maṯa 6

asa 6

ḏiḏəḏo dun diro nyɩkwom

1jil muma nya late laṯape ŋuɽuna ŋalo ŋun ŋiŋir gi jei ganu jeḏi liji kani ŋajilaŋu no; gi gwune ḏa nyalmarre dino nya late ləṯi ḏɩbona ḏi baba gwalo gwun gwaṯɩje kanyin no.

2na ŋiro dino ḏa ŋaməḏəḏə liji ŋɩdio lun late ləṯi ŋɩdio no, aṯaŋadərəjo luba kɩɽelo no liro gi liji lun ləṯi ŋuɽuna ganu ŋɩttən laṯarre gi lɩdunu leḏi elo na gi daṯ kani al liji buḏi. gwerkwe ganu nyi gweiceijɩno, luŋa lɩmape ḏɩbona ḏagin. 3namɩni, ḏa ŋa mar gwəḏəḏə ŋɩdio, aṯaŋouwɩrico ḏi ḏuŋa ḏun ḏiro ḏouwɩr ḏalɩŋe ŋɩru ŋun ŋaṯɩl ḏi ape ḏun ḏiro ḏiŋir no, 4kani a ḏiḏəḏo ḏuŋa ŋwulbiḏɩni, na baba gwuŋa gwun gwaṯaŋu ŋuɽuna ŋun ŋɩlɩbo gwaŋawəɽijo ŋɩdio.

ḏuməḏɩjo eloŋu nyɩkwom

5na ḏa ŋamuməḏɩjo eloŋu, ŋa gwo gwaro gi liji lun ləṯi ŋuɽuna ganu ŋɩttən, gi gwune ləmɩnyu laṯuməḏɩjo eloŋu naldiɽi gi lɩdunu leḏi elo na gi daṯ de dɩmalɩḏo ganu kani ai liji aŋu. gwerkwe ganu nyi gweiceijɩno, luŋa lɩmape ḏɩbona ḏagin. 6namɩni ḏa ŋamuməḏɩjo eloŋu, ŋəḏi gidano gwe na gwune ŋalaŋɩṯi ouwɩr yuŋa, ŋuməḏɩjo babaŋ gwuŋa gwun gwaṯɩlɩbe; na baba gwuŋa gwun gwaṯaŋu ŋuɽuna ŋun ŋɩlɩbo gwaŋawəɽɩjo ŋɩdio.

7namɩni ḏa ŋamuməḏɩjo eloŋu aṯawouwəɽeico ŋuɽuna kworo ganu no gi liji lun liro ga dino no, gi gwune luŋa laṯuməḏɩni nalarno lal elo deŋɩnejo ŋuɽuna ŋagin ŋun ŋutu. 8nya lo laro gi luŋa, gi gwune baba gwalo gwilɩŋiḏi ŋun ŋɩbunyanyalo gwerre gwate mənyuməḏɩjo no.

ḏuməḏɩjo eloŋu ŋuɽun ye ŋaŋijɩlo yecu

lk. 11:2-4

9na uməḏɩjil eloŋu dino,

baba gwəri gwun gwaṯɩje kanyin,

ouwɩrico jiri juŋa a liji nəji jɩpido pɽul,

10na ŋele ŋuŋa wila

na ŋuɽun ŋuŋa ŋədujini kɩḏilio

gi gwune ŋandujini kanyin.

11ḏəḏije gia gwunne;

12na ŋijiḏuḏɩjo ŋuɽun ganu ŋun ŋɩki,

gi gwune lɩmananiḏuḏɩjo ŋuɽun ganu ŋun

ŋɩki ŋun ŋaṯijil liji ərrɩjo lagəri;

13aṯijəḏɩjo ŋuɽun ŋe ḏɩḏeijo no,

nijimɩni əbɩri ŋuɽun ganu ŋun ŋɩki.

gi gwune əṯo ŋəlɩnya na ŋɩma na ḏoɽeḏa bubruṯ, gwerkwe.

14gi gwune ḏa ŋa maḏuḏɩjo liji ŋuɽun ganu ŋagin ŋun ŋɩki na ŋajɩn baba gwalo ḏuḏɩjo ganu dino gwun gwaṯɩje kanyin, 15namɩni ḏa ŋate ŋɩmanyaniḏuḏɩjo liji ganu ŋagin ŋun ŋɩki no, ŋate ŋajɩn baba gwalo ḏuḏɩjo ganu dino no.

ḏɩməṯo əbuṯo

16na ḏa nyalməməṯo əbuṯo, nyakeḏa gijei ganu gi liji lun ləṯi ŋuɽuna ganu ŋɩttən no, gi gwune lɩmake gi jei ganu jagin kan al liji lɩŋe lɩməṯi əbuṯo. gwerkwe ganu nyi gweiceijɩno luŋa lɩmape ḏɩbona ḏagin. 17namɩni ŋa, na ḏa ŋa məməṯo əbuṯo wɩrɩṯi lɽa luŋa na gawei jei juŋa, 18kani ŋate ŋaŋinijo liji ḏiməṯo əbuṯo no, namɩni baba gwuŋa gwun gwaṯɩlɩbe, na baba gwuŋa gwun gwaṯaŋu ŋun ŋɩlɩbo gwaŋawəɽɩjo ŋɩdio.

ḏɩbona ḏun ḏɩro muma gwerkwe

lk. 12:33-34

19aṯanyaməṯo ḏɩbona kɩḏilio no kalo gun gaṯɩn aṯum e na ŋam, na kalo gun gaṯɩn luɽam ŋɩrṯe naləḏi nalapa ŋɩdio ŋuɽama, 20nyamɩni məṯo lagalo ḏɩbona kanyin, kalo ŋun ŋate gaṯɩn aṯum e na ŋam no, na kalo ŋun ŋate gaṯɩn luɽam ŋɩrṯe naləḏi nalapa ŋɩdio ŋuɽama no. 21gi gwune kalo gun gaṯɩn ḏɩbona ḏalo je, ŋɩnowei dugwor dalo daɽe dino.

bure na girɩm

lk. 11:34-36

22lambə leḏi aŋɩnu lɩro gei. na ḏa gei guŋa giŋir aŋɩnu yuŋa wei enyeḏo ḏoɽeḏa ḏe ga; 23namɩni da gei guŋa gɩmaro gɩki, namɩni aŋɩnu yuŋa enyeḏe girɩm ganu. na ŋiro dino da bure gwun gwijo lugwuŋa maro girɩm, na girɩm keno girimə dɩtim.

24gwiji gwate gwete gwun gwəṯi ŋɩma gwapijo lelɩnya ŋɩru lɩttən no; gi gwune gwudonye gwete namɩni gwəmɩnyi gwete, i ŋwuməṯo gwete nunmɩni ŋələḏəṯɩni ganu gwete. nya late ləṯi ŋɩma nyaləpijo eloŋu ŋɩru na ḏɩbona no.

ḏuməḏino gi ḏugwor ganu na ḏigela ḏugwor ḏi elo

lk. 12:22-31

25na ŋiro dino nyi gweiceijɩno, aṯanyuməḏɩno gi dugwor ganu dalo gwan ḏɩmiḏa ḏalo no, gun ŋar ŋanyalʼe, i ŋanyalyu, i gi jiŋɩno jalo jakani aŋe no. ḏɩmiḏa ḏate ḏɩbuṯano gi ḏiṯa na jiŋɩno jɩbuṯano gi ḏɩkana na? 26iril jei ga gi nyiɽuwə nyeḏi kanyin: gi gwune nyate nyaṯɩkwoi no, i nyatɩwone no, i nyate nyaṯəḏɩje ŋwona gi nyuɽulo no, namɩni baba gwalo gweḏi kanyin nyaṯuliʼi. nyaŋa late lɩnəno gi nyiɽuwə na? 27na əḏi gwiro lagalo ḏa muməḏɩni gi ḏugwor ganu gwəṯi ŋɩma gwenyeḏeice aŋɩna yuŋun elo dura detɩdo? 28na gwudaro gəko naṯanyuməḏɩni gi dugwor ganu gwan ḏɩkana? iril jei ga ŋɩḏini ŋun ŋiro ŋwiromel galakwe ŋwaṯɩbuḏe; ŋwate ŋwaṯape ŋɩru, i naliri ŋabuɽo no, 29namɩni nyi gweiceijɩno, namɩni suliman gi ḏiniḏo ḏuŋun wei, gwate gwaṯɩkani gi lete lagin no. 30na ŋiro dino na da elo maṯikaii garoma geḏi geḏo, gun gijo gwune namɩni ḏa ŋɩma liji ɩa kigo giləganu, ŋiro ŋada ŋutəno gwate gwajikaii nyaŋa lun lɩti ḏɩməṯo na? 31na ŋiro dino aṯanyuməḏɩno gi dugwor ganu nyalanarno, ileʼe aŋe, i ilayu aŋe, i ilakani aŋe no? 32na ŋɩdi ŋeno wei ŋaṯɩlɽoṯeḏe liji lun liro ga dino. namɩni baba gwalo gweḏi kanyin gwilɩŋiḏi ŋibunyanyalo ŋeno. 33nyamɩni bunyi gwerre ŋelɩnya ŋeḏi elo na ŋuɽun ŋuŋun ŋun ŋiŋir na ŋeno wei ŋajilbəḏəṯɩjo. 34na ŋiro dino aṯanyuməḏɩni gi dugwor ganu gwan giləganu no, gi gwune giləganu gwuməḏɩni gwan ŋɩdi ŋuŋun. ŋuɽun ŋun ŋɩki ŋeḏi lamon ŋaḏəḏəṯe lugwun.

Jelenleg kiválasztva:

maṯa 6: OTR1966

Kiemelés

Megosztás

Másolás