Genesis 4
4
Cainmi śhullcan Abelta wañuchin
1Ñatac Adan walmin Evawan cuscäluptinmi patayu licalilcul walaśhta ishyacüla. Chaymi “Tayta Diospa munayninwan cay walaśhta taliycullá” nil “Cain”#4.1 Cain ninanꞌa hebreo limayćhu “talisha” ninanmi. śhutiwan śhutichäla. 2Chaypïtam Cainpa śhullcan Abeltapis ishyacüla. Cay Abelꞌa uwish michiyćhümi cala. Cainñatacmi ćhacla lulayćhu cala.
3Chay unaypïñam Cain ćhaclanćhu talpuynincunapi sulpäta ucuyninwan Tayta Diosman uycula. 4Ñatac Abelꞌa wamä uwishnincunapïmi allinnin wirannintalä Tayta Diosman uycula. Chaymi Abeltapis, apaśhantapis allinpä cushisha licaycula.#Heb 11.4. 5Ñatac Caintawan uycuśhantam ichá mana ćhasquilachu. Chaymi śhunꞌunpis timpuyaptin wällïsha Cain pulila.
6Jinaptinmi Cainta Tayta Dios nin: “¿Imapïtam rabyäśha tïpuyanqui? ¿Imapïtam wällïsha cayanqui? 7Rasunpa allincäta lulalꞌa manaćh imapi uyshulänayqui canmanchu. Allincäta mana lulaptiquim ichá mana allinca awaytayänu alcayäśhunqui munayninćhu ćhänalächishunayquipä. Chaynu captinpis amꞌa quiquintam aśhwanpa ćhänalächinquiman” nil.
8Juc cutićhümi śhullcanta Cain nin: “Abel, acuchun pulipacämuśhun” nil lipäcula. Chaynu calućhu cayalcalñam Cain śhullcan Abelta wañüchin.#Mat 23.35; Luc 11.51; 1Jn 3.12.
9Chaymi Tayta Dios: “Cain, ¿mayćhümi śhullcayqui Abel cayan?” nin.
Niptinmi Cain: “Manam yaćhächu. ¿Licäninchun yaꞌa cayá imatá?” nin.
10 Tayta Diosñatacmi: “¡Imactam lulälunqui! Allpäman śhullcayquip yawarninta jićhaśhayquim apalcaćhaypa mañayäman cäraycunäpä.#Heb 12.24. 11Chaymi cay śhullcayquip yawarninta śhuꞌuśhan allpapïta alapacüśha canqui; jinaman mana allinpä licaśham canquipis. 12Ćhaclaćhu maynu-maynu talpuptiquipis manam ishpinꞌachu. Jinantin pachäpam taplaycaćhanqui mana malcayu ima” nin.
13Niptinmi Cain: “Cay mućhuchicuycá sasa-sasa mana awantaycunam. 14Caypïta canan alapacayämaptiquiꞌa ampïta japächäśham calućhu yanꞌal-yanꞌal taplaycaćhamuśhä. Mayanpis talimäcá wañüchimanꞌaćh” nin.
15 Tayta Diosñatacmi nin: “Manam chaynüchu canꞌa. Mayanpis wañuchishüniquiꞌa ampïpis anćhish cuti maslämi ñacachisha canꞌa” nil.
Nilculmi Cainta unanchaycula, mayanpis talïcunaca mana wañuchinanpä.
16Chaynüpam Tayta Diospïta Cain japächacüla. Jinalmi Edenpa inti ishpimunan lädu cä “Nod”#4.16 Nod ninanꞌa hebreo limayćhu “pulicü” ninanmi. malcaman yaćhä licula.
Cainpa milaynincunam
17Chaypïta Cain walminta patacta talïchiptinmi walaśhta ishyacüla. Chay chulintam Enocwan śhutichäla. Cain malca śhalcachishancäta chulin Enocpa śhutinwanmi śhutichäla. 18Milaynincuna caycunam: Enocpa chulinmi Irad cala. Iradpa chulinñatacmi Mejuhael; Mejuhaelpa chulinñatacmi Metusael; Metusaelpa chulinñatacmi Lamec. 19Lamecpa ishcaymi walmin cala: Jucninpam Ada śhutin cala; juccäpañatacmi Zila cala. 20-21Adaćhümi ishcay chulin cala: Jucninmi Jabal śhutiyu cala. Paypa milaynincunam chucllacunaćhu yaćhal uywacunacta michï capäcula. Juccäñatacmi Jubal śhutiyu cala. Paymi arpacta, flautacta wamä tucäca cala. 22Chay Zila nishan walminćhüpis ishcaymi chulin cala: Jucninmi Tubal-cain nishan cala. Paymi brunsipïtawan jïrrupïta irramintacunacta wamä luläca cala. Juccäñatacmi “Naama” śhutiyu walmi chulin cala.
23Juc muyunmi Lamec ishcaynin walminta nin:
“Adawan Zila, sumäta uyalipämay.
Cay nishäta tuquicta uyalipämay.
Dañädümaptinmi juc wayapacta wañüchilá.
Maꞌamaptinmi juc müsucta wañüchilá.
24Sïchuśh Cainta anćhish cuti cutichicülunꞌa,
Lamectañatacćha anćhish ćhunca anćhishniyu (77) cuti cutichicämanꞌa” nil.
Adanpa quimsa chulincuna
25Ñatac Adanpa walminmi patayu licalilcul juc walaśhta ishyacüla. Paytam “Set”#4.25 Set ninanꞌa “uycuśhä” ninanmi. śhutiwan śhutichäla: “Tayta Diosmi uycaman Cain wañuchishan Abelpa pudirninta” nil. 26Setpa chulinñatacmi Enos nishan cala. Chay muyunpïmi nunacunaca Tayta Diosta alawayta allaycapäcula.
Jelenleg kiválasztva:
Genesis 4: QVW
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
