Luka 14

Isa ka kɛ́ dɔ lakɛnɛya Nɔningɛlon teme

1Nɔningɛlon dɔ, Falisilu ya ɲamɔɔ dɔ ka Isa kili dɔnniko lɔ aa bon na, ado mɔɔlu tɛɛ a lakɔlɔsila kosɛvɛ. 2Wo k'a talan, kɛ́ dɔ tɛɛ Isa ɲakɔlɔ, falilafaa jangalo tɛɛ min na. 3Isa ka seliya kalanmɔɔlu ni Falisilu maɲininga, a vɛɛ: «A yi di? Ka mɔɔ lakɛnɛya Nɔningɛlon, wo ladaanyine, baa wo ladaannin tɛ?»

4Ai do ka jeden. Wo kɛ, Isa ka jangalotɔ ta k'a lakɛnɛya, ka ban k'a labila. 5#Matiyu 12.11.Isa do vɛɛ ai yɛ: «Jene y'ài tɛma, ni min denkɛ niwotɛ aa nisi ka ben kɔlɔn nɔ Nɔningɛlon, a tɛnala a labɔla telemanin?» 6Ai do ma se wo javila.

Fulusiliya ma sana

7Isa k'a ye ko mɔɔ minu kilinin dɔnnikɛya lɔ, wolu tɛɛ ɲamɔɔ siiyalu le tala ai jɛlɛ yɛ. Wo le k'a kɛ, a ka sana dɔ la ai yɛ, a vɛɛ: 8«Ni mɔɔ dɔ k'i kili fulusiliya lɔ, i k'i sii ɲamɔɔ siiya lɔ, kamasɔlɔn ni a k'a talan mɔɔ gbɛlɛ kilinin je min buɲanin i le, 9mɔɔ min n'ài mɔɔ fila kilila, wo natɔ a fɔla i yɛ, a vɛɛ: ‹I wuli, i siiya di min ma.› Wo vɛ kɛla, i kɛtɔ kɔfɛ siiya dɔ ɲininna maloya boloma. 10Wo le y'a ma, ni ai k'i kili, i t'i sii kɔfɛ. Wo vɛ kɛla, mɔɔ min n'i kilila, wo natɔ a fɔla i yɛ, a vɛɛ: ‹Ǹ tɔva, i wuli, i t'i sii ɲafɛ.› Ado i kɛtɔ buɲa sɔlɔnna mɔɔ kilinin bɛ ɲakɔlɔ. 11#Matiyu 23.12; Luka 18.14.Kamasɔlɔn mɔɔ mɔɔ v'a fannɔbuɲala, wo tii ma yi jiile. Ni do mɔɔ mɔɔ v'a fanmajiila, wo tii kɔlɔ yi tale.»

12Wo kɔ, Isa k'a fɔ a kiliba yɛ, a vɛɛ: «I vɛ telelɔ dɔnni ba lɔbɛnna, niwotɛ wulala dɔnni, i k'i tɔvalu kili, niwotɛ i badenmalu, kumatɛ i siiɲɔɔ banalu ma, fɔsa ailu fana kana wo suu kɛ i yɛ k'iya kokein julu sala. 13Kɛɛ ni i do ka feeti dɔnni lɔbɛn, i yi fandannilu kili, ani namalanilu, ani senkelennilu, ani ɲagbɛlu. 14I kɛtɔ balayi sɔlɔnna wo lɔ, kamasɔlɔn wolu tɛ se iya kokein wo suu kɛla i yɛ. Ala gbu le kɛtɔ i salala wo ma, Telenmandelu Lawulilon ka bɔ saya lɔ.»

Feeti ba ma sana

Matiyu 22.1-10

15Mɔɔ dɔ tɛɛ siinin Isa dafɛ dɔnnikɛya lɔ, wo ka kuma min mɛn mingɛ, a k'a fɔ Isa yɛ, a vɛɛ: «Mɔɔ minu kɛtɔ feetikɛya lɔ Ala ya masaya lɔ, wolu yi duwawuden ne le.»

16Isa do vɛɛ a yɛ: «Lon dɔ, kɛ́ dɔ ka dɔnni ba lɔbɛn ka mɔɔ siyama kili. 17Dɔnni kɛ waate ka se mingɛ, a ka aa bɔiden lataa ko a yi taa a fɔ mɔɔ kilininnu yɛ, ko: ‹Ài yi na, fen bɛ lɔ vɛ bɛn.› 18Kɛɛ ai kelenkelenna bɛ k'ai kumanɔbɔ a yɛ. Mɔɔ kunfɔlɔ vɛɛ: ‹Ǹ na duu dɔ le sanna. Ǹ'a fɛ n'i taa a lasaa. I jon, i yi diɲa ǹa kumanɔbɔ ma.› 19Mɔɔ filana do vɛɛ: ‹Ǹ na sɛnɛkɛ nisi tan ne sanna, ǹ'a fɛ ka taa ai lɔsuma yi ne. I jon, i yi diɲa ǹa kumanɔbɔ ma.› 20Mɔɔ sawana vɛɛ kɔtunun: ‹Moso fulunin kula le ne m̀ bolo. Wo le y'a ma, ǹ tɛ se taala yi ne.› 21Bɔiden ka taa wo ɲafɔ aa kuntii yɛ mingɛ, wo josola ka kuna bubale. A do vɛɛ bɔiden yɛ: ‹Taa telemanin so kɔnɔ, i ɲa kaa siyaba ni siyanilu bɛ la, i yi na fandannilu le, ani namalanilu, ani ɲagbɛlu, ani senkelennilu.› 22Bɔiden do vɛɛ: ‹Ǹ kuntii, m̀'ɛ iya jamali wo mafa. Kɛɛ hali bi, iya bonna ma fa ba bene.› 23Wo lɔ, aa kuntii vɛɛ a yɛ: ‹Bɔ i yi taa sɛnɛ ni gbelelɔsiyalu la. I vɛ mɔɔ mɔɔ yena je, i yi ǹa kililikan magbeleya ai yɛ, fɔsa ǹa bonna yi fa. 24Kamasɔlɔn ǹ'a fɔ ài yɛ, mɔɔ minu kilinin kunfɔlɔ le, ai foi tɛnala ǹa feeti dɔnni dɔ mafɛlɛnna!› »

Ài y'ài ban ài jɛlɛ lɔ

Matiyu 10.37-38

25Jama ba tɛɛ taamana Isa kɔ siya la, a k'i ɲa tilimin ai la k'a fɔ ai yɛ, a vɛɛ: 26#Matiyu 10.37.«Ni mɔɔ min y'a fɛ ka na m̀ ma, ni wo tii m'i ban a fa lɔ, niwotɛ a ba, niwotɛ a moso, niwotɛ a dennu, niwotɛ a badenmalu, hali ale gbu ya niimaya, wo tii tɛ se kɛla ǹ kɔbiladen ne. 27#Matiyu 10.38; 16.24; Malɛkɛ 8.34; Luka 9.23.Ni do mɔɔ min ma diɲa a jɛlɛkanu gbaankɔlɔman tako ma ka bila ǹ kɔ, wo tii tɛ se kɛla ǹ kɔbiladen ne.

28«Jene y'ài tɛma, ni a a fɛ ka sangaso lɔ, a t'i sii kunfɔlɔ le ka kɔndɛbɔ k'a lɔn ni a yi sene a lɔla k'a laban? 29Niwotɛ, ni a ka aa bon jusii ka koli a labanko ma, wo vɛ kɛla, mɔɔlu kɛtɔ wo yena ka jɛlɛbɔ a lɔ, 30ai vɛɛ: ‹Kɛ́ min na bonlɔ jusiila, kɛɛ a do ma se a labanna!›

31«Wo boloɲa kelen ma, masakɛ mindɛ kɛtɔ diɲala k'a masakɛɲɔɔ kɛlɛ, ni a m'i sii kunfɔlɔ le ka kɔndɛbɔ k'a lɔn ni aa sɔdasi mɔɔ waa tan (10 000) yi sene a masakɛɲɔɔ ya sɔdasi mɔɔ waa muan (20 000) na? 32Ni a tɛ se wo la, a kɛtɔ tola poon ka aa samakanlasebalu lataa a masakɛɲɔɔ ma ka bɛn ai wotɛbɛnko ma. 33Wo le y'a ma, ài suu suu tɛ se kɛla ǹ kɔbiladen ne, ni ài m'i ban ài jɛlɛ lɔ ka ko bɛ to je.»

Kɔɔ nafandan

Matiyu 5.13; Malɛkɛ 9.50

34«Kɔɔ yi fen kein ne le, kɛɛ ni kɔɔ diyaya vɛ bɔla a la, a yi se diyala di kɔtunun? 35A nafa tɛ kɛ a la duu yɛ, niwotɛ gbuan yɛ, fɔ k'a lafili banama. Tolo yi mɔɔ min kun, wo tii y'a tolomalɔ kuma min ma.»

Jelenleg kiválasztva:

Luka 14: MBT2023

Kiemelés

Megosztás

Másolás