Matiyu 10

Isa ka aa keladen mɔɔ tan ni fila (12) ta teme

Malɛkɛ 3.13-19; Luka 6.12-16

1Wo kɔ, Isa ka aa keladen mɔɔ tan ni fila (12) kili, ka seetiiya di ai ma fɔsa ai yi se jinajuulu gbɛnna mɔɔlu lɔ, ani ka mɔɔlu lakɛnɛya k'ai bɔ aiya jangalo ni tɔlɔya suu bɛ lɔ. 2Keladen mɔɔ tan ni fila (12) wolu tɔɔ le ne: a kunfɔlɔ Simɔn (ai y'a fɔla min ma ko Piyɛli), ani a dɔɔni Andele, ani Zebede denkɛ Janguba ni a dɔɔni Yohana, 3ani Filipe ni Batolomu, ani Tomasi ni Matiyu min tɛɛ niisɔɔnminaba le, ani Alife denkɛ Janguba, ani Tade, 4ani Simɔn (ai y'a fɔla min ma ko Fasokanuba), ani Judasi Isekaliyɔti, min ka Isa janva.

Isa ka aa keladen mɔɔ tan ni fila (12) kelaya teme

Malɛkɛ 6.7-13; Luka 9.1-6

5Isa ka mɔɔ tan ni fila (12) wolu kelaya. A do vɛɛ ai yɛ: «Ài kà taa siboloma gbɛlɛlu fɛlɔ. Ài do kà don Samaliyakalu ya so suu suu la. 6Fɔ ài yi taa Bani Isilankalu le fɛlɔ, minu kɛnin iwo saalu minu bilanin ai jɛlɛ ma. 7Ài vɛ timinna tɛɛ o tɛɛ lɔ, ài yi mɔɔlu kawani k'a fɔ ko haijɛnɛ masaya waate ma vɛ sulunya. 8Ài yi jangalotɔlu lakɛnɛya, ka fulenilu lawuli, ka kunatɔlu lasɛnɛya, ka jinalu gbɛn k'ai bɔ mɔɔlu lɔ. M̀'ɛ seetiiya di ài ma, ài ma min sala. Wo lɔ, ài vɛ ko min kɛla mɔɔlu yɛ, ai kà fen sala. 9Ài kà sanu bila ài kun, niwotɛ wɔli suu suu. 10#1 Kolɛntikalu 9.14; 1 Timote 5.18.Ài kà bɔlɔ ta, ài kà taamabele ta, ài k'àiya faaniba ni àiya samala kɛ fila le, kamasɔlɔn baalekɛba ka kan k'a balo sɔlɔn.

11«Ni ài ka don so suu suu la, ài yi mɔɔ ɲinin min yi diɲa k'ài jiya. Ài yi to wo tii fɛlɔ haan fɔɔ ài taa waate. 12Ài vɛ kɛla donna bon na, ài yi bonnamɔɔlu fo kunfɔlɔ le, ài vɛɛ: ‹Hɛlɛ yi kɛ ài yɛ.› 13Ni ai k'ài lɔmina kobɛn, àiya duwawu yi minale ai ma. Ni do ai ma ài lɔmina kobɛn, àiya duwawu yi seikɔle ài ma. 14#Kɛkolu 13.51.Ni mɔɔ suu suu k'i ban ài lɔminako ma, ani k'i ban ai tolomalɔla ài kumakan na, wo vɛ kɛla, ài yi bɔ woja. Ài vɛ kɛla bɔla luu wo ma, niwotɛ so wo la, ài yi je gbangban bɔ ài sen ma, ka wo kɛ ai ban tɔɔmase le. 15#Matiyu 11.24.#Luka 10.4-12.Ǹ'i tuɲa fɔ ài yɛ, kititɛɛlon, Sɔdɔmu ni Gɔmɔli so yonnu ya kiti kɛtɔ nɔyala ka timin so wo mɔɔlu ta la.»

Tɔlɔya minu kɛtɔ nala

Malɛkɛ 13.9-13; Luka 21.12-17

16 # Luka 10.3. «Ǹ'ài kelayala ka kɛ iwo saa minu bilanin soofalilu tɛma. Wo ma, ài hangili yi sii, iwo sa hangili siinin teme. Ài kɛko ma yi fa, iwo poponi mafanin teme. 17#Malɛkɛ 13.9-11; Luka 12.11, 12; 21.12-15.Ài y'ài jando ài jɛlɛ lɔ ka bɛn mɔɔlu ma, kamasɔlɔn ai kɛtɔ taala ài le kititɛɛbonnu la, ani k'ài gbasi gbusan na aiya Aladalibonnu la, 18ani k'ài lalɔ jamanatiilu ni masakɛlu ɲakɔlɔ ka bɛn ǹa ko ma. Àilu gbu le kɛtɔ ǹe masele le wo lɔ, ka ǹa ko fɔ wolu yɛ ani siboloma gbɛlɛlu. 19Ai vɛ kɛla taala ài le kititɛɛbon na, ài ka kan ka kuma min fɔ je ani ài ka kan k'a fɔ teme, ài kà hamin wo le. Ài ka kan ka min fɔ, wo ditɔ ài ma wo waate kelen nɔ. 20Kamasɔlɔn ài kumakannu tɛnala kɛla ài jɛlɛkanu ta le, mafɔ ài Fa Ala Nii Sɛnɛyanin kumakan.

21 # Malɛkɛ 13.12; Luka 21.16. «Kɔlɔmamɔɔ kɛtɔ a badenma donna mɔɔlu bolo a faako lɔ. Fa fana kɛtɔ wo suu le kɛla a den na. Dennu wulitɔ ai sɔlɔnbalu kanma k'ai don mɔɔlu bolo ai faako lɔ. 22#Matiyu 24.9; Malɛkɛ 13.13; Luka 21.17; Matiyu 24.13; Malɛkɛ 13.13.Ài gbeyatɔ mɔɔ bɛ yɛ ka bɛn ǹa ko ma. Kɛɛ ni mɔɔ min ka gbeleya mina a ma ka sii tɔlɔya laban na, wo tii yi kisile. 23Ni ai k'ài tɔlɔya so dɔ la, ài yi bɔli ka taa so gbɛlɛ la. Ǹ'i tuɲa fɔ ài yɛ, ài tɛnala banna Isilan jamana so bɛ lɔtaamana, ni Mɔɔnivin Tanin m'a kɔsei.

24 # Luka 6.40; Yohana 13.16; 15.20. «Kalannaden tɛ buɲa sɔlɔnna ka timin aa kalanmɔɔ la. Jɔn fana tɛ buɲa sɔlɔnna ka timin aa jɔnfa la. 25#Matiyu 9.34; 12.24; Malɛkɛ 3.22; Luka 11.15.Ni kalannaden ka se aa kalanmɔɔ lɔ, wo vɛ je bɔ. Ni do jɔn ka se aa jɔnfa lɔ, wo vɛ je bɔ. Ni ai k'a fɔ lutii kɛmɔba ma ko Biyɛzɛbɔ, a lagbɛyine feu ko ai kɛtɔ wo tii ya bonnamɔɔlu mafinna ka timin wo la!

Mɔɔ man kan ka siyan adamadennu ɲa

Luka 12.2-7

26 # Malɛkɛ 4.22; Luka 8.17. «Wo lɔ, ài kà siyan mɔɔ wolu ɲa. Ko doonnin suu suu tɛ je min la tɛnala nkɛnɛmayala, kumatɛ gbonoko ma min tɛnala lɔnna. 27Ǹ na min fɔla ài yɛ doon nɔ, ài yi wo fɔ bala lɔ. Ài yi min mɛnna ài tolo kɔlɔ, ài y'ài lɔ bon kɔkan ka wo fɔ gbanɔkan nɔ. 28Ài kà siyan mɔɔlu ɲa minu yi se mɔɔ falikolo faala dein, kɛɛ ai tɛ se foi kɛla mɔɔ nii la. Mafɔ, ài yi siyan wo ɲa, min yi se mɔɔ nii ni a falikolo bɛ halakila jahanama. 29Ai yi kɔnɔni fila felela wɔligbanani kelen ne la, kɛlɛ? Wo bɛ n'a kɛ, kɔnɔni wo kelen tɛ ben duu ma ni ài Fa Ala ma diɲa a ma. 30Àilu koni, hali ài kunsi kaali kɔndɛ lɔnnin Ala bolo. 31Wo ma, ài kà siyan. Àilu kulugbeleyanin vɛ kɔnɔni jilika jaan ne.

32«Ni mɔɔ min k'i lɔ a la mɔɔlu ɲakɔlɔ ko ǹe le ta yi a le, ǹe fana kɛtɔ ǹ lɔla a la ǹ Fa ɲakɔlɔ min yi haijɛnɛ, ǹ ko, ǹe le ta yi wo tii le. 33#2 Timote 2.12.Ni do mɔɔ min k'i ban ǹ lɔ mɔɔlu ɲakɔlɔ, ǹe fana kɛtɔ m̀ banna wo tii lɔ ǹ Fa ɲakɔlɔ min yi haijɛnɛ.

34«Ài k'ài mili ko ǹ nanin josolajii le le duukolo kɔkan. M̀ ma na josolajii le, mafɔ kɛlɛ. 35Ǹ nanin ka kɛ́ ni a fa falan, ka moso ni a ba falan, ka maamoso ni a mama falan. 36Mɔɔ juu yi bɔla a tii jɛlɛkanu balamɔɔlu le lɔ.

37«Ni mɔɔ min ka a fa niwotɛ a ba kanu ka timin ǹ na, wo tii ni ǹa kɔbiladenya kaannin tɛ. Ni mɔɔ min ka a denkɛ niwotɛ a denmoso kanu ka timin ǹ na, wo tii ni ǹa kɔbiladenya kaannin tɛ. 38#Matiyu 16.24; Malɛkɛ 8.34; Luka 9.23.Ni do mɔɔ min ma diɲa a jɛlɛkanu gbaankɔlɔman tako ma ka bila ǹ kɔ, wo tii ni ǹa kɔbiladenya kaannin tɛ. 39#Matiyu 16.25; Malɛkɛ 8.35; Luka 9.24; 17.33; Yohana 12.25.Kamasɔlɔn ni mɔɔ mɔɔ si y'a fɛ ka a nii lakisi, wo tii bɔnɔtɔ a la. Ni do mɔɔ min ka bɔnɔ a nii la ka bɛn ǹe ma, wo tii kɛtɔ niimaya sɔlɔnna.

Kokein balayi

Malɛkɛ 9.37, 41; Luka 9.48; 10.16; Yohana 13.20

40 # Luka 10.16; Yohana 13.20; Malɛkɛ 9.37; Luka 9.48. «Ni mɔɔ min k'a bolo sii ài kɔlɔ, wo tii v'a bolo sii ǹe gbu kɔlɔ. Ni do mɔɔ min k'a bolo sii ǹ kɔlɔ, wo tii v'a bolo sii ǹ kelaba fana kɔlɔ. 41Ni mɔɔ min k'a bolo sii Ala ya keladen dɔ kɔlɔ kamasɔlɔn keladen ne a le, keladen yi balayi min sɔlɔnna, wo tii fana kɛtɔ wo suu le sɔlɔnna. Ni do mɔɔ min k'a bolo sii Alaɲasiyanɲɛmɔɔ dɔ kɔlɔ kamasɔlɔn Alaɲasiyanɲɛmɔɔ le a le, Alaɲasiyanɲɛmɔɔ kɛtɔ balayi min sɔlɔnna, wo tii fana kɛtɔ wo suu le sɔlɔnna. 42Ǹ'i tuɲa fɔ ài yɛ, ni mɔɔ min ka hali jiyafɛ ɲa kelen gbu di ji suma lɔ ǹa denni mɔɔ kelen ma, kamasɔlɔn ǹ kɔbiladen ne a le, wo tii tɛnala bɔnɔla a balayi la feu.»

Jelenleg kiválasztva:

Matiyu 10: MBT2023

Kiemelés

Megosztás

Másolás