KEJADIN 6
6
Manusia seh jahatna
1Sanga manusia reh teremna i doni, ipupusna pe nterem anak diberu. 2Si e kerina i idah anak-anak Dibata, janah mejile akapna, e maka iempoina siapai atena ngena. 3Nina TUHAN, “La Kupelepas manusia nggeluh rasa lalap, sabap ia biak si ermasap-masap. E maka mulai genduari nari ia nggeluh la lebih 120 tahun.”
4I bas jaman e ras jaman kenca si e pe lit jelma si seh kal gedang mbelinna, e me kesusuren manusia diberu, si erjabu ras anak-anak Dibata. Sinursur kalak enda me jadi kalak si terberita mbisa i bas paksa si e. #Bil 13:33
5Asum idah TUHAN kuga jahatna manusia ndai i doni, janah kuga macikna perukurenna katawari pe, #Mat 24:37; Luk 17:26; 1Pet 3:20 6e maka erkadiola IA njadiken manusia ras namakenca i doni enda. Perbahan erkadiola kal IA 7e maka nina TUHAN, “Kusasapkenlah manusia si enggo Kujadiken e, bage pe kerina rubia-rubia ras perik-perik, sabap erkadiola Aku njadikenca kerina.” 8Tapi Nuah ngena ate TUHAN.
Nuah
9-10Enda me turin-turin kerna si Nuah. Lit telu anak dilaki ipupusna, e me: Sem, Ham, ras Japet. I bas jamanna Nuah ngenca si mehuli, janah la lit kesalahenna. Ia erdalan i bas dalan Dibata, #2Pet 2:5 11tapi kerina kalak si deban tuhu-tuhu jahat i lebe-lebe Dibata, janah i japa pe terjadi kejahaten. 12Itatap Dibata doni enda, janah idahNa kejahaten kerina i je, sabap manusia kerina enggo mbau lagu langkahna. 13Nina Dibata man Nuah, “Enggo Kutetapken maka Kusasapken me kerina manusia. Kukernepken ia kerina, erkiteken doni enda enggo dem alu kejahaten manusia. 14Bahanlah sada kapal man bandu i bas kayu si nteguh nari. Bahan kamar-kamarna janah lapisi alu ter arah bas ras arah darat. 15Bagenda bahan kam ukurenna: gedangna 150 meter, belangna 25 meter, ganjangna 15 meter. 16Bahanlah tarumna setengah meter ganjangna i babo dingdingna nari. Kapal e ertingkat telu i bas, janah tama sada pintunna i bas sada dingding.
17Kuban ateKu banjir si mbelin i doni enda, gelah kernep kerina si nggeluh. Kasa kai si lit enda la banci la mate kerina, 18tapi ateKu erbahan sada perpadanen ras kam. Bengketlah kam ku bas kapal ras ndeharandu, anak-anakndu, bage pe ras permainndu. 19-20Tamaken ku bas kapal e sada pasang i bas tep-tep erbage rubia-rubia ras tep-tep erbage perik-perik gelah ola keri mate. 21Tamaken ku bas kapal e kerina erbage pangan man bandu ras man rubia-rubia ras man perik e.” 22Ilakoken Nuah kerina kai si iperentahken Dibata man bana. #Heb 11:7
Jelenleg kiválasztva:
KEJADIN 6: BTX
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Batak Karo Bible © Indonesian Bible Society, 2003.
