ÂTHAONA 4
4
Kainâ nata Abela
1Âdâh ta a lapinô Evâ a zialâh ta, Evâ cha saw phaoh ta, Kainâ sa ta, “Abeipa baona ta chapaw ei sa haw,” tah ta. 2Cha khai tawhta a unawhpa Abela sa ta. Abela cha Mietaku vaituhpa châ ta, Kainâ deikua cha leipalietuhpa a châ. 3A noh hropa ta, Kainâ cha chhaohlei theilâpazy tawhta Abeipa lâta hmohlâpa cheih ta. 4#Heb 11.4Abela chhao ta a sahroh a pataw tua chaipazy nata a thawzy hlâ hra ta. Abeipa cha Abela nata a hmohlâpa liata a ly ngaita ta, 5Kainâ nata a hmohlâpa liata deikua cha a ly leipa ta. Chavâta Kainâ cha a pathi ia ngaita ta, a hmia chhie kaw ta. 6Abeipa ta Kainâ hnohta,
“Khazia na hie a hâh?
Khazia na hmia a chhie?
7Hmo dopa na tao khiahta cha,
A pyhpa châ aw va chi ma?
Hmo dopa na tao vei khiahta deikua cha,
Moleina ta chhikao liata châ byh ta,
Cha hnei awpa a khoh;
Na pahnie awpa a châ,”
tah ta.
8 #
Mat 23.35; Lka 11.51; 1 Zhn 3.12 Kainâ ta a unawhpa Abela hnohta, “Lyu lâ sie ei sih y,” tah ta. Lyu liata ama y nota, Kainâ ta a unawhpa Abela cha thyuhnao ta, thie ha ta. 9Chatawhcha Abeipa ta Kainâ hnohta, “Na unawhpa Abela kha zaw?” tah ta. Kainâ ta, “Pahno va na. Ei unawhpa vaituhpa ma ei châ?” tah ta. 10#Heb 12.24Abeipa ta a hnohta, “Khâpa hmo ma na tao haw? Na unawhpa thisaih ta chhaohlei tawhta eina kaw aw. 11Chavâta na unawhpa na thie nota, a thisaih palâ awpa ta a pakah a kaw âpa chhaohlei tawhta chhiesapa na châ haw. 12Lei na palie tita, alei ta kôvei cha pie khao aw vei. Alei chô liana heta leilôpa nata viavipa deita na châ aw,” tah ta. 13Kainâ ta Abeipa hnohta, “Eina hriena chi he ei tao thei awpa hlâta â hri via. 14Moh teh, tanoh he chhaohlei tawhta na papua ha chi ta, na mohmô tawhta nyupa ta y aw na ta, alei chô liana heta leilôpa nata viavipa châ aw na ta, nâ hmôpa maihta eina thie aw ei,” tah ta. 15Abeipa ta a hnohta, “Châ bao va! Ahy rai Kainâ a thiepa cha a lie sari ta a chô liata phuh lapa a châ aw,” tah ta. Chatanachata a hmôpazy ta ama thie lei nawpa ta, Abeipa ta Kainâ chô liata ngiana tao ta. 16Chatawhcha Kainâ cha Abeipa mohmô tawhta pua ta, Idâh nochhi lâta Nawdâ râh liata pahrâ ta.
Kainâ pathlazy
17Kainâ ta a lapinô a zialâh ta, a lapinô cha saw phaoh ta, Enawka sa ta. Chatawhcha khihpi padua ta, a sawchapawpa moh pachyuhpa ta khihpi moh cha Enawka a bi. 18Enawka ta sawchapaw Irâdâ sa ta, Irâdâ ta Mehuzelâ sa ta, Mehuzelâ ta Methuselâ sa ta, Methuselâ ta Lâmeka sa ta. 19Lâmeka cha lapinô pano hnei ta, pakha moh cha Aidâ châ ta, ahropa moh cha Zilâ a châ. 20Aidâ ta Zabâ sa ta, ano cha sahrohzy pasapa ta poh o liata a pahrâpa sahlao pathlatuhpa a châ. 21A unawhpa moh cha Zubâ châ ta, ano cha totâ nata ramo tôtuhpa sahlao zydua pathlatuhpa a châ. 22Zilâ chhao sawchapawpa Tubâkainâ sa hra ta, ano cha dawh nata thua chhaichhi to a daihtuhpa a châ. Tubâkainâ sietanô cha Nâmâh a châ. 23Chatawhcha Lâmeka ta a lapinôzy hnohta,
“Aidâ nata Zilâ y,
Ei ao nathlie u la,
Lâmeka lapinôzy saih u,
Ei bie thei teh u!
Hmah eina paphaopa vâta chyhsa pakha thie na ta,
Thi eina padôhpa vâta satlia pakha ei thie haw.
24Kainâ phuh a lie sari ta lapa a châ khiahta cha,
Lâmeka phuh cha a lie sysari nata ei sari ta lapa a châ aw,”
tah ta.
Sethâ nata Enawsâ
25Âdâh ta a lapinô a zialâh heih ta, sawchapaw sa ta, a lapinô ta, “Kainâ ta a thie hapa Abela vyuhpa ta Khazohpa ta saw hropa eina pie haw,” tah ta, a moh Sethâ#4.25 “Sethâ” tahpa cha, “Piepa ei châ haw” tahna a châ. a bi. 26Sethâ ta sawchapaw sa ta, a moh Enawsâ a bi. Cha daihti tawhna chata chyhsazy ta Abeipa moh pado pathao ei ta.
Jelenleg kiválasztva:
ÂTHAONA 4: MARVBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
The Bible Society of India
© 2023, Used by permission. All rights reserved.
