IIMU/UUNGW 4
4
Kaini nee Abeli
1Adam nee hareerós Hawa tari alqaát, inós iri tsít, Kaini#4:1 Kaini: Umuú Kaini afoorós baraá tsifrír Ebraniaro a slaqmís nee /aymuú ta bay sleemu guri xwayluúr, iri ó', «Na/oó garma ugwa sláw ar alee/isoó AAKOÓ MUNGÚ.» 2Aluudae iri xwayluúr Abeli, hhiyoó Kaini. Nee Abeli a heé bee/ángw deaaeém, nee Kaini a dooslusmo. 3Alaá deelór hhaawaaká Kaini bu'úngw balaangw guna ilahhooár wa huúw amór AAKOÓ MUNGÚ. 4Abeli deelmoó geera oo makaydá' i deaaen guri gaás, wa/amedá' wahhaar gari ilahhooár wa haniís dír AAKOÓ MUNGÚ. Aakoó Mungú kuna qwal/atís nee Abeli nee ilahhooarós tidae. 5Ala AAKOÓ MUNGÚ kwa qwal/atisiiká nee Kaini, tam nee ilahhooarose. Kaini iri ló'wa buúhh, tam gitsee/aawós niri quyuuiyé'. 6AAKOÓ MUNGÚ Kaini guri báy, «Gár tasa búhh a milá? Nee gár gitsee/aawók nisa quyuuiyé' a milá? 7Xáy, bar gár hhoo' aga tléhh, ya/aám a sleerakáhe? Nee bar gár hhoo' aga tlehhká, tlakweema i dayá', i kuúng ilatleeruusiyá' as uwa arba/iya', adór makiito'ór xaraasl ar afkú dó' wa daamaraam, ala kuúng tlakweema na arba/eek.»
8Kaini hhiyaawós Abeli guri báy, «Góh, a baraá qaymór kawaán.» Tawa baraá qaymór i hardáh, Kaini Abeli guri hara/akuút, guri gaás.
9AAKOÓ MUNGÚ Kaini guri báy, «Hhiyaawók Abeli i amá?» Kaini iri oó', «U xuaaká, ahaá, aníng a xuumusmoó hhiyaeéne?»
10AAKOÓ MUNGÚ Kaini guri báy, «Gár taa tléhh a milá? Tseerér hhiyaawók i amor'eé' /aa/amiín baraá hhapér wa alé. 11Hám daxta kuúng taa lu'ús baraá yaamuwo, kudá' tseerér hhiyaawók ngaa ilaoohiye' ar taa ku'ús ar dakók. 12Tam yaamu bir dósl, bu'úngw hhó' ngu duuxiaaká, slám kuúng tay heé tawó hi'imaamiít, oo doó hootaaká.»
13Kaini AAKOÓ MUNGÚ guri báy, «Slahh'amuueé' ku ló'wa úr, tam sa qitluuwo u aleeslawaaká. 14Ga/aaweek, laarí iga gús baraá yaamukae, slám iga gús amór saáwí alé dír geeraawoge. Aníng a heé tawó hi'imaamiít, oo doó koomaaká baraakaá yaamuwo, slám umuúqo heé i ara aqo in gaas.»
15Ala AAKOÓ MUNGÚ Kaini guri báy, «A adoosingeeká, ala heedaádá' kuúng u gaás, un li/áy buú' ay sagaáwa faanqw.» AAKOÓ MUNGÚ Kaini guri gitsee/a ireé/, as kahhó' heé gwa slay munguwa gaás. 16Kaini iri tláy dír geeraá AAKOÓ MUNGÚ wa alé, iri hotaá áy baraá yaamaá ta bay Nodi Gídaabárós a taambeera.
Xwaylár Kaini
17Kaini nee hareerós tari alqaát, inós iri tsít, Enoki guri xwayluúr. Kaini gixsa gari tleéhh, gari umuú garmaawós ar ateét, gari báy Enoki. 18Enoki Iradi guri laqwaál, Iradi Mehuyaeli guri laqwaál, Mehuyaeli Metushaeli guri laqwaál, Metushaeli Lameki guri laqwaál. 19Lameki iri duuxún, tlaawaay tsár, ar wák umuuwós a Ada nee ar tsár a Sila. 20Ada Yabali guri laqwál, kwí an baabuú mukdá' baraá heemaduú wa hotaatiím nee oo makaá deaaeém. 21Hhiyaawós a Yubali; inós a baabuú mukdá' gidandooroó muxaaximá' nee filiímbaywo. 22Sila Tubal-kaini guri xwayluúr. Inós an kareermoó umuúqo xooslmoó tlaquuwo gu tlehhiít oo muqslár sirdaa/aten nee oo muqslaaro. Nee hho'ór Tubal-kaini a Na'ama.
23Lameki tlaawaywós guri báy,
«Áda nee Síla, afor'eé' iiárií qaasaak,
kuungá' tlaaway'eé', tí ni oo' iiárií qaasaak,
Aníng hee ugwa gaás as inós aníng iwa slahh'eés,
masoomo ugwa gaás asma inós án iwa slaáhh.
24Kaini burkwa li/áy buú' sagaáwa faanqw,
Lameki kun li/áy buu' sagaáwa mibeeri faanqw nee faanqw.»
Seti nee Enoshi
25Adam nee hareerós tari malé alqaát, inós na/oó garma guri xwayluúr, umuuwós a Seti. Iri ó', «Mungú na/oó hatlá' ngwa haniís kitángw Abeliwo, asma Abeli kuna gaás nee Kaini.» 26Seti na/oó garma guri laqwaál, guri umií tsaát Enoshi. Qoomaarí an qoomár muu umuú AAKOÓ MUNGÚ nguwa iimu/ún ateetiingo baraá firor'ine.
Jelenleg kiválasztva:
IIMU/UUNGW 4: IRQW
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
The Bible in Iraqw © Bible Society of Tanzania, 2004.