Génesis 2
2
1Hich hu' yu'un te ch'ulchan soc bahlumilal, soc spisil bintic nojel tey a. 2Ta shuquebal c'ahc'al hu' ta pasel spisil ya'tel te Diose; la scux yo'tan yu'un spisil te ya'tele. 3La ya'be bendición te shuquebal c'ahc'al soc la sch'ultes, yu'un tey la scux yo'tan yu'un spisil te ya'tele.
Adán soc Eva ta Edén
4Hich ay sc'oblal te shahchibal te ch'ulchan soc bahlumilal. Te c'alal pastaj yu'un Jehová Dios te bahlumilal soc te ch'ulchan, 5ma to ayuc te'etic ta lumq'uinal a soc ma to chicanuc ha'maletic a, como te Jehová Dios ma to ba la yac' tal ha'al ta bahlumilal soc ma to ayuc winic a te ya x'a'tej ta lumq'uinal; 6pero mo tal sahb ta lumq'uinal te la yahch'es spisil te lumq'uinale. 7Dios la spas te winic ta ts'ubil lum,#2.7 winic: adam, xchi ta hebreo; jteb ma pajaluc ta a'iyel soc ‘adama’: talem ta lum, xchi. la shuhxibe sni' ta ic' yu'un cuxlejal, hich cuxaj.
8Te Jehová Dios la yac' ts'umbil q'uinal ta Edén te ay ta stojol banti ya xloc' tal c'ahc'al. Tey la yac' a te winic te la spase. 9Te Jehová Dios la yac' coluc ta lumq'uinal spisil ta chahp te'etic te t'ujbil ta ilel soc te lec ta lo'beyel sit. Soc ta yohlil te ts'umbil q'uinal ay te te' scuenta cuxlejal soc te te' scuenta sna'el te bintic lec soc te bintic ma lecuque.
10Ay muc'ul-ha' hahchem tey ta Edén te la ya'lelin te ts'umbil q'uinale; tey jetin a, chaneb c'oht. 11Pisón sbihil te june, ha te ya sjoytay spisil te q'uinal yu'un Havila, ta banti ay oro; 12buen t'ujbil te oro, soc ay xuch'il te' te sumet yic', soc ay ónice. 13Gihón sbihil te schebale, ha te ya sjoytay spisil te q'uinal yu'un Cus. 14Hidekel#2.14 O: Tigris sbihil te yoxebale, ha te ya x'oquin c'axel ta stojol banti ya xloc' tal c'ahc'al yu'un te sq'uinal Asiria. Éufrates sbihil te schanebale.
15Te Jehová Dios la yac' te winic ta yohlil te ts'umbil q'uinal Edén scuenta yu'un ya schahpan te lumq'uinal soc ya scanantay. 16Te Jehová Dios hich la spas ta mandar te winique: Spisil te'etic ay ta ts'umbil q'uinal ya xhu' yac alo'be sit, 17yan te te' yu'un sna'el te bintic lec soc te bintic ma lecuc ma me xalo'be sit stuquel, como te bin ora yac alo'be te site, ya me xchamat yu'un, xchi.
18La yal te Jehová Dios: Ma lecuc te stuquel ay te winique, ya jpasbe snuhp' te ya scoltay sba soque, xchi. 19Spisil te chambahlametic ayic ta q'uinal soc spisil te mutetic ya xwihlic ta toyol pasticlambil ta lum yu'un te Jehová Dios. La yic'ticlambe tal ta stojol Adán scuenta yu'un ya yil bin sbihil ya yac'ticlambe stuquel. Te bin sbihil ac'ticlambot yu'un Adán te chambahlametic, hich nix sbihil c'oht a. 20Hich te Adán la slehbe sbihil spisil ta chahp ha'mal chambahlametic, mutetic, soc alaq'uil chambahlametic ayic ta q'uinal; pero ma ba weht snuhp' te ya scoltay sba soque. 21Ha yu'un te Jehová Dios la yac' c'uhbuc swayel te Adán; c'alal wayalix a la sloq'uesbe jch'ix smochbaquel soc la smacbe te banti la sloq'ues. 22Te Jehová Dios la spas ta ants te jch'ix smochbaquel, la yic' tal ta stojol te winique. 23Hich la yal te Adán:
¡Ha'ix jbaquel te sbaquele, soc jbaq'uetal te sbaq'uetale!
Ha ants#2.23 ants: ixxa, xchi ta hebreo, loq'uem tal ta winic (ix), xchi. sbihil ya xc'oht,
como loq'uem tal ta winic, xchi.
24Ha scuentahil te winic ya yihquitay hilel te stat soc snan, ya yic' sba soc te yihnam, junax ya xc'oht schebalic.
25Mayuc sc'u' spac' te Adán soc te yihnam, pero ma ba q'uexawic yu'un.
Jelenleg kiválasztva:
Génesis 2: TZH
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Biblia Tzeltal Bachajon © Sociedad Bíblica de México, A.C., 2006.
