Yohana 3

Isa ni Nikodɛmu

1Kɛ́ dɔ tɛɛ je, min tɔɔ tɛɛ ko Nikodɛmu. A tɛɛ Jahudiyalu ya jama ɲamɔɔ dɔ le le, ai y'a fɔla minu ma ko Falisilu. 2Lon dɔ, a ka taa Isa fɛlɔ su lɔ k'a fɔ a yɛ, a vɛɛ: «Kalanmɔɔ, mɔ k'a lɔn Ala le n'i kelayala mɔɔlu kalanko lɔ, kamasɔlɔn mɔɔ foi tɛ se iya kawananko minu ɲɔɔzii kɛla, ni Ala ma kɛ mɔɔ min fɛ.»

3Isa k'a javi, a vɛɛ: «Ǹ'i tuɲa fɔ i yɛ, ni mɔɔ min ma sɔlɔn kula kɛ, wo tii tɛ se Ala ya masaya yena.»

4Nikodɛmu vɛɛ: «Mɔɔ vɛ kɔlɔyala, a yi se sɔlɔnna kula kɛ di? Jalasa a yi sene seikɔla a ba kɔnɔlɔ ka sɔlɔn kula kɛ?»

5Isa k'a javi, a vɛɛ: «Ǹ'i tuɲa fɔ i yɛ, ni mɔɔ ma sɔlɔn kula kɛ ji ni Nii Sɛnɛyanin sabu la, a tɛ se donna Ala ya masaya lɔ. 6Falikolo yi falikolo le sɔlɔnna, kɛɛ mɔɔlu yi niimaya kula le sɔlɔnna Nii Sɛnɛyanin sabu la. 7Ǹ n'a fɔ mingɛla i yɛ: ‹Fɔ ài bɛ yi sɔlɔn kula kɛ›, wo k'i kawakoya. 8Fan min vɛ diyala fɔɲɛ yɛ, a yi bɔla wo le ja. I y'a mangan le mɛnna, kɛɛ i ma a bɔya lɔn, niwotɛ a taaya. Mɔɔ minu sɔlɔnnin Nii Sɛnɛyanin sabu la, wolu kɛnin ten ne.»

9Nikodɛmu do k'a maɲininga, a vɛɛ: «Ko wolu yi se kɛla di?»

10Isa k'a javi, a vɛɛ: «Ile min yi Bani Isilankalu ya kalanmɔɔ ba le, i ma ko minu lɔn? 11Ǹ'i tuɲa fɔ i yɛ, mɔ ka min lɔn, m'i wo le fɔla. Mɔ do na min yena, m'i wo le seleya dila. Kɛɛ ài tɛ ài bolo siila maa seleyakan kɔlɔ. 12Ǹ na dunuɲakolu fɔla ài yɛ, ài do ma limaniya wolu ma. Ni ǹ ka haijɛnɛkolu fɔ ài yɛ do, ài yi limaniyale wolu ma? 13Mɔɔ mɔɔ ma jɛlɛ ba bene ka taa haijɛnɛ fɔ Mɔɔnivin Tanin min jiinin ka bɔ je. 14Ado Nabi Musa na sa sawula lajɛlɛla kɔlɔman ma fuwa lɔ teme, fɔ Mɔɔnivin Tanin fana la yi jɛlɛ ten ne, 15fɔsa ni mɔɔ mɔɔ ka limaniya a ma, wo tii yi niimaya banbali sɔlɔn. 16Kamasɔlɔn Ala na dunuɲa kanula boloɲa min ne ma: A na a Denkɛ kelenpesa dila, fɔsa ni mɔɔ mɔɔ ka limaniya a ma, wo tii kana halaki, kɛɛ wo tii yi niimaya banbali sɔlɔn. 17Kamasɔlɔn Ala ma a Denkɛ kelaya dunuɲa kɔnɔ dunuɲa jobaliyako lɔ. Kɛɛ a na a kelayala dunuɲa lakisiko le lɔ a fɛ.

18«Ni mɔɔ min ka limaniya a ma, wo tii tɛ jobaliyala butu. Kɛɛ ni mɔɔ min do ma limaniya a ma, wo tii vɛ ban jobaliyala, kamasɔlɔn a ma limaniya Ala Denkɛ kelenpesa ma. 19Jobaliya wo kun ne min ne: Kɛnɛya vɛ na dunuɲa, kɛɛ divi le diyanin adamadennu yɛ ka timin kɛnɛya la, kamasɔlɔn ai kɛkolu le kɛwonyanin. 20Kamasɔlɔn mɔɔ min yi koyon kɛla, kɛnɛya le gbeyanin wo tii yɛ. A do tɛ diɲa ka na kɛnɛya lɔ, fɔsa a kɛkolu kana bɔ gbɛ la. 21Kɛɛ mɔɔ min do yi taamana tuɲandeya lɔ, wo tii yi diɲale ka na kɛnɛya lɔ, fɔsa a la yi gbɛ ko a a kɛkolu kɛla Ala ya kafonɲɔɔya le lɔ.»

Yaya ka seliya di ka bɛn Isa ma teme

22Wo kɔ, Isa ni a kɔbiladennu ka taa Jude koovi lɔ ka waate dana kɛ ai fɛ, a vɛ mɔɔlu makola kɔɔ kɔlɔ. 23Yaya fana tɛɛ mɔɔlu makola Enɔn, Salim so dafɛ, kamasɔlɔn ji ba tɛɛ wo le ja. Mɔɔlu tɛɛ nala Yaya ma ko a ai mako. 24#Matiyu 14.3; Malɛkɛ 6.17; Luka 3.19, 20.Wo k'a talan, ai tɛɛ ma Yaya bila ba kaso la bene.

25Lon dɔ, sɔsɔyali dɔ k'a wuli Yaya kɔbiladen dɔlu ni Jahudiya kɛ́ dɔ wotɛ ka bɛn diina ya sɛnɛya laana ma. 26Ai do ka taa Yaya fɛlɔ k'a fɔ a yɛ, ai vɛɛ: «Kalanmɔɔ, ile ni kɛ́ min tɛɛ i ɲɔɔ fɛ Julidɛn kɔɔ kɔma, i na seleya dila ka bɛn min ma, wo le yi mɔɔlu makola yi ne, bɛ do yi taala a kɔ.»

27Yaya k'ai javi, a vɛɛ: «Mɔɔ tɛ se foi sɔlɔnna ni Ala ma min di i ma. 28#Yohana 1.20.Ǹ tɛɛ a fɔ mingɛla ko: ‹Ǹe tɛ Masa Tɔɔmasenin ne, kɛɛ ǹ kelayayine a ɲa›, àilu gbu le m̀ masele le ka bɛn wo ma. 29Kɔɲɛmoso yi kɔɲɛfa ta le le. Kɔɲɛfa tɔva y'i lɔla a dafɛ, a tolomalɔnin vɛ a la, a vɛ kɔɲɛfa kan mɛnna, a kɔnɔlɔ yi diyala kosɛvɛ. Wo sawa ɲɔɔzii le yi ǹ na, a do da vɛ fa. 30Fɔ aa buɲa ma yi kafon, ǹe ta yi dɔɔya.»

Mɔɔ min bɔnin haijɛnɛ

31Mɔɔ min bɔnin Ala fɛlɔ, wo tii le yi fen bɛ kunna. Kɛɛ mɔɔ min sɔlɔnnin dunuɲa, wo tii yi dunuɲa ta le le, a do yi dunuɲakolu le fɔla. Min do bɔnin haijɛnɛ, wo tii le yi fen bɛ kunna. 32A na min yena ani k'a mɛn, a yi wo le seleya dila, kɛɛ mɔɔ foi tɛ a bolo siila aa seleyakan kɔlɔ. 33Ni mɔɔ min do k'a bolo sii aa seleyakan kɔlɔ, wo tii v'a jiya ko Ala le tuɲande le. 34Ala na mɔɔ min kelayala, wo le yi Ala kumakannu lasena, kamasɔlɔn Ala yi Nii Sɛnɛyanin dila a ma bɛlɛbɛlɛ kɛ. 35#Matiyu 11.27; Luka 10.22.Fa y'a Denkɛ kanula. A do vɛ fen bɛ bila a fanga kɔlɔ. 36Mɔɔ min vɛ limaniyala a Denkɛ ma, niimaya banbali yi wo tii le yɛ. Kɛɛ ni mɔɔ min k'i ban a Denkɛ lɔ, wo tii tɛnala niimaya sɔlɔnna, mafɔ a yi tole Ala ya mɔnɛya kɔlɔ kudein.

Jelenleg kiválasztva:

Yohana 3: MBT2023

Kiemelés

Megosztás

Másolás