Mm 12
12
Yakob a wôéban; ba bi Pierre a su'ulane vaa nye mimbôk
1Melu mete njô bôte Hérôde a nga taté na a kpwe'ele bôte bevo'o ya keké. 2Ane a nga wôé Yakob a monyañe wé Yôanes a nkpwaté mekôn. 3Eyoñ a nga yene na, Beyude be nga yene jame te mvaé, ane a nga taté mfefé ébia, aval ane Pierre. A mbe melu be nga di fembé é ne tee mvusan. 4Eyoñ a biya nye, ane a nga futi nye *nda mimbôk, a telé bezimbi minsamba minyin, nsamba ôse bôte benyin, be ba'ale nye. A nga bo a vañe na a ye bo'olô nye e mise me bôt, éyoñ abô'ô ya Pak e lôteya. 5Pierre a nga too fo'o *nda mimbôk, ve ngule meye'elan ya keké, a mban ôse, é nga bete be Zambe ajô dé.
6Hérôde a nga ye bo na a kat ajô. Alu te, Pierre a too ôyo, ézezañe bezimbi bebaé, ntiñetane ngôkop ébaé. Beba'ale ki be tele minsamba e *mbé yôp. 7Atemeteme na, éngele Nti a nga so. Ane *nda é nga jaé ne lut a éfufup. Engele a nga vele Pierre ôyo a mbibane nye mone abaé abum, a jô nye na: Kôlô'ô si avôl! Eté été, bengôkop be nga sotane mo me Pierre. 8Engele a nga ke ôsu a jô nye na: Jaé kandé jôé a tiñeti besilefase bôé! Ane a nga bo nalé. A nga beta jô nye na: Jaék alô'ô dôé a tôñe ma. 9Ane Pierre a nga tôñe nye. A nji buni na, mboone éngele wu ô mbe nya ajôô. A nga yene ve ane biyeyem. 10Ane be nga taté lôte vaa ôsu, a nyô baa. Ane be nga kui e *mbé étyé ô nga too anyiine tison. Ane *mbé ôbien ô nga yombô ôsu viap. Eyoñe be kuiya atan, be nga ke e susu'a njoñ. Ane éngele a nga jañe nye mis atemetem. 11Ane Pierre a nga tu'a bi fek. Ane a nga kobô a jô na: Me yemeya éyoñe ji, e ne bebela na, Nti a te lôme éngele wé a a vaaya ma mo me Hérôde a ôsimesan ôse ya Beyude. 12Ane a nga jeñe *zen, a kui *nda be Marie nyia Yôanes, be nga dañe loone nye na Yôanes Mark. E *nda éte été, abime bôt e nga bo e bo'o meye'elan. 13Eyoñ a nga kute *mbé, ésoé mbo ésaé minga, a too jôé na Kôde, a nga zu yalane *mbé. 14Ane a nga wô'ô tyiñe Pierre. Wôna, njalan a mevak, a nga bo te diine *mbé, ve bulane ji'a ke kate foé na Pierre nye a kut, a tele *mbé si. 15Ane be nga jô nye na; Ô ne akut. Ve a nji ke ku évôl. Bee nye na, jô'ô ñhe na a ne éngele wé. 16Nté te ôse, Pierre ki a ne ve kute *mbé. Ane be nga su'ulane diine wô. A mbe fo'o Pierre. Ane be nga too fe'e ne vema. 17Ane a nga je'e be na, be tabe bivô a mfebane mo. A nga kañete be ane Nti a nga vaa nye *nda mimbôk. A nga su'ulane jô be ve na: Kelane katane Yakob a bobejañ. Ane a nga téé dulu a ke mfa'a mfe. 18Eyoñ tyé é nga lendé, ényenyam é nga bo e zañe bezimbi. Be nga sili bebiene na, bia yeme na Pierre a boya aya' 19Hérôde a nga bo na be jeñe nye, ve teke nye yen. Ane a nga bendé na be fase jame te e be beba'ale, be zuu be, a wôé be. Ane a nga siliki a kôlô'ô Yudé a ke Sézaré e vôm a nga tabe ôbe nté.
Awu Hérôde
(Dn 5:18-20; Mink 16:18; Sam 37:35-36)
20Bôte ya Tir a Sidoñ baa be Hérôde be nga bili angônda beta étom. Be nga kui tyiñe na, ba ke yene nye. Blastus, mbo ésaé njô bôt a su'u be mvuse na be kôm étom évôvoé été, a zene ya nlatane ngbwa. Amu mvolane ya si jap ô nga so ve e be njô bôt. 21Eyoñe môse ndôba'ane be nga tiñeti ô nga kpwaan, Hérôde a be'e éyé njô jé, a nga tabe si éto njôô jé a kobô bôt. 22Ane be nga kute nye mekôp a jô na: Tyiñe Zambe ébiene ñhe fo'o nyô, saa tyiñe môt. 23Eté été, ane éngele Nti a nga bibi Hérôde, amu a nji ve Zambe duma. Ane minsoñ mi nga di nye, ve wu.
24Ajô Zambe e nga ke ve ôsu a mialan. 25Wôna Barnabas ba Saül, éyoñe be maneya bo ésaé jap e Yérusalém, be nga ke. Yôanes a mbe jôé afe na Mark a nga ke nsamba wop.
Jelenleg kiválasztva:
Mm 12: BDCB
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Bible en langue Bulu © L'Alliance Biblique du Cameroun, 2007, 2015.
