव ज्यीन्दक्की तेङ् यी़गी भङ्ज्येम्ब च्यीक् इगीनी मल्ल थो़न्न युङ्न, रङ् लोङ्ल हुब मेमेत् ठीक्न मीस्रे लुङ्बल ढो़ल ज्युक्। ॱनी ङे नम् ह लोक्लेत् सीक्को़दङ् हुगो थुक्ल हुदुरङ् दो़त्। भीज हीगो हेरोद्गी ॱसो़च्च्येल ॱयेङ्गुक् झ्यीब बेत्।
14हुनी युसुफ् ॱङीत् सेत्नी, हुगी गोङ् दीरङ् मेमेत् ॱङीबु दी ठीक्न मीस्रल टप्नर बेत्। 15ॱनी हेरोद् ॱस्यी ॱस्यी थुक् मीस्रदुरङ् देप्प बेत्। हीगी ढीक्ल धङ्बु कलुङ् ॱस्यो़क्केन् च्यीक्की लम्नी चोव ज्यीन्दक्की हीन्दुक् ॱसुङ बेत्।
ङे ॱरेबु मीस्रनी भो़क्केन् सीक्केन् हीगो डुबल हुगो झ्युङ बेत्। (होशे ११:१)
बेथ्लेहेम्गी भीज घयेत् हेरोद्गी ॱसेत् तङ १६-१८
16हुनी हेरोद्गी कल चीबा दीबे ॱमत् चीय, लोक्नर हीम्ब हेरोद्गी ॱह घोनी हुबल खोङ्डोक् गन्दीक्म लङ बेत्। हुनी बेथ्लेहेम् धङ् हुगी थप्स्यील यो़प्पे भीज भु फोलो ॱङीब मेन् कुरीक् हेरोद्गी ॱसो़त्तु ची़प्प बेत्। हुगो हेरोद्गी चीबा दीबे खनी घोवे कर्म थो़म्बे धी़ दीनी लोरङ् चीय हीङ्गो़प्प बेत्। 17-18हीगी ढीक्ल कलुङ् ॱस्यो़क्केन् यर्मीयागी यीगील थो़ङ्गेन् बेत्।
रामागी युनी ङुजी दीङ्लुप् ज्यक्प गज्येन् घोगेन् बेत्। राहेल् रोरङ्गी ज्यी़त् घयेत् मीप्पल ॱयोङ्गी ॱसीम्स तङ्न आक्, ॱस्युली फेन् ॱमीत् थोगेन् बेत् सीक्केन् हीगो ताब बेत्। (यर्मीया ३१:१५)
युसुफ्सो मीस्रनी लोक्प १९-२३
19ॱनी तीङ्ला हेरोद् ॱस्यीन खुर्नी, चोव ज्यीन्दक्की भङ्ज्येम्ब च्यीक् मीस्रे लुङ्बदु युसुफ्ल ॱङीनम्ल थो़न्न युङ्न हुगी युसुफ्ल 20रङ् लोङ्ल हीब मेमेत् ॱङीबु ठीक्ल इस्राएल्की लुङ्बल लोक्ल ज्युक्। भीज हीगो ॱसो़च्च्येल ॱयेङ्गेन् घयेत् दीब ह ॱस्यी छर्सोङ् झ्यीब बेत्।
21हुनी युसुफ् लोङ्न मेमेत् ॱङीबु दी ठीक्न इस्राएल्ल लोक्न युङ बेत्। 22ॱनी यहुदीया लुङ्बदु हेरोद्गी भु अर्खीलौस् सीक्केन् दी ठील जेन यो़प्प ॱह घोनी युसुफ् यहुदीयादु दो़त्तु डोवल ज्यीब बेत्। ॱनी ॱङीनम्ल को़न्ज्योक्की ॱङाबल नेन्न युसुफ् गालीलाल फीन्न 23नासरत्की सार्तु देत् तङ बेत्। हुगो झ्यीनी हीगी ढीक्ल कलुङ् ॱस्यो़क्केन् घयेक्की ॱसुङ्रप् येशुल नासरीया सीक्केन् बेत् सीक्केन् हीगो ताब बेत्।
Jelenleg kiválasztva:
मत्ती 2: LHM
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 1995 Wycliffe Bible Translators, Inc. and Nepal Bible Society
