Yohana 9
9
Isa ka ɲagbɛ kɛ́ dɔ ɲa laka teme
1Isa timintɔla, a ka kɛ́ dɔ ye min sɔlɔnnin tɛɛ ɲagbɛtɔya lɔ. 2A kɔbiladennu k'a maɲininga wo lɔ, ai vɛɛ: «Kalanmɔɔ, jene ya julumbu kɛnin sabu le kɛ́ min sɔlɔnnin ɲagbɛtɔya lɔ? A jɛlɛkanu ta, baa a sɔlɔnbalu?»
3Isa k'ai javi, a vɛɛ: «A tɛ k'a fɔ kɛ́ min na julumbu le tala, niwotɛ a sɔlɔnbalu. Min kɛyine fɔsa Ala kɛkolu la yi nkɛnɛmaya a fɛ. 4Damanda tele yi bɔla, fɔ m'i kɛ ǹ kelaba ya baale le la. Su kotɔle, mɔɔ tɛ se baale kɛla waate min nɔ. 5#Matiyu 5.14; Yohana 8.12.Damanda ǹ'i dunuɲa kɔnɔ yi ne, ǹe le dunuɲa kɛnɛya le.»
6Wo fɔ Isa bolo, a k'a daji bɔn duu ma ka wo kɛ bɔɔ le, ka ban k'a sisa kɛ́ ɲa kɔkan. 7A do vɛɛ a yɛ: «Taa i ɲa lako Silowe dala lɔ.» (Silowe kɔlɔ le ko Min Kelayanin). Wo fɔ, kɛ́ ka taa a ɲa lako ka seikɔ luu ma, a vɛ yeni kɛla.
8A siiɲɔɔlu ni mɔɔ minu deinin tɛɛ a siinin yena dailila, wolu vɛɛ: «Kɛ́ min siinin tɛɛ dailila, wo le ne?»
9A dɔlu vɛɛ: «Wo le kɛ.» A dɔgbɛlɛlu vɛɛ: «Ale tɛ, kɛɛ a bɔnin a la.»
Kɛɛ ale gbu tɛɛ a fɔla k'a magbeleya, a vɛɛ: «Ǹe le jɔ!»
10Ai k'a maɲininga, ai vɛɛ: «I ɲa la na kala di wo lɔ?»
11A k'ai javi, a vɛɛ: «Kɛ́ min tɔɔ yi ko Isa, wo le na bɔɔ ladanna k'a sisa ǹ ɲa kɔkan, ko ǹ'i taa ǹ ɲa lako Silowe dala lɔ. Ǹ na taala ǹ ɲa lakola mingɛ, ǹ ɲa la ka ka.»
12Ai k'a maɲininga, ai vɛɛ: «Kɛ́ wo yi min ne?»
A do vɛɛ: «M̀ m'a dingila lɔn.»
Falisilu ka ɲagbɛtɔ kɔlɔ maɲininga teme
13Wo kɔ, ai ka taa ɲagbɛtɔ kɔlɔ wo le Falisilu fɛ. 14Isa na bɔɔ ladanna ka kɛ́ wo ɲa laka lon min na, wo taanin kɛla Nɔningɛlon ne le. 15Wo lɔ, Falisilu fana ka kɛ́ maɲininga a ɲa lakako ma, ai vɛɛ: «I ɲa la na kala di?»
A k'ai javi, a vɛɛ: «A na bɔɔ le sisala ǹ ɲa kɔkan. Wo kɔ, ǹ ka taa ǹ ɲa lako, ǹe do yi yeni kɛla yi ne.»
16Falisi dɔlu vɛɛ: «Kɛ́ min ma bɔ Ala fɛlɔ, kamasɔlɔn a tɛ Nɔningɛlon buɲala.»
Kɛɛ a dɔlu vɛɛ: «Ni a ka kɛ julumbutɔ le, a yi se kawananko suu minu kɛla di?» Wo lɔ, ai ka falan a ma.
17Ai ka ɲagbɛtɔ kɔlɔ maɲininga kɔtunun, ai vɛɛ: «I yi mindɛ fɔla ka bɛn a ma, kamasɔlɔn ale le na i ɲa lakala?»
A k'ai javi, a vɛɛ: «Kela le a le.»
18Kɛɛ Jahudiya kuntiilu tɛɛ ma la a la feu ko kɛ́ min yi yeni kɛla yi ne, wo sɔlɔnnin tɛɛ ɲagbɛtɔya le lɔ. Wo le k'a kɛ, ai k'a sɔlɔnbalu kili 19k'ai maɲininga, ai vɛɛ: «Ài den ne min ne, ài n'a fɔla min ma ko a sɔlɔnnin ɲagbɛtɔya le lɔ? A do yi yeni kɛla di vɛ butu?»
20Kɛ́ sɔlɔnbalu k'ai javi, ai vɛɛ: «Mɔ k'a lɔn mɔ den ne min ne, a sɔlɔnnin ɲagbɛtɔya le lɔ. 21Kɛɛ ko min n'a kɛla a yi yeni kɛla butu, mɔ ma wo lɔn, kumatɛ mɔɔ min na a ɲa lakala. Ài yi ale gbu maɲininga, denni tɛ a le. A yi sene kumala a jɛlɛ yɛ!» 22A sɔlɔnbalu na wo fɔla kamasɔlɔn ai tɛɛ siyanna Jahudiya kuntiilu ɲa, kamasɔlɔn wolu tɛɛ vɛ bɛn a ma ko ni mɔɔ mɔɔ k'i lɔ a la k'a fɔ ko Isa le Masa Tɔɔmasenin ne, ai kɛtɔ wo tii gbɛnna Aladalibon na. 23Wo le n'a kɛla, kɛ́ sɔlɔnbalu n'a fɔla, ai vɛɛ: «Ài yi ale gbu maɲininga, denni tɛ a le.»
24Kɛ́ min sɔlɔnnin tɛɛ ɲagbɛtɔya lɔ, Falisilu k'a kili a siɲa filana lɔ k'a fɔ a yɛ, ai vɛɛ: «Magbiliyali di Ala ma! Mɔ k'a lɔn ne ko kɛ́ wo yi julumbutɔ le le.»
25Kɛ́ do k'ai javi, a vɛɛ: «A ka kɛ julumbutɔ le o, a ma kɛ julumbutɔ le o, m̀ ma wo lɔn. Kɛɛ ǹ ka ko kelen ne lɔn. Ɲagbɛ le tɛɛ ǹ ne, kɛɛ tandainɔ ǹ'i yeni kɛla.»
26Ai k'a maɲininga, ai vɛɛ: «A na mindɛ le kɛla i la? A n'i ɲa lakala di?»
27A do k'ai javi, a vɛɛ: «M̀'ɛ ban wo fɔla ài yɛ, kɛɛ ài do ma ài tolomalɔ ǹ na. Mindɛ lɔ ài y'a fɛ ka wo mɛn kɔtunun? A yi di? Àilu gbu y'a fɛ ka kɛ a kɔbiladen ne?»
28Wo fɔ a bolo, ai v'a jɛvɛla, ai vɛɛ: «Ile le kɛ́ wo kɔbiladen ne, kɛɛ ǹu do yi Nabi Musa kɔbiladen ne le. 29Mɔ k'a lɔn Ala na kumala Nabi Musa yɛ. Kɛ́ wo koni, hali mɔ ma a bɔya gbu lɔn!»
30Kɛ́ do vɛɛ: «Ko makawanin ba le min ne! Ài ma a bɔya lɔn, kɛɛ ale le na ǹ ɲa lakala. 31Mɔ k'a lɔn Ala tɛ julumbutɔ ya madailikan minala, kɛɛ mɔɔ mɔɔ vɛ Ala buɲala k'a sawo kɛ, a yi wo tii ya madailikan ne minala. 32Ka ta dunuɲa dan ma, mɔɔ m'a mɛn ba bene ko mɔɔ dɔ vɛ ɲagbɛ ɲa laka, min sɔlɔnnin tɛɛ ɲagbɛtɔya lɔ. 33Ni kɛ́ min tɛɛ ma bɔ Ala fɛlɔ, a tɛɛ tɛ se foi kɛla.»
34Falisilu vɛɛ a yɛ: «Ile min yi julumbutɔ ba le ka damina i sɔlɔn waate ma, ile le y'a fɛ ka mɔ kalan yi ne?» Ai do ka a gbɛn Aladalibon na.
Falisilu ya ɲagbɛya
35Isa k'a mɛn mingɛ ko ai vɛ kɛ́ wo gbɛn, a do ka taa a ɲinin k'a maɲininga, a vɛɛ: «I limaniyanin Mɔɔnivin Tanin ma?»
36A do ka Isa javi, a vɛɛ: «Ǹ Kuntii, jene wo le? I y'a jiya ǹ na fɔsa ǹ'i limaniya a ma.»
37Isa vɛɛ a yɛ: «I ɲa vɛ la a kan. Ale le yi kumala i fɛ yi ne.»
38Kɛ́ do vɛɛ: «Ǹ Kuntii, m̀'ɛ limaniya.» A do k'i majii Isa kɔlɔ ka a bato.
39Isa do vɛɛ: «Ǹ nanin dunuɲa kititɛɛko le lɔ, fɔsa ɲagbɛlu ɲa la yi ka ani yenikɛbalu ɲa yi gbɛ.»
40Falisi dɔlu ka to Isa dafɛ ka kuma wo mɛn. Ai do vɛɛ a yɛ: «A yi di? Ǹu fana yi ɲagbɛ le le?»
41Isa k'ai javi, a vɛɛ: «Ni ài tɛɛ vɛ kɛla ɲagbɛ le, julumbu tɛɛ tɛnala kɛla ài ma. Kɛɛ komi ài vɛɛ ko ài yi yeni kɛla, wo le n'a kɛla, julumbu tonin ài ma.»
Jelenleg kiválasztva:
Yohana 9: MBT2023
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Manya Bible Translation, © SIM International, 2023
