John 11
11
Lazarus lei ovokake leipe
1Kakare haela ae rare Lazarus. Bethany aeaveape haela, Mary i areve mariapo Martha ila ve karikara. 2La Mary Amua ve loa muramura muo veveke hariripe, kai elare haro koro haroroape la uamari — areve loare Lazarus maea heaha leipe. 3Laelave la maritaloa Iesu oharo maria paraeape, Amua, iapai — a iki havahu haela ma maea heaha lei aeavila. 4Iesu la oharo iapai mariape, Ma maea apaki maea va ka, aka ehovea Aualari lei morapaeakive — kai Aualari ve Akore kara lei morapaeakive.
5Iesu Martha i mariheari i Lazarus ila ikivere eapapo leivahaeape. 6Are areve maea heaha ve la hari iapai are aeape la ita aeka hare two aeape — 7are va aireaki kilea haela maeaeape, Elaviila Judea aeka pekahavakilai. 8Kilea haela arero maeape, Rabbi, Jew haela ma hoa aro have koavi harive ikivere leilula. A va leia aeka pekakilai ha? 9Iesu kavale maeaeape, Hare haroapo areve hora 12 ka ha? Haela hare hoa loa la veakilava, are hilau va ka, ehovea are ma meahaiapo ve ovava eavavila. 10Aka haela oroa hoa la veakilava are hilaukilai, ehovea ovava are i aea va ka. 11Are ma oharo maeai aire are erero maeaeape, Elaviilave kake Lazarus avuki i eaeave. Ara v'ai arero hurapakive. 12Areve kilea haela maeape, Amua, are avuku la aeakilava, are veveke leikilai. 13Aka Iesu are va apape la oharo hukavape — ereve ikikekela are va Lazarus iki parae i avuku i aeavila maeape. 14Aire Iesu erero hihika maeaeape, Lazarus le api. 15Ara kara ikiveveke e v'ila ehovea ara leia va ka, e va auhohi kelavaki laeviva elaviila areve leia auvahaeakilai. 16Thomas, rare ae Didymus, areve kake haela maeaeape, Elaviila are i hareho auvahaeai apihaeakive.
17Iesu leia ekepe hoa are iapape are va kapu ita hare 4 aeaveape. 18Bethany Jerusalem maeamaea vea, mile orahokaila hovea. 19Jew haela oaria iki Martha i Mary ila ve leia erealilave loare v'ila hakakaeakive. 20Martha are va ekepe la oharo iapai mea hoai arero oki koarape: aka Mary uvi ve au hiki haiavape. 21Martha Iesu maeape, A va overa maia va laila, arave loare apa va ka. 22Aka, ara v'ore, mahau kara a va le la eharu Aualari ve velavela leikilai, la eharu Aualari avarakilai. 23Iesu arero maeape, Ave loare aireaki uroukilai. 24Martha arero maeape, Ara v'ore. Are aireaki la hare, api kai urouki hoa, are le uroukilai. 25Iesu arero maeape, Api kai urai ovokake iele ve oki ara v'ila. Araro ikikekelaki la haela, are la apakilava, ovokake le leikilai. 26Ovokake lei arave rare kekelaki la haela aire apa va ka. A ma oharo iapai ha? 27Are arero maeape, Kaire, Amua e, ara va ikikekela. A va Keriso meahaiapo ve kihoaupe Aualari ve Akore.
28Are la oharo a, mariheari Mary muruhari itavi mari maeape, Haelapo overa iki aro le itavave. 29Are la oharo iapai elavelave urai areve leia aupe. 30Iesu karikara havahu au pekaila, aka Martha arero eavape la ita aeape. 31Are i hareho uvi ureve apea arero hakakaeape la Jew haela, Mary elavelave mea ve hoauvila eavape la hoa, ere areve aire hoakukai maeape, Are kapu ita leia hi arive auve. 32Mary Iesu aeape la ita iki areve oropa ve ekaopi mariape, Amua e, a overa maia la araikilava, arave loare apa ka. 33Iesu arero are i hareho ekevaheape la Jew haela hivavara arula eavape la hoa, are kara iki ureve hi ape, kai iki heraho leipe. 34Are maeape, E va arero le lahoa aipepe? Ere maeape, Amua, a iki ovohae eava. 35Iesu hi le ape. 36La hoa Jew haela maeape, Eavaila, are arero ikivere havahu leipe. 37Uku haela maeaeape, Lehae — ovohae kariri haela ve ovohae ovava leipe ma haela, are va ma haela kara apaki aue maeakilai hovea hovea ka ha?
38Laelave Iesu hi ila kapu ita le aupe. Are va have ura okiape have le kokaukape. 39Iesu erero maeaeape, Have hareavaila. Martha, apape haela ve mariloa, arero maeape, Amua, are va ma hoa muo heaha ila, ehovea areve apape hare 4 ila karia le leipe. 40Iesu arero maeape, Ara aro au maeaila ha, a va iki la kekelakilava — a va Aualari ve haharika eavakilai? 41Ere apape haela aipepe la ita have le hareavape. Iesu ovohae iupe mari maeape, Oa e, ara aro thank you ehovea a arave oharo le iapaila. 42Ara va ore a mea oaria arave oharo iapaivila, aka ehovea maia apeaki la haela ara lamaeaila, ere ore leikilai a araro kiparaeape. 43Are la oharo a are āra maria hape, Lazarus, a kihoaukive. 44Apape la haela mai i loa ila kapu pura kohahai kihorerape, areve oropape kara muko hahape. Iesu erero maeaeape, Arero helauka paraeakive.
45Mary hakakaeakive ekevahaeape la Jew haela uku iki kelavahaeape, ehovea ere areve horova ovohae eavape. 46Uku haela hoahuka Pharisee haela are leivahaeape la horova oaria maeaeape.
Akea Oharo Haela Iesu harive oharo hukavape
47Oharo haela i Pharisee haela ila hareho Council ve korukaiavahaeai mari maeape, Elaviila leari leikilai ha? Ehovea ma haela ihova oaria leivahaevila. 48Elaviila arero hakorelapakilava, haela oaria arero iki kelavakilai, Roman haela kara iki elaviilave ita i vila ipi ila hoa haroapo le hareavakilai. 49Aka ereve haela ae rare Caiaphas, la hitolo ve akea oharo haela, erero mari maeaeape, E va lehae lei haveva va leiro ha? 50E v'iki kelava va ka ehovea veveke haela haroapo haela oaria v'ila apakilai, vila‐ipi hoa haroapo apihaeaki ave. 51Are ma oharo are v'ila au maeaila, aka ehovea are va la hitolo akea oharo haela, laelave are peroveta oharo maria ape, Iesu haela oaria v'ila apakilai. 52Vila ipi hiki ka, aka are va meahaiapo ita oaria kopuravahaeape Aualari ve akoremari oaria are hoa haroapo korukaiavahaeakilai. 53Laelave la hoa aiai hare oaria ere elarelare oharo hukavape ehovea arero huru harive.
54Iesu kara Judea haela oropa ve hihika au veaila, aka kaipu ita huakara maeamaea vea araeape, karikara rare Ephraim pekape. Kilea haela are i hareho apeape.
55Jew haela ve Passover hurae maea iele. Haela oaria elare maea veveroro leivahaeakive Jerusalem oropa pekahavape — Passover hoa aireaki. 56Ere Iesu haropi Hehe Uvi ureve pavape la hoa elarelare oharo mari hukavape, Eve iki lehae ha? Are hurae ve ekeva va ka ha? 57Ohara haela i Pharisee haela ila pupu oharo erero maria maeape, Haela ae areve aeavila ita ore la leikilava, are hihika kai ari, ehovea ere arero mai paeakive.
Jelenleg kiválasztva:
John 11: ORO
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Published by the British and Foreign Bible Society 1963-1972
