Malikɔ 4
4
Kisimo kye mobyachi we tumuka
(Mat 13:1-9; Luk 8:4-8)
1Yɛsu wabangoa kabee koeyecha mɔ mɔkɔngɛ we kichibachiba kye Kalilaya, ndongo yee bando na komokombea. Ko boa awɛ na kwingea mo bwato na kuchikaa moa monda.Bwato bwabɛchaya mu kichibachiba ne bando babɛchaya mo nganda. 2Yɛsu na kobaeyecha makomo mabua mu bisimo. Awɛ na kobasaolea bobo mu bia bisimo: 3«Mwiyungweeche! Ɔmɔ mondo wayaka kwabyae tumuka. 4Abɛchaya awɛ mo kobyaa mwisio, tɔmɔchi na kokea mɔsɛɛsɛ mwe njea, tɔnyɔnyi na kotolya. 5Tukinɛ na kokeea mo ndanda ataasi matɛkɛ mabua. Tumuka toa na kɔtɔa chaa chaa kɔ kɔmɔa ndeaba matɛkɛ mabua. 6Alakini achaka chooba, na kututumba, kɔ kɔmɔa ndetwaingecha michi, atwo na kooma. 7Tukinɛ na kokea mwingya mɛkɛɛ. Elya mɛkɛɛ kɔtɔa na kɔtɔyɔta nato ndetwaɔcha keemo. 8Alakini tukinɛ tumuka na kokeela mo matɛkɛ maachi, atwo na kɔtɔa, na kutunga na kobota bimuka: tɔmɔchi na kobota bichɛngɛ makumi masato masato, tukinɛ makumi motoba motoba ne tukinɛ lokama lokama.»
9Kusia Yɛsu na kobasaolea: «Oe ne matwe me kuungwa uungwe!»
Ko booni kɔtɔɔcha Yɛsu mu bisimo
(Mat 13:10-17; Luk 8:9-10)
10Abechaya Baeyechwa ikumi ne babee ba Yɛsu kɔmɔɔsa ne bando babɛchaya mɔsɛɛsɛ mwaakɛ abɛchaya abɔ ikɛɛsa, na komobocha obasaolee bitɔɔcha bibyɔ bisimo. 11Yɛsu na kobasaolea: «Banu ne basoenoka kocheba byaisama bye boombe bwa Kakua. Alakini bakinɛ bando bae anjɛ yee ketongo kinu abɔ batuungwa makomo masɛ koetea bisimo, 12kɔ kɔmɔa
‹Balɔlɛ alakini baamɔaya,
na abɔ baungwe alakini baachebaya,
kɔ kɔmɔa bangaba mɔ kɔmɔa ne kocheba,
bingatuulukea Kakua.
Na awɛ ungabaungwea lokwa.›»#4:12 Yɔɔla Isa 6:9-10.
Yɛsu ususingeecha kisimo kye mobyachi wa tumuka
(Mat 13:18-23; Luk 8:11-15)
13Kusia Yɛsu na koseboa kobasaolea: «Ingɛ ndemwaungwa bitɔɔcha keke kisimo, booni botaungwe banu bikinɛ bisimo? 14Mobyachi otobyaa Ikomo lya Kakua. 15A iboa akea tɔtɔ tumuka mɔsɛɛsɛ mwe njea, byaeyana ne bando baanga kuungwa Ikomo lya Kakua, alakini akaɛ alya Isombo na koba kwatose lea Ikomo lyabyaiwa monda mwabɔ. 16Ne twakea mo ndanda, totoeyana ne bando baanga kuungwa Ikomo lya Kakua ne kuliimenya ne kɛmɛmɔ, 17Alakini letochama monda mwabɔ boe michi; bae mu kulibunda ko kyaanya kɛkɛɛkɛ bokata, kɔmɔa atoolea tɔngɔnjɔ ne mayombe ko mbanga yee Ikomo lya Kakua, akaɛ alya ne basɔlɛkɛa iekekeo. 18Na toa tokee mɔ mɛkɛɛ, totoeyana ne bando batuungwa Ikomo lya Kakua, 19alakini mayombe me oono mɔsɛngɛ, kulingwa ne byɛndɔ, ne kokonda biemo biisɛ biswingea monda mwabɔ ne kukungunyeka lea Ikomo lya Kakua lee monda mwabɔ ne kulichibea biochaya bimuka. 20Na toa tokeechi mo matɛkɛ maachi, totoeyana ne bando baanga kuungwa Ikomo lya Kakua ne kɔlɛsɛkɛa. Abɔ batobota bimuka: bamɔchi bimuka makomi masato masato, bakinɛ makomi motoba motoba ne bakinɛ lokama lokama.»
Kisimo kyɛ kyɛɛngɛ
(Luk 8:16-18)
21Kɔmɔngɔ Yɛsu na kobasaolea: «Mondo otokoka kobesa kyɛɛngɛ ne kokebwekea kose kwe kembaka ɔbɛɛ kokebeka kose kwe kyandwa? Kuusi, otowaena ne kɔtɛcha ko kakoekelwa! 22Na bɔbɔ kuusi kitwisekiwa ketaasi kekabooliwe, ne ikomo lɛsɛ litwisekwa letabooliwe paa paa. 23Oe ne matwe me kuungwa, uungwe!»
24Yɛsu na koseboa kobasaolea: «Makomo matuungwa banu, mɔmalɔlɛ byaachi! kɔmɔa, botoketea banu bakinɛ, Kakua otabaketee, ne kobakandekea koeta. 25Kɔmɔa oe ne keemo ne otokondoea abɔ kikinɛ; alakini otaasi ne keemo, batamobakoe naanga na kea kitwiwaenya naakɛ.»
Kisimo kye tumuka twaitɔɛa
26Yɛsu na kosebua kɔɔcha: «Boombe bwa Kakua botoeyana ne mondo ɔmɔchi wabyaa tumuka mwisio lyaakɛ. 27Lusu ku lusu wakyesaya ne kobyoka, tumuka na kokoaya na kutunga. Alakini ndaacheba booni bwatɔa tumuka. 28Mochebe itɛ matɛkɛ mɛɛnɛ ne matɔtɔya mobyao: kombaa bisasi, kɔmɔngɔ bichɛngɛ, kusia ngano na chisutunga monda mwe bichɛngɛ. 29Alya atɔɛla ngano, mondo utuchibɛmbɛ, kɔmɔa ne kyaanya kye kokaula kesoolea.»
Kisimo kye kamuka kakɛɛkɛ ke alalali
(Mat 13:31-32,34; Luk 13:18-19)
30Yɛsu na kɔɔcha kabee: «Toeyanekye boombe bwa Kakua na eke? Ɔbɛɛ toowaenye ne keke kisimo? 31Bobo boombe botoeyana ne kamuka ke alalali. Kaka kamuka kae nɛ kɔɔma byatɔba koetea tumuka tɔɔsɛ totobyalwa mɔ mɔsɛngɛ. 32Alakini, kasobyalwa, katɔtɔa na koongwa kyanaka koeta mebyao ɛɛsɛ. Katoocha metabe ya yanaka naa nɛ tɔnyɔnyi tɔtɔsɛnga makɛɛsa mabɔ mo nganda kyaakɛ.»
33Yɛsu waeyecha bando mu bisimo byabua bye ona mutindɔ koengama ne bwakoka abɔ kubyungwa. 34Ndaɔcha nabɔ kotasi kɔtɛcha kisimo, alakini abɛchaya awɛ ne baeyechwa bakɛ wabasaoleaya makomo masɛ paa paa.
Yɛsu osokɔbɔa lɔɔbɛ
(Mat 8:23-27; Luk 8:22-25)
35Ne aolea kyɔlwa kye lwakaɛ loa lusu, Yɛsu na kosaolea baeyechwa bakɛ: «Toaboke mbanga yee kichibachiba.»
36Kɔ bɔbɔ baeyechwa na kolaa ndongo yee bando, na kwingea mo bwato mwabɛchaya Yɛsu, na kotoka naakɛ kɔmɔɔsa. Ne kusindekechwa ne chikinɛ bwato. 37Akaɛ alya lɔbɛ lwachoa na kobabanga, bibumba bye maache na kobangoa kobaingela monda mwe Bwato, maache na koenga kochaa. 38Mo kea kyanya, Yɛsu awɛ wabɛchaya losa lwe kɔmɔngɔ kwe bwato mɔ kɔkyɛsɛa bwɛyamɛɔ. Baeyechwa bakɛ na komobyosa na komosaolea: «Mweyechi, nduusi ne keangaa kɔ kɔmɔa tungakwa?»
39Yɛsu na kobyoka, na kokandokea loa lɔbɛ ne kosaolea kichibachiba: «Nyamea! Kɔbɔka!» Akaɛ alya loa lɔbɛ na kɔbɔnga na koongwa nyaa. 40Kusia Yɛsu na kobabocha baeyechwa bakɛ: «Ko eke kototena banu? Ne moe leno muunaimenya?»
41Alakini baeyechwa na kotena bokoo bokoo, abɔ na kobangoa kobochana: «Oona ne moke mondo, naa nɛ lɔbɛ ne kichibachiba bitumuungwa?»
Jelenleg kiválasztva:
Malikɔ 4: ZMB
Kiemelés
Megosztás
Másolás
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fhu.png&w=128&q=75)
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©2022 Seed Company in coordination with Forum Communautaire des Traducteurs de la Bible et Alphabétisation