Yohana 5

Isa ka falifaamatɔ dɔ lakɛnɛya teme

1Wo kɔ, Isa ka taa Jelusalɛmu ka bɛn Jahudiyalu ya selibɔlon dɔ ma. 2Dala ba dɔ yi Jelusalɛmu, Saalu Donda dafɛ, ai y'a fɔla min ma Hebulukan nɔ ko Betizada, ado bolon loolu le yi dala wo laminin nɔ. 3Jangalotɔ siyama lanin tɛɛ bolon wolu kɔlɔ, ɲagbɛlu o, namalanilu o, ani falifaamatɔlu. 4[Ai tɛɛ ji lamaamaa waate le makɔnɔna. Kamasɔlɔn waate dɔlu lɔ, Ala ya mɛlɛka dɔ tɛɛ jiila dala wo lɔ k'a ji lamaamaa. Wo tɛɛ vɛ kɛla, jangalotɔ min tɛɛ vɛ jiila dala wo lɔ kunfɔlɔ le, wo tii tɛɛ kɛnɛyale, hali jangalo suu suu tɛɛ kɛ a la.] 5Kɛ́ dɔ tɛɛ je, min tɛɛ vɛ san bisawa ni sein (38) kɛ jangalo lɔ. 6Isa ka kɛ́ wo lanin ye mingɛ k'a lɔn a tɛɛ vɛ mɛn jangalo lɔ, a k'a maɲininga, a vɛɛ: «I y'a fɛ i yi kɛnɛya?»

7A do ka Isa javi, a vɛɛ: «Ǹ Kuntii, mɔɔ tɛ m̀ bolo min yi m̀ madɛmɛn ka ǹ lajii dala lɔ ji lamaamaa waate. M̀'ɛ a fɔla ǹ'i jii a lɔ kotan, mɔɔ gbɛlɛ le yi jiila ǹ ɲa.»

8Isa do vɛɛ a yɛ: «I wuli, i iya dɛvɛ ta ka taama.» 9Kɛ́ do ka kɛnɛya telemanin. Wo kɛ, a k'i wuli ka aa dɛvɛ ta ka taama damina.

Isa ka wo kɛ Nɔningɛlon ne. 10Wo kɛ, Jahudiya kuntiilu k'a fɔ kɛ́ lakɛnɛyanin wo yɛ, ai vɛɛ: «Nɔningɛlon ne bi! Wo ma, a ladaannin tɛ k'a fɔ i iya dɛvɛ ta i bolo ten.»

11Kɛ́ do k'ai javi, a vɛɛ: «Kɛ́ min na ǹ lakɛnɛyala, wo le n'a fɔla ǹ yɛ, a vɛɛ: ‹I iya dɛvɛ ta, i yi taama.› »

12Ai do k'a maɲininga wo lɔ, ai vɛɛ: «Kɛ́ jene yi wo le, min n'a fɔla i yɛ ko i iya dɛvɛ ta ka taama?»

13Kɛɛ kɛ́ tɛɛ m'a lɔn mɔɔ kelen min n'a lakɛnɛyala, kamasɔlɔn Isa tɛɛ vɛ tunun jama wo tɛma.

14Wo kɔ, Isa ka taa kɛ́ wo talan lɔhɔlɔmabonba luu kɔnɔ k'a fɔ a yɛ, a vɛɛ: «A ye, i la vɛ kɛnɛya yi ne. I do kà kɛ julumbutaba le butu, niwotɛ kokɛwon dɔ yi kɛle i la min yi timin a kunfɔlɔ ta la.»

15Kɛ́ wo vɛ taala k'a fɔ Jahudiya kuntiilu yɛ ko Isa le na a lakɛnɛyala. 16Wo le k'a kɛ, ai ka Isa lagbeyaɲɛ damina, kamasɔlɔn a deinin tɛɛ ko suu wolu kɛla Nɔningɛlon ne la. 17Kɛɛ Isa k'ai javi, a vɛɛ: «Ǹ Fa yi baalela hali bi, ani ǹe gbu yi baalela.»

18Ka bɛn kuma wo ma, Jahudiya kuntiilu tɛɛ Isa faako ɲaɲininna ka timin a kunfɔlɔ ta la. Nɔningɛlon laana tiɲako tɛɛ tɛ dein, kɛɛ a tɛɛ a fɔla kɔtunun Ala ma ko a Fa, k'a jɛlɛ lɔkaɲa Ala ma wo lɔ.

Isa ya seetiiya

19Wo lɔ, Isa k'a fɔ ai yɛ, a vɛɛ: «Ǹ'i tuɲa fɔ ài yɛ, Denkɛ tɛ se foi kɛla a jɛlɛ ma, mafɔ a v'a Fa yena min kɛla dein. Kamasɔlɔn Fa yi ko ko si kɛla, a Denkɛ fana yi wo ɲɔɔzii le kɛla. 20Kamasɔlɔn Denkɛ ya ko diyanin a Fa yɛ. Wo le y'a ma, wo yi ko ko si kɛla, a yi wo bɛ le jiyala a Denkɛ la. A do kɛtɔ ko gbɛlɛlu jiyala wo la ai kɛko lɔ minu buɲanin dɔ wolu le, fɔsa ài yi kawakoya. 21Kamasɔlɔn Fa yi fulenilu lawulila ka niimaya di ai ma teme, wo boloɲa kelen ma, a Denkɛ yi niimaya dila mɔɔlu ma, minu vɛ a diyala. 22K'a dɔ la wo kɔkan, Fa tɛ mɔɔ foi ya kiti tɛɛla, kamasɔlɔn a na kitiko bɛ tola a Denkɛ le bolo, 23fɔsa bɛ yi Denkɛ buɲa iwo ai y'a Fa buɲala teme. Ni mɔɔ min ma Denkɛ buɲa, wo tii tɛ a Fa fana buɲala min na wo kelayala.»

24«Ǹ'i tuɲa fɔ ài yɛ, ni mɔɔ mɔɔ ka ǹ kumakan mɛn ka limaniya ǹ kelaba ma, niimaya banbali yi wo tii le yɛ. Kiti tɛnala bilala wo tii la, kɛɛ a do vɛ bɔ saya lɔ ka don niimaya lɔ. 25Ǹ'i tuɲa fɔ ài yɛ, waate dɔ sentɔ, a do vɛ se butu, fulenilu kɛtɔ Ala Denkɛ kumakan mɛnna, ado minu vɛ a kumakan mɛnna, wolu le kɛtɔ niimaya kɛla. 26Kamasɔlɔn Fa yi niimayatii le teme, a v'a Denkɛ kɛ niimayatii le wo boloɲa kelen ne ma. 27A do na kititɛɛ seetiiya dila a ma, kamasɔlɔn ale le Mɔɔnivin Tanin ne. 28-29Ài kà kawakoya wo lɔ, kamasɔlɔn waate dɔ sentɔ, fulenilu kɛtɔ a kumakan mɛnna, k'i wuli ka bɔ aiya kabululu lɔ. Mɔɔ minu na kokeinnu kɛla, wolu kɛtɔ ai wulila ka niimaya banbali le sɔlɔn, ani minu na koyonnu kɛla, wolu kɛtɔ ai wulila ka kolatɔn ne sɔlɔn.»

Isa ya selelu

30«Ǹ tɛ se foi kɛla ǹ jɛlɛ ma. Ǹ'i min mɛnna, ǹ'i kiti tɛɛla ka bɛn wo le ma. Wo le y'a ma, ǹa kiti telenyine, kamasɔlɔn ǹ tɛ ǹe gbu sawonanko ɲaɲininna, mafɔ ǹ kelaba sawonanko. 31Ni ǹ ka seleya di ka bɛn ǹe gbu ma, ǹa seleya tɛnala jatela tuɲa le. 32Kɛɛ a dɔgbɛlɛ yi je min yi seleya dila ka bɛn m̀ ma. Ǹe do k'a lɔn ne ko wo ya seleyakan ka bɛn m̀ ma, wo yi tuɲa le le. 33#Yohana 1.19-27; 3.27-30.Ài na mɔɔ dɔlu kelayala Makolikɛba Yaya ma. A na seleya min dila ka bɛn m̀ ma, wo yi tuɲa le le. 34Ǹ tɛ adamadennu ya seleyakan ɲininna ka bɛn ǹe gbu ma, kɛɛ ǹ'i minu fɔla yi ne, fɔsa ài yi kisi. 35Yaya tɛɛ fitina le le min tɛɛ mɛnɛnna gbesekele. Ài do ka diɲa ka waateni kɛ sawala aa kɛnɛya lɔ. 36Kɛɛ seleya vɛ m̀ bolo min buɲanin vɛ Yaya ta le. Kamasɔlɔn ǹ Fa na baale minu dila m̀ ma k'ai dafa, ǹ'i wolu gbugbu le kɛla yi ne. Wolu le yi seleya dila ka bɛn m̀ ma, ko ǹ Fa le na ǹ kelayala. 37#Matiyu 3.17; Malɛkɛ 1.11; Luka 3.22.Ado ǹ Fa min na ǹ kelayala, wo gbu yi seleya dila ka bɛn m̀ ma. Kɛɛ ài do ma a kan mɛn ba, kumatɛ ka a ɲakɔlɔla ye. 38A kumakan sawatinin tɛ ài josokun nɔ, kamasɔlɔn a na mɔɔ min kelayala, ài ma limaniya wo tii ma. 39Ài yi kitabulu mafɛlɛnna kosɛvɛ, kamasɔlɔn a ài kɔnɔ ko ài kɛtɔ niimaya banbali sɔlɔnna wolu le fɛ, k'a talan kitabu wolu gbu le yi seleya dila ka bɛn m̀ ma. 40Ài do tɛ diɲala ka na m̀ ma fɔsa ài yi niimaya sɔlɔn.

41«Ǹ tɛ adamadennu ya magbiliyali ɲininna. 42Kamasɔlɔn ǹ k'ài lɔn ko Ala ya kanundeya tɛ ài josokun nɔ. 43Ǹ nanin ǹ Fa tɔɔ le lɔ, kɛɛ ài do ma diɲa k'ài bolo sii ǹ kɔlɔ. Ni a dɔgbɛlɛ ka na a jɛlɛkanu tɔɔ lɔ, ài kɛtɔ ài bolo siila wo tii kɔlɔ. 44Ài yi se limaniyala di, k'a talan ài yi magbiliyali ɲininna i ɲɔɔ fɛ, kɛɛ ài do tɛ magbiliyali wo ɲininna min yi bɔla Ala kelenpesa fɛ? 45Ài k'ài mili ko ǹe gbu le kɛtɔ ài jalakila ǹ Fa ɲakɔlɔ. Mɔɔ min kɛtɔ ài jalakila, wo tii le Nabi Musa le, ài jei siinin min na. 46Ni ài tɛɛ vɛ lala Nabi Musa la, ài tɛɛ lale ǹe fana la, kamasɔlɔn ale le na sɛvɛla ka bɛn m̀ ma aa Taulati lɔ. 47Ni do ài ma la aa sɛvɛli wolu la, ài kɛtɔ lala ǹ kumakannu la di wo lɔ?»

Jelenleg kiválasztva:

Yohana 5: MBT2023

Kiemelés

Megosztás

Másolás