Matiyu 2

Lɔnnilalu ka na Isa foya lɔ teme

1Isa ka sɔlɔn Bɛtilɛhɛmu so kɔnɔ, Jude koovi lɔ, Helodi ya masaya waate lɔ. Isa sɔlɔn kɔ, lɔnnila dɔlu ka bɔ telebɔ jamana dɔ lɔ ka na Jelusalɛmu. 2Ai do ka mɔɔlu maɲininga, ai vɛɛ: «Jahudiyalu ya masakɛ min sɔlɔnnin kula le, a yi min ne? Mɔ na aa loloni yena telebɔ fannɔ, wo le n'a kɛla, mɔ nanin a batoko le lɔ.» 3Masakɛ Helodi ka wo mɛn mingɛ, a kɔnɔlɔ ka fili, ani Jelusalɛmukalu bɛ. 4Masakɛ ka Bani Isilankalu ya salakalase kuntiibalu ani seliya kalanmɔɔlu bɛ ladɛn k'ai maɲininga ko Masa Tɔɔmasenin ka kan ka sɔlɔn min ne? 5Ai do vɛɛ a yɛ: «A ka kan ka sɔlɔn Bɛtilɛhɛmu le, Jude koovi lɔ, kamasɔlɔn kela dɔ k'a sɛvɛ, ko:

6‹Ile Bɛtilɛhɛmu, ile min yi Jude koovi lɔ,

i tɛ Jude solu lɔ dɔɔmanin ne dɛ!

Kamasɔlɔn kuntii dɔ bɔtɔ i lɔ,

min kɛtɔ a jandola ǹa Bani Isilankalu lɔ.› »

7Wo kɛ, Helodi ka lɔnnilalu kili ai ta fan, fɔsa a a lɔn loloni wo bɔnin waate min. 8A do ka siya di ai ma ko ai yi taa Bɛtilɛhɛmu, a vɛɛ ai yɛ: «Ài yi taa den ɲinin kobɛn. Ài v'a yena, ài yi na k'a fɔ ǹ yɛ, fɔsa ǹe gbu yi taa a bato.»

9Lɔnnilalu wɔlinin masakɛ lamɛnna, ai ka bɔ je ka taa. Ai ka to siya kɔkan, ai tɛɛ vɛ loloni min ye ai fɛlɔ telebɔ fannɔ, wo loloni kelen ka bɔ kɔtunun ka to ai ɲa haan fɔɔ ka se denni fɛlɔ k'i lɔ je kunna. 10Lɔnnilalu ka loloni ye mingɛ, ai ka sawa kosɛvɛ. 11Ai donnin bon na ka denni ni a ba Mɔyamu ye, ai k'ai ten bilin a kɔlɔ a batoko lɔ. Wo kɛ, ai k'aiya nafololu labɔ ka kɛ denni sama le: sanu, wusulan, ani kɔlɔmanjɛn sumadiyanin min tɔɔ yi ko milu.

12Wo kɔ, ai ka seikɔ aiya jamana lɔ siya gbɛlɛ le, kamasɔlɔn Ala tɛɛ vɛ ai lali siwo lɔ ko ai kà seikɔ Helodi fɛlɔ.

Jusufu ka Mɔyamu ni a den ta ka taa Misilan teme

13Lɔnnilalu taa kɔ, mɔ Tii ya mɛlɛka k'a jɛlɛ jiya Jusufu la siwo lɔ, a vɛɛ a yɛ: «I wuli, i yi den ni a ba ta ka bɔli ai le Misilan jamana lɔ. I yi to je haan fɔɔ m̀'ɛ a fɔla i yɛ lon min na i i kɔsei, kamasɔlɔn Helodi kɛtɔ den ɲininna a faako lɔ.»

14Wo fɔ mɛlɛka bolo, Jusufu k'i wuli su lɔ ka den ni a ba ta ka taa Misilan, 15ka to je haan fɔɔ Helodi ka sa. Wo ka kɛ fɔsa mɔ Tii ya kuma min fɔnin kela bolo, wo ma yi fa teme, ko:

«Ǹ na ǹ denkɛ kilila ko a yi bɔ Misilan.»

Masakɛ Helodi ka denkɛ siyama faa teme

16Helodi k'a lɔn mingɛ ko lɔnnilalu vɛ a janva, a k'a josolakuna bubale. Wo le k'a kɛ, a ka jamali di ko ai yi dɛnkɛlu bɛ faa Bɛtilɛhɛmu ni a laminin nɔ, minu tɛɛ ma timin ba sanji fila la bene. A ka wo kɛ ka bɛn lɔnnilalu ya loloni ye waate ma, ai tɛɛ vɛ min fɔ a yɛ. 17Wo ka kɛ fɔsa Nabi Jelemi ya kuma ma yi fa teme, ko:

18«Kumakan dɔ ka bɔ Lama so kɔnɔ,

kasikan ni josomakasi ba.

Lasɛli yi kasila a dennu ya ko lɔ.

A ma diɲa mɔɔ foi y'a masawali,

kamasɔlɔn a dennu tɛ je butu.»

Jusufu ka seikɔ Isilan jamana lɔ teme

19Helodi sa kɔ, mɔ Tii ya mɛlɛka k'a jɛlɛ jiya Jusufu la siwo lɔ Misilan. 20A do vɛɛ a yɛ: «I wuli, i yi den ni a ba ta. Ài yi seikɔ Isilan jamana lɔ, kamasɔlɔn mɔɔ minu tɛɛ denni faako ɲaɲininna, wolu vɛ sa.» 21Wo fɔ, Jusufu v'i wulila, ka denni ni a ba ta k'i kɔsei ai le Isilan jamana lɔ.

22Kɛɛ Jusufu k'a mɛn mingɛ ko Alikilayosi le siinin masaya la Jude koovi kunna a fa Helodi nɔ lɔ, a ka siyan taako lɔ je. Ala k'a lali siwo lɔ ko a yi taa Galile koovi lɔ. 23#Malɛkɛ 1.24; Luka 2.39; Yohana 1.45.A do ka t'i sii Nazalɛti so kɔnɔ. Wo ka kɛ fɔsa kelalu ya kuma ma yi fa teme, ko: «Ai kɛtɔ a fɔla a ma Nazalɛtika.»

Jelenleg kiválasztva:

Matiyu 2: MBT2023

Kiemelés

Megosztás

Másolás