KEJADIN 4
4
Kain ras Abil
1Kenca bage ersada kula Adam ras ndeharana, e maka mehuli kula ndeharana ndai. Ipupusna sekalak anak dilaki, e maka nina, “Arah penampat TUHAN enggo dat aku sada anak dilaki.” E maka ibahanna gelarna Kain. 2Kenca si e tubuh ka Abil, agi Kain. Abil jadi permakan biri-biri, tapi Kain jadi perjuma. 3Kenca piga-piga dekah ipersembahken Kain man TUHAN sada bagin ulih jumana. 4Abil pe bage ka. E maka igelehna anak biri-biri si pemenana tubuh, jenari ipersembahkenna bagin-bagin si mehulina man TUHAN. Ngenan ate TUHAN man Abil ras persembahenna, #Heb 11:4 5tapi Kain ras persembahenna la ialoken TUHAN. E maka merawa ia, jutjut ayona perbahan nembehna atena. 6Nina TUHAN man Kain, “Engkai maka kam merawa? Engkai kam jutjut? 7Adi mehuli perbahanenndu, tentu cirem kam. Tapi erkiteken perbahanenndu jahat, dosa ngerimrim i lebe-lebe pintun. Ikuasaina atena kam, tapi kam arus naluken ia.”
8Nina Kain man seninana Abil, “Ota ku juma kita.” Seh kenca i juma erkusur Kain ngelawan Abil, jenari ibunuhna. #Mat 23:35; Luk 11:51; 1Joh 3:12 9Isungkun TUHAN Kain nina, “I ja agindu si Abil?”
Nina Kain erjabap, “La kueteh. Aku kin si njagai agingku?”
10Nina TUHAN ka, “Engkai maka bage jahatna perbahanenndu? Dareh agindu serko man bangKu i bas taneh nari. #Heb 12:24 11Kena sumpah kam janah lanai banci iperjumaindu taneh enda. Enggo litap taneh enda erkite-kiteken dareh seninandu, tempa-tempa nganga ia ngaloken dareh seninandu sanga ia ibunuhndu. 12Adi iperjumaindu taneh e, kai pe la lit ulihna; janah kam jadi kalak si mampa-mampa i babo doni enda.”
13Nina Kain man TUHAN, “La aku ngasup maba ukumen si bage beratna. 14IpelawesNdu aku ibas taneh enda nari, ndauh i bas adep-adepenNdu nari. Aku jadi kalak perlajang i babo doni enda, janah adi jumpa aku ras kalak la banci lang ibunuhna aku.”
15Tapi erjabap TUHAN nina, “Labo! Adi ibunuh kalak kam, pitu kalak ibunuh jadi balasna.” E maka ibahan TUHAN tanda i bas Kain, gelah adi jumpa gia ia ras kalak si deban, la ia ibunuhna.
16Lawes Kain i bas adep-adepen TUHAN nari, jenari ringan ia i negeri Nod arah Timur Eden.
Sinursur Kain
17Ndehara Kain mupus sekalak anak dilaki, janah Enoh ibahanna gelarna. Kenca bage ipanteki Kain sada kuta, ibahanna gelarna Enoh sue ras gelar anakna. 18Anak Enoh lit ka sada, Irad gelarna, e me kap bapa Mehuel, janah anak Mehuel e me kap Metusael, bapa Lameh. 19Lameh ndai dua ndeharana, e me kap Ada ras Sila. 20Arah si Ada tubuh Jabal; ia me kap nini kalak si nggeluh i bas kemah si dahinna ngasuhi rubia-rubia. 21Agi Jabal e me kap Jubal, nini kalak perkulcapi ras penarune. 22Arah si Sila tubuh Tubal Kain nini kalak pande tembaga ras pande besi. Gelar turang Tubal Kain e me kap Naama.
23Nina Lameh man ndeharana si dua ndai, “O Ada ras Sila, begikenlah. Enggo kubunuh sekalak dilaki erkiteken ilukaina aku, janah sekalak anak perana erkiteken ipek-pekna aku.
24Adi man kalak si munuh Kain pitu kalak ibunuh jadi balasna, maka man kalak si munuh aku pitu puluh pitu kalak ibunuh.”
Set ras Enos
25Ndehara Adam mupus sekalak nari anak dilaki. Nina ndehara Adam, “Enggo ibereken Dibata bangku sekalak anak dilaki ganti Abel si enggo ibunuh Kain.” E maka ibahanna gelarna Set. 26Set lit ka sekalak anakna dilaki, Enos ibahanna gelarna. Ibas paksa e mulai me kalak erlebuh nandangi gelar TUHAN i bas kebaktin.
Jelenleg kiválasztva:
KEJADIN 4: BTX
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Batak Karo Bible © Indonesian Bible Society, 2003.
