Luke 9
9
Sesu asindige digumi di bayikitsi ne bayikitsi babeyi
1Wisi wumoosi, Sesu agukige digumi ne bayikitsi babeyi ne aveege yawu ngudi ne dinyaange di wupunze manyunyi mootsu mamabi ne wubeeluse bambeedu. 2Kere vane asindige yawu muloonze maambu ma Bufumu bu Nzambi ne mubeeluse babeetsi. 3Ayambile yawu re: «Mu munyalu diyaboonge mupaangu, diyaboonge peengi, diyaboonge mape, diyaboonge badole nisi kure. Mutu nisi wumoosi ayaboonge kape beyi. 4Ndagu tsyotsu tsikeyakwa yenu, bilanu guune kwanga ne ve bugabugulu bwenu. 5Bitsige byootsu bisakeyakwa yenu, buruganu, kuremusanu ne difufundu di divule dyene di mu byoru byenu. Dyaambu dyene re mulubuse yawu re batsevage dibi.» 6Bayikitsi bayende, bavyogenge mu miimbu mootsu nuloonzenge musamu wumunyi nubeelusenge babeetsi mu bitsige byootsu.
Irode aroonde wulabe Sesu
7Mu dikyesi dyene, Irode akumenge gu tseengi yi Galilé. Ayulu tsaangu yi maambu mootsu mavyogenge te aseyabe divindugulu di mo mumbare bamosi bayambilenge mu Sesu re: «Sa Batise atsefwangugu.» 8Baane bayambilenge re nde Ili amelabene, bamosi re: «Nde mubigitsi wukale atsefwangugu.» 9Te Irode ataasenge re: «Matsetabulise muru wu Sa. Ake wuwu mutu nde nyi wugonevage maambu mamanene magoneyulu me batsaangu?» Ne vane abaande wubene Sesu.
Sesu yane bayikitsi baandi bayise piti
10Ve gabugu Bakime banyigule Sesu mootsu mavage yawu. Ayende nawu gu tselu yi divule dilugu re Betesayida. 11Te mbili batu nuyabe dyo, balaande yandi. Sesu ayake yawu, ayambilenge yawu mu dyaambu di Bufumu bu Nzambi ne abeeluse bababile ne nzale wubeelusu. 12Ve baande yide wisi digumi ne babeyi bagogule bebele ne Sesu ne wuyambile yandi re: «Gabuse batu bootsu mure bayendi gu miimbu ne mu bitsige bi bebele mulaame ne mudile kure, mumbare manenu gunu dike gu kumu.» 13Te Sesu ayambile yawu re: «Veeganu yawu kure yenu bene.» Bagabusile yandi re: «Dike ne mape maranu piinze ne bibere bibeyi. Veengu yetu bene direyende gusuumbe kure yi batu babe botswu.» 14Vane vebile bebele ne tosini yiraanu tsi babagele. Sesu ayambile ne bayikitsi baandi re: «Tsigisanu yawu mu makabu ma magumi maranu maranu.» 15Bayikitsi bagobise ne batsigise yawu bootsu. 16Sesu aboonge mape maranu ne bibere bibeyi, asiimbule miisu gu yulu, agabuse dinyi gu Nzambi mu kurene. Kere vane aveege byo gu bayikitsi baandi mu gabile piti. 17Batu bootsu bayi ne bayikure. Babage digumi ne poonzi beyi tsi birini bisalulu.
Pyere asupule re Sesu re Wusoolu ne Nzambi
18Wisi wumoosi, Sesu asaambilenge ve yitsige giyapiinze ne bayikitsi baandi babile naandi. Atombe yawu re: «Batu bakataasi re mande nyi?» 19Bayagule yandi re: «Bane bakayambile re yinde Sa Batise. Bamosi bakayambili re yinde Ili. Basusu re yinde mubigitsi wu kale wufwangugu.» 20Sesu abetombe yawu re: «Ake yenu, dikatasi nde re mande nyi?» Pyere ayagule yandi re: «Yire Wusoolu ne Nzambi.»
Sesu ayambile mu dyaambu di difu dyandi ne di bufwangugulu bwandi
21Sesu ayambile yawu re diyapuke wuyambile dyo gu mutu nisi wumoosi. 22Ne abeyambile yawu re: «Bweedi Mwaane mutu alabi maguge mambili, abusu ne bivuunde bi Basifu ne bivuunde bi baveegitsi ba malagu ne bateenditsi ba migage. Abekoonde yambile re Mwaane mutu aguboku ne mu wisi wu mureru, agufwangugu.»
Nakalaandu Sesu
23Kere vane ayambile ne bootsu re: «Ga mutu aroonde wulaande me, abusi diroonde diyabene, apapingi kuruswandi wisi wotsu ne alaandingi me.#9.23 Apapingi kuruswandi: Sesu aronde wuloonze re, wotsu wulande me agwarili mu maguge kwanga ne ve difu. 24Yabanu re wotsu wukeroonde kyele monyu wandi agutsyemuse wo. Te wotsu wuketsyemuse monyu wandi mu me, aguyobulu. 25Ake tsoongu nde gi gu mutu mudile bukiti bwotsu butseengi yiyi, ga atsyemuse monyu wu mubu ne mubu? 26Ga mutu alabe tsonyi mu me ne mu mabigu mami, me gaandi magulabe yandi tsonyi vekeruge me gugare bunduumbe bune Tate yane bakime baandi barele. 27Mayambile yenu nungyenze, bamosi ve ganegarenu basakenenefu gugalabe Bufumu bu Nzambi.»
Yidimu gi Sesu gikalugu
28Yandi numane yambile maambu mene, tsufu poombu nuvyoge, Sesu aboonge Pyere ne Sa ne Sake bayende gu yulu mukoongu gu wusaambile. 29Ve saambilenge yandi, yidimu gyandi gikalugu ne bidwaari byandi bibile keke bifuuge ne vee. 30Vane ne vane gubile babagele babeyi bayambilenge ne Sesu. Bile re Muyise ne Ili. 31Yawu balabunu gugare bunduumbe bu Nzambi. Bayambilenge ne Sesu mu dyaambu di difu dyandi gu Serusalem. 32Pyere ne bambaatsi baandi babile bametobe byolu; te ve rambuge yawu, balabe bunduumbe bu Sesu ne babagele babeyi babile mitele ve mbarandi. 33Mu dikyesi diyagene babagele bene ne Sesu, Pyere ayambile yandi re: «Muloonzi, bweedi dibilyanu vave. Yetu diruungili yenu masaambe mareru: dimoosi dyagu, dimoosi di Muyise, dine di Ili.» 34Ve yambilenge yandi nane, dibuungi disunde ne yiluunze gi dyo gidibigile yawu. Bayikitsi balabe wome ve labe yawu dibuungi dyene. 35Duufi diyulunu gugare dibuungi re: «Wuwu re Mwaanami wusoole me muvage naroonde me. Yululwanu yandi.» 36Mu dikyesi dimane yulunu duufi, Sesu asale yapiinze. Bayikitsi baruumbe, baseyambile maambu mootsu malabe yawu gu mutu nisi wumoosi.
Sesu abeeluse mwaane wubile ne dinyunyi didibi
37Ne ngwaali yine, Sesu ne bayikitsi baandi basunde mukoongu ne piti yiyinene yiruge mu bengusunu yawu. 38Gugare pityene, dibagele dimoosi abwamugu re: «Muloonzi, kokolu, monige mwaanami, mwaanami wu dikike! 39Makyesi mamosi dinyunyi didibi dikagaangi yandi. Dikayasisi yandi vane ne vane nutsukimise yandi ne ngudi. Dikavatisi yandi difutsi gu mune ne wutsogise yandi. Vekarugi dinyunyi dyene, disakaberoonde wupule mu mwaane. 40Matseleende bayikitsi bagu mu wupunze dyo, te basarungule.» 41Sesu abetile batu bootsu re: «Yenu nde batu bababi bagane gitu. Magubebile nenu nde makyesi makwe? Magubesiindile yenu nde makyesi makwe?» Kere vane ayambile ne tayi mwaane re: «Ruge ne mwaanagu gugu.» 42Mu dikyesi digogule mwaane, dinyunyi didibi diberuse yandi ne wuyambuse yandi ne ditsukimise mwaane pepe. Te Sesu abetile dinyunyi didibi. Abeeluse mwaane nugabuse yandi gu tayandi. 43Batu bootsu bagibeme mbili, mulabe ngudi yiyinene yi Nzambi.
Sesu abekoonde wuyambile mu dyaambu di difu dyandi
Ve gibemenge batu bootsu mu maambu mavagenge Sesu, ayambile bayikitsi baandi re: 44«Yulwanu bweedi mabigu makeyambile me yenu ne mapape. Mwaane mutu agugabu gu batu.» 45Te bayikitsi basenyigugulu dyaambu dyene, mumbare Nzambi aswege yawu dyo ne bayulu wome mutombe Sesu divindugulu di dyaambu dyene.
Ngyebe ne yivuunde gu Bufumu bu Nzambi
46Bayikitsi ba Sesu babaande wutswake mugalene buvuunde ve tsugu yawu bootsu. 47Sesu nuyabe nataasenge yawu mu mirime, aboonge mwaane ngyebe, nutelige yandi ve mbarandi. 48Kere ayambile yawu re: «Wotsu wukeyake mwaane ngyebe wuwu mu ndugami, ameyake mabene ne wotsu wukeyake me, ameyake yandi wusindige me, mumbare wuyi ga mwaane ngyebe ve ganegare yenu bootsu, re yivuunde.»
Wusakakoli yenu re wenu
49Kere vane Sa ayambile Sesu re: «Muloonzi yetu ditselabe mutu atsepunzenge manyunyi mamabi mu dine dyagu ne ditseroonde wukubise yandi mumbare asaandi gu dikabu dyetu.» 50Te Sesu ayagule yandi re: «Diyakubise yandi, mumbare wusakakoli yenu re wenu.»
Bisi Samari babuse wuyake Sesu
51Ve gogulenge dikyesi di Sesu mumake gu yulu, ne bukidi bwotsu ayende gu Serusalem. 52Aregisile bakime gu diimbu di Samari. Yawu bayende mukuunze byootsu mu mwiitsu wandi. 53Te bisi diimbu dyene babuse wusaangile yandi mumbare ayendenge gu Serusalem. 54Ve labe yawu nane, bayikitsi Sake ne Sa bayambile Sesu re: «Fumu, yiroonde re ditombi Nzambi mu sindige mbaawu yi yulu mu wuyoke yawa?» 55Te Sesu agyelugu gu yawu ne aseembe yawu. 56Kere vane bayende gu diimbu dimosi.
Babagoneroonde wulaande Sesu
57Ve yendenge yawu mu nzile, dibagele dimoosi ayambile Sesu re: «Magulaandenge yu mwotsu mukeyendenge yu.» 58Sesu ayagule yandi re: «Banganyi bane bitsige bikalaami yawu, ne banyonyi bane muufu mawu, te Mwaane mutu asaandi ne yitsige gi wulaame ne gi wulooge.»
59Sesu ayambile dibagele dimosi re: «Laande me.» Te dibagele dyene ayagule re: «Fumu, siingise me, mayendi kire gu yevere tate.» 60Sesu ayagule yandi re: «Siise babafu mu dinyunyi baveringi bafuumbi bawu, te yu, yende muloonze dyaambu di Bufumu bu Nzambi.»
61Mutu wususu abeyambile re: «Magulaandenge yu, Muloonzi, te siingise me kire mayelagile bakiinde baami.» 62Sesu agabusile yandi re: «Wotsu wumagaangile tsoopu#9.62 Tsoopu: wuregile wutende musamu asunze chariot, yivave gi dutungu ne bangombi mu wufundule mutambe ne gi wuvare. nubebemine miisu manzime asaandi wuyelimine mu Bufumu bu Nzambi.»
Jelenleg kiválasztva:
Luke 9: SNQ
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
