John 7
7
Iesu i apoheari ila
1Ma oharo karia lei Iesu Galilee hiki veape — Are va Jew haela ve la ita au veaila, ehovea Judea haela arero harive oki haropape. 2Jew haela ve hurai hare horerape — Kovo Uvi kukueavape la hurai; 3Areve apavara arero maeape, A v'ai Judea leia, ave leia apealula kilea haela ere a leivahaevila la horova oaria eavakilai. 4Ehovea hihika leikive ikivere la haela are va horova kara muruhari lei va ka. A ma horova iele la leikilava, a havahu meahaiapo oropa ve hihika leikive. 5Ehovea areve lalava haela kara arero iki au kekelaila 6Iesu arero maeaeape, Arave hoa āre — aka eve hoa mea oaria veveke hiki. 7Meahaiapo ero ikiheaha lei va ka, aka are araro ikiheaha leivila, ehovea ara areve horova heahaha hihika aioiaevila. 8Kahara, e va ma hurai pekahavaila. Ara ma hurai peka va ka, ehovea arave hoa perehekai are. 9Are erero lari avi Galilee hiki aeape.
10Aka areve apavara oropa pekahavi are kai ereve aire pekape, hihika va ka — muruhari hiki. 11Jew haela arero hurai ita haropi mari avahaeape, Are lahoa aeave? 12Haela oaria are v'ila oharo oaria hukavape — Uku haela maeape, Are haela veveke, uku mariape, Are haela oaria amuraeahaevila. 13Lae vi va haela oaria oharo hihika au maeaila, ehovea ere Jew haela oaoka leivahaeape.
Iesu — Aualari ve kihoaupe oharo kileape
14Hurai hare uku karia lei Iesu Hehi Uvi pekai kileape. 15Jew haela ikihorahora eapapo leivahaeai mari maeaeape, Ma haela hohoa ore lahoa leipe, ehovea haela arero au kileaila. 16Iesu erero kavale maeaeape, Ma kilea oharo arave hiki ka, araro kiparaeape la haela ve. 17Haela areve ikivere horova la leikilava are kilea oharo kara ore leikilai, Aualari ve aka ara havahu ve. 18Elare oharo la hukavavila la haela elare hiki morapaeavila. Arero kiparaeape haela ve rare morapaeavila la haela, are va iele, areve mai heaha kara karia. 19Moses ero pupu aiarape ha? Aka e va la pupu kiva leivahaea va ka. E va araro harive haropalula ehovealeve? 20Haela arero kavale maeape, A va ovehahu ila — aro harive leita la haropalula ha? 21Iesu kavale maeaeape, Ara va horova haroapo leipe — e va iki horahora leivahaeape. 22Moses ero peritome pupu avarape. (Moses ve pupu havahu ka, aka Aualau haela ve la) laelave e va sabati hare haela peritome mai leivahaelula. 23Haela sabati hare peritome mai la avakilava, Moses ve pupu haerapaki ave — e va araro hihiri ha, ehovea ara sabati hare haela la makuripe. 24Hihika leipe la eharu hiki ka heheavalue. Iki ehoe havahu heheavakive heroe.
25Jerusalem haela uku maeape, Ma va ere harive haropape haela ha, a ka ha? 26Eavaila are oaoka lei va ka, oharo hihika la kirive — ere arero oharo maea va ka. Amua haela ore ha, ma haela va Keriso iele ha? 27Ela ma haela ve ekepe hoa ore, aka Keriso lahoa ve ekekilai, haela oaria haveva. 28Iesu Hehe Uvi ureve āra hai maria itavape. Eva araro ore, aeva ara ekepe la ita kara e v'ore. Ara va arave aheke v'ila au ekeila. Araro kiparaeape la haela are va iele, e va arero haveva. 29Ara arero ore — ehovea ara areve leia ve ekepe. Are kara araro kiparaeape. 30Ere v'ikivere arero paeakive, aka haela arero mai au paeaila, ehovea areve hoa va are. 31Haela perehekai oaria arev'ila iki kelavi mari avahaeape, Keriso la ekekilava, are ai ma haela leivahaeape horova oaria i kepea ila leivahaeakilai ha?
32Pharisee haela are v'ila hukavape la oharo oaria iapavahaeape. Pharisee haela i oharo haela ila kapena haela uku arero mai paeakive paparaehape. 33Iesu erero maeaeape, Ara e i hareho mea haiapo aea va ka — aireaki ara araro kiparaeape la haela ve leia kai aukilai. 34E va araro haropi koara va ka. Ara va auki la ita e kai auvahaea va ka. 35Jew haela elarelare oharo maria hukavape, Are lahoa aukilai — ela kai arero eava va ka — are va ita lahua haela leia apealula la Jew haela ve ita ai ita lahua haela kileavahaeakilai ha? 36Ma are lamaeaila la oharo iele le ha, Eva araro haropi koara va ka ha, ae va, Ara auki la ita e auvahaia va ka ha.
Ovokake ma
37Hurai hita hare, horova eapapo hare la, Iesu epavi āra maria hape, Haela ae ma karave koa la leikilava, arave maia iki ma larive. 38Buka hape hohoa hovea — araro ikikekelaki la haela ovokake ma, mai ma hovea, areve eharau ve horerakilai. 39(Ma oharo are ove v'ila maeape — arero ikikekelaki la haela avakilai. Ehovea Ove Veveke ve la meru hoa are, ehovea Iesu ve morapaeaki hoa kara au horeraila.)
40Haela perehekai oaria ma oharo iapai avahaeape, Iele havahu, ma va la peroveta haela. 41Haela ae va maeape, Ma va Keriso iele, aka haela uku maeape, Keriso Galilee ve kihorerakilai ha? 42Buka maria au maeaila ha? Keriso, David ve meavore, Bethlehem karikara ve kihorerakilai — David aeaveape karikara la. 43Laelave haela oaria arev'ila ikihorahora leivahaeape. 44Uku haela arero kaivakive ikivere leivahaeape, aka haela arero mai au paeaila. 45Hevehe kapena haela Pharisee haela i oharo haela ve leia auvahaeape. Ere arero maeape, Ehovealeve e arero lai ekeva ka ha? 46La kapena maeape. Haela oaria ma haela ve oharo hovea au hukavaila. 47Pharisee haela kavale maeaeape, Are ero kara lamu?-?rae aila ha? 48Akea haela i Pharisee haela ila arero ikikelavape ha? 49Aka ma pupu haveva haela oaria heaha koarakilai. 50Nicodemus erero maeaeape (Iesu ve leia oroa hoa aupe la haela), ehovea are va Pharisee haela. 51Areve horova au eavaila la haela elaviila ve pupu elavelave heheavi hahakilai ha? 52Ere arero kavale maeape, A kara Galilee haela ha? Auhohi haropi — peroveta haela Galilee ve kihorera va ka. 53Ere elarelare ita ve auvahaeape.
Jelenleg kiválasztva:
John 7: ORO
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Published by the British and Foreign Bible Society 1963-1972
